Сюрс укмыс сю укмыс арын,
Ӵапак туннэ нуналын,
Дания кун утем улын,
Нылкышномурт кенешын.
Кенешыса тупатӥзы
Та нуналэз возьыны.
Нылкышноез пиос вӧзы
Одӥг быдӟа карыны.
Та нуналэ арлы быдэ,
Одӥг огзэс адӟыны.
Гуртъёстӥ но гуртлы быдэ
Сыӵе кенеш люканы.
Соин тӥни, удмурт кышно,
Ас нуналдэ тон но тод.
Нылкышноез люкалля но
Кызьы улны кенешод.
Азьло дыръя туж шуг улӥд
Номыре но тодытэк
Кузпалэдлы ляльчи улӥд,
Вазьылыны дӥсьтытэк.
Нылкышномурт-мумыез тон
Паськыт кыре потонлэн,
Нылпиослы нянь сётӥсь тон
Эрик шедьтон сюреслэн.
Соин тӥни тон луиськод
Асьме властьлэн осконэз,
Али ке нош тон кылиськод,
Уд тодӥськы сюресэз.
Кенешо власть эрик сётӥз.
Ужась кышномурт юрттӥз.
Ляльчи луса эн ул шуиз.
Женотделъёс кылдытӥз.
Кышномуртъёс азьветлӥсез
Таӵе кенеш поттӥзы.
Озьы тӥни асьме властез
Соос матэ каризы.
Сюрс укмыс сю дас куинь арын
Асьме кунэ вуттӥзы.
Сюрс укмыс сю дас ньыль арын
Нимаз газет поттӥзы.
Собере нош кык ар, куинь ар
Война сэрен дугдылӥз,
Али ке нош ньыль ар, вить ар
Кенешо власть юн кариз.
Нылкышноос, эн вунэтэ,
Ас кенештэс юнматэ.
Гуртлы матэ ӟечгес вуттэ.
Женотделдэс тупатэ.