Менам вӧлі еджыд шаль
| Менам вӧлі еджыд шаль (1927) |
| Гижан кад: 1927. Йӧзӧдан во: 1927. Ӧшмӧс: Ордым. 1927. №2. |
Менам вӧлі еджыд шаль,
Шӧвк тугъя, зарни дора,
Менам вӧлі милӧй друг,
Веж кудриа юрсиа.
Ветламӧ жӧ, ветламӧ,
Исток шорӧ чай вала.
Ог ли, ог ли аддзылӧй,
Ванвисдінса зонъясӧс.
Неужели кыдз пу абу,
Лоӧ ловпу керавны.
Неужели зонмыс абу,
Лоӧ дӧвеч любитны.
Кыдз пуыс тай вӧлӧма,
Ловпу тай керассьӧма.
Зонмыс пӧ тай вӧлӧма,
Дӧвечӧс любитчӧма.
Чери косӧд оз ветлӧдлы,
Ватӧг оз вермы овны.
Зонмыс нывсӧ так оз любит,
Сытӧг оз вермы овны.
Емва вожын уна чери,
Кебӧсысь уна абу.
Емва вожын уна зонъяс,
Ыбсаысь мича абу.
Сьӧлӧм шӧрын чорыд гӧрӧд,
Некор оз ӧд и разьсьыв:
Мӧд керкаын менам жӧник,
Некор оз ӧд и вайлыв.
Емва ю кузя кӧ кывта,
Шогыс менам бырлывлас.
Милӧй дорті кӧ ме муна,
Синва менам петлывлас.
Керка бердын кыдз пу быдмӧ,
Гӧрд чветысь на мичаджык.
Мӧдлапӧлын милӧй олӧ,
Быд зонмысь на мичаджык.
Шонді петӧ, шонді петӧ,
Ог тӧд, петас али оз.
Милӧй локтӧ, милӧй локтӧ,
Ог тӧд, ваяс али оз.
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- it was anonymously published before January 1, 1954 (more than 70 years ago).
This work is in the public domain in the United States because it was published before January 1, 1929 (more than 95 years ago).
This anonymous or pseudonymous work is also in the public domain in other countries and areas where the copyright term of anonymous or pseudonymous works is 96 years or less since publication.
Public domainPublic domainfalsefalse