Сэтэней:
— Сосрыкъуэ си къан,
Сосрыкъуэ си нэху,
ЯмэӀуху дыщафэ,
Дыщэр зи джанэ куэщӀ,
Ещыгуауэу мэшэс,
Нарт шур щышэскӀэ
Сосрыкъуэ къыкӀэроху,
ХьэскӀэ-маскӀэ зэдолъ,
Бийм я шхылъэ зэредзэ,
Хьэ дзакъэныр зи мэисэ,
Бгыр зы къутэр и зы шащхьэ,
Нарт джэгум согъакӀуэ,
Уи кӀуакӀэр къызжыӀэ!
Сосрыкъуэ:
— АрыкъыкӀэм сынохуэ,
Кхъуэ-бланэ сыщещэу,
Зы фӀыцӀагъэ седжэнщ,
Япэ лъагъур сэсейти,
СыщӀыӀэри сыщӀыхьакъым,
СыщӀэгуауэри къымпӀарыхэ сыкъищӀкъым,
КъысщӀыӀэри къысщӀохьэ,
КъысщӀогуори кӀэзызыжу сыувыӀэщ,
Абы къэса шуми
Дэнагъуэр и бжыщхьэщ,
БжыкӀэр къызимыпэсгурэ,
БжыкъыпэмкӀэ къыскӀуэцӀоуэ,
Бжэныц гуэуэ цыпыӀэгуэуэ
Уэнэгум сыредз,
Шэгуэуэ сызэбгъэфа мыгъуэр
Ӏубыгъу изу сегъэкӀ,
Дэнагъуэ си пащӀэр
Пщыбийм зэщӀейшхэр,
Выйм вэгъэбзумыр,
Си блыпкъыпэкӀи сегъавэр,
Вийм я пщӀэнтӀэпсыр
Си натӀэпэмкӀэ къыпхейху,
Жыр маисэр къырехри
Щхьэр фӀихыну къокӀуалӀэ.
— Щыт, щыт щауэфӀ!
Нобэ бэрэжьейщ,
Ди лъэпкъ яукӀыркъым,
Махуэ пӀалъэ къеӀысхри
Сэ сыкъэкӀуэжащ:
Си анэурэ Сэтэней-гуащэ!
Уи щхъухь-псыхь зэхэлъхьэщ,
Жыр лэныстэри къэгъабзэ,
Тэджэлейри схуегъэщӀ,
Уи жьгъэрури зэхэщӀэ,
Пшагъуэ мащӀи зынещӀэкӀ,
Хьэрамэ Ӏуащхьэ сыдэгъэкӀ.
Сэтэней:
— Сосрыкъуэ си нэху!
Сосрыкъуэ си къан!
КъыпщыщӀар къызжыӀэ,
Сосрыкъуэ:
— КъысщыщӀар дауэ бжэсӀэн,
ФызитӀ зэуэнджэщыркъым,
УипщӀи зэрахьэлӀэркъым
Сэ къысщыщӀа лейр дауэ ныбжесӀэн.
Сэтэней:
— Уэ къыпщыщӀа лейр сэ къыщызжумыӀэкӀэ
Армэ зызогъалӀэ,
Армэ зызолӀэж,
Сосрыкъуэ:
— Армэ зумыгъалӀэ,
Армэ зумылӀэж,
Ди яужь къинэ цӀыхум
Ар къахущумынэ.
Нарт джэгум сыбгъэкӀуащ,
АрыкъыкӀэми синихуэу,
Арыкъыпщэми сынакӀуэ,
Кхъуэ-бланэми сыщейщэу,
Зы фӀыцӀагъи секӀэпри,
Япэ лъагъур сэсейт.
СыщӀыӀэри сыщӀыхьэкъым,
СыщӀэгуори хъымпӀарыхи сыкъищӀкъым.
КъысщӀыӀэри къысщӀохьэ,
КъысщӀогуори кӀэзызыжу соувыӀэ,
Абы къэса шум,
Дэнагъуэр и бжыщхьэщ,
БжыкӀыр къызимыпэсурэ
БжыпкъыпэмкӀэ къыскӀуэцӀыуэри,
Бжэныцгуэуэ цыпыӀэу
Уэнэгум сыредз,
Шэгуэ сызэбгъэфар,
Ӏубыгъу изу сегъэкӀ.
Дэнагъуэ си пащӀэр
Пщыбийм зэщӀешхэ.
Вийм я вэгъэбзумэр
БлыпкъыпэкӀэ сегъавэ,
Вийм я пщӀэнтӀэпсыр
Си натӀэм ныпхеху.
Жыр маисэр нырехри ЩхьэфӀэхыным нокӀуалӀэ.
— Щыт, щыт щауэфӀ!
Нобэ бэрэжьейщ,
Ди лъэпкъ щаукӀ икӀыжыркъым,
Махуэ пӀалъэ къызэт.
Сэтэней:
— Сосрыкъуэ си къан,
Сосрыкъуэ си нэху!
Ар сэ си къуэ щӀаси.
Хым я щхьэр къэпхьай.
Ебланэщи къуозгъэхьыни.
Жыр лэныстэри къегъабзэ,
Жыр мастэри мэщыпэ,
Тенджэлейр хуейгъэщӀэ,
И жьгъырур зэхейщӀэ,
Пшагъуэ мащӀи зэрещӀэкӀ!
Сосрыкъуэ ныдокӀри
Хьэрамэ Ӏуащхьэ доущыкӀ,
ЛӀыхъум жьэхощатэ,
Шыгъуэ Ӏэл мэбгъунлъэ-мэлъей,
ЛӀыхъур жьэдоуэри
ЖьэлъэнтӀанэр къыхейтхъэ,
ЛӀыхъур мэдэкъауэри
Джэжналъихи екъутэ.
Сосрыкъуэ лӀы псынщӀэти
Жыр маисэр къырехри
Щхьэ фӀихыным нокӀуалӀэ.
— Щыт, щыт щауэфӀ!
Махуэ пӀалъэ къызэт,
— Къызэптамэ куэдыщэщ,
Къызэпт-уэстыжу дыпытынкъым.
Еуэри и щхьэр къыфӀех.
Янэм деж къехьри и щхьэр егъэтӀылъри,
Сэтэней:
— Армэ сыфыз мыгъуи сэ!
Армэ сыфыз гущи сэ!
Сосрыкъуэ:
— Си анэу Сэтэней-гуащэр,
ФӀым сыхуэбгъэӀущкъыми сэ,
Ем сыхуэбущикъыми сэ.
Къэхь жыпӀати къэсхьащ,
Хыж жыпӀэми хыжьыгъуейкъым, — жери
Сэтэней и куэщӀ ныредзэ.