Матфейсянь святӧй бурвисьталӧм

by Шергин Александр Васильевич

МЕДВОДДЗА ЮР.

Рӧдвисьталӧм Исус Кристослӧн Давид пилӧн, Авраам пилӧн.

Авраам чужтіс Исаакӧс. Исаак чужтіс Иаковӧс. Иаков чужтіс Иудаӧс и вокъясӧс сылысь.

Иуда чужтіс Фаресос и Зараӧс Фамарасянь. Фарес чужтіс Есромӧс. Есром чужтіс Арамӧс.

Арам чужтіс Аминадавӧс. Аминадав чужтіс Наасеонӧс. Наасеон чужтіс Салмонӧс.

Салмон чужтіс Воозӧс Рахавасянь. Вооз чужтіс Овидӧс Рудасянь. Овид чужтіс Иессейӧс.

Иессей чужтіс Давид сарӧс. Давид сар чужтіс Соломонӧс Урия гӧтырсянь.

Соломон чужтіс Ровоамӧс. Ровоам чужтіс Авияӧс. Авия чужтіс Асаӧс.

Аса чужтіс Иосафатӧс. Иосафат чужтіс Иорамӧс. Иорам чужтіс Озияӧс.

Озия чужтіс Иоадамӧс. Иоадам чужтіс Ахазӧс. Ахаз чужтіс Езекияӧс.

Езекия чужтіс Манассияӧс. Манассия чужтіс Амонӧс. Амон чужтіс Иосияӧс.

Иосия чужтіс (Иоакимӧс. Иоаким чужтіс) Иехонияӧс и вокъясӧс сылысь мунӧм водзын Вавилонӧ.

Мунӧм бӧрын жӧ Вавилонӧ Иехония чужтіс Саладиильӧс. Саладииль чужтіс Зоровавельӧс.

Зоровавель чужтіс Авиудӧс. Авиуд чужтіс Елиакимӧс. Елиаким чужтіс Азорӧс. Азор чужтіс Садокӧс. Садок чужтіс Ахимӧс. Ахим чужтіс Елиудӧс.

Елиуд чужтіс Елеазарӧс. Елеазар чужтіс Матданӧс. Матдан чужтіс Иаковӧс.

Иаков чужтіс Иосифӧс, верӧсӧс Мариялысь, кодсянь чужис Исус, коді шусьӧ Кристос.

И сідз быд рӧд Авраамсянь Давидӧдз дас нёль рӧд; и Давидсянь Вавилонӧ мунӧмӧдз дас нёль рӧд; и Вавилонӧ мунӧмсянь Кристосӧдз дас нёль рӧд.

Исус Кристослӧн чужӧм вӧлі сідзи: чунькытшалӧм бӧрын сылысь мам Марияӧс Иосифкӧд, водзджык найӧ ӧтлаын овтӧдз на, тӧдчис, мый сы кынӧмын эм Святӧй Духсянь.

Иосиф жӧ сылӧн верӧс вӧлі бур и эз кӧсйы сійӧс янӧдны, а кӧсйис гусьӧн лэдзны сійӧс.

Сійӧ жӧ сылы думайтмысьт, со Господьлӧн Ангел вӧтӧн петкӧдчис сылы и шуис: Иосифӧ, Давидлӧн пи, эн повзьы босьтны ассьыд гӧтыр Марияӧс; чужан ӧд сыын эм Святӧй Духсянь.

Чужтас жӧ пиӧс и пуктан ним сылы Исус; сійӧ ӧд мынтас ассьыс йӧз найӧ грекъясысь.

Быдсӧн жӧ сійӧ лои, мед артмас Господьсянь шуӧм пророкӧн, коді шуӧ:

Со ныв кынӧмас босьтас и чужтас пиӧс и пуктасны сылы ним Еммануил, мый шусьӧ «миянкӧд Ен».

Чеччымысьт жӧ Иосиф узянінысь, керис, кыдз тшӧктіс сылы Ангел Господьлӧн и босьтіс гӧтыр ассьыс.

И эз тӧд сійӧс, кыдзи медбӧрын сійӧ чужтіс ассьыс медводдза пиӧс, и сійӧ пуктіс сылы ним Исус.

МӦД ЮР.

Кор жӧ Исус чужис Иудейскӧй Вифлеемын, Ирӧд сар лунъяс дырйи, сэки воисны Иерусалимӧ асыввывсянь тӧдысьяс и шуӧны:

«Кӧні эм выль чужӧм иудейскӧй сар, аддзылім ӧд ми асыввылын кодзув сылысь, и воим юрбитны Сылы».

Тайӧ кывмысьт Ирӧд сар повзис, и быд Иерусалим сыкӧд.

И чукӧртмысьт быд медводдза попъясӧс и велӧдчӧмаясӧс йӧз шӧрысь юаліс налысь: «Кӧн колӧ чужны Христослы?»

Найӧ шуисны сылы: «Иудейскӧй Вифлеемын. Сідз ӧд гижӧма пророкӧн:

И тэ Вифлеем, му Иудалӧн, нинӧмӧн абу ичӧтджык Иуда ыджыд каръясысь: тэысь ӧд петас нуӧдысь, коді видзас менсьым йӧз Израильӧс». опечатка

Сэки Ирӧд гусьӧн кормысьт тӧдысьясӧс, юавліс налысь кодзув петкӧдчӧм дыр.

И ыстымысьт найӧс Вифлеемӧ шуис: «Мунӧ и ёна юасьӧ кага йылысь; и кор аддзанныд Сійӧс, висьталӧй меным, мед и ме муна юрбитны Сылы».

Найӧ кывзымысьт сарӧс, муніны. И со кодзув, кодӧс аддзылісны найӧ асыввылын, муні на водзын; кыдз медбӧрын воис и сувтіс сэтчӧ, кӧні вӧлі кага.

Аддзымысьт жӧ кодзув сувтӧм, найӧ гажӧдчисны зэв ыджыд гажӧн.

И вомысьт керкаӧ, аддзисны кагаӧс сійӧ мам Мариякӧд и юрбитісны Сылы муӧдз: и восьтымысьт ассьыныс буръяс, мыччисны Сылы козинъяс: зарни, ладан и смирна.

И босьтмысьт вӧтӧн тшӧктӧм не бергӧдчыны Ирӧд дінӧ, мӧд туйӧн муніны асланысладорӧ.

Найӧ жӧ мунӧм бӧрын со Ангел Господьлӧн петкӧдчис Иосифлы вӧтӧн и шуӧ: «Чеччы, босьт кагаӧс и мам Сылысь и пышйы Египетӧ, и ов сэтӧн, кытчӧдз ог висьтав тэныд; кӧсйӧ ӧд Ирӧд корсьны кагаӧс, мед виас Сійӧс».

Сійӧ чеччис, босьтіс кагаӧс и мам сылысь войын и муніс Египетӧ.

И вӧлі сэтӧн Ирӧд кувтӧдз; мед лоас Господьсянь шуӧм пророкӧн, коді шуӧ: «Египетсянь Ме кори ассьым Пиӧс».

Сэки Ирӧд аддзымысьт, мый серамӧ воис тӧдысьяссянь, зэв лӧгасис и ыстіс вины Вифлеемӧ и сы гӧгӧр быдлаӧ быдсӧн зон кагаясӧс, кык арсянь и улӧджык, сэкисянь, кор юаліс тӧдысьяслысь.

Сэки лои Иеремия пророкӧн шуӧм, коді висьталӧ:

«Гӧлӧс Рамаын кылӧма вӧлі, бӧрдӧм, оллялӧм и ыджыд горзӧм; Рахиль бӧрдӧ ас челядь вӧсна и оз кӧсйы дугдыны, мый найӧ абуӧсь».

Ирӧд жӧ кулӧм бӧрын со Ангел Господьлӧн вӧтӧн петкӧдчӧ Иосифлы Египетын

И шуӧ: «Чеччы, босьт кагаӧс и мам Сылысь, и мун Израильскӧй муӧ: куліны ӧд корсьысьяс лов кагалысь».

Сійӧ чеччис, босьтіс кагаӧс и мам Сылысь и воис Израильскӧй муӧ.

Кывмысьт жӧ, мый Архелай сарствуйтӧ Иудеяын ас бать Ирӧд местаын, повзис сэтчӧ мунны, а босьтмысьт тшӧктӧм вӧтӧн муніс Галилейскӧй оланінъясӧ.

И вомысьт сэтчӧ овмӧдчис карын, коді шусьӧ Назарет, мед лоас шуӧм пророкъясӧн, мый Сійӧ Назарейӧн шусяс.

КОЙМӦД ЮР.

Сійӧ лунъясӧ воис Иоанн Креститель, и велӧдӧ Иудейскӧй пустыняын.

И шуӧ: «Пӧкаитчӧ, матыстчис ӧд небеснӧй сарство».

Сы понда ӧд и висьталіс Исая пророк шуӧмӧн: «Гӧлӧс ӧдйӧн вӧйпысьлӧн пустыняын: дасьтӧй туй Господьлы, лӧсьӧдӧ Сылы ветланін».

Ачыс жӧ Иоанн паськӧм новліс верблюд гӧнысь и вӧнясьліс кучик тасмаӧн: а сёян сылӧн вӧлі акридаяс и ачыс артман ма.

Сэки Иерусалим, быд Иудея и быд Иордан гӧгӧрса петалісны сы дінӧ

И пыртчисны сысянь Иорданын, висьталӧмӧн ассьыныс грекъяс.

Аддзымысьт жӧ (Иоанн) локтӧм уна фарисейяслысь и саддукейяслысь сы дінӧ пыртчыны, шуис налы: «Ехиднасянь чужсьӧмъяс, коді тіянӧс велӧдіс пышйыны локтан лӧгысь?

Керӧ жӧ ӧні сідзи, мед тӧдчас пӧкаитчӧм тіян:

И эн пондӧ шуны ас костын: миян бать эм Авраам; висьтала ӧд тіянлы, мый вермас Ен тайӧ изъясысь вӧчны пиян Авраамлы.

И чер нин пу вуж дінын куйлӧ; и сідз быдсяма пу, коді оз вай бур вотӧс, кералӧны и вувзялӧны биӧ.

Ме пырта тіянӧс ваӧн пӧкаитчӧмӧ, а ме бӧрын локтысь ёнджык меысь, кодлы ме ог туй кӧмкотъяссӧ нуны. Сійӧ пондас пыртны тіянӧс Святӧй Духӧн и биӧн».

Зыр Сы киын, и Сійӧ весалас ассьыс гумла и чукӧртас ассьыс шобді жытникӧ ; а идзас сотас куслытӧм биӧн.

Сэки локтӧ Исус Галилеяысь Иордан вылӧ Иоанн дінӧ пыртчыны сысянь.

Иоанн жӧ эз лэдзлы Сійӧс и шуис: «Меным колӧ пыртчыны Тэсянь, а тэ-ӧ локтан ме дінӧ?»

А Исус шуис сылы воча: «Лэдз ӧні; сідзи ӧд колӧ миянлы тыртны быдсяма веськыд». Сэки Иоанн сибӧдӧ Сійӧс.

И пыртчымысьт Исус петі регыд ваысь; и со воссисны Сы вылын небесаяс, и Иоанн аддзис Дух Енлысь лэччӧм, кыдзи гулю, и локтӧм Сы вылӧ.

И со гӧлӧс небесаяссянь шуис: «Тайӧ эм менам зэв муса Пи, кодын быдсӧн менам бур».

НЁЛЬӦД ЮР.

Сэки Исус нуӧдӧма вӧлі духӧн пустыняӧ, ылӧдӧм понда дявӧлсянь.

И видзавмысьт нелямын лун и нелямын вой, сы бӧрти тшыгмис.

И вомысьт Сы дінӧ ылӧдлысь шуис: «Тэ кӧ Енлӧн Пи, шу, мед тайӧ изъяс лоасны няньяс».

А Сійӧ шуис воча: «Гижӧд вылын эм, не ӧтик нянь понда ловъя лоӧ морт, а быдсяма кывйысь, коді Ен вомысь петӧ».

Сэки босьтіс Сійӧс дявӧл Святӧй карӧ, и сувтӧдіс Сійӧс вичко вевт вылӧ,

И шуӧ Сылы: «Тэ кӧ Енлӧн Пи, уськӧдчы улӧ. Гижӧд вылын ӧд шуӧма: Кыдз аслас Ангелъяслы тшӧктӧма тэ понда (видзны тэнӧ), и кияс вылӧ босьтасны тэнӧ, мед он дойд ассьыд коктӧ из дінӧ».

Исус шуис сылы: «Сідз жӧ гижӧма: Эн ылӧд ассьыд Господь Енмӧс».

Бара босьтіс Сійӧс дявӧл зэв джуджыд гӧра вылӧ, и петкӧдліс Сылы быд сарствояс тайӧ югыдысь, и слава налысь.

И шуис Сылы: «Быдсӧн тайӧс Тэныд сета, кор юрбитан меным муӧдз».

Сэки сылы шуӧ Исус: «Мун ме дінысь, сӧтана! Гижӧма ӧд эм: аслад Господь Енлы юрбит и Сылы ӧтнаслы служит».

Сэки эновтіс Сійӧс дявӧл; и со Ангелъяс воисны и пондісны служитны Сылы.

Кыліс жӧ Исус, мый Иоанн кутӧма вӧлі, муніс Галилеяӧ.

И эновтіс Назарет, воис и пондіс овны море дор Капернаум карын, Завулон и Нефдалим гӧгӧрын:

Мед лоас шуӧма Исайя пророкӧн, коді шуӧ:

«Му Завулонлӧн и му Нефдалимлӧн морелань туй кузя Иордан пӧлӧн Галилея йӧзъяслӧн.

Пукалысь йӧзъяс пемыдінын аддзисны ыджыд югыд, и пукалысьяслы пемыд кулан стӧрӧнаын, воссис югыд налы».

Сэкисянь пондіс Исус велӧдны и шуны: «Пӧкаитчӧй, матыстчис ӧд небеснӧй сарство».

Ветлігӧн жӧ Галилейскӧй море дорті аддзис кык вокӧс, Симонӧс, коді шусьӧ Петыр, и Андрейӧс, воксӧ сылысь, тыв чӧвтігӧн мореӧ, найӧ ӧд вӧліны чери кыйысьяс.

И шуис налы: «Ме бӧрысь локтӧй, и тіянӧс Ме кера морт кыйысьясӧн».

Найӧ жӧ регыд колисны тывъяс и Сы бӧрын мӧдісны.

И мунӧм бӧрын сэтысь, аддзис мукӧд кык вокӧс, Иаковӧс Зеведейлысь и воксӧ сылысь Иоаннӧс, пыжын асланыс Зеведей батькӧд вочліг ассьыныс тывъяс, и корис найӧс.

Найӧ жӧ регыд колисны пыж и батьнысӧ ассьыныс, мӧдісны Сы бӧрысь.

И ветліс Исус быдсӧн Галилея гӧгӧр, велӧдіс найӧс чукӧртчӧмъяс инын и висьтавліс Евангелльӧ сарство йылысь, и бурдӧдаліс быдсяма висьӧм и быдсяма вермытӧм йӧзлысь.

И петіс юӧр Сы йылысь быдсӧн Сирия кузя, и вайӧдлісны Сы дінӧ быд сикас висьысьясӧс, кодъяс висисны бессянь и тӧлыссянь, и кодъяс киӧн и кокӧн эз вермыны вӧрзьӧдчыны и бурдӧдіс найӧс.

И мӧдісны сы бӧрысь уна йӧз Галилеяысь и Даскарысь, Иерусалимысь, Иудеяысь и Иордан сайысь.

ВИТӦД ЮР.

Йӧзӧс аддзымысьт жӧ кайис гӧра вылӧ; и кор пуксис, сэки воисны Сы дінӧ велӧдчысьяс Сылӧн.

И сійӧ ассьыс вом восьтымысьт велӧдіс найӧс и шуӧ:

«Шудаӧсь нищӧйяс лолӧн: налӧн ӧд эм небеснӧй сарство.

Шудаӧсь бӧрдысьяс: найӧ ӧд гажӧдчасны.

Шудаӧсь рамъяс, мый налӧн ӧд лоас му.

Шудаӧсь сёйӧмысь и юӧмысь моз тшыгъялысьяс веськыд понда, мый найӧ ӧд пӧтасны.

Шудаӧсь милӧсьтаяс, мый найӧ милуйтӧмаӧсь лоасны.

Шудаӧсь сӧстӧм сьӧлӧмаяс, мый найӧ Енмӧс аддзасны.

Шудаӧсь миритысьяс, мый найӧ пиянъяс Енлӧн шусясны.

Шудаӧсь вӧтлӧмъяс веськыд понда, мый налӧн эм небеснӧй сарство.

Шудаӧсь ті, кор видасны тіянӧс, и вӧтласны, и шуасны быдсяма лёк кыв тіян вылӧ весьшӧрӧ Ме понда.

Радуйтчӧй и гажӧдчӧй, мый ыджыд тіян мырсьӧм дон небесаясын; Сідзи ӧд вӧтлісны пророкъясӧс, кодъяс (вӧліны) водзын тіянысь.

Ті эмӧсь сов мулӧн: кор жӧ сов дубалӧ, мыйӧн соласяс? Сэсся нинӧкытчӧ нин оз шогмы, кыдзи сӧмын кисьтны ортсӧ и талявны мортъяслы.

Ті эмӧсь югыд йӧзлы: оз вермы кар дзебсьыны гӧра вылын сулалігӧн.

И ӧзтымысьт би, оз пуктыны сійӧс вевт улӧ, но би видзанінӧ, и югъялӧ быдсӧнлы, кодъяс эмӧсь оланінын.

Сідзи мед югъялас тіян югыд мортъяс водзын, мед аддзасны тіянлысь бур керӧмъяс, и ошкасны Батьӧс тіянлысь, коді небесаяс вылын.

Эн думайтӧ, мый Ме вои рӧзӧритны закон, либӧ пророкъясӧс. Ме эг во рӧзӧритны, но тыртны.

Веськыда ӧд шуа тіянлы: небеса и му мунас, некутшӧм жӧ медся ичӧт гижӧм законысь оз мун сытӧг, кытчӧдз быдсӧн оз тыртчы.

Кор коді рӧзӧритас тайӧ ичӧт заповедьясысь ӧтикӧс и велӧдас сідзи мортъясӧс, сійӧ ичӧтджык шусяс небеснӧй сарствоын, а коді керас и велӧдас, сійӧ ыджыд шусяс небеснӧй сарствоын.

Шуа ӧд Ме тіянлы: кор веськыда олӧм тіян оз ло ыджыдджык книжникъяс и фарисейяс дорысь, он пырӧй небеснӧй сарствоӧ.

Кылінныд ті, мый висьталӧма вӧлі важ йӧзлы: «Эн ви, коді жӧ виас, мыжа лоас судлы».

А Ме шуа тіянлы: быдӧн, коді лӧгалӧ ас вок вылӧ весьшӧрӧ, мыжа лоас судлы; коді жӧ шуас ас воклы «нинӧм морт», мыжа лоас ыджыдджык судлы, коді жӧ шуас «мывкыдтӧм», мыжа лоас куслытӧм биын сотчыны.

И сідз, кор ваян ассьыд козин вӧлтар водзӧ, и сэки дум вылад усьӧ, мый тэнад вок лӧг кутӧ тэ вылӧ,

Коль сэтчӧ ассьыд козин вӧлтар водзас, и мун войдӧр бурась ас вокыдкӧд, сэки лок и вай козин ассьыд.

Миритчы регыдджык, кодкӧд лӧг кутан, кытчӧдз тэ эм туй вылын сыкӧд, мед сійӧ оз сет тэнӧ суддялы, а суддя мед оз сет тэнӧ слугалы, и мед оз чӧвтны тэнӧ тюрмаӧ.

Веськыда шуа тэныд: он пет сэтысь, кытчӧдз он сет медбӧръя пӧлушка.

Кылінныд, мый шуӧма вӧлі важъяслы: «Эн прелюбодействуйт».

А Ме шуа тіянлы: быдӧн, коді видзӧдлас йӧз гӧтыр вылӧ омӧль думӧн, любодействуйтіс нин сыкӧд ас сьӧлӧмнас.

Кор жӧ веськыд син тэнад ылӧдӧ тэнӧ, кыскы сійӧс и шыбит ас дінсьыд; бурджык ӧд тэныд, мед вошас ӧтик тор тэнад, а не ачыд быдсӧн шыбитӧма лоан кустӧм биӧ.

И кор веськыд ки тэнад ылӧдӧ тэнӧ, керав сійӧс, и шыбит ас дінсьыд; бурджык ӧд тэныд, мед вошас ӧтик тор тэнад, а не ачыд быдсӧн шыбитӧма лоан кустӧм биӧ.

Шуӧма жӧ вӧлі: «Кор коді лэдзас ассьыс гӧтыр, мед сетас сылы янсӧдчан гижӧд».

А ме шуа тіянлы: быдӧн, коді лэдзас ассьыс гӧтыр прелюбодеянньӧысь ӧприч, сійӧ тшӧктӧ сійӧс прелюбодействуйтны; и коді лэдзӧмӧс босьтас, прелюбодействуйтӧ.

Бара ті кылінныд, мый висьталӧма вӧлі важъяслы: «Весьшӧрӧ эн ёрсьы, но кер мыйысь ёрсин Господь водзын».

Ме жӧ шуа тіянлы некыдз не ёрсьыны: ни небесаӧн, сійӧ ӧд Престол эм Енлӧн;

Ни муӧн, мый сійӧ эм кокув Сылӧн; ни Иерусалимӧн, мый сійӧ эм кар ыджыд сарлӧн.

Ни эн ёрсьы аслад юрӧн, сы понда мый он вермы тэ ӧтик юрси еджыдӧс либӧ сьӧдӧс керны.

Мед жӧ тіян лоас ёрсян кыв: «сідз, сідз», «абу, абу»; мый жӧ вывті таысь, сійӧ эм лукавӧйсянь.

Ті кывлінныд, мый шуӧма вӧлі: «Син син пыдди и пинь пинь пыдди».

Ме жӧ шуа тіянлы: эн водзсась лёклы, но кор жӧ коді кучкас тэнӧ веськыд тшӧкаӧ, бергӧд сылы и мӧдарсӧ.

И коді кӧсйӧ тэкӧд судитчыны и мырддьыны тэнсьыд вылыс паськӧм, сет сылы и дӧрӧм.

И коді тэнӧ нуӧдас аскӧдыс ӧтик верст, мун сыкӧд и кыкӧс.

Коді тэнсьыд корӧ, сет; и коді кӧсйӧ тэнсьыд удждыны, эн ӧткажит.

Ті кывлінныд, мый висьталӧма: «Любит ассьыд вокӧс и эн любит ассьыд врагӧс».

Ме жӧ шуа тіянлы: любитӧй ассьыныд врагъясӧс, бурсиӧй тіянӧс ёрысьясӧс, бур керӧй, кодъяс оз любитны тіянӧс, и кевмӧй тіянлы лёк керысьяс вӧсна и тіянӧс вӧтлысьяс вӧсна.

Мед лоанныд пиянъяс асланыд Батьлӧн, коді эм небесаясын; сы понда мый Сійӧ тшӧктӧ аслас шонділы лэдзны югыд омӧльяс вылӧ и буръяс вылӧ, и зэрны веськыда олысьяс вылӧ и омӧля олысьяс вылӧ.

Кор ті понданныд любитны асьнытӧ любитысьясӧс, кутшӧмӧс тіянлы виччысьны дон? И мытаръяс оз-ӧ керны сійӧс жӧ?

И кор окаланныд ассьыныд другъясӧс сӧмын, мый вывті керанныд; и невернӧйяс оз-ӧ керны сійӧс жӧ?

Лоӧй жӧ ті сы мында бурӧсь, кыдзи и Бать тіян небеснӧй эм бур.

КВАЙТӦД ЮР.

Видзчысьӧй юклыны ассьыныд милӧстина йӧз водзын, кор аддзӧны найӧ тіянӧс. А мӧд ногӧн, тіянлы оз ло некутшӧм мынтӧм асланыд небеснӧй Батьсянь.

Кор жӧ тэ юклан милӧстина, эн ошйысь аснад, кыдзи лицемеръяс керӧны йӧз чукӧръясын и улич вывъясын, мед эськӧ ошкасны найӧс йӧз. Веськыда шуа тіянлы: найӧ босьтісны нин аслыныс дон.

А тэ сідз юклы милӧстина, мед оз тӧд тэнад шуйга ки, мый керӧ веськыдыд.

Мед лоас милӧстина тэнад гусьӧн, и Бать тэнад, коді аддзӧ гусьӧн, мынтас тэныд явнӧ.

И кор кевман, эн ло кыдзи лицемеръяс, кодъяс любитӧны йӧз чукӧръясын и улич вывъясын сувтавлӧмӧн кевмыны, мед аддзасны найӧс йӧз, веськыда шуа тіянлы, найӧ босьтісны нин аслыныс дон.

А тэ, кор кевман, пыр аслад кумӧ и, ассьыд ӧдзӧс пӧдлавмысьт, кевмы аслад Батьлы, коді оз тыдав; и Бать тэнад, коді аддзӧ гусьӧн, мынтас тэныд явнӧ.

Кевмигӧн жӧ эн вывті сёрнитӧ, кыдзи невернӧйяс; найӧ ӧд думайтӧны, мый асланыс уна сёрнитӧмӧн лоасны кылӧмаӧсь.

Эн лоӧй найӧ кодь; тӧдӧ ӧд тіян Бать, мыйысь тіянлы нужда тіян кортӧдз.

А ті кевмӧй сідзи: «Батьӧй миян, коді эм небесаяс вылын! Мед святитчас ним тэнад;

Мед воас сарство Тэнад; мед лоас вӧля Тэнад, кыдзи небеса вылын и му вылын.

Нянь миянлы пӧтмӧн сет миянлы талун кежлӧ;

И эновт миянлы уджйӧзъяс миянлысь, кыдзи и ми эновталам асланым уджйӧзаяслы.

И эн нуӧд миянӧс ылӧдӧм вылӧ, а видз миянӧс лукавӧйысь. Тэнад ӧд эм сарство, и вын, и слава век кежлӧ. Аминь.

Кор понданныд лэдзны мортъяслысь грекъяс, лэдзас и тіянлысь небеснӧй Бать тіян.

А кор он пондӧй лэдзны мортъяслысь грекъяс, оз лэдз и Бать тіян тіянлысь грекъяс.

Кор жӧ видзаланныд, эн лоӧй гажтӧмӧсь, кыдзи лицемеръяс; найӧ ӧд овлӧны сэки шог чужӧмаӧсь, мед аддзасны видзалӧм налысь йӧз; веськыда шуа тіянлы: найӧ босьтісны нин аслыныс дон.

А тэ видзалігад мавт ассьыд юр, и мыськы ассьыд чужӧм.

Мед он петкӧдчы мортъяслы видзалӧмӧн, но аслад Батьлы, коді оз тыдав; и Бать тэнад, коді аддзӧ гусьӧн, мынтас тэныд явнӧ.

Эн чукӧртӧй аслыныд эмбур му вылын, кӧні воз и сім сёйӧ и кӧні гусясьысьяс кодйӧны и гуӧны;

Но чукӧртӧй аслыныд эмбур небеса вылын, кӧні ни воз, ни сім оз сёй, и кӧні гусясьысьяс оз кодйыны и оз гуны.

Кӧні ӧд эмбур тіян, сэтӧн лоас и сьӧлӧм тіян.

Югдӧдысь аслыд эм син. И сідз, син кӧ тэнад веськыд, быдсӧн ачыд лоан югыд.

Кор жӧ син тэнад омӧль, сэки быдсӧн ачыд пемыд лоан. И сідз, кор югыдыс тэ пытшкын эм пемыд, сэки пемыдыс кутшӧм нин?

Некод оз вермы уджавны кык господинлы: либӧ ӧтиксӧ любитас, а мӧдсӧ оз, либӧ ӧтик дінас кутчысяс, а мӧдсӧ эновтас. Он вермӧй уджавны Енлы и мамонлы.

Сы понда шуа тіянлы: эн тӧждӧй асланыд лолӧн, мый тіянлы сёйны и мый юны, и мыйӧн асьнытӧ пасьтӧдны; лолыд абу ӧмӧй ыджыдджык сёянысь и асьтӧ пасьтӧдӧмысь?

Видзӧдлӧй небеснӧй птицаяс вылӧ: найӧ оз кӧдзны, ни оз вундыны, ни оз чукӧртны жытникӧ; и тіян небеснӧй Бать вердӧ найӧс. Ті абу ӧмӧй на дорысь бурджыкӧсь.

Коді жӧ тіянысь мырсьӧмӧн вермас содтыны аслас быдмӧмлы кӧть ӧтик гырддза судта.

И паськӧм понда мый тӧжданныд? Видзӧдлӧй му выв турунъяс вылӧ, кыдзи найӧ быдмӧны, оз уджавны ни оз печкыны.

Шуа жӧ Ме тіянлы: и Соломон аслас быд слава дырйи сідзи эз пасьтасьлы, кыдзи ӧтик найӧ пытшкысь.

Кор жӧ му выв турун, коді талун быдмӧ, и аски шыбитӧма лоас пачӧ, Ен сідзи пасьтӧдӧ; оз ӧмӧй тіянӧс зэвджык, этша веритысьяс.

Энӧ жӧ тӧждысьӧй сёрниӧн: мый миянлы сёйны, либӧ мый юны, либӧ мый пасьтавны?

Быдсӧн ӧд сійӧс невернӧяс корсьӧны. Тӧдӧ ӧд небеснӧй Бать тіян, мый тайӧ быдсӧн тіянлы колӧ.

Корсьӧ жӧ войдӧр сарство Енлысь и веськыд сылысь, и сійӧ быдсӧн сетсяс тіянлы.

И сідз, эн тӧждысьӧй аскиа лун понда, аскиа лун ачыс пондас тӧждысьны ас вӧсна; тырмас быдсяма лунлы аслас мырсьӧм.

СИЗИМӦД ЮР.

Энӧ судитӧй, мед он лоӧй судитӧмаӧсь.

Кутшӧм судӧн ӧд судитанныд, сэтшӧмӧн судитасны и тіянӧс; и кутшӧм мераӧн мерайтанныд, сэтшӧмӧн жӧ мерайтасны и тіянлы.

Мый жӧ тэ аддзан аслад вок синмысь ув, а аслад синмысь он аддзы и кер?

Кыдз жӧ тэ шуан аслад воклы «Вай ме перъя тэнад синмысь ув», кор тэнад аслад синмад кер?

Лицемер, перйы войдӧр аслад синмысь кер, и сэки аддзан перйыны аслад вок синмысь ув.

Эн сетӧй святӧйӧс понъяслы; и эн шыблалӧй ассьыныд дона изъяс порсьяс водзӧ, мед оз талявны найӧ асланыс кокъясӧн, а бергӧдчымысьт мед оз курччавны тіянӧс.

Корӧй и сетсяс тіянлы; корсьӧй и аддзанныд; гольӧдчӧй и восьтасны тіянлы.

Быдӧн ӧд, коді корӧ, босьтас, и коді корсьӧ, аддзас, и гольӧдчысьлы воссяс.

Эм-ӧ тіян костын сэтшӧм морт, коді, кор пиыс сылӧн корас сылысь нянь, сетас сылы из?

И кор корас чери, сетас-ӧ сылы змейӧс?

И сідз, кор ті эмӧсь лёкӧсь, кужанныд асланыд пиянлы сетавны бурӧс; кымынысь уна зэв тіян небеснӧй Бать сетас корысьяслы Сы ордысь бур.

И сідзи быдсӧн: кыдзи тіянлы колӧ, мед керасны тіянлы мортъяс, сідзи и ті керӧй налы; сійӧ ӧд и эм закон и пророкъяс.

Пырӧй дзескыд ӧдзӧсъясӧд, сы понда мый паськыд ӧдзӧсъяс и паськыд туй нуӧдӧны омӧль вылӧ, и уна эм мунысьяс сэті.

Кыдзи векньыд ӧдзӧсъяс и дзескыд туй нуӧдӧны бур вылӧ, и этша найӧс аддзысьяс!

Видзчысьӧй пӧръялысь пророкъясысь, кодъяс волӧны тіян дінӧ ыж ку паськӧмъясӧн, и пытшкӧснаныс эмӧсь лёк кӧин кодьӧсь.

Найӧ керӧмъяс серти тӧданныд найӧс. Чукӧртӧны-ӧ лежнӧг вылысь винӧград, либӧ йӧн вылысь смокваяс?

Сідз быдсяма бур пу вайӧ бур вотӧс, а омӧль пу вайӧ омӧль вотӧс.

Оз вермы бур пу вайны омӧль вотӧс, и омӧль пу вайны бур вотӧс.

Быдсяма пу, коді оз вай бур вотӧс, кералӧны сійӧс и шыблалӧны биӧ.

И сідз, найӧ вотӧс серти тӧданныд найӧс.

Не быдсяма шуысь Меным: «Господи! Господи!» пырас небеснӧй сарствоӧ, но керысь вӧля Менам Батьлысь, коді эм небесаяс вылын.

Сійӧ лунӧ унаӧн шуасны Меным: «Господи, Господи, не Тэнад ли нимӧн ми пророчествуйтім, не Тэнад ли нимӧн бесъясӧс вӧтлывлім, и не Тэнад ли нимӧн уна чудесаяс керлім?»

И сэки висьтала налы: «Ме некор эг тӧдлы тіянӧс; мунӧй Ме дінысь омӧльӧсь керысьяс».

И сідзи быдӧн, коді кывзӧ тайӧ Менсьым кывъяс и керӧ сы серти, лоас мудрӧй морт кодь, коді вӧчис ассьыс керка из вылӧ.

И мӧдіс зэр, и визувтісныс юяс, и лэптысисны тӧвъяс, и уськӧдчисны сійӧ керка вылӧ, и эз пӧр: сы понда мый пуктӧма вӧлі из вылӧ.

И быдӧн, коді кывзӧ тайӧ Менсьым кывъяс и оз кер сы серти, лоас йӧй морт кодь, коді вӧчис ассьыс керка лыа вылӧ.

И мӧдіс зэр, и визувтісны юяс, и лэптысисны тӧвъяс и уськӧдчисны сійӧ керка вылӧ, и пӧри; и пӧрӧм сылӧн вӧлі ыджыд».

Кор Исус помаліс сійӧ кывъяс, йӧз дивуйтчисны сійӧ велӧдӧм вылӧ.

Сійӧ ӧд велӧдіс найӧс кыдзи ыджыд морт, а не сідз, кыдз книжникъяс да фарисейяс.

КӦКЪЯМЫСӦД ЮР

Кор жӧ лэччис сійӧ гӧра вылысь, мӧдісны Сы бӧрсянь уна йӧз;

Сэтчӧ воис прокажённӧй и юрбитігтырйи Сылы шуис: «Господи, кӧсъян кӧ, верман менӧ весавны».

Исус нюжӧдіс кисӧ и инмӧдіс сы дінӧ и шуис: «Кӧсъя, весась». И пыр сійӧ весасис проказаысь.

И шуис сылы Исус: «Видзӧд, некодлы эн висьтав; но мун петкӧдчы попъяслы и вай козин, кутшӧмӧс тшӧктіс Моисей законын, тӧдӧм понда налы».

Кор жӧ пырис (Исус) Капернаумӧ, воис Сы дінӧ сотник кевмысигтырйи Сылы.

И шуис: «Господи! Слуга менам куйлӧ гортын, киӧн ни кокӧн оз вермы вӧрзьӧдчыны и зэв висьӧ».

Исус шуӧ сылы: «Ме воа, бурдӧда сійӧс».

А сотник воча шуис (Сылы): «Господи! Ме ог туй Тэныд пырны менам вевт улӧ; а сӧмын шу кыв, и бурдас слуга менам.

Ме ӧд и ачым морт власьт улын, эм и ме улын салдатъяс; ӧтиклы шуа «мун», и мунӧ; мӧдлы «лок», и локтас; и аслам слугалы «кер сійӧс», и керас».

Сійӧс кывмысьтӧн Исус дивуйтчис и ас бӧрсьыс локтысьяслы шуис: «Веськыда висьтала тіянлы, и Израиль пытшкын Ме сэтшӧм вера эг аддзы.

И висьтала тіянлы, мый унаӧн воасны асыввывсянь и рытыввывсянь, и пуксясныс Авраамкӧд, и Исааккӧд, и Иаковкӧд небеснӧй сарствоӧ.

Сарстволӧн жӧ пиян вӧтлӧма лоасны ортсӧ пемыдінӧ, кӧні лоӧ бӧрдӧм и пинь йирӧм».

И шуис Исус сотниклы: «Мун, и кыдз тэ веруйтін, сідз мед лоӧ тэныд». И слуга сылӧн бурдіс сійӧ жӧ часӧ.

И воис Исус Петыр ордӧ, аддзис сылысь тьӧща, мый сійӧ куйлӧ биа висьӧмӧн.

И босьтіс сійӧс киӧдыс, и биа висьӧм колис сійӧс; сійӧ чеччис и пондіс служитны Сылы.

Рытъявыв жӧ вайисны Сы дінӧ уна бесноватӧйясӧс, и Сійӧ вӧтліс духъясӧс кывйӧн, и быдсӧн висьысьясӧс бурдӧдіс.

Мед лоас, мый висьталӧма Исайя пророкӧн, коді шуӧ: «Сійӧ вермӧдчытӧмъяс миянлысь босьтіс, и висьӧмъяс нӧбаліс».

Аддзис жӧ Исус Ас гӧгӧрысь уна йӧз, тшӧктіс велӧдчысьяслы вуджны мӧдлапӧлӧ.

И вомысьт ӧтик книжник шуис Сылы: «Велӧдысь! Муна ме тэ бӧрысь, кытчӧ тэ мунан».

Исус сылы шуис: «Ручьяслӧн эм гуяс, и небеснӧй птицаяслӧн позъяс, а морт Пилӧн абу, кытчӧ и юрсӧ копыртны».

Мӧд велӧдчысь шуис Сылы: «Господи, тшӧкты меным войдӧр мунны и дзебны ассьым батьӧс».

Исус жӧ висьталіс сылы: «Лок Ме бӧрысь и коль кулысьяслы дзебны ассьыныс кулӧмаясӧс».

И кор кайис сійӧ пыж вылӧ, мунісны Сы бӧрысь велӧдчысьяс Сылӧн.

И со лои море вылын ыджыд тӧв, сідзи мый пыж вевттьысьліс гыясӧн; а Сійӧ узис.

Велӧдчысьяс Сылӧн вомысьт Сы дінӧ пондісны садьмӧдны Сійӧс и шуӧны: «Господи, видз миянӧс, вӧям».

И шуис налы: «Мый ті повзинныд, этша веритысьяс». Сэки чеччис, ӧліс тӧв и море, и лои зэв лӧнь.

Мортъяс жӧ дивуйтчӧмӧн шуисны: «Коді эм тайӧ, мый тӧв и море кывзӧны Сійӧс?»

И кор сійӧ вуджис мӧдлапӧлӧ Гергесинскӧй оланінӧ, паныд петісны Сылы кык бесноватӧй гортъяс пытшкысь, сэтшӧм лёкӧсь, мый некод эз лысьт ветлыны сійӧ туйӧд.

И друг горӧдісны найӧ и шуисны: «Мый Тэныд миянӧдз, Исус Енлӧн Пи? Воин татчӧ пӧраысь войдӧр мучитны миянӧс».

Ылынджык жӧ насянь видзисны ыджыд чукӧр порсьяс.

Бесъяс жӧ кевмысисны Сылы и шуисны: «Кор вӧтлан миянӧс, тшӧкты миянлы мунны порсь чукӧрӧ».

И шуис налы: «Мунӧй». Найӧ жӧ петмысьт пырисны порсь чукӧрӧ, и пыр уськӧдчис быдсӧн порсь чукӧр вадор кузя мореӧ, и вӧйисны ваӧ.

Видзысьяс жӧ котӧртісны, воисны карӧ, висьталісны быдсӧн, и бесноватӧйяс йылысь.

И пыр быдсӧнӧн петісны карысь паныд Исуслы, и аддзымысьт Сійӧс кевмысисны, мед эськӧ Сійӧ мунас найӧ оланінъясысь.

ӦКМЫСӦД ЮР.

Сэки Сійӧ пырис пыжӧ, вуджис бӧр и воис аслас карӧ.

Сэтчӧ вайисны Сылы висьысь мортӧс, коді куйліс вольпась вылын; аддзис Исус вера налысь, шуис висьысьлы: «Эн пов, пиӧй, прӧститсьӧны тэнад грекъяс».

И сэтӧн мукӧдъяс книжникъяс шӧрысь шуисны ас костын: «Сійӧ Енмӧс кулитӧ».

Исус жӧ аддзис думайтӧм налысь, шуис: «Мыйла ті думайтанныд омӧльӧс ас сьӧлӧмъяснаныд?

Мый ӧд эм кокниджык шуны: «прӧститсьӧны тэнад грекъяс» или шуны: «чеччы и ветлы»?

Но мед ті тӧданныд, мый морт Пи вермӧ му вылын прӧститны грекъяс (сэки шуис висьысьлы): «Чеччы, босьт ассьыд вольпась и мун аслад гортӧ».

Сійӧ чеччис (босьтіс ассьыс вольпась) и муніс аслас гортӧ.

Аддзисны жӧ йӧз, дивуйтчисны и ошкисны Енмӧс, коді сетіс сэтшӧм власьт мортъяслы.

И мунӧм бӧрын Исус сэтысь аддзис пукалысь мортӧс, коді чукӧртіс пошлинаяс, Матфей нима, и висьталіс сылы: «Лок Ме бӧрысь». Сійӧ чеччис и мӧдіс Сы бӧрсянь.

И кор Исус пукаліс сы ордын пызан сайын, сэки воисны унаӧн мытаръяс и грешникъяс и пуксисны Исускӧд и Сійӧ велӧдчысьяскӧд.

И аддзисны фарисейяс, шуисны Сійӧ велӧдчысьяслы: «Мый понда Велӧдысь тіян мытаръяскӧд и грешникъяскӧд сёйӧ и юӧ»?

Исус жӧ кыліс сійӧс, шуис налы: «Дзоньвидза йӧз оз корсьны лекарӧс, а висьысьяс.

Мунӧ жӧ, велӧдчӧй, мый вӧлі висьталӧма: «Милӧсьт корся, а не жертва». Эг лок ӧд Ме корны праведникъясӧс, но грешникъясӧс пӧкаитчыны».

Сэки воисны Сы дінӧ велӧдчысьяс Иоанлӧн и шуӧны: «Мыйла ми и фарисейяс уна видзалам, а Тэнад велӧдчысьяс оз видзавны?»

Исус висьталіс налы: «Вермасны-ӧ свадьба вылын гӧсьтъяс гажтӧмтчыны, кытчӧдз эм накӧд жӧник? Воасны жӧ лунъяс, кор мырддьӧма лоас на дінысь жӧник, и сэки пондасны видзавны.

Некод оз пукты выль дӧмас важ паськӧмӧ: выль дӧмас ӧд косялас паськӧм, и розь лоас ыджыдджык важ дорсьыс.

Сідз жӧ оз кисьтны том вина важ мекъясӧ, а мӧд ногӧн потасны мекъяс, и вина киссяс, и мекъяс вошасны. Но том вина кисьтӧны выль мекъясӧ, и дзонь лоӧ кыкнанныс».

Кор Сійӧ висьтавліс налы, сэки кутшӧмкӧ князь воис и юрбитігтырйи шуис Сылы: «Ныв менам ӧні кулі, но лок, пукты сы вылӧ Ассьыд ки, и сійӧ ловзяс».

И чеччис Исус, муні сы бӧрын, и велӧдчысьяс Сылӧн.

Сэтӧн кутшӧмкӧ баба висьысь вир петӧмӧн дас кык во, матыстчис мышсяньыс и инмӧдчис Сійӧ паськӧм дінӧ.

Шуис ӧд сійӧ ачыс аслыс: «Кыдз сӧмын инмӧдча Сійӧ паськӧм дінӧ, и бурда».

Исус жӧ бергӧдчис, аддзис сійӧс и шуис: «Эн пов, ныв, вера тэнад видзис тэнӧ». И бурдіс сійӧ баба сійӧ жӧ чассянь.

И кор воис Исус князь ордӧ, и аддзис свирельщикъясӧс и йӧз зык.

Сэки шуис налы: «Петӧй ортсӧ, эз на ӧд кув ныв, а узьӧ». И сералісны Сійӧс.

Кор жӧ вӧтлӧма вӧлі йӧз, Сійӧ пырис, босьтіс сійӧс киӧдыс, и ныв ловзис.

И петі сійӧ юӧр быд сійӧ му кузя.

Кор Исус мӧдіс сэтысь, кык синтӧм локтісны Сы бӧрысь, чуксалісны и шуисны: «Милуйт миянӧс Исус, Пи Давидлӧн».

Кор жӧ воис Сійӧ керкаӧ, сэки воисны Сы дінӧ найӧ синтӧмъяс. Шуис налы Исус: «Веританныд-ӧ, мый Ме верма тайӧс керны?» Найӧ шуисны Сылы: «Веритам, Господи!».

Сэки Сійӧ инмӧдчис найӧ синъяс дінӧ и шуис: «Тіян вера кузя мед лоас тіянлы».

И воссисны налӧн синъяс. И ёна ӧліс найӧс Исус и шуис: «Видзчысьӧ, мед эськӧ некод эз тӧд».

Найӧ жӧ петісны, висьталісны Сы йылысь быдсӧн сійӧ му кузя.

Найӧ жӧ петӧм бӧрын вайисны Сы дінӧ бесноватӧй мортӧс немӧйӧс.

И вӧтлӧм бӧрын бесӧс, немӧй пондіс сёрнитны. И дивуйтчисны йӧз и шуисны: «Некор сідзи абу на аддзылӧма Израильын».

Фарисейяс жӧ шуисны: «Сійӧ вӧтлӧ бесъясӧс бесовскӧй князь пыр».

И ветліс Исус быд карӧд и оланінъясӧд, велӧдіс найӧс чукӧртчӧмъяс инын и проповедуйтіс Евангелльӧ сарство йылысь, и бурдӧдліс быдсяма висьӧм и быдсяма вермытӧм йӧзлысь.

Аддзис жӧ йӧзӧс, жалитіс найӧс, мый найӧ вӧлісны эновтӧмаӧсь и разалӧмаӧсь, кыдзи видзысьтӧг ыжъяс.

Сэки шуис аслас велӧдчысьяслы: «Вундан уна, а вундысьяс этша.

И сідз, кевмысьӧй Господинлы, кодлӧн вундан, мед эськӧ ыстас вундысьясӧс аслас вундан вылӧ».

ДАСӦД ЮР.

И кормысьт ассьыс дас кыв велӧдчысьясӧс, сетіс налы власьт пеж ловъяс вылӧ, мед вӧтласны найӧс и бурдӧдасны быдсяма висьӧм и быдсяма вермытӧм.

А дас кык Апостоллӧн нимъяс эмӧсь сэтшӧмӧсь: медводдза Симон, коді шусьӧ Петырӧн, и Андрей, сылӧн вок, Иаков Зеведейлӧн и Иоанн, вок сылӧн.

Филипп и Варфоломей, Фома и Матфей мытар, Иаков Алфейлӧн и Леввей, коді шусьӧ Фаддей.

Симон Кананит и Иуда Искариот, коді Сійӧс и вузаліс.

Сійӧ дас кыкӧс ыстіс Исус и висьталӧмӧн налы шуис: «Язычникъяс ордӧ эн мунӧй и Самарянскӧй карӧ эн пырӧй.

А мунӧй бурджык Израильскӧй вошӧм ыжъяс дінӧ.

Ветлігӧн жӧ проповедуйтӧй и шуӧй: матыстчис ӧд небеснӧй сарство.

Висьысьясӧс бурдӧдӧй, прокажённӧйясӧс весалӧй, кулӧмаясӧс ловзьӧдӧй, бесъясӧс вӧтлалӧй; весьшӧрӧ босьтінныд, весьшӧрӧ и сеталӧй.

Аскӧдныд эн босьтӧй ни зарни, ни эзысь, ни ыргӧн вӧнь поманыд,

Ни сумка туй вылӧ, ни кык пӧлӧс паськӧм, ни сапӧгъяс, ни бедь. Уджалысьӧс ӧд колӧ и вердны.

Кутшӧм ӧд карӧ либӧ оланінӧ пыранныд ті, войдӧр тӧдмасьӧ, коді сэн бур эм, и сэтӧн олӧй, кытчӧдз он петӧй.

Пыригӧн жӧ керкаӧ, окалӧй сійӧс и шуӧй: «Мир тайӧ керкалы».

Кор керка лоӧ бур, сэки мир тіян мед воас сы вылӧ; а кор оз ло бур, сэки мир тіян мед бергӧдчас аслыныд.

А кор коді оз лэдз тіянӧс и оз кывзы кывъяс тіянлысь, сэки петігӧн сійӧ керкаысь, либӧ сійӧ карысь, пыркӧдӧ ёг асланыд кокъясысь.

Веськыда шуа тіянлы: кокниджык лоас Содомскӧй и Гоморскӧй мулы судитан лунӧ, нежӧли сійӧ карлы.

Со Ме мӧдӧда тіянӧс, кыдзи ыжъясӧс кӧинъяс пытшкӧ. И сідз, лоӧй мудерӧсь, кыдзи змейяс, и рамӧсь, кыдз гулюяс.

Видзчысьӧй жӧ йӧзысь, сы понда мый найӧ пондасны сетавны тіянӧс судӧ, и асланыс чукӧртчӧмъяс инын пондасны тіянӧс нӧйтны.

И нуӧдасны тіянӧс суддяяс водзӧ и саръяс водзӧ Менӧ висьталӧм понда на водзын и язычникъяс водзын.

Кор жӧ пондасны тіянӧс сетавны, эн тӧждысьӧй, кыдзи либӧ мый шуны: сэки ӧд сетсяс тіянлы, мый колӧ висьтавны.

Не ті ӧд понданныд сёрнитны, но Дух тіян Батьлӧн сёрнитас тіян пытшкын.

Сетас жӧ вок вокӧс кулӧм вылӧ, и бать пиӧс; и лэптысясны пиян батьяс вылӧ и виасны найӧс.

И лоанныд вӧтлӧмаӧсь быдӧнӧн Менам ним понда; коді жӧ терпитас помӧдз, сійӧ спаситчас.

Кор жӧ пондасны тіянӧс вӧтлыны ӧтик карын, пышйӧй мӧдӧ. Веськыда ӧд шуа тіянлы, он эштӧй гӧгӧртны Израильскӧй каръяс, кытчӧдз морт Пи оз во.

Велӧдчысь оз овлы ыджыдджык велӧдысьысь, и уджалысь аслас Господинысь.

Тырмас велӧдчысь понда, мед сійӧ лоас кыдз велӧдысь сылӧн; и слугалы, кыдз господин сылӧн. Кор кӧзяинӧс керкаысь шуисны Веельзевулӧн, сэки кымынысь зэвджык нин гортсаяссӧ сылысь?

И сідз, эн полӧй наысь! Немтор ӧд абу дзебӧма, мый оз югды, и тӧдтӧм, мый оз ло тӧдӧма.

Мый жӧ шуа тіянлы пемыдінын, шуӧй ті югыдінын, и мый пельнад кыланныд, висьталӧй вевтъяс вывсянь.

Эн полӧй, кодъяс виӧны тіянӧс, а лов оз вермыны вины; а полӧй зэвджык, коді вермас ловтӧ и асьтӧ воштыны гееннаӧ.

Не кык ли вӧрӧбей вузасьӧ ӧтик ассарияӧн? И ни ӧтик наысь оз усь му вылӧ тіян Батьтӧг.

Тіян жӧ юрысь и юрси быдсӧн лыддьӧма.

Эн жӧ полӧй: ті уна вӧрӧбейясысь донаджыкӧсь.

И сідз быдӧнӧс, коді висьталас менӧ мортъяс водзын, висьтала и ме аслам Бать водзын, коді небесаяс вылын.

А коді ӧткажитчас Меысь йӧз водзын, ӧткажитча и Ме сыысь аслам Бать водзын, коді небесаяс вылын.

Эн думайтӧй, мый ме вои вайны мир му вылӧ; эг лок вайны мир, но меч.

Вои ӧд Ме юкны мортӧс аслас батькӧд, и нылӧс аслас мамкӧд, и моньӧс аслас энькакӧд.

И врагъяс мортлы аслас гортсаясыс.

Коді любитӧ батьӧс либӧ мамӧс зэвджык Ме дорысь, оз туй Меным; и коді любитӧ пиӧс либӧ нылӧс зэвджыка Ме дорысь, оз туй Меным.

И коді оз босьт ассьыс крест и оз му Ме бӧрысь, сійӧ оз туй Меным.

Коді видзӧ ассьыс лов, воштас сійӧс; а коді воштас ассьыс лов Ме понда, аддзас сійӧс.

Коді примитӧ тіянӧс, Менӧ примитӧ; а коді Менӧ примитӧ, сійӧс примитӧ, коді ыстіс Менӧ.

Примитысь пророкӧс пророк нимӧ, дон босьтас пророк пыдди; и примитысь праведникӧс праведник нимӧ, праведник пыдди дон босьтас.

И коді юкталас ӧтикӧс тайӧ ичӧтъясысь сӧмын кӧдзыд ва тасьтіӧн велӧдчысь ним кузя, веськыда шуа тіянлы, оз вошты ассьыс дон».

ДАС ӦТИКӦД ЮР.

И кор помаліс Исус тшӧктӧмъяс аслас дас кык велӧдчысьлы, муні сэтысь велӧдны и проповедуйтны найӧ каръясын.

Иоанн жӧ кывмысьтӧн тюрмаын Кристос керӧмъяс йылысь, ыстіс ассьыс кык велӧдчысьӧс,

И шуис Сылы: «Тэ-ӧ Сійӧ локтысь, али виччысьны миянлы мӧдӧс?»

Исус висьталіс налы паныд: «Мунӧй, висьталӧй Иоаннлы, мый кыланныд и аддзанныд.

Синтӧмъяс аддзӧны, коктӧмъяс ветлӧны, прокажённӧйяс весасьӧны, пельтӧмъяс кылӧны, кулӧмаяс ловзьӧны, и нищӧйяс бурвисьталӧны.

И шуда сійӧ, коді оз ылав Ме йылысь».

Найӧ жӧ мунмысьтӧн пондіс висьтавны Исус йӧзлы Иоанн йылысь: «Мый видзӧдны петінныд пустыняӧ? Бедь-ӧ, кодӧс тӧлӧн вӧрӧдӧ?

Мый жӧ петінныд ті видзӧдны? Мортӧс-ӧ, коді дона паськӧмӧн пасьтасьӧма? Новлысьяс ӧд дона паськӧм олӧны сарскӧй домъясын.

Мый жӧ петінныд ті видзӧдны? Пророкӧс ӧмӧй? Веськыда висьтала тіянлы, и ыджыдджык пророкысь.

Тайӧ ӧд эм, код йылысь гижӧма: «Со Ме ыста ассьым Ангелӧс Тэ водзын, коді дасьтас туй Тэнсьыд Тэ водзын».

Веськыда шуа тіянлы: кодъяс чужисны гӧтыръяссянь, наысь эз вӧв некод ыджыдджык Иоанн Креститель дорысь; но ичӧтджык небеснӧй сарствоын эм Сы дорысь ыджыдджык.

Иоанн Креститель лунъяссянь ӧнӧдз небеснӧй сарство мырдӧн босьтсьӧ, и ёна корсьысьяс шедӧдӧны сійӧс.

Быдсӧн ӧд пророкъяс и закон Иоаннӧдз водзвыв висьталісны.

И кор ті кӧсъянныд тӧдны, сійӧ эм Илия, кодлы колӧ воны.

Кодлӧн эм пельяс кывзыны, мед кывзас.

Код кодь жӧ лоас тайӧ рӧд? Сійӧ эм челядь кодь, кодъяс пукалӧны туй дорын и чуксалӧны ассьыныд другъяс.

И шуӧны: ми ворсім тіянлы свирель вылын, и ті эн йӧктӧй; ми сьылім тіянлы бӧрдӧмӧн, и ті эн бӧрдӧй.

Воис ӧд Иоанн, ни оз сёй, ни оз ю, и шуӧны: сы пытшкын бес.

Воис Пи мортлӧн, сёйӧ и юӧ, и шуӧны: со морт сёйысь и вина юысь, друг мытаръяслы и грешникъяслы. И веськыд лои премудросьт ас челядьсянь».

Сэки пондіс Исус вӧйпны каръяслы, кодъясын унджык вӧлі петкӧдӧма чудесаяс Сылӧн, сы понда мый найӧ эз пӧкаитчыны.

«Горе тэныд Хоразин, горе тэныд Видсайда! Сы понда мый кор эськӧ Тирын и Сидонын вӧліны сэтшӧм чудесаяс, кутшӧм петкӧдлӧма тіянын, сэки эськӧ важӧн нин найӧ си паськӧмӧн и пӧимӧн пӧкаитчисны.

Дерт висьтала тіянлы: Тирлы и Сидонлы кокниджык лоӧ судитан лунӧ, нежӧли тіянлы.

И тэ, Капернаум, коді лэптысьлін небеса дінӧдз, лэччан адӧдз; сы понда мый кор эськӧ Содомын вӧлісны сэтшӧм чудесаяс, кутшӧм петкӧдлӧма тэныд, сійӧ эськӧ сулаліс ӧнія лунӧдз.

Дерт висьтала тіянлы: Содомскӧй мулы кокниджык лоас судитан лунӧ, нежӧли тэныд».

Сійӧ пӧраӧ сёрнитігӧн Исус шуис: «Ошка Тэнӧ, Батьӧй, Господи небесалӧн и мулӧн, мый тэ дзебин сійӧс мудеръясысь и мывкыдъясысь, и петкӧдін сійӧ ичӧтъяслы.

Дерт Батьӧ, мый Тэныд сідз ӧд колӧ вӧлі.

Быдсӧн Меным сетӧма Аслам Батьӧн; и некод оз тӧд Пиӧс, Бать кындзи; и Батьӧс некод оз тӧд Пи кындзи, и кор кодлы Пи кӧсъяс петкӧдны.

Локтӧй Ме дінӧ быдӧн мырсьысяс и сьӧкыда олысьяс, и Ме шойччӧда тіянӧс.

Босьтӧй Менсьым сьӧкыд ас выланыд и велӧдчӧ Месянь, Ме ӧд эм бур и рам сьӧлӧмӧн, и аддзанныд шойччӧм асланыд ловъяслы.

Сьӧкыд ӧд Менам эм бур, и нӧб Менам кокньыд».

ДАС КЫКӦД ЮР

Сы пӧраӧ муні Исус субӧтаӧ кӧдзӧм муяс вомӧн; велӧдчысьяс жӧ Сылӧн тшыгмисны и пондісны шепъяс нетшкыны и сёйны.

Фарисейяс жӧ аддзымысьт сійӧс шуисны Сылы: «Со велӧдчысьяс Тэнад керӧны, мый оз ков керны субӧтаӧ».

Сійӧ жӧ шуис налы: «Эн ӧмӧй ті лыддьылӧй, мый керис Давид, кор тшыгмис ачыс и сыкӧд вӧлысьяс.

Кыдзи пырис вичкоӧ и ваялӧм няньяс сёйис, кодъясӧс эз шогмы сёйны ни сылы, ни вӧлысьяслы сыкӧд, а сӧмын попъяслы?

Али энӧ ті лыддьылӧй законысь, мый попъяс вичкоын субӧтаӧ оз видзны субӧтаяс, и абу мыжаӧсь?

Висьтала жӧ тіянлы, мый коді тан, сійӧ вичкоысь ыджыдджык.

А кор эськӧ ті тӧдінныд, мый эм висьталӧма «милӧсьт корся, а не жертва», сэки эськӧ некор эн пондӧй дивитны мыжтӧмъясӧс.

Господь ӧд эм и субӧта вылын Пи мортлӧн».

И мунмысьт сэтысь воис найӧ чукӧртчанінӧ.

Сэтӧн вӧлі кос соя морт и юаліс Исуслысь: шогмас-ӧ субӧтаӧ бурдӧдны? Мед эськӧ лоас, мыйӧн Сійӧс мыждыны.

Сійӧ жӧ шуис налы: «Коді эм тіян пытшын морт, кодлӧн эм ӧтик ыж, кор сійӧ субӧта лунӧ усяс гуранӧ, оз ӧмӧй босьт сійӧс и лэпты?

Мый мында жӧ морт бурджык ыж дорысь? Сы понда позяс и субӧтаӧ бур керны.

Сэки шуис сійӧ мортлы: «Нюжӧд ассьыд кырым». И сійӧ нюжӧдіс, бурдіс и лои мӧдыс кодь.

Фарисейяс жӧ петмысьтӧн сӧвет керисны Сы вылӧ, кыдз эськӧ вины Сійӧс; Исус жӧ тӧдіс, муніс сэтысь.

И мӧдісны Сы бӧрсянь уна йӧз, и Сійӧ найӧс быдсӧнӧс бурдӧдіс.

И ӧліс найӧс, мед оз висьтавны Сы понда.

Мед дерт лоӧ шуӧм Исайяс пророкӧн, коді висьталӧ:

«Со отрок Менам, кодӧс Ме бӧрйи, зэв муса Меным, кодын быд бур Менам ловлӧн; пукта Дух Ассьым Сы вылӧ, и висьталас суд йӧзъяслы.

Ни оз шу паныд, ни оз горӧд, и некод оз кыв туйвежъяс вылын гӧлӧс Сылысь.

Жугалӧм бедь оз чег, и ӧзйӧм шабді оз кусӧд, кытчӧдз правда Сылӧн оз босьт вермӧм.

И Сы ним вылӧ пондасны надейтчыны йӧзъяс».

Сэки вайӧдісны Сы дінӧ синтӧм и кывтӧм бесноватӧйӧс; и бурдӧдіс сійӧс, сідз мый синтӧм и кывтӧм пондіс и сёрнитны и аддзыны.

И дивуйтчисны быд йӧз, и шуисны: «Абу тайӧ Кристӧс, Пи Давидлӧн?»

Фарисейяс жӧ сійӧс кывмысьтӧн шуисны: «Сійӧ вӧтлалӧ бесъясӧс Веельзевул бесовскӧй князь пыр».

Тӧдіс жӧ Исус налысь думайтӧм, шуис налы: «Быдсяма сарство, коді юксис ачыс ас кежас, пуста лоӧ; и быдсяма кар либӧ керка, коді юксис ачыс ас кежас, оз сувт.

И кор сӧтана сӧтанаӧс вӧтлӧ, сэки ачыс аскӧдыс юксис: кыдзи жӧ сулалас сарство сылӧн?

И кор Ме Веельзевул вынӧн вӧтлала бесъясӧс, сэки пиянъясыд тіян кутшӧм вынӧн вӧтласны? Сы понда найӧ лоасны тіянлы суддяясӧн.

А кор Ме Ен Духӧн вӧтлала бесъясӧс, сэки дерт суис тіянӧс сарство Енлӧн.

Али кыдзи вермас коді пырны вына ордӧ керкаӧ и эмбур петкӧдас сылысь, оз кӧ войдӧр кӧртав вынаӧс? И петкӧдас сэки эмбур сылысь.

Коді абу мекӧд, сійӧ Ме вылӧ эм; и коді оз чукӧрт Мекӧд, сійӧ разӧдӧ.

Сы понда висьтала тіянлы: быдсяма грек и кулитӧм прӧститсяс мортъяслы, а Духӧс кулитӧм оз прӧститсьы мортъяслы.

И кор коді шуас кыв морт Пи вылӧ, прӧститсяс сылы; а коді шуас Святӧй Дух вылӧ, оз прӧститсьы сылы ни таладор югыдын, ни мӧдарын.

Али керӧй бур пу, и вотӧс сылӧн бур; али керӧй омӧль пу, и вотӧс сылӧн омӧль. Пу вотӧс серти тӧдчас.

Ехиднасянь чужсьӧмъяс! Кыдзи верманныд ті бурӧс сёрнитны, кор омӧльӧсь? Сьӧлӧм шӧрсянь ӧд быд сёрни вомӧд петӧ.

Бур морт бур эмбурысь петкӧдӧ бурӧс; и омӧль морт омӧль эмбурысь петкӧдӧ омӧльӧс.

Висьтала жӧ тіянлы, мый быдсяма омӧль кыв йылысь, кодӧс шуасны мортъяс, сетасны ӧтвет судитан лунӧ.

Аслад кывъяссянь ӧд веськыд лоан, и аслад кывъяссянь мыжман».

Сэки кодъяскӧ книжникъяс и фарисейяс пытшкысь шуисны: «Велӧдысь, кӧсъям Тэсянь чудеса аддзыны».

Сійӧ жӧ шуис воча налы: «Лукав рӧд и прелюбодейнӧй корсьӧ чудеса; и чудеса оз сетсьы сылы, Иона пророк чудесаысь ӧприч.

Кыдзи ӧд вӧлі Иона кит кынӧм пытшкын куим лун и куим вой, сідзи лоас и мортлӧн Пи му пытшкын куим лун и куим вой.

Ниневитянаяс сувтасны суд вылӧ тайӧ рӧдкӧд и мыждасны сійӧс, сы понда мый найӧ пӧкаитчисны Иона проповедьсянь, а татӧн ыджыдджык Иона дорысь.

Лунвывса сарича сувтас суд вылӧ тайӧ рӧдкӧд и мыждас сійӧс, сы понда мый сійӧ воис му помсянь кывзыны премудросьт Соломонлысь, а татӧн ыджыдджык Соломон дорысь.

Кор жӧ пеж лов петӧ морт пытшкысь, сэки ветлӧ ватӧм местаясӧд, корсьӧ шойччанін, и оз аддзы.

Сэки шуӧ «Бергӧдча аслам гортӧ, кытысь петі» и воӧм бӧрын аддзас, мый сійӧ тыртӧм, чышкӧма и весалӧма.

Сэки мунас и босьтас сьӧрас ас дорсьыс лёкджык мукӧд сизим ловъясӧс, и пырмысьт оласны сэтӧн; и лоас сійӧ мортлы медбӧрын омӧльджык воддза дорысь. Сідзи лоас и тайӧ лукавӧй рӧдлы».

Кор жӧ сійӧ ещӧ сёрнитіс йӧзкӧд, Мам и вокъяс Сылӧн сулалісны ывлаын и корсисны сёрнитны Сыкӧд.

И кодкӧ висьталіс Сылы: «Со Мам и вокъяс Тэнад сулалӧны ывлаын и кӧсйӧны сёрнитны Тэкӧд».

Сійӧ жӧ воча шуис сійӧ висьталысьлы: «Коді Мам Менам? И коді вокъяс Менам?»

И индіс аслас кинас аслас велӧдчысьяс вылӧ и шуис: «Со Мам Менам и вокъяс Менам. Коді ӧд керас вӧля Менам небеснӧй Батьлысь, сійӧ Меным вок, и чой, и мам».

ДАС КОЙМӦД ЮР.

Сійӧ жӧ лунӧ петіс Исус гортысь, пукаліс море дорын.

И чукӧртчисны Сы дінӧ уна йӧз, мый Сылы лои пыж вылӧ кайны и пуксины, а быдсӧн йӧз сулаліс вадорын.

И велӧдіс найӧс уна притчаясӧн и шуис: «Со петі кӧдзысь кӧдзны.

И кор кӧдзис сійӧ, мукӧд уси туй дорӧ, и воисны птицаяс и кокалісны сійӧс.

Мукӧд уси изйӧсь инӧ, кӧні этша вӧлі му, и пыр петаліс, сы понда, мы эз вӧв пыдын му пытшкын.

Шонді жарсянь жӧ сотчис, и кыдзи вӧлі вужтӧм, косьмис.

Мукӧд уси лежнӧг пытшкӧ, и быдмис лежнӧг и ляпкӧдіс сійӧс.

Мукӧд жӧ уси бур му вылӧ и вайис плӧд: коді сё мында, коді квайтымын мында, и коді комын мында.

Кодлӧн эм пельяс кывзыны, мед кывзас».

И воисны велӧдчысьяс Сылӧн, шуисны Сылы: «Мый вӧсна притчаясӧн сёрнитан налы?»

Сійӧ висьталысь налы воча: «Сы понда мый тіянлы сетӧма тӧдны тайнаяс небеснӧй сарствоысь, а налы абу сетӧма.

Кодлӧн ӧд эм, сылы сетсяс и содтысяс, а кодлӧн абу, сылысь мырддьӧма лоӧ и сійӧ, мый эм.

Сы понда Ме висьтала налы притчаясӧн, мый найӧ аддзанӧс оз аддзыны, и кыланӧс оз кывны, и оз гӧгӧрвоны.

И тыртчӧ на вылын пророчество Исайялӧн, коді шуӧ: «Кылӧмӧн кыланныд и он пондӧй гӧгӧрвоны, и синъясӧн видзӧдны, и он пондӧй аддзыны.

Чорзис ӧд сьӧлӧм тайӧ йӧзлӧн, и пельясӧн сьӧкыда кылӧны и синъяс ассьыныс кунисны, мед оз аддзыны синъяснас, и оз кывны пельяснас, и оз гӧгӧрвоны сьӧлӧмнаныс, и оз бергӧдчыны, мед эськӧ Ме бурдӧда найӧс.

Тіян жӧ шудаӧсь синъяс, мый аддзӧны, сідз жӧ и пельяс тіян, мый кылӧны.

Веськыда ӧд висьтала тіянлы, уна пророкъяс и праведникъяс кӧсйисны аддзыны, ті мый аддзанныд, и эз аддзывны; и кывзыны, мый кыланныд, и эз кывлыны.

Ті кывзӧй жӧ притча кӧдзысь йылысь.

Быдӧн ордӧ, коді кывзӧ кыв сарство йылысь, и оз велав, волӧ лукавӧй и мырддьӧ кӧдзӧмӧс сы сьӧлӧмысь; со сійӧ, коді туй дорӧ кӧдзӧма.

А изйӧсь инӧ кӧдзӧм, сійӧ эм, коді кывзӧ кыв, и регыд босьтӧ сійӧс радлігтырйи,

Но кодлӧн ас пытшкас абу вуж, и вежласьӧ мывкыдысь, кор жӧ воас шог либӧ вӧтлӧм кыв понда, регыд сійӧ ылалӧ.

А кӧдзӧм лежнӧгӧсь инӧ, сійӧ эм кыв кывзысь, код пытшкын печаль тайӧ югыдын и пӧръялӧм озырмӧмӧн ляпкӧдӧ кыв, и сійӧ нинӧм оз вай.

А бур му вылӧ кӧдзӧм, сійӧ эм, коді кыв кывзӧ, и велалӧ, и вайӧ плӧд, коді сё мында, коді квайтымын мында, а мукӧд и комын мында».

Мӧд притча висьталіс налы и шуис: «Сарство небеснӧй эм морт кодь, коді кӧдзис бур кӧйдыс аслас му вылӧ.

Кор жӧ узисны мортъяс, воис враг сылӧн, и кӧдзис лёк турун шобді пытшкӧ, и муніс.

Кор ӧзим быдмис и пондіс шепавны, сэки петкӧдчисны и лёк турунъяс.

Воисны жӧ уджалысьяс, висьталісны кӧзяинлы: «Господин! Эн ӧмӧй тэ бур кӧйдыс кӧдз аслад му вылӧ? Кытысь жӧ лоины лёк турунъяс?»

Сійӧ жӧ шуис налы: «Враг морт сійӧс керис». Уджалысьяс жӧ шуисны сылы: «Колӧ-ӧ тэныд, ми мунам нетшкалам сійӧясӧс?»

Но сійӧ шуис налы: «Энӧ, мед эськӧ нетшкалігӧн турунсӧ он нетшкӧй тшӧтш сыкӧд и шобдісӧ.

Эновтӧй кыкнансӧ тшӧтш быдмыны вундытӧдз, и вундан дырйи ме висьтала вундысьяслы: чукӧртӧ войдӧр лёк турун и кӧртавлӧй сійӧс кольтаясӧ сотӧм вылӧ, а шобді идралӧй аслам жытникӧ».

Мӧд притча висьталіс налы шуӧмӧн: «Сарство небеснӧй эм горчица тусь кодь, кодӧс морт босьтіс и кӧдзис ас му вылас.

Коді кӧть посниджык быд кӧйдысысь, но кор быдмас, лоӧ ыджыдджык мукӧд быдманысь и лоӧ пу, кытчӧ небеснӧй птицаяс локтасны и сайӧдчасны сійӧ увъяс вылӧ».

Мӧд притча шуис налы: «Небеснӧй сарство эм рокӧс шом кодь, кодӧс босьтіс баба, пуктіс куим мера пызь пытшкӧ, и колис, кытчӧдз быдсӧн оз шоммы».

Быдсӧн сійӧс висьтавліс Исус йӧзлы притчаясӧн, и притчатӧг нинӧмтор эз висьтавлы налы,

Мед лоас, мый висьталӧма вӧлі пророкӧн, коді шуӧ: «Ме восьта ассьым вом притчаясын и висьтала, мый эз кывлыны мир пуксьӧмсянь».

Сэки Исус лэдзис йӧзӧс, пырис керкаӧ; и воисны Сы дінӧ велӧдчысьясыс Сылӧн, шуисны: «Висьтав миянлы притчатӧ лёк турун йывсьыд».

Сійӧ висьталіс налы воча: «Бур кӧйдыс кӧдзысь эм Пи мортлӧн,

А му эм мир; а бур кӧйдыс эм пиян сарстволӧн; а омӧль турунъяс эм пиян лукавӧйлӧн;

А враг кӧдзысь сійӧс эм дявӧл; а вундӧм эм помасьӧм олӧмлӧн; а вундысьяс эмӧсь Ангелъяс.

Кыдзи жӧ чукӧртӧны лёк турунъяс и сотӧны биӧн, сідз жӧ лоас тайӧ олӧм помасигӧн.

Мӧдӧдас Пи мортлӧн ассьыс Ангелъяссӧ и чукӧртасны Сійӧ сарствоысь быдсӧн ылалысьясӧс и омӧль керысьясӧс.

И шыбитасны найӧс кустӧм биӧ; сэтӧн лоас бӧрдӧм и пинь йирӧм.

Сэки праведникъяс югыдӧсь лоӧны кыдзи шонді найӧ бать сарствоын. Кодлӧн эм пельяс кывзыны, мед кывзас.

Бара небеснӧй сарство эм эмбур кодь, коді дзебӧма вӧлі му вылӧ, кодӧс аддзис морт и соссис; и гажаӧн сы вӧсна мунӧ, и быдсӧн мый эм вузалӧ, и ньӧбӧ сійӧ му.

Бара небеснӧй сарство эм купеч кодь, коді корсьӧ бур бисеръяс.

Коді кор аддзис ӧтик дона бисер, муні и вузаліс быдсӧн, мый аслас вӧлі, и ньӧбис сійӧс.

Бара небеснӧй сарство эм тыв кодь, коді чӧвтӧма мореӧ, и чукӧртіс быдсяма сикас чери.

И кор тырис, кыскисны берегӧ, пуксисны и буръяссӧ бӧрйисны дозъясӧ, а омӧльяссӧ шыблалісны ортсӧ.

Сідзи лоас татчӧс олӧм помасигӧн: петасны Ангелъяс и янсӧдасны омӧльясӧс праведникъяс дінысь.

И шыбитасны найӧс куслытӧм биӧ: сэтӧн лоас бӧрдӧм и пинь йирӧм».

Медбӧрын юаліс налысь Исус: «Велалінныд-ӧ ті быдсӧн тайӧс?» Шуисны Сылы: «Велалім, Господи!»

Сійӧ жӧ висьталіс налы: «Сы понда быдсяма книжник, коді велаліс небеснӧй сарство йылысь, сійӧ эм кӧзяин кодь, коді петкӧдӧ аслас эмбурысь выльӧс и важӧс».

И кор помаліс Исус сійӧ притчаяс, муніс сэтысь.

И вомысьт аслас чужан муӧ, велӧдіс найӧс чукӧртчӧминын сідзи, мый найӧ дивуйтчисны и шуисны: «Кытысь сэтшӧм Сылы премудросьт и вын?

Абу-ӧ тайӧ плӧтниклӧн пи? Не сылӧн ли мам шусьӧ Марияӧн, и вокъяс Сылӧн Иаков, и Иосия, и Симон, и Иуда?

И чойяс Сылӧн не быдӧн-ӧ миян пӧвстын? Кытысь жӧ Сійӧ быдсӧн Сылы?»

И ылалісны Сы йылысь думнаныс. Исус жӧ шуис налы: «Некӧн абу пророклы ичӧтджык чесьт, кыдзи аслас чужан муын и аслас гортын».

И эз кер сэтӧн уна чудесаяс, найӧ эскытӧм понда.

ДАС НЁЛЬӦД ЮР.

Сы пӧраӧ кыліс Ирод четвертовластник Исус йылысь юӧр.

И шуис аслас слугаяслы: «Тайӧ эм Иоанн креститель. Сійӧ ловзис кулӧминысь и сы понда артмӧны чудесаяс сы ордысь».

Ирод ӧд кутіс Иоаннӧс, кӧрталіс сійӧс и пуксьӧдіс тюрмаӧ, аслас Филипп вок гӧтыр Иродиада вӧсна.

Сы понда мый Иоанн висьтавліс сылы: «Оз ков тэныд видзны сійӧс».

И кӧсйис вины сійӧс, но поліс йӧзсянь, сы понда мый сійӧс пуктісны пророк пыдди.

Ирод чужан лунас Иродиадалӧн йӧктіс нылыс чукӧртчӧминын и сьӧлӧм вылас воис Иродлы.

Сы понда сійӧ ёрсьӧмӧн кӧсйысис сылы сетны, мый сійӧ корас.

Сійӧ жӧ аслас мам велӧдӧм серти шуис: «Вай меным татӧн жӧ юр блюд вылын Иоанн Крестительлысь».

И шогсьыны пондіс сар; но ёрсьӧм вӧсна и гӧсьтъяс вӧсна тшӧктіс сетны сылы.

И ыстіс тюрмаӧ керавны Иоаннлысь юр.

И вайисны сылысь юр блюд вылын, и сетісны нывлы, а сійӧ нуис аслас мамлы.

Велӧдчысьяс жӧ сылӧн воисны, босьтісны шой и дзебисны сійӧс; и мунісны, висьталісны Исуслы.

И кыліс Исус, муніс сэтысь пыж вылын торъя местаӧ ӧтнас. Йӧз жӧ кыліс и мӧдіс Сы бӧрысь подӧн каръяссянь.

И петмысьт Исус аддзис уна йӧз, и жалитіс найӧс, и бурдӧдіс висьысьясӧс налысь.

Рытъявыв жӧ воисны Сы дінӧ велӧдчысьяс Сылӧн и висьталісны: «Места татӧн пуста и пӧра сёр нин; лэдз йӧзӧс, мед мунасны оланінъясӧ и ньӧбасны аслыныс сёян».

Исус жӧ шуис налы: «Нинӧм вӧсна налы мунны, сетӧй ті налы сёйны».

Найӧ жӧ шуӧны Сылы: «Миян татӧн абу унджык вит нянь дорысь и кык чериысь».

Сійӧ жӧ шуис: «Вайӧй Меным найӧс татчӧ».

И тшӧктіс йӧзлы пуксьыны турун вылӧ, и босьтіс вит нянь и кык чери, видзӧдліс небеса вылӧ, благӧслӧвитіс, чеглаліс няньяс и сетіс велӧдчысьяслы, а велӧдчысьяс йӧзлы.

И сёйисны быдӧнӧн, и пӧтісны, и чукӧртісны кольӧм торъяссӧ дас кык нянь куд тыр.

Сёйысьяс жӧ вӧліны вит сюрс гӧгӧр морт, бабаясысь и челядьысь ӧприч.

И пыр тшӧктіс Исус аслас велӧдчысьясӧс кайны пыж вылӧ, и мӧдӧдчисны Сыысь войдӧр мӧдлапӧлӧ, сэк кості кыдзи лэдзас Сійӧ йӧзӧс.

И лэдзмысьтӧн йӧзӧс кайис гӧра вылӧ ӧтнасӧн кевмыны. И рытнас кольччыліс сэтӧн ӧтнас.

Пыж жӧ вӧлі море шӧрын и коясьліс гыясӧн, сы понда мый тӧв вӧлі паныд.

Нёльӧд жӧ видзӧм дырйи войын муні на дінӧ Исус море вывті.

И аддзисны Сійӧс велӧдчысьяс море вывті локтӧмӧн, повзисны и шуисны: «Тайӧ ӧд кажитчӧ миянлы». И повзьымысьт горӧдісны.

Но Исус пыр сетіс налы гӧлӧс и висьталіс: «Эн полӧй, эн полӧй, Ме ӧд».

Петыр жӧ шуис Сылы воча: «Господи, кор тэ, тшӧкты меным Ас дінад локны ва вывті».

Сійӧ жӧ шуис: «Лок». И петіс пыжысь Петыр, пондіс мунны ва вывті Исус дінӧ.

Кор жӧ аддзис ыджыд тӧв, повзис, пондіс вӧйны, горӧдіс и шуис: «Господи, видз менӧ».

Исус пыр нюжӧдіс кырым, кутіс сійӧс и шуӧ сылы: «Этша веритысь, мыйла тэ повзин?»

И кор пырисны найӧ пыжӧ, сэки тӧв лӧнис.

Кодъяс жӧ вӧлісны пыжын, воисны, юрбитісны Сылы и шуисны: «дерт Тэ Пи Енлӧн».

И вуджмысьтӧн воисны Геннисаретскӧй муӧ.

И тӧдісны Сійӧс олысьяс сійӧ местаысь, ыстісны висьтавлыны сы гӧгӧр олысьяслы, и вайӧдісны Сы дінӧ быдӧнӧс висьысьясӧс.

И кевмысисны Сылы, мед эськӧ тшӧктас сибӧдчыны Аслас паськӧм дінӧ, и кодъяс сибӧдчисны, найӧ бурдісны.

ДАС ВИТӦД ЮР.

Сэки Иерусалимскӧй книжникъяс и фарисейяс воисны Исус дінӧ, шуӧны:

«Мый понда велӧдчысьяс Тэнад оз кывзыны висьталӧм старечьяслысь? Оз тай мыськыны ассьыныс кырымъяссӧ, кор нянь сёйӧны».

Сійӧ жӧ висьталіс налы воча: «Мый понда и ті он кывзӧй заповедь Енлысь асланыд висьталӧм понда?

Ен ӧд тшӧктіс и шуис: «Почитайт батьӧс и мамӧс, и коді лёкӧн видас батьӧс либӧ мамӧс, кулӧмӧн мед кулас.»

А ті шуанныд: «Кор коді висьталас батьлы либӧ мамлы «Сійӧс, мыйӧн эськӧ тэ месянь пӧльзуйтчин, ме сета жертва вылӧ Енлы»,

Сэтшӧм мед и оз почитайт ассьыс батьсӧ и мамсӧ». Сэтшӧм ногӧн чӧвтінныд заповедь Енлысь асланыд висьталӧм вӧсна.

Лицемеръяс! Веськыда водзвыв висьталіс тіян йылысь Исайя, коді шуӧ:

«Матыстчӧны Ме дінӧ тайӧ мортъяс асланыс вомъясӧн и пӧчитайтӧны Менӧ кывъяснас, сьӧлӧм жӧ налӧн ылын сулалӧ Ме дінысь.

Весьшӧрӧ жӧ пӧчитайтӧны Менӧ и велӧдӧны мортъяс заповедьясӧ и велӧдӧмъясӧ».

И корис йӧзӧс, висьталіс налы: «Кывзӧ и велалӧ.

Не сійӧ, мый пырӧ вомӧ, пежалӧ мортӧс, а сійӧ, мый вомысь петӧ, пежалӧ мортӧс.

Сэки воисны велӧдчысьяс Сылӧн, висьталісны Сылы: «Тӧдан-ӧ, мый фарисейяс тайӧ кыв кылӧм бӧрын ылалісны думнаныс?»

Сійӧ жӧ висьталіс налы воча: «Быдсяма сад, кодӧс эз пукты Бать Менам небеснӧй, косьмас.

Эновтӧ найӧс; найӧ эмӧсь синтӧм нуӧдысьяс синтӧмъяслӧн, а кор синтӧм синтӧмӧс нуӧдӧ, кыкнанныс усьӧны гуранӧ».

Петыр жӧ шуис Сылы: «Висьтав миянлы тайӧ притча».

Исус жӧ висьталіс: «неужели и ті он тӧдӧй?

Неужели он тӧдӧй быдсӧн, мый вомӧд пырӧ, кынӧмӧ тӧрӧ и уліӧд петӧ.

А мый петӧ вомысь, сьӧлӧмсянь петӧ, и сійӧ пежалӧ мортӧс.

Сьӧлӧмсянь ӧд петӧны лёк думайтӧм, виӧм, прелюбодействуйтӧм, любодействуйтӧм, гусясьӧм, лӧжнӧ свидетельӧ ветлӧм и кулитӧм.

Сійӧ пежалӧ мортӧс; а сёйны мыськытӧм кырымъясӧн оз пежав мортӧс».

И петмысьт сэтысь Исус муні Тирскӧй и Сидонскӧй оланінъясӧ.

И сэтӧн Хананейскӧй баба сійӧ местаясысь петіс, чукӧстчис Сылы и шуис: «Милуйт менӧ Господи, Пи Давидлӧн, ныв менам чорыда висьӧ бессянь».

Сійӧ жӧ эз висьтав сылы немтор, и воисны велӧдчысьяс Сылӧн, корисны Сійӧс и шуисны: «Лэдз сійӧс, сы понда мый чуксасьӧ миян бӧрсянь».

Сійӧ жӧ висьталіс воча, мый ыстӧма сӧмын Израильскӧй вошӧм ыжъяс дінӧ.

Сійӧ жӧ воис, юрбитіс Сылы и шуис: «Господи, отсав меным».

Но сійӧ висьталіс воча: «Абу бур мырддьыны челядьлысь нянь и шыбитны понъяслы».

Сійӧ жӧ шуис: «Сідз, Господи! Но и понъяс сёйӧны пызан вылысь гылалӧм крӧшкияс аслас господинлысь».

Сэки Исус шуис сылы: «О бабаӧй! Ыджыд вера тэнад; мед лоас тэныд тэнад корӧм серти». И бурдіс сылӧн ныв сійӧ жӧ самӧй пӧраӧ.

И муніс сэтысь Исус, воис Галилейскӧй море дорӧ, и кайис гӧра вылӧ, пуксис сэтчӧ.

И воисны Сы дінӧ уна йӧз, кодъяскӧд вӧлісны коктӧмъяс, синтӧмъяс, немӧйяс, доймӧмъяс и мукӧдъяс унаӧн, и пуктісны найӧс Исус кокъяс дінӧ; и Сійӧ бурдӧдіс найӧс.

Сідзи, мый йӧз дивуйтчисны, кор аддзисны немӧйяслысь сёрнитӧм, доймӧмъяслысь бурдӧм, коктӧмъяслысь ветлӧм и синтӧмъяслысь аддзӧм; и ошкисны Израильскӧй Енмӧс.

Исус жӧ корис ассьыс велӧдчысьясӧс, висьталіс: «Жаль Меным тайӧ йӧз, мый нин куим лун олӧны Ме дінын, и абу налы нинӧм сёйны; лэдзны найӧс тшыгйӧн ог кӧсйы, мед эськӧ оз мудзны туй вылын».

Велӧдчысьяс Сылӧн шуӧны Сылы: «Кытысь миянлы босьтны пустыняын сымында няньяс, мед эськӧ вердны сы мында уна йӧзӧс?»

И шуис налы Исус: «Мый мында тіян эм няньяс»? Найӧ жӧ висьталісны: «Сизим, и неуна чери».

И тшӧктіс йӧзлы пуксьыны му вылӧ.

И босьтіс сизим нянь и черияс, Енмӧс ошкис, чегъяліс и сетіс аслас велӧдчысьяслы, и найӧ юклісны йӧзыслы.

И сёйисны быдӧн и пӧтісны; и чукӧртісны кольӧм нянь торъяссӧ сизим нянь куд тыр.

Сёйысьяс жӧ вӧліны нёль сюрс морт, бабаясысь и челядьысь ӧприч.

И лэдзмысьтӧн йӧзӧс Исус пырис пыжӧ и воис Магдалинскӧй оланінъясӧ.

ДАС КВАЙТӦД ЮР.

И воисны фарисейяс и саддукейяс, пӧръялӧмӧн корисны Сылысь петкӧдны налы чудеса небесасянь.

Сійӧ жӧ висьталіс налы воча: «Рытсянь ті сёрнитанныд: лоас сэзь, сы понда мый небеса гӧрд.

И асывводз: талун зэрмас, сы понда мый небеса кымӧртчӧ. Лицемеръяс! Ті кужанныд тӧдны чужӧм небесалысь, а чудесалысь пӧра он вермӧй (тӧдны)?

Лукав рӧд и прелюбодейнӧй чудеса корсьӧ; и чудеса оз сетсьы сылы, Иона пророк чудесаысь ӧприч». И колис найӧс, муніс сэтысь.

И вуджмысьт велӧдчысьяс Сылӧн мӧдлапӧлӧ вунӧдісны босьтны няньяс.

Исус жӧ висьталіс налы: «Видзӧдӧй, видзчысьӧй фарисейскӧй и саддукейскӧй шомысь».

Найӧ жӧ думайтісны ас кежын и шуисны: «Мый ми няньяс эг босьтӧй».

Тӧдіс жӧ Исус, шуис налы: «Мый думайтанныд ті ас костын, этша веритысьяс, мый няньяс эн босьтӧй?

Неужели ті он тӧдӧй, и он помнитӧй вит нянь йылысь, кор тырмис вит сюрс мортлы, и кымын нянь куд чукӧртінныд?

И сизим нянь йылысь нёль сюрс мортлы кор тырмис, и кымын куд ті чукӧртінныд?

Кыдзи он тӧдӧй, мый Ме не нянь йылысь висьталі тіянлы видзчысьны, но фарисейскӧй и саддукейскӧй шомысь?»

Сэки гӧгӧрвоисны, мый Сійӧ висьталіс налы видзчысьны не нянь шомысь, но фарисейскӧй и саддукейскӧй велӧдӧмысь.

Воис жӧ Исус Филипп Кесарияӧ оланінъясӧ, юаліс аслас велӧдчысьяслысь и шуис: «Код пыдди Менӧ морт Пиӧс арталӧны мортъяс?»

Найӧ висьталісны: «Мукӧдъяс Иоанн Креститель пыдди, мукӧдъяс жӧ Илия пыдди, а мукӧдъяс Иеремия пыдди либӧ ӧтик пыдди пророкъясысь».

А Исус шуис налы: «А ті код пыдди Менӧ арталанныд?»

Симон жӧ Петыр висьталіс: «Тэ эм Кристос, Пи ловъя Енлӧн».

Сэки Исус шуис сылы воча: «Шуда тэ, Симон пи Ионалӧн! Сы понда мый яй и вир эз петкӧд тэныд, но Бать Менам, коді небесаяс вылын.

Висьтала и Ме тэныд: тэ, Петыр, и тайӧ из вылын Ме вӧча ассьым вичко, и ӧдзӧсъяс адлӧн оз вермыны сійӧс.

И сета тэныд небеснӧй сарствоысь ключьяс, и мый кӧрталан му вылын, сійӧс кӧрталӧма лоас небесаяс вылын; и мый разян му вылын, сійӧ лоас разьӧма небесаяс вылын».

Сэки Исус вӧйпис аслас велӧдчысьяслы, мед эськӧ некодлы эз висьтавны, мый Сійӧ эм Исус Кристос.

Сэкисянь пондіс Исус висьтавны аслас велӧдчысьяслы, мый колӧ Сылы мунны Иерусалимӧ и уна страдайтны старечьяссянь, и аркирейсянь, и книжникъяссянь; и лоас виӧма, и коймӧд лунӧ ловзяс.

И чуксаліс Сійӧс Петыр и пондіс паныд сёрнитны Сылы и шуис: «Милӧсьта тэ Господи! Оз ло тэкӧд сійӧ».

Сійӧ жӧ бергӧдчис, шуис Петырлы: «Мун Ме дінысь, сӧтана, тэ Менӧ ылӧдысь! Сы понда мый он думайт, мый Енлӧн, но мый мортъяслӧн».

Сэки Исус шуис аслас велӧдчысьяслы: «Кор коді кӧсйӧ мунны Ме бӧрысь, мед вунӧдас асьсӧ и босьтас ассьыс крест и локтас Ме бӧрысь.

Коді жӧ кӧсйӧ ассьыс лов видзны, сійӧ воштас сійӧс; а коді воштас лов ассьыс Ме понда, сійӧ аддзас сійӧс.

Кутшӧм пӧльза мортлы, кор сійӧ быдса мир чукӧртас, лов жӧ ассьыс воштас; либӧ кутшӧм дон сетас морт, аслас лов пыдди?

Воас ӧд Пи мортлӧн, аслас Бать славаӧн и аслас ангелъяскӧд, и сэки сетас быдӧнлы найӧ керӧмъяс кузя.

Веськыда шуа тіянлы: мукӧд татӧн сулалысьяс оз кувны, кытчӧдз оз аддзыны Пиӧс мортлысь локтігӧн аслас сарствоын».

ДАС СИЗИМӦД ЮР.

И квайт лун бӧрын босьтіс Исус Петырӧс, и Иаковӧс, и Иоаннӧс сылысь воксӧ, и катӧдіс найӧс джуджыд гӧра вылӧ ӧтнанысӧ.

И вежсис на водзын; и югыд лои Сылӧн чужӧм шонді кодь; паськӧд жӧ Сылӧн вӧлі еджыд югыд кодь.

И со петкӧдчисны налы Моисей и Илия Сыкӧд сёрнитігӧн.

Сы бӧрын Петыр висьталіс Исуслы: «Господи, лӧсьыд миянлы тан овны; колӧкӧ Тэд, вӧчам татчӧ куим оланін: ӧтикӧс Тэныд, ӧтикӧс Моисейлы и ӧтикӧс Илиялы».

Кор жӧ сійӧ сёрнитіс, со югыд кымӧр вевттис найӧс, и гӧлӧс кымӧрсянь шуис: «Тайӧ эм Менам зэв муса Пи, кодын быдсӧн Менам бур, Сійӧс кывзӧй».

И кылісны велӧдчысьяс, усины кымынь и зэв повзисны.

И воис Исус, вӧрзьӧдіс найӧс и шуис: чеччӧй и эн полӧй.

Восьтісны жӧ ассьыныс синъяс, найӧ некодӧс эз аддзыны, сӧмын Исусӧс ӧтнасӧс.

И кор лэччисны найӧ гӧра вылысь, ӧліс найӧс Исус и шуис: «Эн висьталӧй некодлы, мый ті аддзылінныд, кытчӧдз мортлӧн Пи оз ловзьы кулӧминысь».

И юалісны Сылысь велӧдчысьяс Сылӧн, шуисны: «Кыдзи жӧ книжникъяс шуӧны, мый колӧ Илиялы войдӧр воны?»

Исус жӧ висьталіс налы воча: «Сідз, Илиялы колӧ воны войдӧр и лӧсьӧдны быдсӧн.

Но Ме тіянлы висьтала, мый Илия воис нин, и эз тӧдны сійӧс, а вӧчисны сыкӧд кыдз кӧсйисны; сідзи и Пи мортлӧн страдайтас насянь».

Сэки велӧдчысьяс гӧгӧрвоисны, мый Сійӧ шуис налы Иоанн Креститель йылысь.

И кор воисны йӧз дінӧ, матыстчис Сы дінӧ морт юрбитігтырйи

И шуис: «Господи, милуйт менсьым пи, сійӧ выль тӧлысьяс водзын бессянь мучитчӧ и зэв висьӧ; унаысь ӧд шыбласьӧ биӧ, и унаысь ваӧ.

Ме вайлі сійӧс тэнад велӧдчысьяс дінӧ, но эз вермыны сійӧс найӧ бурдӧдны».

Исус жӧ воча шуис: «О невернӧй и тшыксьӧм рӧд! Кытчӧдз лоа тіянкӧд? Кытчӧдз понда терпитны тіянӧс? Вайӧй Меным сійӧс татчӧ».

И ӧліс сійӧс Исус, и бес петіс сы пытшкысь, и зон бурдіс сійӧ жӧ часӧ.

Сэки велӧдчысьяс воисны ас кежын Исус дінӧ, висьталісны: «Мый вӧсна ми эг вермӧй вӧтлыны сійӧс?»

Исус жӧ шуис налы: «Тіян вериттӧм вӧсна, веськыда ӧд тіянлы висьтала: кор тіян вера лоас горчица тусь кодь, и висьталанныд тайӧ гӧралы «мун татысь сэтчань», и мунас; и нинӧмтор оз ло вермытӧм тіянлы.

Тайӧ жӧ рӧд оз пет нинӧмӧн, а сӧмын кевмӧмӧн и видзалӧмӧн».

Олігӧн жӧ налы Галилеяын, шуис налы Исус: «Сетӧма лоас Пи мортлӧн мортъяс кырымӧ.

И виасны Сійӧс, и коймӧд лунӧ ловзяс». И шогсьыны пондісны зэв.

Кор жӧ воисны найӧ Капернаумӧ, сэки вичко вылӧ чукӧртысьяс воисны Петыр дінӧ, и висьталісны: «Велӧдысь тіян оз сет дидрахма?»

Петыр висьталіс: «Сетас». И кор пырис сійӧ керкаӧ, водзвыв юаліс сылысь Исус: «Кыдзи тэ думайтан, Симонӧй? Му вылын Саръяс кодъяслысь босьтӧны вотъяс? Ас пиянлысь али йӧзлысь?»

Петыр шуис сылы: «Йӧзлысь». Исус висьталіс сылы: «И сідз пиянъяс оз мынтысьны.

Но мед эськӧ миянлы найӧс не ылӧдны, мун море дорӧ, шыбит вугыр, и медводдза чери, коді шедӧ, босьт и вомсӧ сылысь паськӧд, аддзан статир; босьт сійӧс сет налы Ме пыдди и ас пыдди».

ДАС КӦКЪЯМЫСӦД ЮР.

Сэки воисны велӧдчысьяс Исус дінӧ, шуисны: «Коді ыджыдджык небеснӧй сарствоын?»

И корис Исус кагаӧс, сувтӧдіс сійӧс на шӧрӧ,

И шуис: «Веськыда висьтала тіянлы, кор он бергӧдчӧ и он лоӧ, кутшӧмӧсь кагаяс, он вермӧй пырны небеснӧй сарствоӧ.

И сідз, коді рам лоас, кутшӧм тайӧ кага, сійӧ эм ыджыдджык небеснӧй сарствоын.

И кор коді босьтас ӧтик сэтшӧм кагаӧс Менам нимӧ, сійӧ Менӧ босьтас.

А коді ылӧдас ӧтикӧс тайӧ ичӧтъясысь, кодъяс веруйтӧны Меным, сылы бурджык лоӧ эськӧ, кор ӧшӧдасны сылы изки сы сьылі вылӧ и шыбитасны сійӧс мореӧ джуджыд инӧ.

Горе мирлы соблазнъяссянь, колӧ ӧд воны и соблазнъяслы; но горе сійӧ мортлы, код пыр соблазн овлӧ.

Кор жӧ ки тэнад либӧ кок тэнад ылӧдӧ тэнӧ, керав сійӧс и шыбит ас дінсьыд; бурджык тэныд пырны оланінӧ коктӧмлы либӧ китӧмлы, нежӧ кор шыбитӧма лоан кыкнан кинад и кыкнан кокнад кустӧм биӧ.

И кор син тэнад ылӧдӧ тэнӧ, кыскы сійӧс и шыбит ас дінсьыд; бурджык тэныд ӧтик синмӧн оланінӧ пырны, нежӧ кор шыбитӧма лоан кыкнан синнад кустӧм биӧ.

Видзчысьӧй нинӧм пыдди пуктыны кодӧскӧ тайӧ ичӧтъясысь: шуа ӧд Ме тіянлы, мый налӧн Ангелъяс небеса вылын пыр аддзӧны чужӧм Менам небеснӧй Батьлысь.

Воис ӧд Пи мортлӧн корсьны и видзны вошӧмӧс.

Кыдзи ті думайтанныд, кор кодлӧн эськӧ лоас сё ыж, и ӧтик на пытшкысь ылалас, оз-ӧ коль сійӧ ӧкмысдас ӧкмыссӧ гӧраяс вылӧ, и оз-ӧ мун корсьны ылалӧмӧс?

И кор аддзӧма лоас сійӧ, веськыда шуа тіянлы, сэки пондас радлыны сы йылысь зэвджык, нежӧ ӧкмысдас и ӧкмыс ылавтӧмъяс йылысь.

Сідзи абу вӧля тіян небеснӧй Батьлӧн, мед эськӧ вошас и ӧтик тайӧ ичӧтъясысь.

Кор жӧ мыжмас тэ водзын вок тэнад, мун и вӧйп сылы ӧтнаслы; и кор тэнӧ кывзас, сэки аддзин ассьыд вокӧс.

Кор жӧ оз кывзы тэнӧ, нуӧд аскӧдыд ещӧ ӧтикӧс либӧ кыкӧс; мед эськӧ кык либӧ куим свидетель дырйи вернӧ лоас быдсяма кыв.

Кор жӧ оз кывзы найӧс, висьтав вичко водзын, а кор жӧ и вичко водзын оз кывзы, сэки мед сійӧ лоас тэныд кыдз язычник и мытар.

Веськыда шуа тіянлы: мый ті кӧрталанныд му вылын, лоӧ кӧрталӧма небеса вылын, и мый разянныд му вылын, лоӧ разьӧма небесаяс вылын.

Сідз жӧ веськыда шуа тіянлы: кор ті кыкӧн лӧсьӧдчанныд му вылын корны мый либӧ, быдсӧн сійӧ тіянлы лоас сетӧма Менам небеснӧй Батьсянь.

Кӧні ӧд чукӧртчасны кыкӧн либӧ куимӧн Менам ним вӧсна, сэтӧн и Ме эм на шӧрын».

Сэки воис Сы дінӧ Петыр, шуис: «Господи, кымынысь ме прӧстита аслам воклы, кор сійӧ мыжмас ме водзын? Прӧстита-ӧ сизимысь?»

Исус шуис сылы: «Ог шу тэныд сизимысь, но сизимдас сизимысь.

Сы понда небеснӧй сарство эм сар кодь, коді кӧсйис лыддьысьны аслас слугаяскӧд.

Кор жӧ пондіс сійӧ лыддьысьны, вайӧма вӧлі сы дінӧ, коді вӧлі уджйӧза дас сюрс талантӧн.

А кыдзи сылӧн эз вӧв, мыйӧн мынтыны, сэки сар тшӧктіс вузавны сійӧс, и гӧтыр сылысь, и челядь, и быдсӧн, мый сылӧн вӧлі, и мынтыны уджйӧз.

Слуга жӧ сійӧ юрбитӧмӧн уськӧдчис сылы муӧдз и шуис: «Господи, виччысь ме вылысь, и быдсӧн тэныд мынта».

Сар жӧ милуйтіс сійӧ слугаӧс, лэдзис сійӧс и уджйӧз прӧститіс сылы.

Петмысьт жӧ сійӧ слуга аддзис ӧтикӧс аслас тӧварышъясысь, коді уджйӧза сылы вӧлі сё динарийӧн, кутіс сійӧс, пондіс пӧдтыны и шуис: «Мынты меным уджйӧз, мый мында тэ вылысь воас».

Тӧварыш сылӧн уськӧдчис сылы кок вылас и кевмысьӧмӧн шуис: «Виччысьлы ме вылысь, и быдсӧн тэныд мынта».

Сійӧ жӧ эз лэдз, муні и пуксьӧдіс сійӧс тюрмаӧ, кытчӧдз оз мынты уджйӧз.

Тӧварышъяс сылӧн аддзисны, мый лои, зэв пондісны сійӧс жалитны; и воисны, висьталісны асланыс Господинлы быдсӧн, мый вӧлі.

Сэки корис сійӧс Господин сылӧн, шуис сылы: «Омӧль морт, ме быдсӧн уджйӧз прӧститі тэныд, сы понда мый тэ кевмысин меным.

Эз-ӧ ков и тэныд прӧститны аслад тӧварышӧс, кыдзи и ме тэнӧ прӧститлі?»

И лӧгасис Господин сылӧн, сетіс сійӧс мучитысьяслы, кытчӧдз оз мынты быдсӧн ассьыс уджйӧз.

Сідзи и Бать Менам небеснӧй керас тіянкӧд, кор он прӧститӧй ті быдӧн ас вокъяслы тіян сьӧлӧмъяссянь мыжъяс налысь».

ДАС ӦКМЫСӦД ЮР.

И кор помаліс Исус сійӧ кывъяс, муні Галилеяысь и воис Иудейскӧй оланінъясӧ Иордан сайӧ.

И Сы бӧрсянь муніны уна йӧз и бурдӧдіс найӧс сэтӧн.

И воисны Сы дінӧ фарисейяс пӧръявлыны Сійӧс и шуисны Сылы: «Шогмас-ӧ мортлы торйӧдчыны аслас гӧтыркӧд быдсяма мыж понда?»

Сійӧ жӧ шуис налы воча: «Эн ӧмӧй ті лыддьылӧй, мый керис важысянь верӧсӧс и гӧтырӧс, вӧчис найӧс?»

И шуис: «Сы понда коляс морт батьӧс ассьыс и мамӧс и кутчысяс аслас гӧтыр бердӧ и лоасны кык яй ӧтиклаӧ.

Сы понда мый найӧ абу нин кык, но ӧтик яй. И сідз, мый Ен ӧтлааліс, сійӧс морт мед оз янсӧд».

Шуӧны Сылы: «Кыдз жӧ Моисей тшӧктіс сетны янсӧдчан гижӧд и торйӧдчыны сыкӧд?»

Шуӧ налы: «Мый Моисей тіян чорыд сьӧлӧмъяс понда тшӧктіс тіянлы торйӧдчыны асланыд гӧтыръяскӧд, мед войдӧр жӧ эз вӧв сідз.

Шуа жӧ тіянлы, коді янсӧдчас аслас гӧтыркӧд, прелюбодеянньӧысь кындзи, и гӧтрасяс мӧдкӧд, сійӧ прелюбодействуйтӧ; и коді гӧтрасяс торйӧдчӧмыскӧд, прелюбодействуйтӧ».

Велӧдчысьяс Сылӧн шуисны Сылы: «Кор сы мында морт кӧрталӧма аслас гӧтыр дінӧ, сідз бурджык не гӧтрасьны».

Сійӧ жӧ шуис налы: «Быдӧн оз вермыны новлӧдлыны тайӧс, но кодъяслы сетӧма.

Эмӧсь ӧд скопечьяс, кодъяс мам кынӧмысь сідз чужисны, и эмӧсь скопечьяс, кодъяс лоисны сэтшӧмӧсь мортъяссянь, и эмӧсь скопечьяс, кодъяс асьнысӧ вӧчисны скопечьясӧн небеснӧй сарство понда. Коді вермас нӧбавны, мед нӧбалас».

Сэки вайӧдісны Сы дінӧ челядьӧс, мед пуктас на вылӧ кырымъяссӧ и кевмас; велӧдчысьяс жӧ эз сибӧдны найӧс.

Исус жӧ шуис налы: лэдзӧй челядьӧс и эн ӧлӧй налы локны Ме дінӧ, сэтшӧмъяслӧн ӧд и эм небеснӧй сарство».

И пуктӧм бӧрын на вылӧ кырымъяс, муні сэтысь.

И сэтӧн кодкӧ ӧтик матыстчис, шуис Сылы: «Бур велӧдысь, кутшӧм бур ме кера, мед эськӧ меным лоӧ мӧдар югыдын бур олӧм?»

Сійӧ жӧ шуис Сылы: «Мый понда тэ Менӧ шуан бурӧн? Некод абу бур, сӧмын ӧтик Ен. Кор жӧ кӧсъян пырны мӧдар югыд бур оланінӧ, видз заповедьяс».

Шуӧ сылы: «Кутшӧмъясӧс?» Исус висьталіс: «Эн ви, эн прелюбодействуйт, эн гусясь, эн лӧжнӧ свидетельствуйт,

Пӧчитайт батьтӧ и мамтӧ и любит быдсяма мортӧс, кыдзи ачыд асьтӧ».

Шуис Сылы: «Быдсӧн ме сійӧс кери аслам ичӧтысянь, мый ме ещӧ эг помав?»

Шуис сылы Исус: «Кор кӧсъян тыр бур лоны, мун вузав быдсӧн ассьыд, мый эм и сетав корысьяслы; и аддзан эмбур небеса вылын; и лок Ме бӧрысь».

Кывмысьтӧн жӧ морт тайӧ кывъяс муні шогсигтырйи, сы понда мый вӧлі сылӧн уна эмбур.

Исус жӧ шуис аслас велӧдчысьяслы: «Веськыда шуа тіянлы, сьӧкыд пырны озырлы небеснӧй сарствоӧ.

Бара шуа тіянлы: кокниджык лоӧ верблюдлы ем пыс пыр петны, нежӧ озырлы небеснӧй сарствоӧ пырны».

Кылісны жӧ велӧдчысьяс Сылӧн, дивуйтчисны зэв и шуисны: «Коді жӧ вермас спаситчыны?»

Исус видзӧдліс на вылӧ и висьталіс: «Мортъяслы тайӧ оз позь, а Енлы быдсӧн позяс».

Сэки воча Петыр шуис Сылы: «Со ми быдсӧн эновтім, и Тэ бӧрсянь мӧдім, мый жӧ лоас миянлы?»

Исус жӧ шуис налы: «Веськыда шуа тіянлы, мый ті, Ме бӧрсянь локтысьяс, выльысь чужмысьтӧн, кор пуксяс Пи мортлӧн престол вылӧ аслас славанас, пуксянныд и ті дас кык престол вылӧ судитны дас кык кӧлена Израильлысь.

И быдӧн, коді эновтас ассьыс оланін, либӧ вокъясӧс, либӧ чойясӧс, либӧ батьӧс, либӧ мамӧс, либӧ гӧтырӧс, либӧ челядьӧс, либӧ му-видз Менам ним понда, сё мында босьтас и помтӧм олӧм аддзас.

Уна жӧ лоасны медводдза медбӧръяяс и медбӧръя медводдзаяс.

КЫЗЬӦД ЮР.

Сарство небеснӧй эм кӧзяин морт кодь, коді асывводз петіс медавны уджалысьясӧс аслас виноградӧ.

Донъясис жӧ уджалысьяскӧд мынтыны налы пенязьӧн лун кежлӧ, ыстіс найӧс аслас виноградӧ.

И петмысьт коймӧд часӧ, аддзис мукӧдъясӧс сулаліг базар вылын уджавтӧг.

И шуис налы: «Мунӧ и ті менам виноградӧ, и мый мында уджаланныд, мынта тіянлы». Найӧ жӧ мунісны.

Бара жӧ петмысьт квайтӧд и ӧкмысӧд часӧ, керис сідз жӧ.

Дас ӧтикӧд жӧ часӧ петмысьт аддзис мукӧдъясӧс сулаліг уджавтӧг и шуис налы: «Мый ті татӧн сулаланныд лунтыр уджавтӧг?»

Шуисны сылы: «Некод тай миянӧс эз медав». Шуӧ налы: «Мунӧ и ті менам виноградӧ, мый мында уджаланныд, босьтанныд».

Кор жӧ рыт лои, шуӧ господин виноградлӧн аслас вернӧй мортлы: «Кор уджалысьясӧс и мынты налы дон, медбӧръяяссянь медводдзаясӧдз».

И вомысьт медалӧмъяс дас ӧтикӧд часӧ, босьтісны пенязьӧн.

Вомысьтӧн жӧ медводдзаяс думайтісны, мый найӧ босьтасны унджыкӧн, но босьтісны и найӧ пенязьӧн жӧ.

Босьтмысьтӧн жӧ пондісны видчыны кӧзяин вылӧ.

И шуны: «Тайӧ медбӧръяяс уджалісны ӧтик час, а тэ пуктін найӧс ӧткодя миянкӧд, кодъяс уджалім лунтыр и терпитім жар».

Сійӧ жӧ воча шуис ӧтиклы наысь: «Другӧй, ме тэнӧ ог ӧбӧдит, эн ӧмӧй донъясь тэ мекӧд пенязьысь?

Босьт ассьыд и мун. Ме жӧ кӧсъя сетны и тайӧ медбӧръялы сійӧс жӧ, мый и тэныд.

Ог ӧмӧй ме вермы керны аслам эмын, мый меным колӧ? Сы понда син тэнад завидуйтӧ, мый ме бур?»

Сідзи лоасны медбӧръяяс медводдзаясӧн и медводдзаяс медбӧръяясӧн; уна ӧд эмӧсь корӧмаяс, но этша бӧрйӧмаяс».

И кайигӧн Исус Иерусалимӧ, туй вылын нуӧдіс дас кык велӧдчысьясӧс мукӧдъяс дінысь и шуис налы:

«Со пырам Иерусалимӧ, и Пи морлӧн сетӧма лоас аркиtрейяслы и книжникъяслы, и мыждасны сійӧс кувны.

И сетасны сійӧс язычникъяслы ругайтӧм вылӧ, и нӧйтӧм вылӧ, и распинайтӧм вылӧ; и комӧд лунӧ ловзяс».

Сэки воис Сы дінӧ мам Зеведей пиянлӧн аслас пиянъяскӧд, юрбитӧ и мыйкӧ Сылысь корӧ.

Исус шуис сылы: «Мый тэныд колӧ?» Сійӧ шуис Исуслы: «Тшӧкты, мед эськӧ тайӧ кык пи менам пуксясны Тэ дінӧ ӧтикыс веськыдладорад, а мӧдыс шуйгаладорад Тэнад сарствоын».

Исус воча шуис: «Онӧ тӧдӧй, мый коранныд. Верманныд-ӧ юны тасьті, кодӧс Ме понда юны, и пыртчыны пыртчӧмӧн, кодӧн Ме пыртча?» Найӧ шуӧны Сылы: «Вермам».

И шуӧ налы: «Тасьті Менсьым юанныд, и пыртчӧмӧн, кодӧн Ме пыртча, понданныд пыртчыны. А мед эськӧ пуксьыны Ме дінӧ веськыдладорӧ и шуйгаладорӧ, абу Месянь сетны сійӧс тіянлы, но кодлы лӧсьӧдӧма Менам Батьсянь».

Кывмысьтӧн сійӧс, дас велӧдчысь лӧгасисныс кык вок вылӧ.

Исус жӧ корис найӧс и шуис: «Ті тӧданныд, мый князьяс мортъяслӧн господствуйтӧны йӧз вылын, и ыджыдъяс кутӧны найӧс.

Но тіян костын оз ков сідз лоны, а коді тіянысь кӧсйӧ лоны ыджыдӧн, сійӧ мед лоас тіянлы слуга.

И коді кӧсйӧ тіян пытшкын лоны медводдза, сійӧ мед лоӧ тіянлы уджалысь.

Сідзи кыдз Пи мортлӧн эз во сы понда, мед Сылы служитасны, но мед Ачыс служитас и сетас ассьыс лов унаясӧс вештӧм понда».

И кор петісны найӧ Иерихонысь, вӧтчисны на бӧрысь уна йӧз.

Сэтӧн кык синтӧм, туй дорын пукалысьяс, кылісны, мый Исус мунӧ на дінті, пондісны горзыны и шуны: «Милуйт миянӧс, Господи, Пи Давидлӧн».

Йӧз жӧ ӧлісны найӧс, мед эськӧ найӧ оз горзыны. А найӧ зэвджык пондісны горзыны и шуны: «Милуйт миянӧс, Господи, Пи Давидлӧн».

И сувтмысьт Исус корис найӧс и шуис: «Мый тіянлы Месянь колӧ?»

Шуӧны Сылы: «Господи, мед эськӧ воссясны миян синъяс».

Жалитіс жӧ Исус, сибӧдчис на синъяс дінӧ, и пыр воссисны налӧн синъяс, и найӧ мӧдісны Сы бӧрсянь.

КЫЗЬ ӦТИКӦД ЮР.

И кор матыстчисны Иерусалим дінӧ и воисны Виффагияӧ Елеонскӧй гӧра дінӧ, сэки Исус ыстіс кык велӧдчысьӧс,

Шуис налы: «Мунӧ оланінӧ, коді тіян весьтын. И пыр аддзанныд домалӧм ослицаӧс и ослёнокӧс сыкӧд. Разьӧй и вайӧдӧй Ме дінӧ.

И кор коді шуас тіянлы мыйкӧ, висьталӧй воча, мый найӧ колӧны Господьлы, и регыд лэдзас найӧс».

Сійӧ жӧ быдсӧн лои, мед тыртчас шуӧм пророклӧн, коді шуӧ:

Висьталӧ Сионскӧй нывлы: «Со сар тэнад локтӧ тэ дінӧ рам, пукалӧ подъяремнӧй пи ослёнок вылын».

Велӧдчысьяс мунісны и керисны сідз, кыдзи тшӧктіс налы Исус.

Вайӧдісны ослицаӧс и ослёнокӧс, и вевттисны найӧс асланыс паськӧмъясӧн и пуксьӧдісны Исусӧс на вылӧ.

Уна жӧ йӧз вольсалісны ассьыныс паськӧм туй вывті, и мукӧдъяс вундалісны пуясысь ув йывъяс и вольсалісны туй вылӧ.

Йӧз жӧ водзвыв и бӧрвыв локтысьяс горзісны и шуисны: «Осанна Давид Пилы! Благӧслӧвитӧма локтысь Господь нимӧ, осанна вылысъясын!»

И кор пырис Сійӧ Иерусалимӧ, вӧрзис быдсӧн кар и шуис: «Коді эм тайӧ?»

Йӧзъяс жӧ шуисны: «Тайӧ эм Исус пророк, коді Галилейскӧй Назаретысь».

И пырис Исус Ен вичкоӧ, и вӧтліс быдсӧн вузалысьясӧс и ньӧбысьясӧс вичкоысь, и пӧрӧдіс пызанъяс вежласьысьяслысь, и пукаланінъяс гулю вузалысьяслысь.

И шуис налы: «Эм гижӧма: вичко Менам, вичко кевманінӧн шусяс; а ті керинныд сійӧс рӧзбойникъяс оланінӧн».

И воисны Сы дінӧ вичкоын синтӧмъяс и коктӧмъяс, и бурдӧдіс найӧс.

Кор жӧ аддзисны аркирейяс и книжникъяс чудесаяс, кодъясӧс Сійӧ керис, и пиянъясӧс, мый горзӧны вичкоын и шуӧны «Осанна Давид Пилы», лӧгасисны.

И шуисны Сылы: «Кылан-ӧ, мый найӧ сёрнитӧны?» Исус жӧ шуис налы: «Сідз! Эн ӧмӧй ті лыддьывлӧй некор, мый кага вомъясысь и нёнясьысьясысь тэ керин ошкӧм?»

И колис найӧс, петіс ортсӧ карысь Вифанияӧ, и узис сэтӧн.

Асывводз жӧ бергӧдчигӧн карӧ тшыгмис.

И аддзис туй дорысь ӧтик смоковничнӧй пу, воис сы дінӧ и эз аддзы сы вылысь нинӧм, ӧтик коръясысь ӧприч, и шуис сылы: «Мед оз ло сэсся тэсянь быдмӧм некор, и смоковничнӧй пу пыр косьмис.

Аддзымысьт тайӧс, велӧдчысьяс дивуйтчисны и шуисны: «Кыдзи смоковничнӧй пу регыд косьмис?»

Исус жӧ шуис налы воча: «Веськыда шуа тіянлы, кор тіян лоас вера и он пондӧй сумневайтчыны, сэки не сійӧ сӧмын керанныд, мый керӧма смоковничнӧй пукӧд, но кор шуанныд и тайӧ гӧралы «Вӧрзьӧдчы и шыбитчы мореӧ», сэки и сійӧ лоас.

И быдсӧн, мый коранныд кевмысьӧмӧн, вераӧн, босьтанныд».

И кор воис Сійӧ вичкоӧ и велӧдіс, сэки матыстчисны Сы дінӧ аркирейяс и старечьяс йӧз шӧрысь и шуисны: «Кутшӧм власьтӧн тэ тайӧс керан, и коді тэныд сетіс татшӧм власьт?»

Исус шуис воча: «Юала и Ме тіянлысь ӧтик кыв; кор сы йылысь висьталанныд Меным, сэки и Ме тіянлы висьтала, кутшӧм власьтӧн Ме тайӧс кера.

Пыртчӧм Иоаннлӧн кытысянь вӧлі? Небесасянь али мортъяссянь?» Найӧ жӧ арталісны ас костаныс и шуӧны: «Висьталам кӧ небесасянь, сэк шуас миянлы, мый понда жӧ ті эн веритӧй Сылы?

А висьталам кӧ, мортъяссянь, полам йӧзысь; быдӧн ӧд лыддьӧны Иоаннӧс пророкӧн».

И шуисны воча Исуслы: «Ог тӧдӧй». И шуис налы Сійӧ: «И Ме тіянлы ог висьтав, кутшӧм власьтӧн Ме тайӧс кера.

Кыдз жӧ тіянлы кажитчӧ? Кутшӧмкӧ мортлӧн вӧлі кык пи. И воис сійӧ медводдза пи дінӧ и шуис: «Пиӧй, мун талун уджав менам виноградын».

Сійӧ жӧ шуис воча «ог мун», а сы бӧрти думайтчис и муні.

И вомысьт мӧдыс дінӧ, шуис сійӧс жӧ. Сійӧ шуис воча «муна, батьӧй» и эз мун.

Кодыс сійӧ кыкысь керис бать тшӧктӧм серти?» Шуисны сылы: «Воддзаыс». Исус шуис налы: «Веськыда висьтала тіянлы, мытаръяс и блудничаяс тіянысь войдӧр пырасны небеснӧй сарствоӧ.

Воис ӧд тіян ордӧ Иоанн Креститель веськыд туй кузя, и ті эн веритӧй сылы. А мытаръяс и блудничаяс веритісны сылы. Ті жӧ аддзымысьтӧн тайӧс эн кӧсйӧй веритны сылы.

Кывзӧй мӧд притча: вӧлі кутшӧмкӧ кӧзяин, коді пуктіс виноград, потшис сійӧс оградаӧн и лӧсьӧдіс виноград вийӧданін, и вӧчис горнича, и сетіс сійӧс виноград уджалысьяслы и муніс.

Кор жӧ матыстчис пӧра чукӧртны вотӧсъяссӧ, ыстіс ассьыс слугаясӧс виноград уджалысьяс дінӧ, босьны вотӧсъяссӧ ассьыс.

Виноград уджалысьяс кутісны Сылысь слугаяссӧ, кодӧс нӧйтісны, кодӧс жӧ виисны, а мукӧдсӧ и изъясӧн виисны.

Бара ыстіс Сійӧ мукӧд слугаясӧс унджык воддза дорысь. И керисны накӧд сідз жӧ.

Медбӧрын жӧ ыстіс на дінӧ ассьыс Писӧ и шуис: «Яндысясны Менам пиысь».

Но виноград уджалысьяс аддзисны писӧ, шуисны ас костаныс: «Тайӧ эм наследник. Мунамӧ виамӧй сійӧс и босьтам сылысь быд олӧмсӧ».

И кутісны сійӧс, петкӧдісны ортсӧ виноградысь и виисны.

И сідз, кор воас кӧзяин виноградлӧн, мый керас сійӧ виноград уджалысьяскӧд?»

Шуисны Сылы: «Лёкъясӧс лёк ногӧн виас и виноград сетас мукӧд уджалысьяслы, кодъяс сетасны сылы вотӧс аслас пӧраӧ».

Исус шуис налы: «Эн ӧмӧй ті некор лыддьылӧй гижӧд вылысь? Из, кодӧс войдӧр шыбитісны вӧчысьяс, сійӧ лои медводдза пельӧсын. Господьсянь сійӧ вӧлі, и эм шензяна тіян синъяс водзын.

Сы понда висьтала тіянлы, мый мырддьӧма лоас тіянлысь сарство Енлӧн, и сетсяс йӧзлы, кодъяс вайӧны вотӧс сылысь.

И коді усьӧ тайӧ из вылӧ, жугалас, а код вылӧ сійӧ усьӧ, сійӧс ляпкӧдас.

И кывмысьт аркирейяс и фарисейяс притчаяс Сылысь, гӧгӧрвоисны, мый Сійӧ на йылысь сёрнитӧ.

И корсисны Сійӧс кутны, но полісны йӧзысь, сы вӧсна мый Сійӧс лыддисны пророкӧн.

КЫЗЬ КЫКӦД ЮР.

Исус бара пондіс сёрнитны притчаясӧн и шуис налы:

Сарство небеснӧй эм сар кодь, коді керис гӧтрасян пир аслас пи понда.

И ыстіс ассьыс слугаяссӧ корны корӧмъясӧс пир вылӧ, и эз кӧсйыны локны.

Бара ыстіс мӧд слугаясӧс и шуис: «Висьталӧй корӧмъяслы «Ӧбед ме запті, куканьяс и кодӧс ме верді, начкӧма и быдсӧн дась, локтӧй пир вылӧ».

Но найӧ нинӧм пыдди пуктісны сійӧс и мунісны коді аслас му вылӧ, а мукӧд аслас тӧрг вылӧ.

Мукӧдъяс жӧ кутісны сылысь слугаяссӧ, ругайтчисны на вылын и виисны найӧс.

И кывмысьт сійӧ сар лӧгасис и ыстіс ассьыс уна салдатъясӧс, виис сійӧ виысьясӧс и кар налысь сотіс.

Сэки шуис аслас слугаяслы: «Гӧтрасян пир дас, а корӧмъяс эз туйны.

Сідз мунӧ туйвежъяс вылӧ, и быдсӧнӧс, кодъясӧс аддзанныд, корӧ пир вылӧ».

И петісны сійӧ слугаяс туйвежъяс вылӧ, чукӧртісны быдсӧнӧс, кодъясӧс аддзисны, лёкъясӧс и буръясӧс, и тыртчис гӧтрасян пир гӧсьтъясӧн.

Сар жӧ пырис видлыны гӧсьтъяссӧ, аддзис сэтӧн ӧтик мортӧс, коді эз вӧв пасьтасьӧма гӧтрасян пир паськӧмӧ

И шуис сылы: «Друг! Кыдзи тэ пырин татчӧ не гӧтрасян паськӧмын?» Сійӧ жӧ чӧв оліс.

Сэки висьталіс сар слугаяслы: «Кӧрталӧй сылысь кырымъяс и кокъяс, босьтӧй сійӧс и шыбитӧй ортсӧ пемыдінӧ. Сэтӧн лоас бӧрдӧм и пинь йирӧм».

Уна ӧд эмӧсь корӧмъяс, а этша бӧрйӧмъяс».

Сэки мӧдісны фарисейяс и сӧвет вӧчисны, кыдз эськӧ пӧръявны Сійӧс кывъясӧн.

И ыстӧны Сы дінӧ ассьыныс велӧдчысьяссӧ иродианаяскӧд и шуӧны: «Велӧдысь, тӧдам, мый Тэ эм веськыд, и Ен туйӧ дерт велӧдан, и некодӧс он пӧръяв, сы понда мый тэ он видзӧд некутшӧм морт чужӧм вылӧ.

Висьтав жӧ миянлы, кыдз тэ думайтан, колӧ-ӧ вот мынтыны Кесарлы али оз?»

Тӧдіс жӧ Исус пӧръялӧм налысь, шуис: «Мый ылӧдланныд Менӧ, лицемеръяс?

Петкӧдлӧй Меным монета, кодӧн вот мынтӧны». Найӧ жӧ вайисны Сылы дас ура.

И шуис налы: «Кодлӧн тайӧ чужӧм и гижӧм?»

И висьталісны Сылы: «Кесарлӧн». Сэки шуис налы: «Сідз сетӧй Кесарлысь Кесарлы, а Енлысь Енлы».

И кывмысьт тайӧс дивуйтчисны, и колисны Сійӧс, мунісны.

Сійӧ лунӧ воисны Сы дінӧ саддукейяс, кодъяс шуӧны, мый абу ловзьӧм, и юалісны Сылысь,

Шуӧны: «Велӧдысь! Моисей висьталіс: кор коді челядьтӧм морт кулӧ, сэк мед босьтас вок сылӧн ас саяс гӧтырсӧ сылысь и ловзьӧдас рӧд аслас воклысь.

Вӧлісны миян сизим вок, и медводдза гӧтрасьмысьт кулі, и эз вӧв челядь, и колис гӧтырсӧ ассьыс аслас воклы.

Сідз жӧ и мӧд, и коймӧд, дажӧ сизимӧдӧдзыс,

Медбӧрын жӧ кулі и гӧтыр.

Кодлы жӧ сійӧ сизимысь лоӧ гӧтырӧн ловзьымысьт мӧдар югыдын? Сы понда мый сійӧ вӧлі быдӧн сайын».

Исус жӧ шуис налы воча: «Ылӧдчанныд и он тӧдӧй гижӧмъяс, ни вын Енлысь.

Ловзьымысьт ӧд мӧдар югыдын ни оз гӧтрасьны, ни оз верӧс сайӧ мунны, а олӧны кыдз Енлӧн Ангеляс небеса вылын.

А кулӧмъяс ловзьӧм йылысь эн ӧмӧй ті лыддьылӧй, мый шуӧма Тіянлы Енсянь?

Ме эм Ен Авраамлӧн, и Ен Исааклӧн, и Ен Иаковлӧн; Ен абу Ен кулӧмъяслӧн, но Ен ловъяяслӧн».

И кывмысьтӧн йӧз шензисны Сійӧ велӧдӧм понда.

Фарисейяс жӧ кывмысьтӧн, мый яндзимӧ воштіс саддукейясӧс, чукӧртчисны ӧтилаӧ.

И юаліс ӧтик законник на пытшкысь пӧръявлӧмӧн Сійӧс и шуис:

«Велӧдысь! Кутшӧм заповедь эм медыджыд законын?»

Исус жӧ шуис Сылы: «Любит Господь Енмӧс ассьыд быдсӧн тэнад сьӧлӧмӧн, и быдсӧн тэнад лолӧн, и быдсӧн тэнад мывкыдӧн.

Сійӧ эм медводдза и медыджыд заповедь.

А мӧд сы кодь жӧ: любит быдсяма мортӧс, кыдз асьтӧ ачыд.

Тайӧ кык заповедьын эм быдсӧн закон и пророкъяс».

Кор жӧ чукӧртчисны фарисейяс, юаліс налысь Исус:

И шуис: «Мый ті думайтанныд Кристос йылысь? Кодлӧн эм Пи сійӧ?!» Шуисны Сылы: «Давидлӧн».

Шуис налы Исус: «Кыдз жӧ Давид ачыс нимӧдӧ лов кузя Сійӧс Господьӧн и висьталӧ:

Шуис Господь менам Господьлы: пукав Менам веськыдладорын, кытчӧдз ог пукты тэнсьыд врагъясӧс тэнад кокъяс улӧ».

А кор Давид шуӧ Сійӧс Господьӧн, кыдз жӧ Пи сылы лоас?»

И некод эз вермы Сылы шуны воча кыв, ни эз лысьт некод сійӧ лунсянь юавны Сылысь нинӧм сэсся.

КЫЗЬ КОЙМӦД ЮР.

Сэки Исус сёрнитігӧн йӧзкӧд и аслас велӧдчысьяскӧд,

Шуис: «Моисей пукаланінӧ пуксисны книжникъяс и фарисейяс.

Быдсӧн, мый найӧ висьталасны тіянлы кывзыны, кывзӧй и керӧй. Найӧ жӧ керӧмъяс серти эн керӧй; тшӧктӧны ӧд, а асьныс оз керны.

Кӧрталӧны ӧд сьӧкыд нӧбъяс, кодъясӧс оз позь новлӧдлыны, и лэптӧны йӧз пельпомъяс вылӧ, а асьныс и чуньнаныс оз кӧсйыны найӧс вештыны.

Быдсӧн жӧ ассьыныс керӧмъяс керӧны сы понда, мед аддзасны йӧз; паськӧдӧны жӧ ассьыныс хранилищеяс и ыдждӧдӧны ассьыныс паськӧмъяссӧ.

Любитӧны жӧ пукавны медводдза местаясын пиръяс вылын и чукӧртӧмъяс инын.

И мед эськӧ налы юрбитісны йӧз чукӧртчӧмъяс инын, и мед эськӧ нимӧдісны найӧс йӧз: «Велӧдысь! Велӧдысь!»

Ті жӧ эн шусьӧ велӧдысьясӧн. Ӧтик ӧд тіян эм велӧдысь Кристос, а ті быдсӧн вокъяс.

И батьӧн эн шуӧй некодӧс аслыныд му вылын. Ӧтик ӧд эм Бать тіян, коді небесаяс вылын.

Ни эн шусьӧ велӧдысьясӧн, ӧтик ӧд эм велӧдысь тіян, Кристос.

Ыджыдджык жӧ тіянысь мед лоас тіянлы слуга.

Коді ӧд лэптысяс, раммас, а коді рам, сійӧ лэптысяс.

Горе тіянлы, книжникъяс и фарисейяс, лицемеръяс, мый пӧдлаланныд небеснӧй сарство йӧз водзын. Асьныд ӧд он пырӧй, и пырысьясӧс он лэдзӧй пырны.

Горе тіянлы, книжникъяс и фарисейяс, лицемеръяс, мый сёянныд керкаяс дӧваяслысь и пӧръялӧмӧн кевманныд дыр: сы понда босьтанныд сьӧкыдджык мыждӧм.

Горе тіянлы, книжникъяс и фарисейяс, лицемеръяс, мый ветлӧдланныд мореӧд и косӧд, мед эськӧ бергӧдны кӧть ӧтикӧс, и кор бергӧданныд, сэки керанныд сійӧс пиӧн кустӧм билы, кык мында ас дорсьыныд омӧльджыкӧн.

Горе тіянлы синтӧм нуӧдысьяслы и шуысьяслы «кор коді ёрсяс вичкоӧн, сійӧ нинӧм, а кор жӧ коді ёрсяс вичко зарниӧн, сійӧ мыжа».

Йӧйяс и синтӧмъяс! Кодыс ыджыдджык: зарни али вичко, вежӧдысьын зарнисӧ?

Сідз жӧ, «кор коді ёрсяс вӧлтарӧн, сійӧ нинӧм, а коді ёрсяс козинӧн, коді сы вылын, сійӧ мыжа».

Йӧйяс и синтӧмъяс! Мый ыджыдджык: козин али вӧлтар, коді вежӧдӧ козин?

И сідз, коді ёрсьӧ вӧлтарӧн, ёрсьӧ сыӧн и быдсӧнӧн, мый сы вылын.

И коді ёрсьӧ вичкоӧн, ёрсьӧ сыӧн и коді олӧ сы пытшкын.

И коді ёрсьӧ небесаӧн, ёрсьӧ Ен престолӧн и пукалысьӧн сы вылын.

Горе тіянлы, книжникъяс и фарисейяс, лицемеръяс, мый сетанныд дасӧд юкӧн мятаысь, анисысь и тминысь, а колинныд ыджыдджыкӧс законысь: веськыда судитӧм, и милуйтӧм, и вера. Сійӧ колӧ вӧлі керны, и тайӧ эз ков эновтны.

Синтӧм нуӧдысьяс! Номйысь видзчысянныд и верблюдӧс ньылыштанныд.

Горе тіянлы, книжникъяс и фарисейяс, лицемеръяс, мый весаланныд тасьтіяслысь и блюдъяслысь ортсыладорсӧ, а пытшкӧсладорыс жӧ налӧн тырӧсь мырддьӧмъясӧн и неправдаясӧн.

Синтӧм фарисей! Весав войдӧр пытшкӧсъяссӧ тасьтіяслысь и блюдъяслысь: мед налӧн лоас и ортсыладорыс сӧстӧм.

Горе тіянлы, книжникъяс и фарисейяс, лицемеръяс, ті ӧд сэтшӧмӧсь жӧ, кыдзи краситӧм гортъяс, кодъяс ортсысяньыс кажитчӧны мичаӧсь, а пытшкӧсъясын тырӧсь кулӧм лыясӧн и быдсяма пежӧн.

Сідз жӧ и ті ортсысянь кажитчанныд йӧзлы праведникъясӧн, а пытшкӧсныд тыр лицемерствоӧн и омӧля олӧмӧн.

Горе тіянлы, книжникъяс и фарисейяс, лицемеръяс, мый вӧчӧданныд гортъяс пророкъяслысь и мичӧданныд гувыв памятникъяс праведникъясысь,

И шуанныд: «Кор эськӧ ми волім асланым батьяс лунъяс дырйи, эг эськӧ ми вӧлӧй налы тӧварышъясӧн вир кисьтігӧн пророкъяслысь».

Сы понда ті асьныд ас понда свидетельствуйтанныд, мый ті пиян налӧн, кодъяс виисны пророкъясӧс.

Тыртӧй жӧ и ті мера асланыд батьяслысь.

Змейяс, ехиднасянь чужӧмаяс, кыдзи ті пышъянныд мыждӧмысь кустӧм биӧ?

Сы понда со ме ыста тіянӧ пророкъясӧс, мудрӧйясӧс и книжникъясӧс, и ті мукӧдӧс вианныд и распинайтанныд, а мукӧдъясӧс понданныд нӧйтны тіян чукӧртчанінъясын, и вӧтлыны карысь карӧ.

Мед воас тіян вылӧ быд праведниклӧн вир, коді кисьтӧма му вылын, праведнӧй Авель вирсянь Захария вирӧдз, коді вӧлі пи Варахиялӧн, и кодӧс ті виинныд вичко и вӧлтар костын.

Веськыда висьтала тіянлы, воас быдсӧн сійӧ тайӧ рӧд вылӧ.

Иерусалимӧй, Иерусалимӧй, пророкъясӧс виысь и изъясӧн шыблалысь тэ ордӧ ыстӧмаясӧс! Кымынысь Ме кӧсйи чукӧртны тэнсьыд пиянтӧ, кыдзи пӧтка чукӧртӧ ассьыс пиянсӧ бордъяс улас, и ті эн кӧсйӧй?

Со кольччӧ тіянлы керка тіян пуста.

Шуа ӧд тіянлы: он аддзӧй менӧ ӧнісянь, кытчӧдз он шуӧй: благӧслӧвитӧма локтысь Господь нимӧ.

КЫЗЬ НЁЛЬӦД ЮР.

И петмысьтӧн Исус мӧдіс вичкосянь, и матыстчисны Сы дінӧ велӧдчысьяс Сылӧн петкӧдлыны Сылы вичко стрӧйбасӧ.

Исус жӧ шуис налы: «Аддзанныд быдсӧн тайӧ стрӧйбасӧ? Веськыда висьтала тіянлы, быдсӧн тайӧ лоас жугӧдӧма, сідз мый оз коль татӧн из из вылын».

Кор жӧ пукаліс Сійӧ Елеонскӧй гӧра вылын, сэки матыстчисны Сы дінӧ велӧдчысьяс Сылӧн ас кежас и юалісны: «Висьтав миянлы, кор тайӧ лоас, и кутшӧм знаменньӧ Тэнад локтӧмлӧн и помасьӧм татчӧс олӧмлӧн?

Исус шуис налы воча: «Видзчысьӧй, мед некод тіянӧс оз пӧръяв.

Уна ӧд воасны Менам нимӧн и шуасны: «Ме эм Кристос», и унаӧс пӧръяласны.

Сідз жӧ кыланныд юӧръяс войнаяс йылысь, видзӧдӧй, эн полӧй: колӧ ӧд тайӧ быдсӧнлы лоны, но тайӧ абу на ещӧ пом.

Сувтас ӧд йӧз йӧз вылӧ и сарство сарство вылӧ, и лоасны няньтӧм вояс, лёк смертьяс и мувӧрӧмъяс местаясӧн.

Быдсӧн жӧ тайӧ медводдза на пондӧм висьӧмъяслӧн.

Сэки сетасны тіянӧс мучитны, и виасны тіянӧс, и лоанныд вӧтлӧмаӧсь быд йӧзӧн Менам ним вӧсна.

И сэки унаӧн пӧръясясны, и морта-мортӧс сетасны и оз пондыны морта-мортӧс любитны.

И уна лӧжнӧй пророкъяс лоасны, и пӧръяласны унаӧс.

И уна чукӧртӧм грекъяс вӧсна уналӧн любов вошас.

Коді жӧ терпитас помӧдз, сійӧ спаситчас.

И проповедуйтӧма лоӧ тайӧ Евангелльӧ сарстволӧн быд му кузя, висьталӧм понда быд йӧзлы; и сэки воас пом.

И кор жӧ аддзанныд мерзосьт запустения водзвыв шуӧмаӧсь Даниил пророкӧн сулаліг Святӧй местаын, коді лыддьӧ, мед гӧгӧрвоас,

Сэки кодъяс олӧны Иудеяын, мед пышъясны гӧраяс вылӧ,

И коді вевт вылын, мед оз лэччы босьтны, мый сылӧн керкаас,

И коді му вылын, мед оз бергӧдчы бӧр, босьтны ассьыс паськӧмсӧ.

Горе жӧ нӧбасьысьяслы и нёньӧдысьяслы сійӧ лунъясӧ.

Кевмысьӧй жӧ, мед оз ло пышйӧм тіян тӧлын ни субӧтаӧ.

Лоас ӧд сэки ыджыд шог, кутшӧм эз вӧвлы му пуксьӧмсянь ӧнӧдз, и оз ло водзӧ.

И эз кӧ эськӧ дженнявмыны сійӧ лунъяс, эз эськӧ спаситчы некутшӧм морт: но бӧрйӧм буръяс вӧсна дженнявмасны сійӧ лунъяс.

Сэки кор коді висьталас тіянлы, сэтӧн Кристос либӧ сэтчаньын, эн веритӧй.

Лоасны ӧд лӧжнӧй Кристосъяс и лӧжнӧй пророкъяс, и керасны ыджыд знаменньӧ и чудесаяс, сы понда мед эськӧ шогмис кӧ пӧръявны и бӧр бӧрйӧмъясӧс.

Со водзвыв Ме тіянлы висьтала.

И сідз, кор тіянлы висьталасны «Со Сійӧ пустыняын», эн петӧй, «Со Сійӧ пытшкӧс оланінъясын», эн веритӧй.

Кыдзи жӧ чард петӧ асыввывсянь, и югъялӧ рытыввылӧдз, сідз жӧ лоӧ и воӧм морт Пилӧн.

Кӧн ӧд лоӧ шой, сэтчӧ чукӧртчасны кутшъяс.

Пыр жӧ сійӧ шог лунъяс бӧрын шонді пемдас, и тӧлысь оз сет югыдсӧ ассьыс, и кодзувъяс усьӧны небесаысь, и небеснӧй силаяс вӧрзьӧдчасны.

Сэк петкӧдчас знаменньӧ морт Пилӧн небеса вылын: и сэк бӧрддзасны быдсӧн мувыв рӧдъяс, и аддзасны морт Пиӧс локтіг небеснӧй кымӧръяс вылын ыджыд силаӧн и славаӧн.

И ыстас ассьыс Ангелъяссӧ ыджыд трубнӧй гӧлӧсӧн, и чукӧртасны бӧр бӧрйӧмаясӧс Сылысь нёльнанладор тӧвсянь, небеса помысь помӧдз.

Велӧдчӧй жӧ смоковнича притчаысь: кор ув йывъяс сылӧн лоӧны небыдӧсь, и коръяс быдмасны, сэки тӧдӧ, мый матын эм гожӧм.

Сідзи и ті, кор аддзанныд сійӧс быдсӧн, тӧдӧй, мый матын эм, ӧдзӧс дорын.

Веськыда шуа тіянлы, оз мун тайӧ рӧд, кытчӧдз быдсӧн тайӧ оз ло.

Небеса и му мунӧны, кывъяс жӧ Менам оз мунны.

Сійӧ жӧ лун йылысь и часысь некод оз тӧд, ни небеснӧй Ангелъяс, сӧмын Бать Менам ӧтнас.

Кыдзи ӧд вӧлі Ной лунъяс дырйи, сідзи лоӧ и воӧм морт Пилӧн.

Кыдзи ӧд потоп водзвыв лунъясӧ, сёйисны и юисны, гӧтрасисны и верӧс сайӧ сеталісны, сійӧ лунӧдз, кор пырис Ной ковчегӧ.

И эз тӧдны, кытчӧдз эз во ва и эз вӧйт быдӧнӧс. Сідз лоӧ и воӧм морт Пилӧн.

Сэки лоӧны кыкӧн му вылын: ӧтикыс босьтсяс, а мӧдыс кольӧ.

Кык изысь изкиясӧн: ӧтикыс босьтсяс, а мӧдыс кольӧ.

И сідз виччысьӧ, сы понда мый он тӧдӧй, код часӧ Господь тіян воас.

Сійӧ жӧ тӧдӧ, кор эськӧ тӧдіс кӧзяин гортлӧн, код пӧраӧ воас гусясьысь, видзӧдіс эськӧ и эз сет кодйысьны аслас керка улас.

Сы понда и ті лоӧй дасьӧсь, мый код часӧ он думайтӧй, морт Пи воас.

Коді жӧ эм вернӧй и мудрӧй слуга, кодӧс сувтӧдас господин сылӧн аслас слугаяс вылын, мед эськӧ сетавны налы сёянсӧ пӧра дырйи.

Шуда сійӧ слуга, кор господин сылӧн, вомысьтӧн аддзас сійӧс кериг сідз.

Веськыда шуа тіянлы, мый быдсӧн аслас эмбур вылын пуктас сійӧс.

Кор жӧ слуга сійӧ лёк, шуас аслас сьӧлӧмӧн «Оз регыд во господин менам»

И пондас нӧйтны тӧварышъясӧс ассьыс, сёйны жӧ и юны кодалысьяскӧд.

Сэки воас господин сійӧ слугалӧн, код лунӧ сійӧ оз виччысь, и код часӧ оз думайт,

И кералас сійӧс шӧри, и пуктас сійӧс ӧтвыв лицемеръяскӧд; сэн лоӧ бӧрдӧм и пинь йирӧм.

КЫЗЬ ВИТӦД ЮР.

Сэки сарство небеснӧй лоас дас ныв кодь, кодъяс босьтісны сисьяс ассьыныс и петісны жӧниклы паныд.

Вит на пытшкысь вӧлісны мывкыдаӧсь, и вит йӧйӧсь.

Сійӧ йӧйяс босьтісны ассьыныс сисьяссӧ, а вый эз босьтны аскӧдыс.

Мывкыдаяс жӧ вый босьтісны дозъясын асланыс сисьяскӧд.

И кор жӧник жыр эз во, пондісны вугравны быдсӧнӧн и унмовсисны.

Вой шӧрын жӧ лои чуксасьӧм: со жӧник локтӧ, петӧй паныд сылы.

Сэки чеччисны быдсӧн сійӧ нывъяс и лӧсьӧдісны ассьыныс сисьяс.

Йӧйяс жӧ мывкыдъяслы шуисны: вайӧй миянлы ассьыныд вый, сы понда мый миян сисьяс кусны пондісны.

Мывкыдаяс жӧ воча шуисны: мед эськӧ эз ло тырмытӧм миян и тіян, а мунӧй бурджык вузалысьяс ордӧ и ньӧбӧй аслыныд.

Кор жӧ мунісны найӧ ньӧбны, воис жӧник и дасьтысьӧмъяс пырисны сыкӧд свадьба вылӧ и пӧдлалӧма вӧлі ӧдзӧс.

Сы бӧрын жӧ воисны и мукӧд нывъяс и шуисны: «Господи, Господи, восьты миянлы».

Сійӧ жӧ налы шуис воча: «Веськыда висьтала тіянлы, он тӧд тіянӧс».

И сідз, видзӧдӧ, сы понда мый он тӧдӧй лун и час, кор воас Пи мортлӧн.

Сарство небеснӧй ӧд эм морт кодь, коді мӧдӧдчигӧн вылӧ туйӧ корис ассьыс слугаяссӧ, и сетіс налы быд эмбурсӧ ассьыс.

И сетіс ӧтиклы вит талант, мӧдлы кыкӧс, коймӧдлы ӧтикӧс, и быдӧнлы аслас вын серти, и мӧдӧдчис регыд.

Коді босьтіс вит талант, муні и уджавмысьт сійӧясӧн чукӧртіс и мӧд вит талант.

Сідз жӧ коді и кыкӧс босьтіс, чукӧртіс сійӧясӧн и мӧд кыкӧс.

Босьтысь жӧ ӧтикӧс муні гуаліс сійӧс муӧ и дзебис эзысь аслас господинлысь.

Дыр мысьтӧн жӧ воис господин сійӧ слугаяслӧн и пондіс накӧд лыддьысьны.

И воис вит талант босьтысь, вайис мӧд вит талант и шуӧ: Господи, вит талант тэ меным сетін, со ме мӧд вит талант чукӧрті найӧн.

Шуис жӧ сылы господин сылӧн: «Шань, бур и вернӧй слуга, этша вылын вӧлін тэ вернӧй, уна вылӧ тэнӧ пукта: пыр аслад господин радуйтчанінӧ».

Воис жӧ и кык талант босьтысь и шуӧ: «Господин, кык талант тэ меным сетін, со ме мӧд кыкӧс чукӧрті найӧн».

Шуис жӧ сылы господин сылӧн: «Шань, бур и вернӧй слуга, этша вылын вӧлін тэ вернӧй, уна вылӧ тэнӧ пукта: пыр аслад господин радуйтчанінӧ».

Воис жӧ и ӧтик талант босьтысь и шуӧ: «Господин, ме тэнӧ тӧді, мый тэ морт чорыд: вундан, кытчӧ эн кӧдзлы, и чукӧртан, кытчӧ эн разӧдлы.

И повзи, муні и дзеби талант тэнсьыд муӧ, и со тэныд тэнад».

Господин жӧ сылӧн шуис сылы воча: «Лукавӧй и дыш слуга! Тӧдін тэ, мый ме вунда, кытчӧ эг кӧдзлы, и чукӧрта, кытчӧ эг разӧд.

Колӧ ӧд вӧлі тэныд сетны менсьым эзысь тӧргуйтысьяслы, и во мысьт ме эськӧ босьті ассьым содтӧдӧн.

И сідз босьтӧй сы ордысь талант и сетӧй сылы, кодлӧн эм дас талант.

Кодлӧн ӧд эм, быдлаын сетӧма лоас, и содтысяс, а кодлӧн абу, мырддьӧма лоас сы ордысь и сійӧ, мый эм.

И туйтӧм слугаӧс шыбитӧй ортсӧ пемыдінӧ; сэн лоас бӧрдӧм и пинь йирӧм». Сійӧ висьтавмысьтӧн горӧдіс: «Кодлӧн эм пельяс кывзыны, мед кывзас.

Кор жӧ воас Пи мортлӧн аслас славаӧн и быдӧн Святӧй Ангелъяс Сыкӧд, сэки пуксяс престол вылӧ аслас славаӧн.

И чукӧртчасны Сы водзӧ быдсяма йӧз, и янсӧдас найӧс морта-морт дінысь, кыдзи видзысь янсӧдӧ ыжъясӧс кӧзаяс дінысь.

И сувтӧдас ыжъясӧс аслас веськыд ки вылас, а кӧзаясӧс шуйгавылас.

Сэки шуас сар веськыдладорас сулалысьяслы: локтӧй благӧслӧвитӧмъяс Менам Батьлӧн, босьтӧй тіянлы лӧсьӧдӧм сарство му пуксьӧмсянь.

Кор Ме вӧлі тшыг, и ті сетінныд Меным сёйны, колӧ вӧлі Меным юны, и ті юкталінныд Менӧ, туй морт вӧлі, и ті пыртінныд Менӧ;

Пасьтӧм вӧлі, и ті пасьтӧдінныд Менӧ; вися вӧлі, и ті видлінныд Менӧ; тюрмаын вӧлі, и ті волінныд Ме дінӧ».

Сэки праведникъяс шуисны Сылы воча: «Господи! Кор ми тэнӧ аддзылім тшыгйӧн и вердлім? Али ютӧмӧн и юкталім?

Кор жӧ ми тэнӧ аддзылім туй мортӧн и пыртлім? Али пасьтӧг и пасьтӧдлім?

Кӧр жӧ ми тэнӧ аддзылім висьӧмӧн али тюрмаын и волывлім тэ дінӧ?»

Сар жӧ висьталіс налы воча: «Веськыда висьтала тіянлы, сы понда мый кыдзи ті вӧчинныд ӧтиклы тайӧ Менам ичӧт вокъясысь, сійӧс Меным вӧчинныд».

Сэки шуас и шуйгаладорын сулалысьяслы: мунӧй Ме дінысь, проклятӧйяс, кустӧм биӧ, кодӧс дасьтӧма дявӧллы и сы аггелъяслы.

Кор Ме вӧлі тшыг, и ті эн сетӧ Меным сёйны; кор колӧ вӧлі Меным юны, и ті эн юкталӧй Менӧ;

Туй морт вӧлі, и ті эн пыртӧй Менӧ; пасьтӧм вӧлі, и ті эн пасьтӧдӧй Менӧ; виси и тюрмаын вӧлі, и ті эн волывлӧ Ме дінӧ».

Сэки и найӧ шуасны Сылы воча: «Господи! Кор тэнӧ аддзылім ми тшыгӧн, али ютӧмӧн, али туй мортӧн, али пасьтӧмӧн, али висьӧмӧн, али тюрмаын и эг служитӧ Тэныд?»

Сэки шуас налы паныд: «Веськыда висьтала тіянлы, сы понда мый кыдзи ті эн вӧчӧй ӧтиклы тайӧ ичӧтъясысь, сійӧс и Меным эн вӧчӧй.

И мунасны тайӧяс помасьтӧм мукаӧ; а праведникъяс жӧ помасьтӧм оланінӧ».

КЫЗЬ КВАЙТӦД ЮР.

Кор помаліс Исус быд сійӧ сёрни, сэк шуис аслас велӧдчысьяслы:

«Ті тӧданныд, мый кык лун бӧрын лоас Пасха, и Пи мортлӧн сетӧма лоас распинайтӧм вылӧ».

Сэки чукӧртчисны аркирейяс, и книжникъяс, и йӧз пытшкысь старечьяс аркирей ордӧ, кодлӧн нимыс Кайяфа,

И сӧветуйтчисны, кыдз эськӧ босьтны пӧръялӧмӧн Исусӧс и вины.

Сёрнитісны жӧ сӧмын не праздник дырйи, мед эськӧ оз ло йӧз шӧрын зык.

Кодыр жӧ Исус вӧлі Вифанияын, Симон прокажённӧй ордын,

Сэки матыстчис Сы дінӧ баба, кодлӧн вӧлі доз тыр дона мироӧн, и кисьтіс Исуслы юр вылӧ пукалігас.

Аддзисны жӧ сійӧс велӧдчысьясыс сылӧн, лӧгӧн моз шуисны, мый вӧсна сэтшӧм воштӧм;

Позис эськӧ вузавны тайӧ миро ыджыд дон вылӧ и юклыны нищӧйяслы.

Сійӧ жӧ гӧгӧрвомысьт Исус шуис налы: «Мый ӧланныд бабаӧс? Сійӧ ӧд бур делӧ керис Ме понда.

Сы понда мый нищӧйяс быддырйи эмӧсь тіянкӧд, а Ме быддырйи абу.

Кор кисьтіс ӧд тайӧ миро Ме вылӧ, дзебӧм вылӧ сійӧ Менӧ лӧсьӧдіс.

Веськыда висьтала тіянлы, кӧні кор висьталӧма лоӧ тайӧ Евангелльӧ быд мирын, и сы йылысь, мый керис сійӧ висьтассяс.

Сэки дас кык велӧдчысьясысь ӧтик, коді шусьӧ Иуда Искариот муні аркирейяс ордӧ

И шуис: «Мый ті меным сетанныд, и ме тіянлы вузала Сійӧс?» Найӧ жӧ пуктісны сылы комын серебренник.

И сэки сійӧ корсис сэтшӧм пӧра, кор вермас Сійӧс вузавны.

Медводдза жӧ опресочнӧй лунӧ матыстчисны велӧдчысьяс Исус дінӧ и шуисны Сылы: «Кӧн тшӧктан миянлы лӧсьӧдны тэныд сёйны Пасха?»

Сійӧ жӧ шуис: «Мунӧй карӧ сэтшӧм ордӧ и шуӧй сылы, велӧдысь шуӧ: Пӧра менам матын эм. Тэ ордын сёя пасха аслам велӧдчысьяскӧд».

И керисны велӧдчысьяс, кыдз тшӧктіс налы Исус, и заптісны пасха.

Кор жӧ рыт лои, Сійӧ пуксис дас кыкнан велӧдчысьясыскӧд.

И сёйигӧн налы шуис: «Веськыда шуа тіянлы, мый ӧтик тіянысь Менӧ вузалас».

И пондісны шогсьыны зэв и шуны Сылы быдӧн наысь: «Абу-ӧ ме, Господи?»

Сійӧ жӧ налы шуис воча: «Коді Мекӧд пуктыліс сов дозйӧ кырымсӧ, сійӧ Менӧ вузалас.

Пи ӧд мортлӧн мунӧ, кыдз эм гижӧма Сы йылысь: горе жӧ сійӧ мортлы, кодӧн Пи мортлӧн вузасяс; бурджык эськӧ вӧлі сылы, эз кӧ сійӧ морт чужлы.

Воча жӧ шуис Иуда Сійӧс вузалысь: «Велӧдысь! Абу-ӧ ме?» Шуис сылы: «Тэ шуин».

И кор найӧ сёйисны, босьтіс Исус нянь, и благӧслӧвитмысьтӧн чеглаліс, и сеталіс велӧдчысьяслы, и шуис: «Босьтӧй, сёйӧй; тайӧ эм яй Менам».

И босьтіс чаша, и хвала сетіс, мыччис налы и шуис: «Юӧ сы пытшкысь быдӧн;

Сійӧ ӧд эм вир Менам, выль заветлӧн, коді уна вӧсна киссьӧ, грекъяс колӧм понда.

Висьтала жӧ тіянлы, мый ог понды ӧнісянь юны тайӧ винограднӧй плӧдысь сійӧ лунӧдз, кор понда юны тіянкӧд выль вина Аслам Бать сарствоын.

И сьылӧм бӧрын муніны Елеонскӧй гӧра вылӧ.

Сэки шуис налы Исус: «Быдсӧн ті ылаланныд тайӧ войӧ Ме йылысь; гижӧма ӧд эм: дойда видзысьӧс и разӧдчасны ыжъяс чукӧрысь.

Аслам жӧ ловзьӧм бӧрын Ме паныд пета тіянлы Галилеяын».

Петыр жӧ шуис сылы воча: «Кӧть и быдӧн ылалӧны Тэ йылысь, а ме некор ог ылӧдчы».

Шуис сылы Исус: «Веськыда висьтала тэныд, мый тавой войдӧр, кытчӧдз петук оз чуксась, куимысь ӧткажитчан Меысь».

Шуис сылы Петыр: «Кӧть эськӧ меным и кувны Тэкӧд, ог ӧткажитчы Тэысь». Сідз жӧ и быдсӧн велӧдчысьяс шуисны.

Сэки воис накӧд Исус оланінӧ, коді шусьӧ Гефсиманияӧн, и шуӧ велӧдчысьяслы: «Пукалӧй сэтӧн, кодкості Ме ветла кевмысьны сэтчань».

И босьтіс Аскӧдыс Петырӧс и кыкнан писӧ Зеведейлысь, пондіс шогсьыны и тужитны.

Сэки шуис налы Исус: «Шог эм Менам ловлы кувтӧдз; виччысьлӧй татӧн, и овлӧй Мекӧд».

И муніс неылӧ, уськӧдчис аслас чужӧм вылӧ, кевмис и шуис: «Батьӧй Менам! Позяс кӧ, мед мунӧ Ме дінысь чаша тайӧ; но не сідз, кыдз Ме кӧсъя, а кыдз Тэ».

И воис велӧдчысьяс дінӧ, и аддзис найӧс узиг, и шуис Петырлы: «Сы мында ӧмӧй эн вермӧй ӧтик час овны Мекӧд?»

Эн узьӧй и кевмӧй, мед он воӧй омӧльӧ, лов ӧд кокньыд, а асьныд вермытӧмӧсь.

Бара муні мӧдысь кевмыны, и шуӧ: «Батьӧ Менам! Оз кӧ позь тайӧ чашалы Ме дінысь мунны, Менам ютӧг сійӧс, мед лоас вӧля Тэнад».

И воис, аддзис найӧс бара узиг; вӧлі ӧд налӧн синъясыс сьӧктӧмаӧсь.

И колис найӧс, муні бара, кевмысис коймӧдысь и сійӧ жӧ кыв шуис.

Сэки воис аслас велӧдчысьясыс дінӧ и шуӧ налы: «Узьӧй жӧ ті и куйлӧй; со матыстчис час, и Пи мортлӧн сетсьӧ грешникъяс кырымӧ.

Чеччӧй, мунамӧй; со матыстчис вузалысь Менӧ.

И ещӧ сійӧ сёрнитіс на, со Иуда, ӧтик дас кык пытшкысь, воис, и сыкӧд уна йӧз ӧружйӧясӧн и зоръясӧн аркирейяссянь и йӧз старечьяссянь.

Вузалысь жӧ Сійӧс сетіс налы знак, и шуис: «Кодӧс ме окала, сійӧ и эм, кутӧй Сійӧс».

И пыр воис Исус дінӧ, шуис: «Радуйтчы, Велӧдысь!» и окаліс Сійӧс.

Исус жӧ шуис сылы: «Друг Менам! Мыйла тэ татӧн?» Сэк матысмисны, лэптісны кырымъяссӧ Исус вылӧ и кутісны Сійӧс.

И со ӧтик, коді вӧлі Исускӧд, нюжӧдіс кырымсӧ, и кыскис ассьыс пурт, и кучкис слугаӧс аркирейлысь, и вундіс сылысь пельсӧ.

Сэки шуис Исус: «Пукты пурттӧ ассьыд аслас пуртӧсӧ; быдсӧн ӧд пурт босьтысьяс пуртӧн пӧгибнитасны.

Али думайтан тэ, мый Ме ог вермы ӧні корны Аслам Батьлысь, и ыстас Меным унджык дас кык легионысь Ангелъяс?

Кыдз жӧ тыртчасны гижӧмъяс, мый сідз колӧ лоны?»

Сійӧ часӧ шуис Исус йӧзлы: «Рӧзбойник вылӧ ӧмӧй воинныд ӧружйӧясӧн и зоръясӧн кутны Менӧ? Быд лунӧ Ме тіянкӧд пукалі и велӧді вичкоын, и эн кутӧй Менӧ».

Сійӧ жӧ быдсӧн вӧлі, мед тыртчас гижӧмъяс пророкъяслӧн. Сэки велӧдчысьяс Сылӧн быдӧн колисны Сійӧс и пышйисны.

Босьтысьяс жӧ Исусӧс нуӧдісны Кайяфа аркирей ордӧ, кытчӧ книжникъяс и старечьяс чукӧртчӧмаӧсь волыны.

Петыр жӧ локтіс Сы бӧрысь ылісянь аркирей ордӧдз; и пырмысьт пукаліс слугаяскӧд и виччысис помсӧ.

Аркирейяс жӧ и старечьяс и быдсӧн чукӧртчысьяс корсисны лӧжнӧй свидетельясӧс Исус вылӧ, мед эськӧ вины Сійӧс.

И эз аддзыны. И кор лӧжнӧй свидетельяс волісны, сідз жӧ эз аддзыны. Медбӧрын жӧ воисны кык лӧжнӧй свидетель

И шуисны: «Сійӧ шуис: верма рӧзӧритны вичко Енлысь и куим лунӧн вӧчны сійӧс».

И сувтіс аркирей, шуис Сылы: «Мый жӧ Тэ нинӧм он висьтав? Кылан-ӧ, мый таяс Тэ вылӧ свидетельствуйтӧны?»

Исус жӧ чӧв оліс. И воча шуис Сылы аркирей: «Заклинайта Тэнӧ ловъя Енмӧн, висьтав миянлы, Тэ-ӧ эм Кристос, Пи Енлӧн?»

Шуис сылы Исус: «Тэ ачыд шуин. А ме висьтала тіянлы: ӧнісянь аддзанныд Пи мортлысь пукаліг веськыдладорын Ен силаысь и локтіг небеснӧй кымӧръяс вылын.

Сэки аркирей косяліс ассьыс паськӧмсӧ и шуис: «Тайӧ ӧд Енмӧс кулитӧ; мый ещӧ корсям свидетельясӧс? Со ӧні кылінныд Енмӧс кулитӧм Сылысь.

Кыдз ті думайтанныд?» Найӧ жӧ шуисны воча: «Колӧ вины Сійӧс кувтӧдз».

Сэки сьӧлалісны Сылысь чужӧмсӧ и пакӧсьтъяс Сылы вӧчисны; мукӧдъяс жӧ кучкалісны Сійӧс тшӧкаас,

И шуӧны: «Висьтав миянлы, Кристос, коді кучкис Тэнӧ».

Петыр жӧ ортсын пукаліс ӧградаын; и воис сы дінӧ ӧтик служанка и шуӧ: «И тэ вӧлін Исус Галилейскӧйкӧд».

Сійӧ жӧ ӧткажитчис быдӧн водзын, шуис: «Ог тӧд, мый тэ сёрнитан».

Петны жӧ сійӧ пондіс ӧдзӧс дорӧ; аддзис сійӧс мӧд и шуӧ: «Кодъяс сэтӧн вӧліны, и тайӧ ӧд вӧлі Исус Назорейкӧд».

И бара ӧткажитчис ёрсьӧмӧн, мый ог тӧд сійӧ мортӧс.

Недыр мысьт жӧ воисны сулалысьяс сэтӧн, шуисны Петырлы: «Дерт и тэ эм найӧ пытшкысь; тэнад тай и сёрниыд висьталӧ тэнӧ».

Сэки пондіс ёрсьыны и божитчыны, мый ог тӧд сійӧ мортӧс. И пыр чукӧртчис петук.

И дум вылас воис Петырлы висьталӧм Исуслӧн шуӧм сылы, мый «водзджык, кытчӧдз петук оз чукӧстчы, куимысь ӧткажитчан Меысь». И петіс ортсӧ, зэв пондіс бӧрдны.

КЫЗЬ СИЗИМӦД ЮР.

Асывводз жӧ сӧвет керисны быдсӧнӧн аркирейяс и йӧз пытшкысь старечьяс Исус вылӧ, мед вины Сійӧс.

И кӧрталісны Сійӧс, нуӧдісны и сетісны Понтийскӧй Пилатлы игемонлы.

Сэки аддзис Иуда, вузалысь Сійӧс, мый мыждісны Сійӧс, каитчис и бӧр сетіс комын серебренник аркирейяслы и старечьяслы,

Шуис: «Согрешиті ме, вузалі мыжтӧм вир». Найӧ жӧ шуисны: «Мый миянлы? Тэ аддзан ачыд».

И шыбитіс серебренникъяс вичкоӧ, петіс, муніс и джагӧдчис.

Аркирейяс жӧ босьтісны серебренникъяс, шуисны: «Оз шогмы тайӧ пуктыны вичко казнаӧ, сы понда мый эм тайӧ вирлӧн дон».

Сӧвет жӧ керисны, ньӧбисны сыӧн му гырнич вӧчысьлысь, туй мортъясӧс дзебӧм вӧсна.

Сы понда и пондіс шусьыны сійӧ му «Вир муӧн» ӧнія лунӧдз.

Сэки тыртчис шуӧм Иеремия пророкӧн, коді шуис: «И босьтісны комын серебренник, донъялӧм дон, кодӧс донъялісны Израильлӧн пияныс,

И сетісны сійӧ гырнич керысь му пыдди, кыдзи висьталіс меным Господь».

Исус жӧ сувтіс игемон водзӧ. И юаліс Сійӧс игемон: «Тэ-ӧ эм сар иудейяслӧн?» Исус жӧ шуис сылы: «Тэ шуан».

И кор мыждылісны Сійӧс аркирейяс и старечьяс, Сійӧ нинӧм эз висьтав воча.

Сэки шуис Сылы Пилат: «Он ӧмӧй Тэ кыв, кымынӧн Тэ вылӧ свидетельствуйтӧны?»

И эз воча шу сылы Исус некутшӧм кыв вылӧ сідзи, мый дивуйтчис игемон зэв.

Быдсяма жӧ праздник кежлӧ сэтшӧм вӧлі ног игемонлы, лэдзны ӧтикӧс тюрмаысь йӧзлы, кодӧс корасны.

Вӧлі жӧ сэки тюрмаын рӧзбойник, коді шусис Варавваӧн.

Чукӧртчымысьт жӧ налы, шуис налы Пилат: «Кодсӧ колӧ (кык пытшкысь), лэдза тіянлы, Варавваӧс али Исусӧс, коді шусьӧ Кристос?»

Тӧдіс ӧд, мый зависьт понда вузалісны Сійӧс.

Пукалігӧн жӧ сылы судейскӧй местаын, ыстіс сы дінӧ гӧтырыс сылӧн висьтавны: «Немтор эн кер тайӧ праведниклы; уна ӧд ме тавой вӧтӧн терпиті Сы вӧсна».

Аркирейяс жӧ и старечьяс велӧдісны йӧзӧс, мед корасны Варавваӧс, Исусӧс жӧ виасны.

Воча жӧ игемон шуис налы: «Кодсӧ колӧ кык пытшкысь, лэдза тіянлы» Найӧ жӧ шуисны «Варавваӧс».

Шуис налы Пилат: «Мый жӧ ме кера Исуслы, коді шусьӧ Кристос?» Шуисны сылы быдсӧнӧн: «Мед распинайтӧма лоӧ».

Игемон жӧ шуис: «А кутшӧм лёк керис Сійӧ?» Найӧ жӧ лёкпырысь горӧдісны и шуӧны: «Мед распинайтӧма лоӧ».

Аддзис жӧ Пилат, мый немтор оз вермы керны, но сӧмын зык ыдждӧ, босьтіс ва, мыськис кияссӧ йӧз водзын и шуис: «Абу ме мыжа тайӧ праведник вирӧн, видзӧдӧй ті».

И воча быдсӧн йӧз шуисны: «Вир Сылӧн миян вылын и миян пиянъяс вылын».

Сэки лэдзис налы Варавваӧс, Исусӧс жӧ нӧйтіс, сетіс налы, мед Сійӧс распинайтасны.

Сэки воинъяс игемонлӧн босьтісны Исусӧс асланыс суд вылӧ, и чукӧртісны Сы вылӧ зэв уна воинъясӧс,

И пӧрччӧдісны Сійӧс, пасьтӧдісны багряничаӧн.

И кыисны венеч лежнӧгысь, и пуктісны Сы юр вылӧ и сетісны Сылы веськыд кырымас бедь, и юрбитісны Сы водзын видзӧс вылӧ уськӧдчӧмӧн, ругайтчисны Сы вылын и шуӧны: «Радуйтчы, сар иудейскӧй!»

И сьӧлалісны Сы вылӧ, босьтісны бедь и кучкалісны юрас Сійӧс.

И кор ругайтчисны Сы вылын, пӧрччисны Сы вылысь багрянича, и пасьтӧдісны Сійӧс аслас паськӧмӧ, и нуӧдісны Сійӧс распинайтны.

Туй вылын жӧ паныд лои налы Киринейскӧй морт, Симон нима; и сійӧс тшӧктісны тшӧтш нуны крест сылысь.

И воисны места вылӧ, коді шусьӧ Голгофаӧн, мый эм «Лобнӧй места».

Сетісны Сылы юны уксус сорлалӧмӧн сӧпкӧд и видлымысьт эз кӧсйы юны.

Распинайтысьяс жӧ Сійӧс, юкисны паськӧм Сылысь, пудъялӧмӧн;

И пуксисны видзны Сійӧс сэтӧн.

И пуктісны Сылы юр вылас мыжсӧ Сылысь гижӧмӧн: «Тайӧ эм Исус сар иудейяслӧн.

Сэки распинайтісны Сыкӧд кык рӧзбойникӧс, ӧтиксӧ веськыд кивыв, а мӧдсӧ шуйга кивыв.

Ветлысьяс жӧ Сы дінтӧ кулитісны Сійӧс, шатлӧдлӧмӧн юръяссӧ ассьыныс,

И висьтавлісны: «Рӧзӧритысь вичко и куим лунӧн вӧчысь, спаситчы Ачыд, кор Тэ эм Енлӧн Пи, лэччы крест вылысь».

Сідз жӧ и аркирейяс ругайтчисны книжникъяскӧд, и старечьяскӧд, и фарисейяскӧд и шуисны:

«Мукӧдӧс спаситліс, а асьсӧ оз ӧмӧй вермы спаситны? Кор Сійӧ сар эм Израильлӧн, мед лэччас ӧні крест вылысь и веруйтам Сылы.

Сійӧ надейтчис Ен вылӧ, мед мездас ӧні Сійӧс, кор Сійӧ колӧ сылы. Шуис тай, мый Енлӧн эм Пи».

Сідз жӧ и рӧзбойникъяс Сыкӧд распинатйӧмаяс ругайтчисны Сы вылын.

Квайтӧд жӧ чассянь пемыд вӧлі быд му кузя ӧкмысӧд часӧдз.

Ӧкмысӧд жӧ часӧ горӧдіс Исус ыджыд гӧлӧсӧн и шуис: «Или, или, лима Савахдани», мый эм «Ен Менам! Ен Менам! Мыйла Тэ Менӧ колин?»

Мукӧдъяс жӧ сэтӧн сулалысьяс кылісны сійӧс и шуисны, мый Илияӧс чуксалӧ Тайӧ.

И регыд котӧртіс ӧтик на пытшкысь и босьтіс тшак, тыртіс уксусӧн, пуктіс бедь вылӧ и юкталіс Сійӧс.

Мукӧдыс жӧ шуисны: «Сулав, видзӧдам воас-ӧ Илия Сійӧс мездыны».

Исус жӧ бара горӧдіс ыджыд гӧлӧсӧн и лэдзис лов.

И сэки завеса вичкоын косясис кык торйӧ вылыс дорсяньыс улӧдзыс, и вӧрис му, и изъяс потласисны.

И гортъяс воссисны, и уна кулӧм йӧз Святӧйяс ловзисны;

И петісны гортъяс пытшкысь, Сійӧ ловзьӧм бӧрын, воисны Святӧй карӧ и петкӧдчисны уналы.

Сотник жӧ и сыкӧд видзысьяс Исусӧс, аддзисны му вӧрӧм и быдсӧн, мый вӧлі, повзисны зэв и шуисны: «Дерт Енлӧн Пи тайӧ вӧлі».

Вӧлісны жӧ сэн и видзӧдісны ылісянь уна бабаяс, кодъяс Исус бӧрысь локтісны Галилеясянь, и служитісны Сылы.

На костын вӧлі Мария Магдалина, и Мария Иаковлӧн и Иосиялӧн мам, и мам Зеведей пиянлӧн.

Кор жӧ вӧлі сёр, воис ӧтик озыр морт Аримафейсянь, Иосиф нима, коді сідзжӧ велӧдчис Исус ордын.

Сійӧ воис Пилат дінӧ, корис телӧ Исуслысь. Сэки Пилат тшӧктіс сетны телӧ.

И босьтіс телӧ Иосиф, быдмаліс сӧстӧм дӧраӧн.

И пуктіс Сійӧс аслас выль гортйӧ, кодӧс кераліс из пытшкӧ; и пуктіс ыджыд из горт ӧдзӧс вылас и муні.

Сэн жӧ Мария Магдалина и мӧд Мария пукалісны горт водзас.

Мӧд лунӧ пятница бӧрын чукӧртчисны аркирейяс и фарисейяс Пилат ордӧ

И шуисны: «Господин! Дум вылӧ миянлы уси, мый сійӧ пӧръясьысь шуис ещӧ ловъя дырйиыс: куим лун мысьт ловзя.

И сідз, тшӧкты видзны горт коймӧд лунӧдз, мед эськӧ велӧдчысьяс Сылӧн войын оз воны и гусявны Сійӧс, и оз висьтавны йӧзлы «Кулӧминысь ловзис». И лоӧ бӧръя пӧръялӧм лёкджык воддзаысь.

Шуис жӧ налы Пилат: «Эм тіян стража. Мунӧй, видзӧй, кыдз кужанныд».

Найӧ жӧ муніны, пуктісны печать из вылӧ и сувтӧдісны горт дінӧ видзысьясӧс.

КЫЗЬ КӦКЪЯМЫСӦД ЮР.

Субӧта бӧрын жӧ югдігӧн медводдза лунӧ воис Мария Магдалина и мӧд Мария видлыны горт.

И вӧлі ыджыд мувӧрӧм: Ангел ӧд Господьлӧн лэччис небесасянь и воис, путкыльтіс из, горт ӧдзӧс вылысь и пукаліс сы вылын.

Чужӧм жӧ вӧлі сылӧн чардби кодь и паськӧм сылӧн еджыд лым кодь.

Видзысьяс жӧ сійӧс повзисны зэв и лоины кыдз кулӧмаӧсь.

Ангел пондіс сёрнитны и шуис бабаяслы: «Эн полӧй ті. Тӧда ӧд Ме, мый ті распятӧй Исусӧс корсянныд.

Абу сійӧ татӧн. Сійӧ ӧд ловзис, кыдз шуис. Локтӧй, видзӧдӧй местасӧ, кӧні куйліс Господь.

И регыд мунӧй, висьталӧй сійӧ велӧдысьяслы, мый Сійӧ ловзис кулӧминысь; и паныд лоас тіянлы Галилеяын, сэтӧн Сійӧс аддзанныд, ме тіянлы висьтала.

Найӧ петісны регыд горт пытшкысь полігтырйи зэв и радлігтырйи котӧртісны висьтавны Сійӧ велӧдчысьяслы. Кор жӧ мунісны Сійӧ велӧдчысьяс дінӧ висьтавны.

И сэки Исус паныд лои налы; и шуис «Радуйтчӧй!» Найӧ жӧ матыстчисны, кутчысисны Сійӧ кокъяс, и юрбитісны Сылы.

Сэки шуис налы Исус: эн полӧй, мунӧй, висьталӧй Менам вокъяслы, мед мунасны Галилеяӧ и сэтӧн найӧ Менӧ аддзасны.

Кор жӧ найӧс муніны, сэк кодъяскӧ видзысьясысь воисны карӧ, висьталісны аркирейяслы быдсӧн, мый вӧлі.

И чукӧртчисны старечьяскӧд, сӧвет керисны, сетісны уна деньга видзысьяслы

И шуисны: «Висьталӧй, мый велӧдчысьяс Сылӧн войын воисны, и гусялісны Сійӧс миян узигӧн».

И кор сійӧ кылас игемон, ми вӧйпӧдам сійӧс, и тіянӧс печальтӧг вӧчам.

Найӧ жӧ босьтісны деньга, вӧчисны, кыдзи велӧдӧмаӧсь вӧліны, и паськалі тайӧ юӧр иудейяс пытшкын ӧнія лунӧдз.

Дас ӧтик жӧ велӧдчысьяс муніны Галилея гӧра вылӧ, кытчӧ тшӧктіс налы Исус.

И аддзисны Сійӧс, юрбитісны Сылы, а мукӧдъяс сумневайтчисны.

И матыстчис Исус и шуис налы: «Сетсис Меным быдсяма власьт небеса вылын и му вылын.

И сідз мунӧй, велӧдӧй быд йӧзӧс, и пыртӧ найӧс Бать, и Пи, и Святӧй Дух нимӧ.

Велӧдӧй найӧс видзны быдсӧн, мый Ме тшӧкті тіянлы; и со Ме тіянкӧд эм быд лунӧ татчӧс олӧм помасьтӧдз. Аминь.