Мича ныв ним

by Аноним

Мича ныв ним  (1923)  Аноним

Гижан кад: 1923, Йӧзӧдан во: 1923. Ӧшмӧс: Выль туйӧд. Сыктывдінкар, 1923.

Пӧртчис пӧ менам
Муса ныв олӧмӧй,
Мича ныв нимӧй
Зарни уткаӧ
Да и пуксис
Пывсян жӧлӧб дорӧ.
Мудзласьӧ да песласьӧ,
Оз некытчӧ инась ни такав.
Лэбзис пӧ тай сійӧ
Вичко крест вылӧ.
Крестыс тай дзирыд да югыд.
Мича ныв нимыс пӧ менам
Сыысь дзирыд да югыд.
Кутшӧм пӧ тайӧ
Зарни утка локтӧма,
Дзирдалӧ да югъялӧ.
Зарни утка
Крест вылын пукалӧ,
Оз некытчӧ инась ни такав.
Лэбзис пӧ сійӧ
Рытъя кодзув дінас.
Кодзулыс пӧ дзирдалӧ да югъялӧ.
Мича ныв нимыс пукалӧ
Югыдджык сыысь да дзирыдджык.
Мудзласьӧ да песласьӧ,
Оз некытчӧ инась ни такав.
Лэбзис пӧ сійӧ чӧдъя давйӧ.
Чӧдъя давйыс лӧзыд да лӧзыд.
Мича ныв нимыс сыысь лӧзыд.
Мудзласьӧ да песласьӧ,
Оз некытчӧ инась ни такав.
Лэбзис пӧ сійӧ озъя тылаӧ.
Тылаыс гӧрдыд да гӧрдыд.
Мича ныв нимыс сыысь гӧрдыд.
Мудзласьӧ да песласьӧ,
Оз некытчӧ инась ни такав.
Лэбзис пӧ сійӧ мырпома нюрӧ.
Мырпома нюрыс вижыд да вижыд
Мича ныв нимыс сыысь вижыд.
Мудзласьӧ да песласьӧ,
Оз некытчӧ инась ни такав.
Лэбзис пӧ сійӧ сэтысь
Лежнӧг куст дінӧ.
Кытшовтіс мича ныв нимӧй
Лежнӧг кустанӧс.
Мича да мича дзордзалӧ
Ленкор лежнӧг чвет дзоридзанӧй.
Сыысь на мича
Дона ныв ниманӧй.
Оз инась сылӧн сьӧлӧманыс.
Мунас мича ныв нимӧй
Гажа луг вылӧ.
Мича да мича дзордзалӧ
Гажа луг вылын
Быдсяма пӧлӧс
Турун дзоридзанӧй.
Наысь на мичаджык
Дона ныв нимӧй.
Мунас сійӧ сэтысь
Визув ю дорӧ.
Плавайтӧны визув юын
Куим зарнианӧй уткаанӧй.
Плавайтӧ эськӧ сэні
Ныв мича ниманӧй.
Оз инась сэтчӧ сылӧн сьӧлӧманӧй.
Мӧдӧдчас ныв мича нимӧй
Визув шор кузя.
Петас сійӧ паськыд ва дорӧ.
Пуксяс мича ныв нимӧй
Йи плака вылӧ,
Кывтас ныв мича нимӧй
Кӧджысь кӧджӧ да,
Прилукысь прилукӧ
Аддзылытӧм вылӧ.