Малпаськись но Пеймыт гурт (Кельдов)

From Wikisource
Jump to navigation Jump to search
Малпаськись но Пеймыт гурт
Автор: Матвей Кельдов
Поттэмын: 1927. Источник: Удмурт дунне : газет. — 2018. — № 96. — 16-тӥ бам

Пыдэстэм чагыр инмын пилемъёс уяло, погыллясько. Куддыръя, узвесь кадь пурысь луыса, бугыръясько, ӵошатскыса лобӟо, куддыръя нош, ву вылэ кисьтэм тӧдьы мамык кадь пазяськыса, чагыр инметӥ уяло, лобась юсьёслы но ушало.

Пӧртэм тусо луо пилемъёс. Пилемъёс кадь ик пӧртэмесь адямилэн но малпаськонъёсыз. Пересь мурт, чаляк-а мед куло шуса, туна, кышноос, юон дыр азелы вина пӧзьтыны мед быгатомы шуса, вӧсясько, юрт кузёос, хозяйство куашка, кызьы ке выльдоно шуса, куректо. Кулак кресткомъёс кужмо луэмлэсь кышка, начар мурт нош, кресткомъёс ляб ужало, кулак улысь потыны уг лу шуса, тышкаське. Егит пиос, чебер ныл мед шедёз вал, егит нылъёс, чебер пи шедьтоно вал шуса, малпасько.

Паймоно кадь пӧртэмесь адямилэн малпаськонъёсыз. Солэсь но паймоно кадь соос пӧлысь Семон Мишалэн малпаськонэз люкиське.

Семон Миша — 18 арес юрт кузё, комсомолын улэмез 2 ар ини. Чебересь пилемъёс уяло инметӥ. Пилемъёс кадь ик чебересь Семон Мишалэн но малпанъёсыз. Бакчаяз жальгыртӥсь пичи шураз пыдъёссэ лэзьяса, валес кадь небыт вож турын вылэ выдыса, пилемъёсыз учке, малпаське.

«Милям гуртмы пеймыт, куанер, нокинлы тодмо ӧвӧл. Сое кыре поттоно», — Семон Миша ас понназ малпа.

Кызьы бен Пеймыт гуртэз кыре поттод? Сизьйыр турын кизьыса, лыдӟон корка усьтыса, таза пудо вордыны кутскыса: озьы кожаськоды, дыр, газет лыдӟись бускельёс. Семон Миша нош озьы гинэ уг малпа. Солэн малпанэз душеслэсь вылэ лобӟись, чагыр инлэсь паськыт вӧлъяськись. Семон Миша бадӟым ужъёсыз яратэ, вылӥ верам пичи ужъёсыз, кизэ дэриямен гинэ, лыдъя. Озьы ужаса, туж каллен вамыштод, ноку но социализме уд ву, шуэ со. Одӥг ар, арня, нунал, час, оло собере, минут куспын пеймыт гуртэз быдэсак выль карыса, Америкаез возьытэ вуттыны малпа. Со понна инкуазьлэсь (природалэсь) котьмае ӝамдэ куспын мукет карись кужымзэ, пе, шедьтоно. Со кужымез шедьтыса, валэдлэн ныртӥз пызйы но, валэдлэн пыдъёсыз питран, сюлмыз мотор луозы. Кытчы ке мыноно ке луиз, пуксьы но, пе, кошкы яке лобӟы. Кулэезъя машинаез котьмар карыны, пе, луоз. Сиемед ке потӥз, машинадэ гур кар но пушказ горд сюй тыр. Соку ик отысь ӵыж-ӵыж булкаос потозы. Йӧл ке луиз, гурдэ сепаратор кар но ву пон. Соку ик йӧлвыллэсь ческыт йӧл кичкоз. Тусьтыдэ гинэ пукты. Йӧллэсь ческыт умой маръёс ке но вань, дыр, но (дунне вылын мар но ӧвӧл), Семон Миша сое уг тоды на. Пеймыт гуртын мае бон тодод.

Соку алимент тыронлэсь но кышканэз ӧвӧл ини. Адями но номырлы уз ёрмы ини (Семон Миша нош солэсь туж кышка).

Озьы ке луиз, нокин тодымтэ Пеймыт гурт Нью-Йорклэсь но нимо-дано луоз. Дунне вылын нош Семон Миша кадь визьмо, калыклы ӟеч лэсьтӥсь адями ик уз луы ни. Озьы малпа Семон Миша. Лумбыт-лумбыт пичи шур дурысь турын вылын кылльыса, быдэс дунне вылысь шудтэм калыкез шудо карыны малпа. Со куспын ик Семон Мишалэн хозяйствоез утялтӥсьтэк, ужасьтэк куашка. Пеймыт гурт но кыре поттӥсь ӧвӧлэн ог интыяз сылэ. Вина юо, висёнъёсын сисьмо.

Лыз инмын пилемъёс уяло, бугыръясько. Пилемъёс кадь Семон Мишаослэн но малпаськонъёссы. Малпаськемзылэн ӟечез нош гужем ӵоже зорымтэ пилемъёслэн мында ик. Пӧртэм тусо луо пилемъёс. Пилемъёс кадь ик малпанъёс но.