Мемилы (Кедров)

From Wikisource
Jump to navigation Jump to search
Мемилы
Автор: Филипп Григорьевич Кедров
Кылдытон дыр: 1943. Источник: Кедров Ф. Г. Катя: Кылбуръёс но повесть / Дасяз но азькыл гожтӥз А. А. Ермолаев. — Ижевск: Удмуртия, 1989. — С. 44. — 112 с. — («Школьная библиотека»).

Мемилы


Алигес мон басьтӥ гожтэттэс,
Ми понна сюлмаськись мемие,
Пересьмид, шӧдӥське, ни тужгес
Агае быремысь кайгуэн.
Зэм, меми, мон понна но секыт
Агайлэн войнаын быремез.
Ма карод бен, та вакыт
Чик виртэк шат вормод тушмонэз.
Дуно мурт вал агай, зарни ки,
Со но зэм, мусое, валасько.
Колхозын со сярысь коть нош кин
Умоен гинэ, ӟэч вазиськоз.
Бен уго, сыӵеесь калыкъёс
Весь ваньмыз ми радын, мемие,
Лев кадесь, кышкатэк вамышто
Фашизмлэн пумитаз лек бое.
Пумйылтэм сьӧд кыез корало,
Торнало со гадэз жалятэк.
Западэ весь азьлань мыныло
Со пиос, кулонлэсь кышкатэк.
Западын со кый кар — сутоно,
Быдтоно со карез чалякгес,
Со карын сьӧд кыйёс туж уно,
Со кыйёс тӥнь сиё калыкез.
Тӥни со тушмонэз быдтонын
Усемын, батыр кадь, агае.
Юнматскы, эн сётскы куректын,
Кисырмем ымныро мемие.
Укыргес мӧзмыкуд пот кыре,
Вамышты каньылля бакчае,
Отысен мын, мемие, шур дуре,
Пумиськод кык веськрес тополен.
Бадӟымез — агайлэн мерттэмез —
Туж балбес, агай кадь ик веськрес,
Покчиез — со луоз мынамез —
Учкы тон, мемие, мӧзмыкуд.
Быдтомы, мемие, кыйёсты,
Тӥнь соку ик война но быроз.
Агай ке быремын, мон берто,
Улонмы нош крезен жингыртоз.


Действующей армия, 1943


Public domain
This work is in the public domain in countries where the copyright term is the author's life plus 70 years or less. See Copyright.