Нош ик тулыс (Герд)

Нош ик тулыс Автор: Кузебай Герд

Поттэмын: 1919. Источник: Куӟебай Герд. Зарни кылчуръёсы. — Ижевск: Удмуртия, 1997. — Б. 88—89.

Нош ик тулыс

Асьме доры лыктэ
Шулдыр тулыс.
Туж зӧк йӧэз шунтэ
Шуръёс вылысь.

Изись нюлэсъёсыз
Со сайкатэ,
Чебер нылъёс сямен
Со серектэ.

Кам дур шашыосын
Со чупаське.
“Иземысь султэ!” —
Шуса кеське.

Бадӟым Кам вуос
Вырыны кутско,
Чагыресь инъёс
Шулдыр учко.

Кезьыт тӧллэсь мон
Уг кышкаськы ни.
Изись муртъёсты
Уг тышкаськы ни:

Тулыс вуэмъя,
Калык султоз —
Югыт сюресэз
Ачиз шедьтоз!..

---