Менам шудлун
| Менам шудлун (1941) by |
| Гижан кад: 1941, Йӧзӧдан во: 1941. Ӧшмӧс: Ананий Размыслов. Медводдза любов : стихотворенньӧяс. Сыктывкар : Комигиз, 1941. |
Ассьым шудлун вӧлись гӧгӧрвои;
Ӧні тӧда,
Кытчӧ кӧть ог мун:
Югӧр койӧ меным
Асъя войӧ
Менам шудлун —
Менам чужан му.
Менам шудлунӧй
Эм менам томлун,
Кыпыд сьӧлӧм,
Киподтуя удж.
Миян востерлунӧн
Кузяла кӧть вомлӧс
Повтӧг Войвыв саридз вудж.
Чужан му тэ менам,
Синмӧн судзтӧм,
Тэнад вынлӧн некӧн абу пом.
Пӧрысьмам ми... Мудзам...
Тэ пыр мудзтӧм...
Тэ пыр лунысь лунӧ лоан том.
Кыдз нӧ радейтчытӧг миян овны,
Олӧмыс кӧ долыдлунӧн тыр.
Сетам ассьыным ми
Тэныд томлун,
Том мед вӧлін
Нэмыд кежлӧ пыр.
Менам шудлун —
Сійӧ шуда аски.
Миян кузь туй
Джын выйын оз ор.
Югыд кадын аддзысьлам на, гашкӧ,
Паныдасьлам,
Ичӧтдырся ёрт!
Розъявны
Став вӧльнӧй мувыв пасьта
Кутас енэж улын гажа сад...
Паныдасьлам!
Пышйӧм вояс казьтам...
Кыпыд томлуннымлысь
Визув кад!
Визув кад!
Тэ вунны дыр он вермы.
Тӧда,
Коркӧ казьтылантор сюрас.
Сійӧн аслым пыр ме шуа:
Тэрмась овны талун
Тыр олӧмӧн бура.
Шуа аслым:
Олӧмысь ог дӧзмы.
Сійӧ гажӧн
Морӧс пытшкӧс пестӧ.
Мый кӧть став олӧмыс —
Йӧзлӧн?
Сэні неуна и менам места.
Сы вӧсна и меным
Татшӧм долыд,
Морӧс пиысь
Сьыланкыв оз куслы,
Сы вӧсна и
Лов тыр гажӧн ола,
Видза сьӧлӧм пиын
Помтӧм муслун.
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- its creator fought or worked for Soviet Union victory during the Great Patriotic War — so the 74-year protection term is applied;
- and the creator died before January 1, 1950 (more than 74 years ago), and has been not posthumously rehabilitated since that date;
- and this work was first published before January 1, 1950 (more than 74 years ago).
The author died in 1943, so this work is also in the public domain in other countries and areas where the copyright term is the author's life plus 80 years or less (if applicable), or the copyright term is 82 years or less since publication (if applicable).
Public domainPublic domainfalsefalse