Медым ёртыд вӧлі бур
Важӧн Помӧд сиктын овлісны
Комияс: Тима да Пома.
Ӧтчыд найӧ гожӧмын кыкӧн
вӧвъясӧс корсьны мунісны пармаӧ.
Тылаысь тылаӧ шӧйтісны лунтыр,
вӧвъясыс налӧн эз сюрны некысь.
Увтасмис шонді — пемдыны мӧдіс,
Помалы сэки Тимаыс шуис:
„Оз жӧ нин, тыдалӧ, вӧвъясным сюрны-а,
пемдытӧдз вай жӧ туй вылӧ петам.
Да гортаным ньӧжйӧник лэччам.“
Пома питшӧгсьыс перйыліс матка,
видзӧдліс кодарӧ мунны, да шуис:
„Асывлань, буракӧ, сетчыны лоӧ“.
Пармаын пуяс тшӧкыдӧсь, кузьӧсь —
Чащаті мунӧны Тима да Пома,
панӧмась — кыӧны ош йылысь сёрни:
кодзувкоткарйӧс жуглӧма ош со.
Водзвылын ӧні на мунӧма, бесыд.
Мед эськӧ огӧ жӧ паныд ми сюрӧй.
Муртса на шуисны, важӧн нин сэні —
найӧлы паныд ыджыд ош воис.
Кык кок йыв сувтіс, сяркӧдчӧ гыжйӧн.
Тима да Пома повзисны ёна —
Ёкмуні сьӧлӧмныс, юрсиыс сувтіс.
Бордсяліс Пома, котӧртіс садьтӧг.
Коз пуӧ кань моз кышасис-кайис,
Тимаӧс ош дінӧ эновтіс ас кеж.
Тималӧн вежӧрыс воши ли, эз ли —
огӧй на тӧдӧй, висьталам бӧрын...
Уськӧдчис муӧ — оз вӧрӧд ки-кок,
оз лолав весиг — быттьӧкӧ кулі.
Тима дінӧ матыстчис ыджыд ош сэки,
тушасӧ исавны пон моз жӧ мӧдіс.
Кулӧмӧн чайтіс, эз вӧрзьӧд некыт,
чарӧстіс-горӧдіс, гӧнитіс водзӧ.
Кывлӧма Тима важ йӧзлысь коркӧ:
„Кулӧм мортъяслысь пӧ шойяс
Некор оз чашйыны ошъяс.
Сӧмын нин чашйӧны чуалан кадӧ“.
Пома лэччис пу йылысь сэки,
петӧма садьыс, сералӧ, ваксьӧ,
Тималысь юалӧ, наросьнӧ эльтчӧ:
„Мый нӧ тэд гусьӧнсӧ висьталіс ошкыс?“
Тималӧн сьӧлӧмын пузьӧдчис вирыс сэк,
Помалы пӧв-мӧд кыв тшупыштіс воча:
„Со мый, вежӧрыд кӧ эм, кывзы:
Омӧль жӧ тэнад тыдалӧ ёртыд,
Пикӧ воин да, эновтіс ас кежад тэнӧ.
Омӧль ёрт — абу ёрт —
Ёртыд вӧлі медым бур“.
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- its creator fought or worked for Soviet Union victory during the Great Patriotic War — so the 74-year protection term is applied;
- and the creator died before January 1, 1950 (more than 74 years ago), and has been not posthumously rehabilitated since that date;
- and this work was first published before January 1, 1950 (more than 74 years ago).
This work is in the public domain in the United States because it was published before January 1, 1929 (more than 95 years ago).
The author died in 1943, so this work is also in the public domain in other countries and areas where the copyright term is the author's life plus 80 years or less (if applicable), or the copyright term is 95 years or less since publication (if applicable).
Public domainPublic domainfalsefalse