Юғалған Урман Рәүәте,
Үлән алған эҙҙәрҙе,
Һирәк кесерткән таныта
Зымзыя нигеҙҙәрҙе.
Өләсәмдең бала сағы
Үткән ошо битләүҙә,
Ошонда тәү ауаз һалған,
Аҙым яһаған тәүләп.
Өйөр-өйөр аттар тотҡан,
Йорттар һалған ҡанбаба,
Май тулы булған батмандар,
Һаумал ҡымыҙлы - һаба
Көмөш-мәрйен ботлап-ботлап
Бирнәлеккә - киленгә...
17 һәм 21 ...
Барыһы киткән тигенгә.
Исемен генә ҡалдырған
Өләсәйем ауылы -
Упҡынға алып осорған
37 дауылы.
41 - һуңғы нөктә ҡуйған...
Нигеҙҙәрҙә - кесерткән.
Әй аяуһыҙ - егерменсе -
Быуат ниҙәр кисерткән!
Ҡанбабам тарихын һөйләй
Етем Рәүәт йылғаһы.
Йәшем йыуам таң һыуында-
Мин дә иҫтә ҡалаһы...
