Лёк гожӧм бӧрын

by Попов Фёдор Васильевич

Лунъяснас зэрласьӧ,
Ыркыдӧсь рытъяс,
Войясыс кӧдзыдкодь,
Асывъяс руа.
Ыб вылын вежӧсь на
Идъяс да сюяс.
Шепъясыс веськыда
Чурвидзӧ уна.
Гожӧмбыд зэрала
Сёрмисны найӧ.
Кӧдзысьыс ӧніӧдз
Виччысис воӧм.
Кузь арся войясын
Лоины пужъяс.
Асывъяс кӧдзыдӧсь.
Руаӧсь лунъяс.
Ыб вылын этша нин
Вундытӧм муыс.
Быдлаын чумали
Пемыдӧсь, рудӧсь.
Гумлавыв весалӧ
Мам ичӧт нывкӧд.
Айныс сэн котшкӧдчӧ:
Тэчасін вӧчӧ.
Детина матысмӧ
Ид доддя-вӧла.
Вӧв вылысь лапкыштіс,
Нуӧдӧ домӧд.
Сувтӧдіс, лэдзаліс,
Домаліс бокӧ.
Мыччалӧ кольтаяс
Айыслы тэчны.
«Кутшӧми кокньыдӧсь
Кольтаыс ставыс!» —
Тыртӧм тай... Кынмӧма...
Сійӧн ий кокньыд.
Мыйкӧ тон кутам жӧ
Тӧвбыдӧн сёйны.