Малы? (Ильин)

Малы? Автор: Михаил Ильич Ильин

Кылдытон дыр: 1917. Источник: Ильин М. И. Стихотворенияёсыз. — Елабуга: Типография совета народного хозяйства, 1920. — 14—15-тӥ бамъёс.

Малы?

Малы медам шумпотонъёс
Веран луонтэм пичи,
Туж осконо кылъёслэн но
Куараосыз ӧрекчи?

Малы медам азьлапала
Малпаськемъёс буш луэ,
Туж чебересь синъёслэн но
Уродъёсыз адӟиське?

Малы медам ненокин но
Ӟеч луыны уг тыршы.
Вань дуннеез урод зӥбем
Татулыкез быдтылэм?

Малы медам азьло кадь ик
Начар мылкыд йырлыкын,
Шуныт сюлмысь верам кылъёс
Визьмо ке но тӧл йылын?

Ку бон быроз медам таӵе
Уродлыкен начаръёс?
— Акыр уз быр неноку но —
Ӟеч луын ке ӧм тырше!..

1917 арын 24 август

---