Матӥ (Герд)
| Матӥ Автор: Кузебай Герд |
| Поттэмын: 1920. Источник: Куӟебай Герд. Люкам сочинениос : куать томен / Люказ Ф. К. Ермаков. — Ижевск: Удмуртия, 2004. — Т. 3. — Б. 20—30. |
Малпасько ке, кемалась ик ӧй вал кадь со…
Таӵе ик син азям пуксе.
Матӥ нылъёсмурт вал. Вань калык котыр ёросысь тодэ вал сое. Чеберез шоры учкыса, кӧтсы уг тыры вал…
Ма, кызьы уз учке!
Со сяна, номыр ас чебереныз синэз уг эркия вал. Котыр тэльёс, быронтэм нюръёс, муӵъёс. Коркаоссы удмуртъёслэн начаресь: синтэм кышноос кадесь, пичиесь укноё. Калык но, коркаосыз кадь ик, синтэм… секыт ужез ужаса губырмемын, ужен музъем борды пачкатэмын…
Сяська кадь чебер вал Матӥ!
Сяська сямен ик шуяз… шуяз — жалятэк сое дэрие лёгазы.
Шунды ӝужамлэсь азьло, пилемъёс гордэктыны куткыку ик, потоз вал ини со ӟезьы (капка) азяз: куткоз вал, тылобурдо сеен, кинэн ке но вераськыны.
Азвесь гырлы кадь вал солэн куараез: чылкыт, жонгрес. Вераськыны ке кутке, быдэс нунал кылзыны чидасал.
Ветлэм манерыз но солэн кыӵе ке но чебер вал: весь учкысал, ноку но синмыд ӧй жадьысал. Ӝужыт, веськрес мугоро, ӵуж баблес йырсиё… Урам кузя ву вылтӥ юсь уям кадь кошке вал со…
Нош синъёсыз! Сютэм кион но сием потонзэ вунэтысал, адӟысал ке солэсь синъёссэ: чебересь, визьмоесь, сяська кадь чагыресь!
Ваньмыз шоры учкоз, ваньмызлы капчи кыл вералоз, куддыр, турагай сеен, кырӟаны куткоз, — сыӵе адями вал Матӥ!..
Юон дыръя, Матӥ пӧлазы ке, кудӟем пиос но асьсэзыс умой возьны туртто вал. Матӥ дыръя шудны но, кырӟаны но, эктыны но мукет сеен, чебергем, кутко вал.
Таман воргоронъёс но, Матӥен пумисько ке, чебер кылъёс солы вератэк уг кошко вал:
— Умой адями тон, Матӥ, умой…
Озьы тӥни сое мурт калык но яратыса улӥз. Котькин со понна сюлмаське вал… Ма, уз сюлмаськы!.. Со сяна, гуртын нокин но улонэз чеберъясь, синэз эркиясь, мылкыдэз лӥятӥсь ӧй вал.
Котыр пеймыт. Улон-вылон секыт. Матӥ ке ӧй лусал, кин чебер гуръёсыз (кырӟанъёсыз) кырӟасал, визьмо кылъёс верасал, куректӥсь сюлэмез шунтысал!..
Кема ик ӧз сяськаяськы Матӥ… Сяська сеен — шуяз.
Кин-о, марлы сӧриз солэсь чебер улонзэ — нокин тодӥсь ӧвӧл: кудӥз ӟуч пилы кудӟем атаез ас киыныз мыскылъяны сётэм шуэ, кудӥз нош Матӥез уксёен алдаллям шуэ.
Оломар но куткизы сапальтыны.
Ваньзы, оло, шумпотӥзы, лэся.
Ӧжыт улса, Матӥ кинэн сюрем пиосын но юмша шуны куткизы.
Мар-о карод? Удмурт калык милям синтэм, нюръёсын, тэльёсын улэ.
Мае-о вала со?
Сьӧд кырныжъёс сеен куткизы Матӥез кокчаны, кинлэн мылыз потэ, ваньмыз куткиз сое серекъяны, таман думем пуныос но со шоры утны куткизы…
— Эй, Матӥ! Кызьы улӥськод? Кинлы нуиськод? — шуса кесясько вал куддыр тушо воргоронъёс.
Кудӥз шӧдтэк шорысь кырме вал солэсь кӧтсэ, гурт тыр кеськыса:
— Уромъёс, кӧто со, шунды понна! Ха-ха-ха!
Бамзэ киыныз ӵоктаса, бызьса кошке вал Матӥ дораз…
Зар-зар бӧрдэ вал…
Кулӥз чут Педорлэн кышноез… вожаса, тышкаса сое со вииз. Мар-о карод? — оген юртэз утьны уг луы.
Кемалась со Матӥез чакласа улэ вал ини. Табере, котькин сое мыскыл карыку, со ӧдъяз сое аслыз кышнолы юаны.
Мынӥз Матӥ доры.
— Жугод ук тон монэ, азьло кышнодэ сеен ик! — шуиз солы Матӥ. — Быдтӥз монэ калык саптаса…
Бӧрдны куткиз…
Жаль потӥз Матӥ Педорлы:
— Уг жугы, эн кышка! Яратыса, нуныяса тонэ возё!
Жугоз ке но, уз ке но, мар-о карод, кытчы йырдэ быдтод? Ӧд ке бызьы, быдтоз ас гурт калыкед ик, серем карса. Озьы бырны кылдэм, лэся, ини удмурт нылъёслы…
Бызиз Матӥ…
Тодӥз калык солэсь быземзэ — Педорез котьмар шуны куткизы: кышноед сыӵе, кышноед таӵе шуса, унь-мань карса серекъязы.
Сыӵе калыкез ваньзэ висал, дыр, Педор но, быдэс гуртлы пумит кызьы мынод?
Ӧжыт улса, паймоно кадь, куткиз Педор маин сюрем жугны. Жуге вал сое ӵукна, жуге вал ӝытазе, калыклэн син азяз но, лушкем но: уин, котькин чал-чал изьыку.
Жуге, сӧсыръя вал жадьтозяз, кион сеен, пиньзэ сыскыса… Дугдэм бераз, жаляны кутке вал, куддыр нуныяса бӧрдэ вал:
— Калык быдтэ улэмме, калык!
Вазьвыл (первой) нуналысен ик куткиз со Матӥез жугны…
Соку урамын калык ӝытозь Педорез мыскыл карса улӥз: кудӥз бодыен корказэ тышказ, кудӥз нош кышнозэ котьмар шуса серекъяз:
— Юмшаз пуны сеен но Педорлы мылессэ ваиз!
Уйбыт ӵашетӥзы, кесяськизы.
Пеймыт луэм бере, уин, Педорлэсь укнозэ тышказы, мыскыл карса, капказэ тэкитазы, вуж кутъёс, куроос ошылӥзы…
Учкыны ик ӵукна оломар кадь вал.
— Марлы милемлы ёрмиськоды? Мар-о карим ми тӥледлы? — шуса, кема бӧрдӥз Матӥ.
Сьӧд пилем сеен, номыр куареттэк пукиз Педор…
Одӥг тол ортчыса, паймоно кадь луиз Матӥ: чал-чал пукись… номыр уг вераськы…
Ветлыкуз малпаськыса, йырзэ мыкыртыса ветлыны куткиз. Куддыр султыса, синъёссэ бадӟымесь карса куткоз вал со музэ учкыны… Куддыр шап-шап вия вал бамтӥз синкылиез.
Кышкано кадесь луизы солэн синъёсыз, мур, гудӟем кадь, гуаськизы, шушмизы.
Лемлет бамыз кӧдэктӥз…
Вераськыны но со секыт луиз. Мае ке юаськод ке, уг шӧды вал.
Олокӧня пол юам бере гинэ, иземысь султэм мурт сеен, куалектыса кеськоз вал:
— Ой! Мар-о?..
Учкоз вал бадӟымесь-бадӟымесь синъёсыныз шоре… Кема учкыса, лулӟыса, куддыр бӧрдоз вал, куддыр олокудняла малпаськыса пукоз вал… Сыӵе луиз, ноку но куректонэз тодтэк, весь гырлы сеен серекъясь, турагай сеен кырӟась Матӥ…
Сайказ одӥг пол Педор вазь. Пеймыт на вал али. Ӧжыт кормаськыса, ӵыжиз со пыдыныз вӧзысьтыз Матӥез: котьку, уйбыт жугыса, ӵукна кӧтаз ӵыжаса сайкатоз вал сое со.
Куалектыса чирак кеськоз вал Матӥ но собере, кион улэ сюрем ыж сеен, чал-чал кариськоз вал.
Али ӵыжыкуз, Педор сое ӵыжны ӧз шедьты.
— Султӥз-а, мар-а? — шуса малпаз.
Кылзӥськиз… Корка пеймыт на али. Котыр чал-чал. Одӥг лул но ӧвӧл. Кыдёкысен гинэ кылӥське тэльлэн куашетэмез, каньылъя лулӟылэмез; олокытын, азвесез кисьтэм сеен, шур жонгыртэ… Тулыс вал соку.
Кыктэтсэ кужмогем ӵыжиз на Педор. Нош ик нокинэ ӵыжны ӧз шедьты. Ӟус вылысь ведра пограз. Собере нош ик коркан, гуын кадь, чал-чал луиз.
Азьло сеен ик, педлон тэль куашетэ, шур жонгыртэ, тулыс вуса, музъем шока…
Ньыльпыд йылаз султыса малляз Педор котыр куро валессэ… Утчаз Матӥез — ӧз шедьты.
— Пун-н-н-ы! Шайтан! Уд пегӟы мон ки улысь. Шедьто — виё…
Отысь-татысь утчаз, корка азяз потӥз.
Кеськиз… Ӧвӧл нокин но…
Бызьса сеен мынӥз скал гидэ. Отын, сюдон улын, Матӥлэн шӧй вордкем нуныез ватэмын вал. Ӵукна, куддыр уин но, Педор кулэм кадь изьыку, лыктэ вал Матӥ та скал гидэ, нуныез дорын погылляськыса бӧрдэ вал…
Пыриз Педор гидэ, скал сиёнзэ сиемысь дугдӥз.
Татын но Матӥ ӧй вал… Ышиз, тёпак олокытчы луиз!..
Йыраз изьытэк, визьтэммем сеен бызьылӥз Педор гурт кузя. Пересь Мавра доры пыраз. Одӥг пол, со дорысь Матӥез шедьтыса, йырситӥз гыж кыскыса дораз ваиз со. Татысь но ӧз шедьты.
Вань калыклэсь юаз: нокин но Матӥез адӟымтэ, уг тодо.
Ышиз Матӥ.
Лыназе пал Педор бызьса кошкиз Куреггуртэ, Матӥлэн вордкем гуртаз. Куддыр, тыш бодылы чидатэк, татчы но пега вал Матӥ.
Утча… Пересь атайзэ Матӥлэсь ӧжыт гинэ ӧз жугы.
Ӧз шедьты…
Со кошкем бере, ӟус вылэ пуксьыса, зар-зар бӧрдны куткиз Матӥлэн пересьмем анаез:
— Марлы меда тон сыӵе шудтэм вордкид… Куанер нуные, зарни комоке!
Пересь атаез нош выжез бодыен йыгаса кесяськиз:
— Пуны, кӧс кион тон, Педор… Сӧсыртӥд шудтэм Матӥме. Уен-нуналэн, зарниез сеен, мон сое жаляса, нуныяса гинэ будэтэм вал… Сьӧлык луоз тыныд, Педор, сьӧлык. Быдтӥд нуныме!..
Чал-чал, мылыз поттэк, огназ бертӥз Педор Куреггуртысь: йырзэ мыкыртыса, оломар малпаськыса.
Ӧз шедьты Матӥез…
Шим-шим луиз котырыз…
Быриз лымы бусыосысь. Мур нюкъёсын гинэ, шундылэсь пегӟыса, кӧня ке улэ на вал. Со но, синкыли сеен, музъеме шупаса быре вал…
Пересь кышно сеен улэ вал шунды улын сьӧд музъем шунткыса. Сюрес вылтӥ мыныку, пыд борды сюй лякиське вал. Зӧк тырмыса, усьса, нош ик ӧчкарса сеен люкаське вал… Оло, кин ке, сюрес вылэ выдса, адямилэсь пыдзэ кырманы турттэ вал, лэся; тулыс бусэн кудӟем муртъёсыз музэ погыртыны ӧдъя вал, лэся.
Мур нюкъёсын кесяськыса, оломарлы шумпотса бызе вал тулыс ву.
Бусы дуръёсын пужым тэль, оломар быдӟа батыр сеен, инме пыкиськыса сылэ вал. Каньылъя вож баблес йырсиоссэ някыръяса… дугдылтэк ас понназ куашетса…
Отысь, кыдёкысь, тулыс вуэмлы шумпотыса куашетэ вал-а со?..
Выль улон вордкемлы, выль шуд лыктэмлы шумпотэ вал-а со?..
Ӵуказеяз ветлӥз Педор гуртэтӥ, бусыостӥ, тэльёстӥ, Матӥез утчаса.
Ӝытозь ветлӥз…
Собере, олокытын кудӟыса, урам кузя уйбыт кырӟаса, ас понназ вераськыса ветлӥз. Ӵукна пал гинэ, гуртлэн пумаз вуса, телеграп юбо улэ дэрие ымныр вылаз усьса, умме усиз.
Серекъясь шунды ӝужатозь, весь Педорлэн дораз телеграп юбо кырӟаз, жонгетӥз: аслэсьтыз мӧзмоно, бӧрдоно кадь кырӟанъёссэ дугдылтэк кырӟаз.
Котькытчы вуо телеграп езъёс, котьмае тодо, — ӧжыт-а соослэн веранзы, кырӟанзы? Соин соос уйбыт жонгетӥзы…
Ӧз шедьты Педор Матӥзэ: изэз вуэ куштэм сеен, со олокытчы луиз…
Гуртын калык нош ик оломар но сапальтыны куткиз. Котькинлэсь но тыросгем воргоронъёс кыл пӧркмазы. Педорез исаса, котьмар шуса серекъязы.
Соосыз кылзыса-кылзыса, Педорлэн йырыз кур луэ вал: чидатэк, серекъясь муртэ чыртытӥз гинэ кырме вал со жугны.
Кышноос чалмыткизы…
Ву вайны гинэ ветлыкузы, шур дурын лушкем соос сипырто на вал…
Нылъёс но азьло кадь шулдыресь ӧз луэ ни: шер потаны куткизы уин юмшаны, ӝытазе кырӟам куаразы но туж шер кылӥськыны куткиз…
Улон сямзы но Матӥтэк олокыӵе шим-шим луиз.
Озьы улса-улса люкаськизы одӥг тэк улонэ (празднике) быдэс гуртэн Матӥез утчаны. Коркалы, азбарлы быдэ эскеризы, мур нюкъёсы но пыразы, тэльысь но утчазы — ӧз шедьтэ.
Кесяськизы — ӧз сёты Матӥ соослы куаразэ: чал-чал…
Оломае но тодазы вайны куткизы.
Олокинлэн тодаз лыктӥз Педорлэн одӥг уй гурт кузя Матӥ сьӧры зырын бызьылэмез. Гольык пыд, улысь дэремен гинэ, визьтэммем сеен кесяськыса, Матӥ соку бусые бызьса кошкиз.
Малпазы, малпазы… Кызьы ке но Матӥез кытчы ке шайтан нуиз, дыр, шуса, кенеш пуктӥзы. Озьы сяна, быдэс адями кытчы-о, пе, ышоз?..
Кылем арын но Такъянайлэсь пичи нылзэ шайтан нуллӥз. Йырыз кур луса каргам Такъянай нылзэ, шайтан мед нуоз шуса но, кык толэзь нылыз олокытын ышса улӥз. Со тырысь нылыз кылтэм луиз: вераськемез но уг луы, синъёсыз шушмизы, учкыны — кышкано кадесь.
Шайтан — со умойтэм маке! Солэн котьмар но каремез луэ…
Озьы вераськемзэс кылса, поп доры но ветлӥз Педор, скалзэ вузаса но, молебень править картӥз — нокыӵе но пайдаез ӧз луы.
Матӥ ӧз берты…
Педор огназ куректыны, мӧзмыны куткиз Матӥезлэсь… Кызьы уз мӧзмы, дымак огназ кылем бере!
Мӧзмыса юны куткиз. Кылемзэ, скал вузаса шедьтэм уксёзэ но берпумзэ быдтӥз.
Со виын бертӥз солдатысь Пильмон — ӧжыт визьмаз Педорез. Пильмонлэн службаын улэм понназ медальёсыз вал, зарни часэз, собере оломар быдӟа арганэз (мызганэз)…
— Визьтэмесь тӥ! Поп доры молебень править карыны, пе, адями ветлоз-а? Утчаны сое кулэ, — ӝот-ӝот вераз со калыклы, арня ӝытазе урамын люкаськыса пукыкузы.
Со верам сеен, нош ик люкаськиз калык Матӥез утчаны, котыр куинь гуртысь огазеяськизы. Пильмон-солдат ассэ командир кариз.
Ӵаш поттыса утчаны кошкизы. Ӵукна тырысь ӝытозь вань тэльёсыз, куакъёсыз турказы, таман вылэ но пыӵалэн ыбылӥзы.
Нокызьы но Матӥез ӧз шедьтэ…
— Венчатьтэм кышно картэзлэсь пегам бере, со туж ик умой ӧвӧл ни, — шуиз Пильмон, часэзлэсь жильызэ сэзъяса.
Дугдӥз калык Матӥез утчамысь.
Педор нош, куректыса, кытчы пырны валатэк, со тырысь куткиз маиз вань винаен вошъяса юны. Визьтэм кадь луиз…
Куасьмиз шунды шорын музъем… Вож гуждорен шобретэн сеен шобырскиз, сяськаяськиз, бадӟым праздниклы нылъёсмурт вошкем сеен, ассэ чеберъяса вошкиз.
Вало шур пичиёмиз — берен ас нюказ пыриз. Чиль-чиль, луо узвесь сеен, со табере бызе тэльёстӥ, возь вылъёстӥ. Ӝытазе тэль адске вал шурын, кыӵе ке но чебер, гордалэс чильтэр (чильпет) сеен улэ вал, тӧл тӧламъя ворекъяса.
Уин дугдо вал кырӟамысь тылобурдоос (папаос). Пӧркмаськисьёс сеен ӝутко вал шур вылэ бусъёс…
Чал-чал луэ вал соку котыр.
Одӥг чорыгась Онсин гинэ уйбыт изьтэк ветлэ вал татӥ, пыжын уяса. Кыӵе ке пӧркмаськись сеен, шӧдтэк шорысь шуак потэ вал со куакъёс сьӧрысь, ву вылтӥ уяса, гожъя вал пыжыныз шурез кузяла но, вамен но, шурлэсь мурзэ-лапегзэ утча вал. Куддыр инмарлы вӧсяськыса киська вал вуэ сетьёссэ, собере, ӧжыт улса, шачыр гинэ чилясь чорыгез поттэ вал.
Вань ултозяз улӥз со чорыгаса: шур вылын улса пересьмиз. Соин со, атаез сеен ик, укыр яратэ вал шурез. Оломае но тодэ вал, оломае но чакла вал. Вить чиньыоссэ сеен тодэ вал со: кытын кыӵе чорыг улэ, маин сое кутылыны луэ. Дышетонлы уг ёрмы вал…
Одӥг пол, уйбыт ужаса жадьыса, ӵукна югыт луыку ваське вал со пыжаз уллань шур кузя. Пыж ас понназ ваське вал. Онсин пыжын гаӵолӥн выдса, умме усем кадь луса кылле вал. Шунды серекъяса потэ вал тэль сьӧрысь…
Шетак оломар кылӥськиз Онсинлэн пель сьӧраз: оломар куак сьӧрын жомбыляк вуэ тэтчиз кадь. Туж кышказ Онсин — пыд йылаз султӥз. Чорыг ке со, туж шӧтэм бадӟым кадь. Онсин татысь вань чорыгез, таман жомбыльтэмзэ но тодэ.
Чаляк потӥз Онсин пыжысьтыз шур дуре, собере лушкем куак сьӧртӥ мынӥз со интые: учкыны кулэ, маин-о умойгес луоз кутны со чорыгез — сетен-а, острогаен-а.
Учкыса ик ӧз вутты пересь Онсин: олокин, кышкано кадь мар ке, жомбыляк вуэз выретӥз, собере, шур дурысь ньӧръёсыз тӥяса, урод кеськыса, Онсин шоры шуккиськыса, бызьса кошкиз.
Усиз Онсин музэ, марзэ-созэ валатэк. Вылтырыз, вуэн кисьтэм сеен, юзыр-кезьырак луса кошкиз. Туж кышказ… Ма, уз кышка! Со мурт гольык, сьӧд, кот, тыпыль-тапыль мар ке вал. Таӵе ик адӟе Онсин — со кизэ вылэ ӝутыса потӥз шурысь. «Осто, Инмаре! Кышномурт вал, таӵе ик ноныё-маро…»
Ӧжыт визьмаськем кадь луса мынӥз Онсин шур дуре но отысь шедьтӥз сьӧдэктэм, кесяськем кышномурт дэрем. Ӝутӥз Онсин со дэремез, шунды шорын пазьласа учкиз, собере куштӥз. Кошкыны ӧдъя вал ини но, Матӥ тодаз лыктӥз.
«Та дэрем кызьы ке но солэн, дыр! Со кӧшкемано кадь маке Матӥ вал, дыр», — шуса малпаз Онсин. Собере вӧсяськыса, со кышномурт дэремез басьтыса, пыжаз пуксиз.
Ӵукна сайкаса, тэльын кырӟало вал ини тылобурдоос. Олокытысь тэль сьӧрысь ӝуткыны куткизы пилемъёс. Шунды весь вылэ ӝуткыса, пӧсь луны куткиз.
Шур, мылыз поттэк сеен, каллен бызе. Солэн вылтӥз Онсин пыжын уяса кошке…
Шедьтӥзы Матӥез…
Сое утчаны нош ик ветлӥзы быдэс гуртэн. Мукет гуртъёсысь но калык ветлӥз.
Онсин солэсь верамзэ кылзо шуса шумпотӥз. Со инмарез буре вайса вера:
— Табере Матӥ — азьло Матӥ ӧвӧл ни: тыбыраз гон потэмын, бераз пичи быжыз вань. Кымсаз маиз вал — ӧй адӟы. Сюръёсыз вал кадь.
Калык туж тырос вал. Котькинлэсь азьло мынэ вал Онсин, Матӥез адӟи шуса, ушъяськыса возьматэ вал калыклы пазьласа шедьтэм кышномурт дэремзэ.
Ӵашето… Пильмон-солдат пыӵалэн вал; кудӥз зыръёсын, бодыосын: кин-о тодэ, оло, собере Матӥ шайтан луиз? Пиос бӧрсьын бызьса мыно вал кышноос, отӥ-татӥ кылзӥськыса, ымзэс усьтыса бызьыло вал пиналъёс.
Кема утчазы Матӥез тэлетӥ. Ӧй шедьтысалзы, дыр, но, пуныос зынъяса шедьтӥзы. Матӥ чылкак гольык, дэремтэк, оломар быдӟа пужымлэн йылаз ик тубыса, кый сеен, котыртӥз бинялъяськем.
Сое адӟыса, калык кесяськыны куткиз, мед васькоз шуса но, Матӥ ӧз кылзы — ӧз васькы. Соку Пильмон киоссэ ик пажалъяса тубиз Матӥ доры, вал сеен кырмиськиз солэн пыд бордаз.
Воргоронъёс серекъяны куткизы. Кудӥз, кышномуртлэсь гольык вылтырзэ медам адӟы шуса, кыдёкегем кошкизы. Кышноос, нылъёс керпотыса бамзэс ӵоктазы…
Пильмон вань кужмыныз васькытыны турттыса кыскиз Матӥез но, номыр каремез ӧйлась — юн кырмиськем Матӥ пужым борды.
Соку юрттыны тубизы воргоронъёс, таман тушоосыз но тубизы: кузьылиос сеен.
Ӵашетны куткизы: кудӥз кесяське, кудӥз серекъя. Кыкез олокызьы пужымысь музэ усизы… Мырдэм вормизы Матӥез.
Кутэм душес сеен, со олокинлэн кияз выре вал ини: синзэ кышкаса бадӟымесь карса кормаське, куртчылӥське, одӥг кыл но вератэк.
Кышноос пушкын олокин бӧрдны куткиз. Пужымысь олокин култозяз кесяське, гозы курса. Нылъёс пегӟизы, медаз адӟе, кызьы пиос Матӥлэсь гольык вылтырзэ кырмало шуса.
Матӥ соослы кый кадь уг сётскы вал. Собере сое кутӥзы трос кузя — Матӥ выремысь дугдӥз, визьтэммем сеен, тэль тыр туж шуш кеськиз. «Ой-й-й!» шуса, тэлетӥ солэн кесяськемез вӧлдӥськиз. Мозмыткыны ӧдъя на вал Матӥ но — сое керттылӥзы гозыен.
Кема сылӥз, тае учкыса, номырзэ валатэк, Педор. Собере адӟиз гольык Матӥез. Оломар тодаз лыктӥз, кеськиз, олокытысь зыр шедьтыса, Матӥез шуккыны бызьса лыктэ вал ини но — пиос ӧз сётэ. Матӥ нош лудкеч сеен кесяське, куртчылӥське вал. Мырдэм сое кутны вормо вал пиос. Мырдэм гуртэ нуса кошкизы… Каньылля чалмиз калыклэн ӵашетэмез…
Номыре валатэк кылиз Педор тэле огназ, бадӟым пужым улэ… Собере Матӥез тодаз лыктӥз. Тылын сутэм кадь сюлмыз луиз, бӧрдыны куткиз.
Жаль потӥз солы Матӥез…
Олокудняла озьы пукиз но, визьтэммем сеен, пырак Вало шур дуре кошкиз…
Ӧжыт улса, оломар Валое жомбыляк тэтчиз, кык пол кеськиз, собере чалмиз…
Соку лыназе вал…
Шунды музъемез ик сутны турттэ вал. Тӧл ӧй вал. Калыклэсь кышкаса, тэльлэн пыдсаз ик пегӟизы тылобурдоос…
Калык куара чалмиз… Нокин но тэльын ӧвӧл ни… Чал-чал…
Ӵуказяз шедьтӥзы Валоысь Педорез… Ватӥзы…
Матӥез нош олокытчы бадӟым каре керттылыса нуса кошкизы, визьтэммем калыкез возён корка.
Оломарлы Матӥ туж бӧрдса кошкиз…
Озьы быриз Матӥ…
Озьы быро, дыр, тыросэз удмурт нылъёс…