Колхозонь эряф/1941/04/Кузенцяса

←Валпрякс

Колхозонь эряф (1941), № 4 Апрель edited by Игнатьев Г. А. Кузенцяса by авторсь: Франко, Иван Яковлевич, мокшекс ётафтозе: Аф содаф (аноним)

Миколась и Пророксь→

Колхозонь эряф. Эрь ковонь литературно-художественнай и общественно-политическяй журнал. Мордовскяй Советскяй писателень союзть органоц. — № 4 Апрель 1941. — с. 19—29

  Иван  Франко

---

 

КУЗЕНЦЯСА

Монь лятфнеманень эзда

Монь лятфнеманень потмаксса, коса-бди самай крхкадонга крхка вастса палы тол. Аф яркай, но вишке толонь аф оцю очагсь валдопнесыне васенце контурхнень, конат ушечнихть няевома идень ваймоть шобдаста. Тя толсь монь алязень кузенцяса.

Тя пингс няйса кшни каймонять, конань мархта алязе марси сетть седяфонь арзяняста. Ня сеттнень сон плхнезень сонць куттнень фтала ямаса, кона тячемс лемневи седень ямакс, хоть тяни сонь эздонза следга ашезь иляда, ёрясыне синь горнав палы сеттнень лангс, конатнень кандозень церямкаса кудста, а тоса эсь обычнай отькоршинц мархта шарфни слуганцты:

— Тон, тон, тон, Андрюша, а ну, уфак, саворне, саворне, пока аф крьвязихть.

Андрюшась, самай ся, кона кандомань монь кудста лафту лангсонза и озафтомань седень ящикть лангс, тяни фатнесы мехнень эзда байдекть и кармоси уфама. Сразу мехсь кати-кода уфси нюрьхкяняста, сон нинге ашезь кочка кожф, ашезь ушеда работама; сон уфсесыне сеттнень, но тол аф тиенди.

— Савор, Андрюша! Да тон, цёраня, сяда валом!

— Нинге дикай бабась пушксни! — корхтай шутендазь Андрюша и, мезе ули вийц, утнесы уфама недть, штоба кочкамс мехти нинге сяда лама кожф.

Мзярда сон лятфнесы дикай бабать, монь фатнесамань трнатома.

— Коса тя дикай бабась? — кизефнеса мон.

Андрюша пееди:

— Мехса. Дряй аф кульсак, кода сон уфай?

Мон кулхцондан — афкукс, уфай.

— Ожу, мон сонь цебярняста уфаса, — корхтай Андрюшась, — кармай сон куфцема.

— Мондейне аф эряви! Тяк уфа! — юватькшнян мон.

Монь сай авардемазе. Мон аф шарьхкодьсайне Андрюшань шутканзон. Монь воображениязе пяшкотьф всякай приведенияса, упырьса, эсь прянь шависа, конатнень мон эрь илядня кулендьсайне минь кафта служанканьконь кштирдема ёткова азонтф рассказстост. Синь аф весть лятфнезь и дикай бабать, кона ащи озада Долинаса и качафни тоста качамса; Андрюша ульсь васенцесь, кона путозе сон мехть потмос, и ся пингста сявомок, мехсь монь пяшкотькшнесамань пелемаса.

— Но-но-но, тон, цёрошкя! Тят корхне идняти глупостть. Тят кулхцонда, Ванечка, тят кулхцонда, мехса аш кодамовок дикай баба.

— А мезе ина тоса тяфта мзнай?

— Тя вармась, цёраняй. Няйсак, мехсь кочкай варма, а кодак пяшкоди — уфай. Вдь и монга тяфта уфан!

И алязе ламоксть уфай толти.

Монь озси седиезе. Толсь крьвязькшни. Васенда сон, мярьгат, пелезь лисенди сеттнень ёткова сенем кяльнякс. Вов дикай бабась ушеткшни уфама сяда вишкста; сенем кяльнятне алува якстерьготкшнихть и эрязста комотнихть седень марть потмоста. Валомне синцьке равжа сеттне ушеткшнихть якстерьгодома, толсь вжняй и комотни, тиевихть бта марс сотнеф пиндолды пеельхть или стрелат. Но дикай бабась пяшкодезе ни эсь пеконц пцтай поталакти молемс. Андрюша люпшни кядензон, мяштенц и пеконц мархта, штоба пондамс байдекть и алуда толонь пеельхне акшелгочнихть; якстерь сеттне арсихть золотойкс, мярьгат, пачкаст няят, бта шянячнихть. Монь афи аерфтовихть сельмоневок тя ёмла очагонять эзда, кона аф чванендай валдса и вийхца срафнесы аф оцю шуфтонь кузенцять потмоста сунеть, но тянкса сельгонди оцю цяткт мянь сокса валф, сёвонень, очкокс ащи поталакти, и кирди эсонза лама лямбе, оцю рабочай энергия.

А алязе ащи наковальнять ваксса, сявозе эсь аф оцю „удобнай“ молатканц, эрьхтсь несколькаксть наковальнять ланга, курок ушедсь мельцек-мельцек сидеста, кода барабанщиксь — барабанть. Циннязевсть эрьхнематне марнек приселкать эзга — тяфта, што кузенцяса ушедсь работась.

Тяни сон тарксесы мехть алда всякай кшниса пяшкотьф ящиконянц. Тяса улихть тапаф узерхть, конат эрявихть оржаптомс; вов фкясь ванонды, кода тапаф пря мархта отчаяннай — сонь тапаф шовонец, сон сави мянь „почерямс“, кода корхтай алязе эсь образнай кяльсонза. А вов кенкшнень ваксса сошник — эряви петемс. Кузенцять тейса, аф оцю вельхксть ала, точилать ваксса ащихть усфть эзда кафта шарыхть, синь кандозь шиновандамс, — тоса жа ащихть пингонди тиемс од кшнинь полосатка.

Алязе ульсь содаф кузнецекс сембе соседняй велетнень эзга, особенна славасольхть сонь узеренза. Сонь куломдонза меле мянь колмогемонь киза ётазь лия велень фкя ломань, атя, монь мархтон корхнемста, лятфтамок алязень, мярьгсь:

— Аш, аш ни тяни стама кузнець. Монь нинге тячемс шиса сонь тиф узерец. Тя вайме — аф узерь!

Мзярда наковальнять ланга молаткать барабаннай бойц кайгозевсь сембе велеса, ушедсть обычна пуромкшнема шабраньке. Сембода пяк работась лакась кузенцяса тялонда — кизонда ульсь аньцек кафта нюрхкяня сезотт: соканнесь да тарвазоннесь — сяс алязе панчсезе кузенцять аньцек кизонда, мзярда кие-кие тихтетькшнесь кодамовок оцю эрявикс тевонь тифтема.

Ну, тялонда хозяйственнай работада ульсь кржа. Кой-коса ригаса цяпиихть тяляматне, кудонголе вяшкихть пилатне или пиксонь понамста сувихть коловороттне. Работамста эряскодомс ашель коза. А кузенцяса весяла. Кие сашенды оцю работа мархта — или шарыень шинавандафтома, или узерень тифтома, ся ашезе юксне путомс повозонза вина бутылка. Сашендсть кузнецти, кода шабраснонды, а аф кода ремесленниконди, штоба тиелезе сянь, мезе эряви, сяльде — шумбра ульхть, мон тонь аф содате, тон монь аф содасамак. Работанкса кодамовок таксац алязень ашель, „мезе ломаттненди, сянь и тейне“, кда анокт аш, учи. Но кельгозе, штоба кузенцясонга улель весяла, шумна. Оцю компанияса весяласта корхнезь и рюмка вина ваксса работась мольсь сембода цебярьста. Да вдь сидеста лама лездыдонга эрявсь. Вов, хотя ба шарыть лангс шинань таргамста: колма, ниле молодец сявсазь кшнинь крючок мархта эфтярь байдекнень, кафта сафне и алязе синь мархтост кувака клящаса кандсазь календаф шинать, путсазь сонь ободть лангс, а тонат байдекнень песта крючокнень мархта фатнесазь кшнинь пингть, нежечнесазь байдекнень песнон ободти и ушечнихть сембе вийса люпштама алу. Алязе фатнесы оцю молаткать и эрьхнесы кшнить тоста, коста эряви. Ободсь пси кшнить токафтомста кой-коса нолни тол, но сон курок мадонды.

— Ну, ну! Тон-тон-тон, — кулеви алязень корхнемац, конац шоворькшни молаткать токшнить, то ободть лангс эрьхнеманзон да крючокнень калтыемаснон мархта, конат тарксесазь пингть сембе шири. Сяльде колма-ниле ломатть сявондихть самай тяфтама жа оцю молаткат и ушеткшнихть забоецнень тактснон коряс ободть ланга таргаф пингть шавома. Луп-цуп-цуп! — кулеви сембе слободаса, мзярс шинась аф арай эсь вастозонза. Сяда сире алятне содайнь сельмоса ванондсазь шарыть, ванондсазь, цебярьста ли люпштазень шинась спицатнень, сувась ли кажнайсь эсь вастозонза, кемоста ли ащи ступицась; конац-конац кеподьсы эфтярь кядьса шарыть вяри, валом нолдасы сонь мастору и кулхцондсы сонь стукадеманц.

— Шарысь, кода пайге, — корхтайхть фкя-фкянь мельге. Инь оцю шнамась кузнецти.

А кузенцяса дикай бабась куфци, и куфци, толсь горнаса марнек акша ни, а сяда алува потмосонза кати мезе палы, валдомкшни, кода золота, и ноляй куваказа, сембе шири лии цяткт, кода мярьгондихть, зындрат... Тя — „варендакшневи“ будущай узер. Алязе ёрдась толти кафта цебярь васеньгурмость ёмла эскт — ковоннай кшниста кядьса тиф старомоднай эскт, — вельхтязень синь седьса и путсь нинге фкя цёра, Андрюшада башка, уфама. Алязень кузенцясонза тяфтама ни установкась: кие сась — ащеза, сай очередсь угощандамати, сонь аф ётасазь вакска, но мзярда эрявксты мезьса-мезьса лездомс, эста алязе церемонияфтома шарфни тейнза: „Тон-тон-тон, молодец!„ (кда тя сондедонза од), или; „Кум-кум! Ну-ка сявке молаткать!“ Или уфама кярьмотть! Или мезьс тоса эрявсь. И нльне монь ничтожнай особазе тяфтама случайста ульсь сонь заботанзонды предметокс. Мзярда эрявсь путомс наковальнять лангс пяк календаф кодама-кодама кшнинь оцю пакш, конань эзда комотнесть оцю цяткт или пяярсть акшаза сянгяря спицат, алязе фалу мярьгондсь кинди кинди тоса ащихнень эзда:

— А кяшесть тоса шабать!

Мон пяк пелендень ня цяткнень эзда, но сембе сяка пяк кельголине ванондомать, синь толонь праможень ройкс лийкснесть алязень молатканц алда и тушендсть сембе шири. Сембода пяк эста, мзярда эрявсть кшнинь кафта пакшт варендамс марс. И тяфта, мзярда алязе толоптф эскнень пуроптозень марс, несколька раскаливанияда меле тя марста усксь кувака, лапш штабка, конань кувалмоц — колма пядьт *)^[1] и келец — колма суронь келешка, тоса наковальнять круглай уголонц лангса мяндезе, а пензон петфтазень фкя-фкянди, сась узерть тиеманц инь ответственнай пяльксоц: тиема цебярь, кеме узерь пиле и варендама, таргама и оржаптома сембе узерсь. Мянтьф, эчке штабась путф тага толти, а мзярда ульсь эжтьф акшелгодомс, неоформленнай варяти эрявсь шавомс обушницась — кшнинь приспособлениясь, конань вельде кемоксневи узерть пилец. Тя обушницати щафтозь, алязе пяк старательнайста тиендезе узерь пилеть; сонь узерь пиленза мзярдонга ашесть лазондов и ашесть срачне, а тя хозяйственнай узерть, кона сидеста полафнесы долбнять, пяк оцю достоинствац. Марса обушницать мархта узерсь тага мольсь толти, но кодама видса! Вастсь, коса мянтьф кшнить пенза педсть марс и коса должен улемс узерть лапшец, сембе вадентьфоль аф пяк туста сёвоньца — тя должналь лездомс кшнить варендаманцты. Толти путф узерть алязе старательнайста, кода иднянь, вельхнезе пси, а тоса тага свежай седьса и ня сеттнень нинге валондозень севонь мархта шовордаф ведьса — тянь сянкса, штоба улель сяда пара псись. И дикай бабась ушеткшнесь куфцема сембе вийса. Ся пингс, мзярс очагста обыкновеннай седень цяткса ашесть ушеткшне лисендема яркай акша осколкат. Аф, нинге аф ся пингс! Пока ня осколкатне аф кармайхть лиендема очагста туста ройкс, тя няфнезе, што кшнись ёфси ни варендавсь. Алязе сявондезе клящаса толомф кшнить, молаткаса крксезень лангстонза сеттнень и сёвонть, путнезе наковальнять лангс и несколькаксть савор эрьхнезе молаткаса. Ня эрьхнематне фалу марявсть тейне кати-кодама таинственнай волшебствакс: конашкава ульсть тёждянят, сембе сяка эрь эрьхтемста тжнасть и лиендсть марнек кузенцять эзга осколкань оцю ройхть. И хоть мон обыкновенна ащекшнень озада сери вастса, кяшемок наковальнять эзда кодама-кодама эсь ломаненьконь фталу, сембе сяка монь сельмоне аф опаснай вастса ласькондсть сембе кузенцять эзга, ванцть эрь вспышкать мельге, а тяка ёткова ашезь кадонда ся кшнитьке, конац алязень молатканц эрьхнеманц эзда примсесь сембе сяда яснай форма. А максомок ляпе кшнити ся формать, конац тейнза эрявсь, алязе яфиезе прянц тоса ащихненди, особенна оттненди и корхнесь:

— Тон, тон, молодец! А-ну фатяка, тяляк! А-ну, жива!

Кафта ломатть сявондезь оцю молаткатнень и шавсть тактс коря кшнить. Луп-цуп-цуп! Луп-цуп-цуп! — кулевсть колма молоткатнень эрьхнемасна. Алязеннесь, ёмланясь, шуваняняста, а кафта оцюфне кайгиста, усерднайста, бта кяжиста.

Узерть лапшец ульсь варендаф, но тяни ушеткшнесь алязень детальнай работац; тага узерь пилеть лангса, пока ашезе сатне сянь, што можна улель таргамс обушницать, сяльде узерть лапшенц и оржанц лангса. Алязе перековывал эрь пяльксть ламонь-крда, старандамок тиемс лацкас аф аньцек формать, а сяда пяк сянкса, штоба кшнись улель ровнай и цебярьста выделаннай, штоба косонга афоль уле аф моргоня, аф ангоркскя, штоба узерсь улель кода „валозь валф“.

Кузенцяса молихть корхнемат. Шабратне азонкшнихть велень од кулят: кие мезе кульсь общественнай управлениять колга, мезе няйсь Дрогобычень базарса, мезе азонкшнесь бродяга нищай атясь. Сембода лама корхнемада Бориславть колга, яматнень и раскопкатнень колга: ся пингть ушеткшнесь оцю размерса нефтань таргамась и усксемась. Тёжятть ломань мольсть Бориславу, васькафнесть мезь лангска крестьяттнень кядьста мода пакшкат и ушечнесть ямань шувома. Соседняй велева кармась шачендома „рипниконь“ ^[2]) тип: обыкновеннай цёратне, аф аньцек беднайхне, но и козятне, „добувакшнесть равжа панархт и акша кши“, — тяфта характеризовандакшнезе велень валмуворкссь нефтянникть эряфонц — ся сетьме, тя пингс нинге патриархальнай уженяса промышленно-капиталистическяй порядкатнень васенце проявленияснон.

Минь кузенцязонк пачкотькшнесть тя од явлениять аньцек кой-кона, мярьголень ба, аф яснай кулянза. Тя недялять яматнень эса шавовсть вете ломатть, а тоса фкя ямаса опамсь колма, а тя или тона прась вышкаста и нефтевсь перяф плетенти, кона ащесь сруб вастс ся ёфси примитивнайста тиф яматнень эса. Тя ульсь азонкш нем ань фкя постояннай темакс. А омбоце темась: тя-тя бориславецсь тусь сумканц мархта, ся-ся кармась симондема, тонань, корхтайхть, симдезь и ирецта тостядезь ямав. И сяда тов мольсть пефтома сязентьф азонкшнемат нефтянникнень всякай мошенничестваснон, симондемаснон колга, синь цебярь заработкаснон колга, сянь колга, кода синь ётафнесазь заработаннай ярмакснон, ветеце, кемонце, кемгафтувоце сажеттнень эса ямава нефтань взрыфнень колга.

Мон кулхцонкшнине ня азондоматнень, кода ичкоздень волшебнай странань фантастическяй ёфкст. Бориславсь эсь ужасонзон, дикай шутканзон и фортунать дикай комотнеманзон мархта, эсь удивительнай промысланц, работань удивительнай способонц, удивительнай народонц мархта пяшкотькшнезь монь фантазиязень. Минь слободаньке ащесь ичкозе столбовой кить эзда; минь эздонк кивок ашезь яка Бориславу; кулхцонкшнемок тялонда сонь колганза азондоматнень, мон кемоста путыне мяльс тяникиге тунда аф ужяльдемс пильгонень, ласькомс трактть лангс и ванондомс тоса ся пингс, мзярс аф няян нефтянникт, конат молихть ичкоздень, беднай велетнень эзда столбовой киге Бориславу или меки сайхть тоста ёткшиня куду. Монь тя любопытствазе ульсь успокоенай тяда инголе ни: нинге тялонда фкя понедельникста сявомань монь алязе Дрогобычу и тяса мон няень нефтянниконь целай толпат и еврейнь целай кучат, конат эрь крестьянинть, кда сон щамонзон коряс няевсь тейст Бориславецекс, кизефнезь:

— Хозяин, хозяин! Тон Бориславста? Аш ли модаце мимс?

Алязе аф охотнайста кулхцонкшнезень Бориславть колга азондоматнень. Сон тяшкава тонадсь велень эряфть сире порядканзонды, што тя од бориславскяй шумса марясь мезе-бди од, вражескяй тяниень эряфти. Сон ашезь няфне пря, ашезь сюцекшне и ашезь кяжиякшне, кода сире пингть кой-кона горячай сторонникоза, но мзярда аделакшневсь од кулянь запассь, охотнайста ётафнезе корхтамать лия, преимущественна моральнай темас. Алязе старательнай и шарьхкоди работник, кельгондезе рахсемс дармоеттнень и бездарнай разинятнень и крикуттнень лангса. Штоба кемокснемс эсь общай положениянзон, сон келгондезе нюрьхкяня рассказонь, притчань лятфнеманц, конешна, кузенцянь тевть эзда. Тяса, кузенцяса мон марянь васенда тяфтама расскаст, кода вов цёранять колга, конанц аляц вятезе кузнецти тонафнема и, пелемок, штоба „иднясь афоль пидев, или цятксь афольхце пиде сонь сельмонц, эняльдсь кузнецти, штоба тонац путольхце сонь цёранц стенати шавф кептерняв. „Сон, — корхтай, — кармай ванондома сембонь лангс, мезе тиихть кузенцяса, и тяфта тонады“. Цёрась „тонафнесь“, тяфта, сисем кизот, а мзярда сась меки алянцты, сошникть вастс тись пшик.

Общай темас корхтамась и азондомась ётнесь живойста. Кулхцондомс мяльсна ульсь ламонь, но ульсть минь шабраньконь ёткса и аф обыкновеннай мастярхт—рассказчикт. Фкя-фкянь мельге мольсть анекдоттне, Кашуцкяй войнать колга, стака кизотнень колга, минь крестьяноньконь Подольскяй губерняв служама или Покуттяв или Буковинав кукурузанкса путешествияснон колга ётай пингонь лятфнематне. Личнай приключениятне сотнекшневсть ломаттнень — Подоляттнень, Гуцулэряйхнень, Бойкэряйхнень — и васттнень: Коломинть, Городенкить, Салогорыть, Черновицать нюрьхкяня меткай характеристикаснон мархта.

Но вов узерсь анок. Нинге весть календакшнесы алязе сонь, но аньцек якстерьгодомс и тоса нолнесы оржанц кафта суронь серес кельме ведьс, сон календакшневи. А сяльде — шрубстакти, напильникть алу, штоба ровналгофтомс и мекпяли — точилати, штоба шовамс — и анок крестьянинть постояннай ялгац вирьса, и сокать ваксса, и алаш аса молемста, — сембе вастса, коса эряви „лезкс кяттненди“. Кузнецсь радостна ваны эсь тевонц лангс, кельгондьсы несколька минута, а тоса макссесы шабранц кядьс. И тусь од узерсь кядьста кядсь. Кажнайсь ванондсы шовоненц, сурса варчсесы, оржа ли оржац, ванондсы лапшенц, мярьгат, тя узерсь ульсь тиф тейнза.

— Тя кирди ламос, — корхтай фкясь.

— Тейне ба ся тумонятнень тяни, конатнень сон кармай кяромост — куфцекшни омбоцесь.

Од узерть павазу собственникоц ваны сонь лангозонза гордость мархта и кельгозь. Сон няезе, кода тиезь васень минутаста сявомок, мзярда сон ульсь нинге сире эсконь кучакс. Сон лездсь тиемстонза: мехса уфась, молаткаса эрьхнесь — значит узерсь отчасти и сонь собственнай тевоц. Сон весяласта азсь спасиба кузнецти, таргась кяскавстонза лапшаза пяле кварта вина. Алязе мярьгонди кандомс кудста рюмка, кшиня, шуфтонь тарелка лангса пяле круг сыр, и ушеткшни угощениясь, „од узерть штамац“.

Алязе сими рюмка вина, сусконды и ушеткшни од работа; иляды обществась сими-ярхцай, корхни, шутендай. Фкясь кулевиста арьси: кда ба тейне кафта-колма сядот, эста мон ба аф тянь тиелень и няфтелень! Омбоцесь лувондсы, мзяра ярмак ётасть сонь кядьганза мекольдень кизоть.

— Комсь десятка, ей-богу, куманек, комсь десятка, кода фкя крейцер! Кодамот ба улельхть кафта букатне! А тяфта мезе! Кода сурса стукадсь. Аф ярхцавсь, аф симовсь, аф цебярьста щавсь ломанць, аньцек шяйтан-тядяти старандась.

— А тейть, кум Марк, — корхтай фкясь минь добродушнай шабраньконди, — кда ба тейть тяни комсь десятка, мезе ба тон тиелеть?

— Мон, мон, мон, — пяле кяльса корхтазевсь Марк — уж содалине, б-б-б коза синь прдамс!

— Наверна, сотолить ба лоскоткас и прдалить ба стрехать алу! — кие-бди шутендай. Марк афи срхкси каршек валонь азома, аньцек яфиесы прянц, мярьгат, корхтай: шутендада шумбрашис, а мон эсь тевозень содаса.

Кой-конатне советовандакшнихть эсь кудонь тевснон колга: конань траксоц прась, тоса иднясь козы; тонац фалендай, што исяк сон пяле капа тозерста тялясь вете четвертть. Ломаттнень колга, конат ашет тяса, корхнематнень, синь осужденияснон алязе афи кулельхцень, мзярда кинь-кинь шарондсь кялец тя шири, маштсь удачнай оборотса или валса аерфтомс сонь тя киста, а одть видеста апрякакшнезе: „тяк эцекшне шалхкцень илянь перес“. Тяфта жа сонць алязе ашезе кельгонде мезтьке аф приличнайть корхтамаса: сон сонць и марнек компаниясь кирдсь приличиянь рамкаса, конешна, тяфтамса, кодапт могут позволить эстейст честнай, положительнай азорхне. Аватнень лангса кой-мзярда шутендасть, а алязе кельгондезе азонкшнемс содаф притчать искусительница-стирть колга, сянь няфтемс, „што“ авань натурась и аф муворутьке пачфтьсы грехс“.

— Вов весть фкя аля эрясь вирьса эсь цёранц мархта комсь киза. Цёрась таки и кассь вирьса, алядонза башка, фкявок лия живой ваймонь апак няйхть. Кодак топодсь комсь кизоц, корхтай аляц:

— Ну, цёрай, аде аф ламняда светти варжаксстама, кода тоса ломаттне эряйхть?

А цёрац корхтай: „Цебярь, аляй!“

Тусть. Пачкотькшнихть вели, а велеть крайса — кузенця. Сувасть синь кузенцяв, озасть, цёрац ваны кузнецть работанц лангс, а тоса и корхтай алянцы:

— Аляй, пади, и монга работан аф ламняда?

— Цебярь, цёрай, работак!

Цёрась нежедсь толти, коса эждевсь кшнись, аф сявондьсы не клящатнень, аньцек фатнесы пси кшнить галошкядьса, путнесы наковальнять лангс и работай, а кшнись цютькянядонга сонь аф пидесы.

Кузнецсь тетькозень сельмонзон тяфтама прислужникть лангс, а аляц станяк ащи, аньцек корхтай цёранцты:

— Ну, кода, цёрай, цебярьста работась моли?

— Цебярста, аляй!

— Кда мяльце, то можеш илядомс. Но тяда инголе мольхтяма аф ламда сяда тов, сяс мес минь пяк кржа светть эзда няеме.

Цебярь. Тусть сяда тов велева, а ульцяса васедсь тейст стирь. Цёрац кармась ванома, мезе тя тяфтамсь, нинге тяфтама ашезь няенде.

— Аляй, а мезе тя тяфтамсь?

— Тя, цёраняй, искушения, — корхтай сиресь.

А цёранц сельмонза крьвязсть.

— Эй, аляй, кда минь, вирьса, улель тяфтама искушенияньке!

Шарьхкодсь сиресь, што цёранц вероц корхтазевсь, и корхтай:

— Ну, саты, цёраняй, аде куду мрдатама!

Шарфтсть. Састь меки кузенцяв, а сиресь и корхтай цёранцты:

— А, кульхте, цёраняй, может ёрат нинге аф ламняда ковандамс?

— Цебярь, аляй, — корхтай цёрац.

И тага эсь лацонза: моли толти, а тоса календаф кшни. Сон фатясь кядьса кшнити. Эй, кодак пешкоды, кодак фатясы кяденц меки. А сембе кядь лапшенц пузырьхть шочазь. Йофси пидезе. А сиресь корхтай:

— Няйсак, цёраняй, тя сяс, што тейть ся искушениясь эрявсь. Да и срхкасть кафцьке и тусть вири.

Алязе азонкшнезе притчать шутендазь. Аскетизмась, кона ульсь сонь основасонза, ульсь марнек чужой алязень характеронцты. Мекланкт, фалу и сембе вастса сон ульсь общественнай ломанькс, ялгакс. „Ломаттнень мархта и ломаттненди,“ — тя ульсь девизкс сонь эряфонцты, и тяниенге мяляфтса, кодама впечатления тись монь лангозон святойть колга сонь рассказоц, конац эняльдсь шкайти, штоба освободил сонь ломаттнень кельгомаснон эзда.

— Тя ульсь пяк кунара, мзярда эрясь фкя известнай доктор. Сон лама лезнесь ломаттненди, и шкайсь макссь тейнза тяфтама милость, што сембе ломаттне сонь кельголезь. Ну, тяфта тейнза педендсть, кода каруфне медти. Коза аф шары, коза аф моли — сембе вастова сонь приятеленза, а кинь мархта аньцек корхтазеви, ся сонь инксонза толска комоти. Вов весть вирьге молемста, сон васьфтсь ёфси крхтапа атя, кона пильгта пряс ульсь понав и озонкшнесь кати-кодама пещераса.

— Мезе тон тяса тиендят, атяй? — кизефнесы докторсь.

— Шкайти служан, — корхтай атясь.

— Кода жа тон тейнза служат?

— А няйсак: мон атказань марнек светскяйть эзда, аердонь сембонь эзда и аньцек озонкшнян да аварькшнян эсь грехонень кувалма.

— А аф сяда цебярьста ли ба тон служалеть шкайти, кда ба илядолеть мирса и работалеть ломаттненди?

— Аш кода служамс марса сразу и шкайти и мамоняти, — отвечась атясь. Ломаттне и сембе синь пичефкссна, беспокойствасна и хлопочамасна, тя мамона. Кие кинди служай, сянь эзда пандомавок учеза. Мон служан шкайти, и шкайсь тейне панды, а кие служай ломаттненди, то мезьса тейнза пандсы судьбась страшнай судонь шиня?

Тяда меле синь и аердсть: атясь илядсь вири, а докторсь тусь эсь тевозонза. Но ся пингста сявомок, кодак кармась арьсекшнема атять валонзон лангса, кодак кармась арьсема, то мекпяли, пачкодсь сянди, што пчкясь афи няельхцень ломаттнень и ёрась сонга чужойгодомс синь эздост. Ворьгодсь вири, но ломаттне сонь музь, а сяс, мес сон ашезь ёра мрдамс ошу, эста синь кармасть эряма сонь мархтонза вирьса. Сон тага ворьгодсь синь эздост, и тага сонь музь. Сон кяшсь аф ётавомшка трущобас, и тостонга сонь музь; уйсь моряв и мярьгсь кадомс сонь ведть кучкас шава скала пряс, — и тостонга ломаттне музь сонь и станяк ингольцеть лаца педендсть тейнза. Эста сон кармась озондома шкайти: — Шкабаваз, кучт тейне тяфтама урма, штоба эздон сембе ломаттне пелельхть, штоба лоткальхть тейне педендемда!

Кодак кармась озондома, кодак кармась шкайть кядьста анама, эста, мекпяли, господин-шкайсь кучсь тейнза стама урма, што сон ушедсь пильгонзон, кядензон модати шавома, тапсевома, кургстонза шовонь нолнема, аф эсь вайгяльсонза рангома, стане, што сембе ломаттне эводсть и ворьгодсть сонь эздонза. А сон тяфтама эрь припадкаста няйсь шяйтатт, сонь фатнесазь толомф щипецьса, усксазь эстейст кшнинь байдекса и сембе юватькшнихть:

— Сак тейнек! Сак тейнек!

Тяфта сон мучендакшнесь целай комсь киза, но ни ашезь ворьготькшне вири или трущобава. Тяни сонь ваймоц тарксезе сонь ломаттненди, но ломаттне ворьготькшнесть эздонза. Сон яксесь ошнень, велетнень эзга, анцесь приют, но сонь урмац тиезе сонь тяфтама страшнайкс, што кивок ашезе примсе сонь эсь крышанц алу. Мзярда сон сашендсь ломанень толпас, сембе ворьготькшнесть, нльне церькаву ашель кода сувамс, сяс мес сембе сонь эздонза тушендольхть ласькозь, коса ба сон афоль эвонда, тяфта сонь тяда меле ни и афи нолязь. Мекпяли, комсь кизода меле, кульсь вайгяль:

— Валентин! Валентин!

Сон пшкядсь: — Кие монь серьгятькшнесамань?

А вайгяльсь корхтай: — А кода, танцти эрямс ломанти ломанень кельгомафтома?

А сон корхтай: — Шкабаваз, мон грехс сувань! Кучт тейне смерть, штоба сяда ламос мон афолень страданда.

А вайгяльсь корхтай: — А няйсак! Кие ломаттненди служай, ся тейне служай. Мон ломанть шачфтыне ломаттненди и аньцек ломаттнень мархта и ломаттнень вельде сон может улемс павазу. Кда ба мон ёралень, штоба сон сонць эсь корязонза и эсь вельденза улель павазу, мон ба тиелине сонь кевкс. Кда ба мон ёралень, штоба сон аньцек тейне ськамон служаль, сонь тиелине ба ангелкс. А сяс мон максонь ломанти высочайшай дар — кельгомс ломаттнень. А тон ёрать улемс сяда мудрайкс и молемс каршек, вов и сувать трущобав, коса ащихть кляща да кшнинь байдек мархтот. Ну, тяни саты тейть кайндакшнемс. Сянкса, што тон инголи служсеть ломаттненди и итцить синь, мон сяфте тонь эстейне, а тонь слабостцень кадса ломаттненди науканди: катк сяскондсазь эсь пелемаснон и сразу жа тонафнихть кельгома и фкя-фкянь аралама тяфтама страшнай положенияса.

— И Валентин докторсь — аделазе алязе — тиевсь святойкс, а сонь слабостец тя пингс якай мирть эзга. А кие итцесы и ванондсы тяфтама урмаса сярядить, ся заслуживандакшни милость господин-шкайть эзда.

Нильгемонь киза топодсь ся пингста сявомок, кода аф оцю шуфтонь кузенцяса мекольцеда кайгсь кузнецень молаткась. Мзяра полафтсь эряфса тя пингста! Аф аньцек кузенцять эзда, пцтай сембонь эзда, мезе ульсь эста основакс минь ужестонк сетьме патриархальнай эряфти, ашезь иляда пцтай мезевок. Эстонь весёлай компаниять эзда, кона корхнесь кузенцянь наковальнять ваксса, уфсесь мехса, щафнесь шарыхнень ланга шинат, залихвацки шавсь молаткаса календаф кшнить ланга да вачкась анекдотт вина рюмка ваксса, кивок, кода няеви, ашезь иляда шиса. А ламоц ся алятнень эстонь весялашиснон и игривостьснон матозень судьбась нинге лама пингта куломдост инголе. И, наверна, эста кивок синь эздост ашезь арьсекшне, што ся кузенцясь и ся компаниясь и ся дружественнай, радостнай настроениясь илядыхть живойста и апак нардак ёмла, рыжай цёранять ваймосонза, кона кяпе, фкянь-крда панарса ащекшнесь очагть ваксса ужеса и пингта-пингс мярьгондсь кяшемс сонь комотни цяткнень эзда.

Монь лятфнеманень потмаксса нинге тя пингс палы ся аф оцю, но вишке толсь. Сонь эздонза аерткшнихть сенем, якстерь и акшаза золотой лучт, сонь эсонза крьвязькшнихть, мярьгат, шяняфтф сетть и алува потмосонза валдомкшни кати-мезе нинге сяда оцю, лучистай, коста апак лотксек лийкснихть тараткакс ащи бликат. Тя толсь монь алязень кузенцяса. И, тейне арам, што сонь запасонц мон сявине идькс пингстон эсь ваймозон эряфонь ичкоздень путешествиянди. И сон ашезь мада нинге тянемс.

Криворовня, 1902 кизонь
июльть 24-це шистонза.

 

---

 

---

1. *) Пядсь аршинть нилеце пяльксшканза — 18 сантиметрашка
2. Нефтань таргай рабочай — нефтяник (Прим. ред.).

 

This is a translation and has a separate copyright status from the original text. The license for the translation applies to this edition only.
Original:
Translation: