Мый вермас вӧчны лёк приказчик
| Мый вермас вӧчны лёк приказчик (1926) |
| Гижан кад: 1926, Йӧзӧдан во: 1926. Ӧшмӧс: Ордым. 1926. №1. |
Приказчик саяд кооперативыдлӧн джын уджыс. Сы понда ёна бӧрйысьӧмӧн сійӧс колӧ пуктыны. Позяс сійӧс правленньӧӧ и не бӧрйыны, а лададжык медалӧм мортӧс приказчикын видзны. Договор вӧчан сыкӧд — позьӧ сэсся и уджсӧ сылысь юавны.
Кыдзи тӧдны омӧль приказчикӧс?
Омӧль приказчикыдлӧн лавка пытшкӧсыд дзик пеж вор кодь. Пыран да — бӧр петны ӧдйӧджык туй корсян. Няйтсьыс да буссьыс горшад клячасьӧ. Сакар дорын — треска видзӧ, шыдӧсъяс пиын — шыръяс узьлӧны. Ситеч пома — стойка улӧ сюйӧма. Локтан да — йӧз вылӧ горзӧ, чиннас ышнясьӧ. Он кӧ видзӧд — регыд на вески лыдӧн кокыштас, гортад локтан да кило оз судзсьы. Колан тӧвар унаысь оз овлы — мем пӧ ичӧт сэтчӧдз делӧ, — шуас. Век ичӧт жалӧванньӧ вылӧ норасьӧ; ачыс зэв дыш, йӧзыд татшӧмыдлы бара жӧ и донсӧ оз пукты унджыксӧ.
Лёк приказчикыд, дерт нин, вина юӧ. Вина кӧ юӧ — кытсюрӧ сійӧ гусялӧ нин. Джын пӧрасӧ сійӧ сэтчӧ и сёйӧ, локтан коланторла да — лавкаад колькъя томан ӧшалӧ. Учёт вӧчасны да татшӧм приказчикыдлӧн, дерт нин, сё-кыкыд, удайтчас дай сюрс шайт, оз судзсьы.
Мый керан? Коркӧ-некоркӧ сетасны судӧ, гашкӧ пӧ перъясны, сэсся, видзӧдан да, йӧзыд павкалісны кооператив бердсьыд. Видчӧны: кысь пӧ нин бара мирскӧй добра буринӧ волас. Сэсся пӧра воас кооперативлы тӧварысь вексель серти мынтыны — сьӧм оз судзсьы. Карын вексельтӧ протестуйтасны, а сы бӧрын босьтас сэсся кыськӧ уджӧннад! Некод оз сет. Правленньӧ пикӧ воас, собранньӧ чукӧртас. Собранньӧ вылӧ дас морт сӧмын локтас, дай найӧ пайсӧ бӧр корӧны. Видзӧдан да — кооперативса уджыд дзикӧдз торксис. Регыд, зон, торкныд — пондыв бӧр тэчны, уна пӧсь петас.
Сэсся кооператив дзикӧдз киссис. Истӧг весиг некысь босьтны. Видзӧдан да, Матвей Прокӧ лӧсьӧдчӧ вузасьны босьтчыны...
Тадз абу?
— Мед, эськӧ, тадз оз жӧ ло!
Татшӧм кӧ приказчикыд — кык жель костӧ босьтӧй да релльӧ ӧшӧй!
Парма.
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- it was anonymously published before January 1, 1954 (more than 70 years ago).
This work is in the public domain in the United States because it was published before January 1, 1929 (more than 95 years ago).
This anonymous or pseudonymous work is also in the public domain in other countries and areas where the copyright term of anonymous or pseudonymous works is 97 years or less since publication.
Public domainPublic domainfalsefalse