Колхозонь эряф/1940/12/Мажит Гафури
| МАЖИТ ГАФУРИ |
Мажит Гафури — башкирскяй литературань классик, башкирскяй советекяй литературать ушедыец. Сон шачсь 1880 кизоня и кулось 1934 кизоня. Сембе од пингонц ётафтозе батрацкяй эряфса, сон эсь копоренц лангса марязе помещикнень, кулакнень и заводчикнень эксплоатацияснон.
Литературнай деятельностец Мажит Гафуринь мольсь 32 киза, конат совпали общественнай эряфонь и мыслянь историяса сложнейшай периоттнень мархта. Гафури ульсь свидетелькс и определеннай смысласа участникокс целай колма революциянь эса, и синь ёткстост тяфтама величайшай революцияса, кода Великай Октябрьскяй социалистическяй революциясь. Сон буржуазно-демократическяй революциять эзда ётась эфтярь ки кувалма социалистическяй революцияти. И, кода всякай оцю художниксь, талантлизай поэтсь, отражандазень эсь произведениянзон эса эпохать существеннай чертанзон, народнай эряфть картинанзон.
Гафури сёрмадома ушедсь XX векть ушетксста, сяда точна азозь 1902—1903 кизотнень. 1902 кизоня сон сёрмадсь васенце стихотворениянц — „Ишанскяй шакирттненди“, коса пяк рахсезень шакирттнень — религиознай фанатикнень. Тя пингть сон тонафнесь медресса, коза вихца удалакшневсь ступиндамс лама киза кувалмонь батрачендамада меле. Кяжияф ишанць тя стихть инкса панезе юношать медресста, но Гафури ашезь макссе пря. Сонь седисонза палсь ни поэтическяй тол, конац выражандакшнезень народть сокровеннай мыслянзон, и поэзиясь сонь кядьсонза ульсь могучай орудиякс угнетательхнень каршес тюремаса.
Тяка жа 1902 кизоня Гафури сёрмадозе васенце зрелай произведениянц — „Нужаса ётафтф эряф“ рассказонц, коса няфтезе пролетаризациять, крестьянскяй массатнень невиданнай обнищанияснон и сянь, кода синь эксплоатировандакшнесазь синцень кулаксна и русскяй кулакне. Разоблачандамок капиталистическяй действительностть, тяса Гафури няфнесы и национальнай гнёттьке, тернемок массатнень передовой русскяй народть примеронц коряс национальнай освобожденьяс. Но эряви азомс, што Гафури национальнай освобождениять [ 16 ]шарьхкочнесы аф узко-национальнай смысласа. Сон мзярдонга ашель националистокс, сяс мес барометракс тейнза фалу ульсь трудендай народсь и сонь эряфоц.
1905 кизонь революциять периодста революционнай движениять подъемоц бта макссь поэтти пацят. Гафури, конац васьфтезе революциять Казаньца, примась эсонза активнай участия. Революциясь крхкалгофнесыне Гафуринь поэзиянц социальнай мотивонзонга. Поэтсь сёрмады лама революционнай стихотвореният, коса тернесыне татарскяй и башкирскяй трудящайхнень кеподемс тюрема самодержавиять каршес. Правда, васень шитнень революциять эзда лама сон изь шарьхкочне. Кепотьксонди, сон лувондозе „злодействакс“ думать роспусконц“... Но революционнай событиятнень сяда келемомасна и касомасна, — конатнень эзда яркайста штадондсь эксплоататорхнень, коса ульсь и национальнай буржуазиясь, и эксплоатируемайхнень ёткса антагонизмась, — тисть поэтть взглядонзон эса оцю перелом. Тяни Гафури шарьхкодезе, што эрявихть лихнемс аф аньцек национально-освободительнай лозункт, но эряви национально-освободительнай тюремась сочетандамс национальнай буржуазиять каршес тюремать мархта. И сон страстнай певецонь сембе вийнц мархта ушедсь норгондома „сембе и всяческяй“ маскатнень эксплоататорхнень шамаста, протестовандамок гнётть, социальнай несправедливостть и нечеловечностть каршес.
„Козяля“ и „1907 кизоть ответоц“ стихонзон эса васьфнетяма строчкат, конат видеста серьгядихть вракнень лангса расправань тиема. Лама лия стихонзон эса поэтсь максси обобщениянь вийс коре исключительнай картинат гнётть колга, народнай массатнень обнищанияснон колга. Ашу ломаттнень образсна, конатнень рисавазень Гафури — революцияда ингольдень революционно-демократическяй литературань бессмертнай обраст. Революцияда инголе тяшкава вииста, тяшкава правдивайста народть и сонь эряфонц колга кивок ашезь сёрмада. Сяс аф случайна, што самодержавиясь пельсь Гафуринь эзда. Сонь стихонь кафта сборниконзон „Эряфозень од пингоц“ и „Нацияти кельгомазе“, конат нолдафтольхть 1906—1907 кизотнень, царскяй цензурась конфисковандазень. Поэтть мельге ульсь ладяф полицейскяй надзор, сонь аф весть подвергандакшнезь домашняй арестс.
Васенце русскяй революциять люпштаманц и равжа реакциянь режимть ладяманц пингстонга Гафури иляткшнесь вернайкс эсь народонцти, ванфтозе сонь могучай духонц и нинге сяда оцю целеустремленность мархта разоблачандакшнезень капиталистическяй действительностть мерзостензон.
Мзярда буржуазнай интеллигенциять пяльксоц аердсь тюремать эзда, авардемок и азомок, што сембе юмафтф, што модать лангса правда аш, и прась мистикав, Гафури кяж [ 17 ]мархта ёрдась синь шамазост валхт: „ули модать лангса правда“ и серьгячнезень ломаттнень „эрь шиня улемс анококс кярьмодемс тюрема коварнай эряфть мархта“.
Буржуазнай поэзиянь — пассивнай созерцаниянь поэзиянь мистицизмати и идеалистическяй „справедливостти“ Гафури каршек путсь жизнеутверждающай оптимизмать, поэзияса действенностть, ломанть эряфонц великай подвигокс, радостекс шарьхкодеманц.
Гафури, кода оцю поэт, кемоста содазе, што народть тюремац, сонь эряфоц — бессмертнайхть, а эксплоататорскяй меньшинствать господствац временнай, преходящай; сяс аньцек народть мархта слитностсь вдохновляндакшнезень и вдохновляндакшнесыне сембе великай поэттнень. И мзярда Гафуринь врагонза старандасть аерфтомс сонь трудящайхнень эзда, поэтсь сёрмадсь знаменитай стих „Мон тосан, коса ашуфне куфцихть“. Тяса сон объясняндакшнесы, коста сявондьсы эсь поэзиянц живительнай вийнц, сонь крхка оптимизманц и гуманизманц.
Васенце империалистическяй войнать Гафури васьфтезе враждебна. Войнать каршес эсь протестонц азозе сон тяфтама стихса, кода „Авартть!“, „Фкя ризфу шиня“ стихне.
Великай Социалистическяй революциять поэтсь васьфтезе оцю радость мархта, революциясь тейнза ульсь роднойкс, инксонза сон фалу тюрсь сембе творчестванц мархта, тяконь шовор февральскяй революциять пингстонга, разоблачандакшнемок временнай правительствать и сонь политиканц. Поэтсь исключительнай эмоциональнай вийса моразе революциять, сонь величиянц, од великай эпохать („Якстерь знамя“, „Воляшинь шитне“, „Воляшить честьс“, „Революция“, „Мезь ина страннай сянь эса?“ и ст. тов.). Гафуринь ня моронза арасть чрезвычайна популярнайкс массать ёткса, морсекшнезь синь боецне Якстерь Армиянь национальнай полкнень эса.
Гражданскяй войнать пингста Гафуринь стихонза кепсезь татарскяй и башкирскяй джигиттнень боевой духснон.
Тяда мельдень кизотнень, народнай хозяйствать восстановленияста, васенце Сталинскяй пятилеткатнень кизоста, странать индустриализациянь и коллективизациянь кизонзон пингста Гафури башкирскяй советскяй поэзияв макссь аф фкя замечательнай поэма и лама прекраснай стихт, конатнень эса, кода летописьса отражандазень минь странаньконь самай разнообразнай — крупнай и мелкай — событиянзон, моразе свободнай трудть, трудендай ломаттнень, нароттнень дружбаснон, поэтти тяшкава аерксокс араф эксплоатациять минь странастонк машфтоманц.
Гафуринь поэзиянцты характернай чертакс ащи советскяй патриотизмань темась, нароттнень дружбасна, Якстерь Армиять колга темась. И сембе сонь творчествац суваф [ 18 ]интернационализмань чувстваса, беспредельнай преданностьса эсь родинанцты, Ленинонь-Сталинонь тевснонды.
Кода и всякай оцю поэтсь, М. Гафури — многотемнай позт, козя и самай разнообразнай жанрань поэт. Сонь творчествасонза крхка разоблачительнай политическяй лирикать ваксса серцек минь васьфнетяма кельгомань пленительнай, чарующай лирика, коса чувстватне макссевихть сембе эсь глубинаснон, полнотаснон м гармоничностьснон мархта, и тя лаца жа природать колга лирика и лирика философскяй.
Тяфтапт сонь „Кельгомась“, „Лятфнема“, „Красавицати“, „Родинка“, „Чудеснай случай“, „Крымскяй панчфт“, „Цветникса“ стихонза — интимнай лирикать и природать колга лирикать эзда инь цебярь образецне. Характерна, што кельгомать и природать кувалма темась васьфневи Гафуринь сембе творчестванц эса: ушетксстонза сявомок пезонза молемс. Революцияда ингольдень поэзиясонза поэтсь кельгомать и природать мазышинц путнесы каршек общественнай эряфть мрачностенцты или использовандакшнесы сянкса, штоба шнамс земной эряфть цебярьшинц сяда лац, чем буржуазнай поэзиять абстрактно-религиознай образонзон эса.
Корхтамок Гафуринь философскяй лириканц колга, эряви отмечандамс ся, што сон эсь поэтическяй мироощущениясонза ульсь материалистокс, а пингонь-пингонь кепочнесь эряфонь явлениятнень диалектическяйста шарьхкодемаснонды.
Революцияда меле Гафури одукс осмыслил революцияда ингольдень творчестванц основной теманцка: угнетениять няфтеманц, капитализмать мархта народнай массатнень эксплоатировандамаснон и сонь разоблачениянц. Кда сядонгольдень рассказонзон эса („Нужаса ётафтф эряф“, „Ашуфт или сожительница“) Гафуринь геройнза ашесть тушенда пассивнай протестта ичкози, то советскяй властть пингста сёрматф произведениянзон эса сяка жа ашуфне тиендевихть активнай революционеркс.
Революцияда меле жа Гафури потрясающай вийса панжезе сядонгольдень действительностть сущностенц. Тяфтама произведениянза сонь, кода „Опозорендафт“, „Эряфть куцеманянза“, „Поэтть золотой приисканзон эса“ повесттне, сембе ширде няфтезь башкирскяй народть царизмань пингонь эряфонц, и ня произведениятнень персонажсна, сембода пяк „Опозорендафт“ и „Поэтть золотой приисканзон эса“ знаменитай повесттнень геройсна арасть ни инь кельгови литературнай геройкс народть ёткса.
Тяфта Мажит Гафури максозе сембе эсь эряфонц и творчестванц народть благанц инкса, человечествати радостенди и павазонди.