Малын мӓгӹрӓт тыртнявлӓ

Атюлов Анатолий Александрович

Малын мӓгӹрӓт тыртнявлӓ
Туан солаэм эртен кӱшӹц,
Тыртнявлӓ мӓгӹрӓт седок.
Шанавӹл гань кӹверӹм шӱм гӹц
Роальым тӹшкӹ шукердок.

Тенелӓок кагакым строен
Тӓнгемвлӓн йӓнгӹштӹ, ӓнят.
Пӹцкемӹш рокеш нӹнӹм коден,
Сылыкын сӓрнӓт пӹл вӹлнӓт.

Шылдыранг кемык,ӧрдӹж вӓрӹш
Чонгештен кенӓм мӹнь тӹшец.
Но кукшы валгынзыш ӹш царнӹ
Йылаташ онгем тӹдӹн верц.

Мардежеш вуйта ӹрвезӹ халык
Сола гӹц ӹнде ӹштӹлт кен.
Яратен колтен кого халам,
Нӓнгеен вес ӹлӹмӓш сем.

Кок уштышан солан школ лишнӹ
Тетя юк ак шакты ганьок.
Машанет, йӹрӓн кымдык лишӹ
Пеледӹш кошкен важгеок.

А шим сӹнсӓӓн охыр пӧртвлӓ
Оролат корныгешӹм пыт.
Машанет, кечӹ гӹцӹн ӧрт кен,
Тӹштӓкен шӹлӹн шӹнзӹн йыд.

Тьотя дон папа лач иконыш
Тетяштӹн толмыжым мӹнд ӹрц
Юк лыкде анжат когогорныш,
Ӹштӹлӹн начкым сӹнзӓ йӹр.

Туан солаэм эртен кӱшӹц,
Тыртнявлӓ мӓгӹрӓт седок.
Тенгелӓ чучеш, вуйта ӱжӹт
Солашкем мӹньӹм мӹнгешок.