Моң. Тамара Искәндәриә

From Wikisource
Jump to navigation Jump to search

Моң. (Шиғыр)
автор Тамара Искәндәриә


Моң


Моң тигәнең нимә —
оҙон көймө —
ҡылғандарҙың туҙғып сайҡалышы,
болоттарҙың бөтмәҫ сыуалышы,
күктең тәрәнлеге, айҡалышы?

Нимә ул моң —
тәрән йылғаларҙың
йондоҙ ғына күренер сөңгөлөмө?
Яңы япраҡ ярған бөрөмө ул,
ҡаяла ғына үҫкән төн гөлөмө?

Бәлки, дала,
бәлки, ҡом бураны,
ә, бәлки, дүрт яҡты тарафымдыр?
Юҡ, юҡ!
Моң ул —
бөтәһенә тиңдәш
мөхәббәтле һинең ҡарашыңдыр...