Небыд Миш
| Небыд Миш (1948) by |
| Йӧзӧдан во: 1948. Ӧшмӧс: В. Елькин. Бӧрйӧм гижӧдъяс : кывбуръяс. Сыктывкар : Комигиз, 1948. |
Жар лунӧ ӧтчыд Небыд Миш,
Кор пӧттӧдз нюжмасис нин гортас,
Сир доз да клюка босьтіс ордас
Да лэччис дӧмны ассьыс пыж.
Вот воис сійӧ берег дорӧ
И кӧсйис шойччыштны здук-мӧд,
Мудз коксӧ лӧньӧдыштны мед,
Но кыліс: отсӧг кодкӧ корӧ.
Миш сылань чатӧр вӧчис юр
И аддзис вӧйысьӧс да шуис:
— Но, трустӧ! кутшӧм сэтшӧм дур,
Бур мортӧй, ваас тэнӧ сюйис?
Ӧд сэні буретш вабергач.
Тэ вартчы кытшолӧнджык тадз
Да овлы сэні мыйкӧ дыра.
Сэк кості дӧма ветки нырӧс
Да отсӧг вылӧ локта скач. —
И Небыд Мишка корсис пес
Да коркӧ ӧзтіс сэсся бисӧ.
— Час, — шуӧ, — матын нин тэд мез.
И мода вылӧ ассьыс кисӧ
Сэк дулляліс да пуджис сос,
А сэсся шамыртіс сир доз
Да кисьтіс сирсӧ пыж ныр вылӧ.
И часджын мысти сэсся кылӧ
Дон бедьлӧн шыыс: дзиж да дзож!
— Час, вокӧ, регыд нин и пыж
Тан лоӧ дась,
И вӧрзя ва шӧрӧ ме тась
Да босьта тэнӧ берег вылӧ
Код тӧдӧ, дыр-ӧ Небыд Миш
Сэн дзоньтіс ассьыс ветки пыж.
Но мортыс кылаліс нин ылӧ
И дзикӧдз воши сылӧн мыш.
Моральыс ачыс татысь петӧ:
Быд уджын колӧ лоны чож,
Весьшӧрӧ минут мед оз вош.
Сэк сӧмын кӧсйӧмторйыд шедӧ.
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- its creator fought or worked for Soviet Union victory during the Great Patriotic War — so the 74-year protection term is applied;
- and the creator died before January 1, 1950 (more than 74 years ago), and has been not posthumously rehabilitated since that date;
- and this work was first published before January 1, 1950 (more than 74 years ago).
The author died in 1942, so this work is also in the public domain in other countries and areas where the copyright term is the author's life plus 81 years or less (if applicable), or the copyright term is 75 years or less since publication for posthumous works (if applicable).
Public domainPublic domainfalsefalse