Мӓ пиш шӹп каштшашлык ылына

Каплинский Ян

Мӓ пиш шӹп каштшашлык ылына

Мӓ пиш шӹп каштшашлык ылына, анжалтышна – рокышты. Тӓлӓндӓ
ядышташ ак кел, мам мӓ кӹчӓлӹнӓ. Тагынамок мӱлӓндӹнӓ
тӓ докыда ванжен дӓ сӓндӓлыкнӓжӹ кого дӓ охыр тӱнымбалны
охоницӓлӓ пыдырген кен. Лидӓ
цӓшӓн, кердӹдӓ гӹнь. Мӓ гӹцӹннӓ мам шаненӓ
идӓ ядышт веле. Тагышты гӹнят
кораллвлӓ вален кешӹ кырык мычыашвлӓэш
ошмаотывлӓм (остров) кузыктат. Тангыж сирӹштӹ
мӹндӹркӹлӓ анжен шалгымынам ужыда гӹньӹ,
мӓ гӹцӹннӓ идӓ ядышт: мам выченӓ.
Тетявлӓнӓ тылвышвлӓмӓт ӹштӓш тыменьӹнӹт, кынамжы
тангыж монгыр гӹц хӹдӹртӹш толеш, техень юкан
вуйта мынысӱк печкӓлтеш, кышец кекигӹ лӓкшӓшлык. Тӓлӓндӓ
лувлӓ гишӓн шанаш акат кел. Нӹнӹ
рокыш сӓрнӓлтӹнӹт дӓ рок вӹлнӹ пиш шӹп каштмыла. Цилӓ
тагынамок тӱлӹмӹ дӓ мондымы. Шукы
сӓндӓлӹк ирӹкӓн лин. Мондыдок.
Мӓжӹ веле ӓшӹндӓренӓ дӓ мӱлӓндӹна соок вуйыштына.
Кугижӓ Филипп. Понтиак. Текумсес. Оцеола.
Утла пӓлӹдӹмӹ лӹмвлӓ вуеш кодыныт. Мӱлӓндӹ
тӓмдӓн дӓ сӓндӓлӹк тӓмдӓн. Ӓнят ӹлен лӓктӹдӓ. Идӓ
ядышт мӓ гӹцӹннӓ,
мам кӹчӓлмӹлӓ, мам шанымыла, мам вычымыла.
Тагынамок-тагынамок сӓндӓлӹкнӓ шӓпнен кен.
Наррагансет. Сускеханна. Чемехеви. Маттоле.
Утла кужы лӹмвлӓ. Утла пӓлӹдӹмӹ йӹлмӹвла. Идӓ
ядышт мӓ гӹцӹннӓ, мам мӓ ӓштенӓ. Сирвлӓм
тангыж вӹлец палцынок ужаш лиэш. Вӹр цӹреӓнвлӓм,
вӹр цӹреӓн жерӓ годым. Мӓ гӹцнӓ анзыц, тӓ паштекдӓ
кораллвлӓ у ошмаотывлӓ дон у сӓндӓлыквлӓм ӹштӓт лиэш.
Келгӹ вӓрӹштӹ тӹгӹрӹштӹшӹлӓ кайын колта: ядмаш
кышакен вӓшештӓш ак ли.
Кӱ мӓ гишӓннӓ дӓ сӓндӓлӹкнӓ ылмы гишӓн паштекнӓ пӓлӓш тӹнгӓлеш?
Тидӹ вуйнаматеш лыкмаш агыл. Тидӹ эче суйымаш агыл. Малын
тӓ тӹнӓм шеклӓнедӓ, малын лӱдӹдӓ? Мӓ
доказываяш ана тӹнгӓл. Келесемӓдӓ,
мам тӓ ӹшке тетявлӓлӓндӓ шайыштыдӒ Ӓнят суд
тӓлӓндӓ ӹнянӓ. Тӓлӓндӓ лӱдӓш ак кел. Куды левӓш
лӹвӓлнӹш тавар юран годым якшаргы гӹнь, тӹдӹ
лач ӹрдӓнгӹн веле. Нӹнӹ,
кыдывлӓ анзылны шеклӓнӹшӓшлык ылыда, пыракыш сӓрнӓлтӹнӹт.
Нӹнӓт, намысланенда, рокыш сӓрнӓлтӹнӹт.
Дэвид Уильямсон. Эндрю Джексон. Буффало Билл. Но тӓ
цӓшӓн эче лин кердӹдӓ. Идӓ лӱд,
мӓлӓннӓ сойток пиш шукым ӓштӓш келеш. Дӓ тӹнӓм,
кынам сирӹштӹ шалгенӓ, кыце хӹдӹртӹш мынысӱкшӹм
пыдыртен шуа дӓ кӱш чонгештен куза, ужын кердӹнӓ. Мӓ
пиш шӹп каштшашлык ылына, анжалтыш –
рокышты, юж-кынамжы
трактор кыралмыжы годым рок вӹкӹ
тетя лувлӓ дон пикш мычашвлӓм сӓрӓл пиштӓ. Но
свидетельвлӓ уке. Индеецвлӓ колышывлӓ веле
яжо ылыт. Ӹдӹрвлӓм нӓлдӓ.
Марлан кедӓ. Тетявлӓм куштыда. Кредӓлдӓ.
Цӓшӓн лиӓш цацыда, кердӹдӓ гынь.