Колхозонь эряф/1940/10/Мезе стамось горясь

From Wikisource
Jump to navigation Jump to search
Колхозонь эряф (1940), № 10 Октябрь edited by Игнатьев Г. А., Дурнов Ф. С.
Мезе стамось горясь
Колхозонь эряф. Эрь ковонь литературно-художественнай и общественно-политическяй журнал. Мордовскяй Советскяй писателень союзть органоц. — № 10 Октябрь 1940. — с. 70—72
 
[70]
 
МЕЗЕ   СТАМОСЬ   ГОРЯСЬ

Фкя ошса эрясь городничай. Сонь ульсь цёрац, конань малость исть сата. Видеста мярыомс, городничайтьке аф семботольхть.

Весть городничайть цёрац ётай базарга, кульсы: крестьятт да рабочайхть корхтайхть, што малачни нужась, а нужать мархта и — горяське. Ся кизоня ашезь шаче сёрось. Сяс марявсть нужать и горять нежедемасна.

Сась цёрась куду и корхтай алянцты:

— Аляй, ся мезе стамось горясь?

— Аф содаса, цёрай, — каршезонза мярьгсь аляц.

Цёрать валдонза меле городничайсь ушедсь арьсема. Все-таки вопроссь оцю, эряви содамс. И синь ушеткшнесть кафцьке алят-цёрат думама тянь лангса: „Мезе стамось горясь?“

Ламос синнезь пряснон, но мезевок ашезь лисенде. Мекпяли ни пачкодсть тоза, што согласиндасть молемс горянь рамама.

— Рамамс эряви сон и ваномс, — корхтай городничайсь. — Пряцень, кода тяк синне, лия мезевок аф тият.

— Вов тянь монга аньцек шта йорайне азомс. Лиякс сонь коданга аф няйсак, — корхтай цёрац.

Но кинди молема рамама? Молемс атяти — ошса тевоц ляды стак ащезь, молемс цёранцты — од нинге, мишендихне могут васькафтомс.

Думандасть-думандасть — думандавсь вихца-важа тевсна. Путозь молемс горянкса цёранцты.

Городничайсь макссь тейнза ярмакт 300 цалковай, тройка алаша и лама недялянди ярхцамбяль. Крьвястсть штатолня, озондсть, штоба удалаль киц, и тусь цёрась горянь рамама.

Ардсь-ардсь — ваны: кафта оцю пект калякондайхть. „Нят, улема, козят алятне, — арьси цёрась. — Ожука, мон синь кизефтсайне“. Лоткафтозень алашанзон, сявозе вазьнянц, кода и тиенчнихть сембе, и кизефтезень, аф содайхть ли горянь мишенди, или, пади, синцень мимс ули.

Но эчке пекне шукадезь пряснон и азозь, што синь афи марьсезь, мезе стамось горясь.

Цёрась тусь сяда ичкози. Лама васьфнесь сон эчке пекта, но тейнза кивок изь азонда мишенди. Эста сон думась кизефтемс крестьянин. И вов сон арды паксява. Ваны — каршезонза [71]карьса карьсеф, плманжава нюрьги пазяйнь панарса щаф аля сай. Тя ульсь крестьянин. Васьфтезе сонь цёрась и корхтай:

— Азка, мужик, содат, пади, тон горянь мишенди?

— Кода ина, содан, — мярьгсь крестьянинць.

— Коса? — кенярдсь цёрась.

А вона вире трваса пенёконя лангса аля ащи... Сон горянь мишендема якась да, няйсак, ашесть мив.

А ся алясь ульсь пьяница, конац ся ошкаса, коса городничайкс ащи цёрать аляц, иредста коварясь и тяниенге похмелиять эзда коданга аф правондафневи пряц. Вага кинь крестьянць няфтсь горянь мишендикс.

Цёрась кенярдсь и кенярдемань пачк афи марязе, кода ардсь ся озадоть ваксс.

— Эй, аля, тонь ули мимс горяце? — ювадсь цёрась.

— Аш, — отвечась алясь. Но тоса сон шарьхкодсь, што тя горянь рамсись эряви тонафтомс. — Ули, да аф монцень, а брадозень.

— А коса братце?

— Хоть тяса сон, аф ичкозе — но тон сембе сяка аф мусак. И ся тага, — сон аф содаф ломаненди аф мишендсы.

— Ну, архт тон ина, — цёрась мярьгсь аляти.

— Мон аф молян, мон эряскодан куду.

— Ну, ламос што ли... Архт, вонот алашатне.

— Пожалай, дай молян... Аньцек вага мезе: лангс щаматненьге максыть.

Цёрась согласиндась максомс тейнза сятненьге.

Синь курокста полафтозь щамснон, алясь озась тройкати, сявозень цёрать ярмаконзон и тусь ардозь.

А цёрась лоскод щамонзон мархта озась алять вастс горянь учема. Пингсь — самай сёксель. Цёрась ащесь-ащесь, а горя аш нинге. Сон ушедсь эйндама, пекоцка вачсь, но горясь станяк таки аш.

Учендсь мянь сутка, эйндась и пекоц вачсь аф кирдемшкас. И эста, мле, аньцек марязе цёрась, што горясь вакссонза ни, но аньцек сон аф шарьхкочни.

— Вага ни горяське сась, вов тя горя, алязти аньцек сон аф пачфтеви, — корхни эстейнза цёрась.

Куду алянцты аф пачфтеви, но тяста сяда маласа ащи ошкаса эряй оцяц. Тоза пачфтеволь, аньцек молемс визькс, сяс мес цёрась пяк ни сязентьф-нозонтф. Арьсесь-тись тяфта, но сембе сяка решил молемс оцянц шири. Пачкодсь, — оцяц срхкай самай базару. Сон изезе няфте прянц. Кодак сувась кухняв — кяшсь пянакудть алу.

Оцянц тумда меле мольсь тоза лия аля. Сон яксекшнель оцянц рьванцты. И ушедсть кафонест пиравама. Пиравайхть, а пелихть. Вальмав варжакснихть. Варжакстсь весть алясь — няйсы: кудазорсь арды меки. Тусь пизем, и молемс базару ашель кода. Эводсь чужой алясь. Сей ёрай кяшемс, тов ёрай [72]кяшемс — эцесь пянакуд алу. Тоса торхцадсь тага фкя алянди. Месендема? Лисемс меки — сяка азсы, тозк ащемс — тага аф пара. Козонга аф комотят, ащема тозк. Плдорфнесыне тоса сельмонзон и ваймонцка пцтай аф тарксесы.

Оцяц сувась куду и ушедсь рьванц мархта винада симома. Оцяц — потмаксти да потмаксти, а рьвац коль аф симсы вина пайнц, а лихнесы кухняв. Кандсы кухняв и эцесы пянакуд алу, а тоста кунцесыне горянь рамайсь. Сон симозе васенце стаканть и корхтай:

— А вдь морамска тяни афоль кола?

Чужойсь, кона ащи мархтонза, эводсь. Ушедсь эняльдема, штоба сон афольхце тие сянь.

— Дай ярмакнень, эста аф моран, — мярьгсь цёрась.

Таргазень алясь ярмаконзон и максозень; синь эздодост ульсь ниле сятт цалковай.

— Аха, — мярьгсь эсь пачканза цёрась, — сяда цалковай выиграл ни горязень эзда.

Азоравась кандозе омбоце стаканть. Тянь цёрась тага симозе.

— Ну, тяни моран ни, — тага мярьгсь цёрась.

— Тят мора, — корхтай алясь, — лангстон щамненьге каясайне тейть.

— Кли тяфта, аф... Эрь ина каяйть. — Цёрась щазень щамонзон и лиссь пянакуд алда. Сувась оцянцты. Оцяц кенярдсь, ушедсь кизефнема, куване сувась да мес ашезь няев-кулев. Цёрась и отвечай:

— Монь, оцяй, эсон стамка вий ули: суван любовай ломанть пяли, и афи няйсамань кивок. И могу содамс, мезе ули кудсонза. Тонь сейчас ули врагце; мезе максат, кда мон сонь паньца?

— Тройка алаша, — мярьгсь оцяц.

— Ладна. Путфтт самовар, аноклак смала и толгат.

Мезе мярькф, ся тифоль.

Цёрась мярьгсь оцянцты панжемда кенкшть и ортатнень.

Сяльде сон нежедсь пянакудть малас и пяле ведаркашка смала — кжл пянакуд алу, мельганза вжнофтсь комор толга, а сянь мельге — лакай ведь карьхкяня. Но „врагсь“ кирдсь, изь лисе фкя карьхкяняти. Эста цёрась кафта карьхкат вдруг жольнефтсь. Алясь кодак комоти пянакудть алда да ласькозь, сонць марнек толгаса цямбаф.

Эста оцяц макссь тейнза тройка алаша, каванязе, и цёрась тусь куду. Тяни сон содасы, мезе стамось горясь. Сась, азондозе алянцтыге, но ся нинге изезе шарьхкоде.

Сёрмадозе  Пурдошанскяй  райононь  мокшень
Оцю  Пашад  велеста
М.  Бородачева