Колхозонь эряф/1941/04/Миколась и Пророксь

←Кузенцяса

Колхозонь эряф (1941), № 4 Апрель edited by Игнатьев Г. А. Миколась и Пророксь

1941 кизоня Мордгизсь нолдась мокшень кяльса книгат→

Колхозонь эряф. Эрь ковонь литературно-художественнай и общественно-политическяй журнал. Мордовскяй Советскяй писателень союзть органоц. — № 4 Апрель 1941. — с. 74—76

 

МИКОЛАСЬ  И  ПРОРОКСЬ

Кунара фкя велеса эрясь беднай аля, лемоц Андрей. Эстедонза башка ульсь авац и ниле шабанза — сембе ёмлат. Сонцень Андрейть ульсь ни 45 кизоц, пожалай, сняра киза ульсь сонь ёмла куднянцтыге, конанц потмоста поталакоц нежетьфоль шочкса. Синь ашель кодамовок жуватасна, и вов тяни Андрей рамась алаша, но мес ярмакта кржаль, алаша цебярь ашезь рамав.

Сась тундась. Андрей кильдезе алашанц и тусь паксяв тозер видема. Модада ульсь целай десятина. Андрей ушедсь сокама — алашац кажнай бораздати сисемксть-кафксоксть лоткай.

Ся ёткова угадявсть ётамда эсь алашаснон мархта Миколась и Пророксь. Синь ваныхть, кода Андрей маятай, и думандасть максомс тейнза эсь алашаснон. Васенда максозе алашанц Пророксь. Соннеть мархта Андрей, сонць афи шарьхкодсь, кода десятинать пяленц соказе. Сяльде кильдсь Миколать алашанц. Тянь мархта курокста и аделазе сембе сокаманц. Андрей пяк кенярдсь, сяс мес сокамац ашезь сата пяле шивок. Андрей тумстост пяк пасибась тейст.

Тумда меле Миколать мархта Пророксь кармасть споряма: конанц сяда цебярь алашац. Кажнайсь, конешна, шнась эсь алашанц эса, и спорямасост мезевок ашезь лисе. Конацка ашезь макссе пря.

Синь мрдасть меки Андрейть кизефтема. Мярьгихть:

— Тон алашаньконь мархта сокать, азк, конанц сяда цебярь алашац?

Андрей Миколать алашанц мархта сокась послетку, сяс сяда ашезь юкстав, и азозе, што Миколать алашац, конешна, сяда пара.

Пророксь Андрейть лангс кяжиясь, мес сонь алашац лиссь кальдявонди, и сон решил Андрейти тиемс кальдяв. Миколати Пророксь корхтай:

— Ну, кли тяфта, мон сонь тозеронц шавса цярахманца.

Миколась ласьксь Андрейти и корхтай:

— Тон видеф тозерцень мик кинди-кинди, а то сембе сяка мезевок аф сяват. Пророксь лангозт кяжиясь и шавсы цярахманца.

Андрей стане и тись. Мольсь фкя козя алянь пяли и корхтай:

— Аяш вага шичас суском кшизе.

А козясь эстокиге:

— Мик давай видеф тозерцень?

— Рамак, вднать, — корхтай Андрей.

Козясь макссь Андрейнди тозеронц инкса 100 цалковай.

Йотась мзяра врема, козясь мольсь рамаф тозеронц ванома, — Пророксь ся порати сяшкава шавозе тозерть — цярахманць мянь плманжава. Козясь нльне аварьгодсь:

— Имась сяда цалковайнязе...

Пророксь няфнесы Миколати:

— Няйсак, кодане тиине тозеронц!

А Миколась отвечай тейнза:

— Тон, Пророк, няить, кие тозерть перьф шаронды? Сон вдь мизе илянди 100 цалковайда.

Пророксь кяжиясь Андрейнь лангс нинге сядонга пяк, но тиемс аш мезе, и корхтай:

— Мон алять 100 цалковайнц аф имафтса, нолдан лямбе пиземнят и тиса стане тозеронц, штоба киньге стама тяза уле.

Миколась ласьксь тага Андрейти и корхтай:

— Тяни, Андрей, аф мисы ли ся козя алясь тозеронц меки... тон рамак сонь кядьстонза: Пророксь вдь надияфтсь лямбе пиземнят и ёрасы тиемс тозерть стане, кодама киньге аш.

Стане и лиссь. Козясь мольсь Андрейти авардезь:

— Васькафтомайть монь, Андрей, тон, наверна, содайть тя тевть, сяс и мийть...

Андрей бта мезевок аф содай и мярьги:

— Месть зря тон корхнят!.. Кли тозерсь аф туф мялезт, то мон меки монць рамаса, Мезе инксонза сяват.

— Дай хоть 50 цалковай? — корхтай козясь.

Андрей макссь 50 цалковай.

Пророксь кода корхтась, стане и тись. Нолдась лямбе пиземнят, кармась сонць тозерть мельге ванома, тозерсь сяшкава цебярьгодсь, што ашель стама паксясонга. Пророксь Миколати и корхтай:

— Ванат, кода арась тозерсь, кли мон заботендань алять инкса!

Миколась тага мярьги:

— Да, тозерсь пяк цебярь, аньцек вдь сонь Андрейсь меки рамазе козять кядьста да нинге аньцек 50 цалковайда.

Сянь кулемок, Пророксь кяжиясь скрось:

— Ну, катк работакшни, урядасы, а калацяда сембе сяка аф ярхцай: мон тейнза обмолот путан аньцек ниле мерат авонти.

Миколась тага ласьксь Андрейти и указовай:

— Тон, Андрей, кярьмодят тозеронь тяльсема — кажнай авонти путт аньцек ниле пулфт: кажнай уголу фкя пулф, и лиси ниле мерат, а то илядат вачеда — Пророксь путсь обмолот авонти ниле мерат.

Андрей усксезе тозеронц и ушедсь тяльсема. Как ниле пулфт путы авонти, плхтай кафта курмость шужярь, тялясыне — лиси ниле мерат. И стане сняра тялясь тозерда, мянь аш кинди урядамс, аш коза ни марсемс.

Кда Андрей аделазе тялямда тозеронц, Миколась и дразняй Пророкть эса:

— Тон, Пророк, ёрайть вачеда кадомс Андрейть, а сон вдь тонь васькафтонзе. Сон тялямста путнель кажнай авонти аньцек ниле пулфт, сяс, ванака, мзяра тозер тялясь... Сембе велети саты колма кизот. Пророксь, тянь содамок, цють аф пряшяярензон сязенди, но кяжец аш кода пандомс, сяс сон мярьгсь:

— Мон сонь шавса атямса, штоба тяза пользонда тозерть мархта.

Миколась ласьксь Андрейти:

— Тонь ёратанза Пророксь шавомс атямса. Тон молят церькаву, тоса рамак кафта штатолнят: фкя — трёшниконь тии, сянь путсак тейне, омбоцеть — цалковайнь тии, сянь путсак Пророкти, и сон мле мирендай, аф шафтанза.

Андрей стане и тись. Мольсь церькаву, рамась кафта штатолнят, нежедсь Миколати, апак варжакстт ёрдазе инголенза трёшниконь тии штатолнять и аердсь, а кда нежедсь Пророкти, инголи озондсь, сяльде крьвястезе цалковайнь тии штатолть, тага озондсь.

Пророксь Миколать бокти токсесы и корхтай:

— Няйсак, Андрей — монь сяда кельгсамань, аф шавса алять.

Стане Андрей илядсь шиса. Тозеронзон эзда лама мись ярмак лангс, путфтсь иля оцю, цебярь куд, рамась цебярь алаша, кармась цебярьста моданц соксема, сяс сёроц кармась шачема. Эстонь пингста Андрей эряй цебярьста.

Сёрмадозе  Купряшкин  Степан  Ефимович
(Ковылкинскяй райононь Порапа велеста).

 

---