Лёва Матран (Медведев)

Лёва Матран Автор: Григорий Сергеевич Медведев 1927 ар

Гурезь бамын, гопъёс вӧзын, ӟуззы пуксемын куро липето юртъёс. Вужесь, ӝуйяськемын. Огзылэсь огзы пӧртэм ӧвӧл — лошъяськем шляпа кадь адско.

Шимес. Учкыса сюлэм будэ: марлэсь ке но мӧзмоно. Долкам бамо, пож, былям синмо юись мурт тодэ лыктэ. Мылкыдэз сура, син азез пеймыт пилем кадь шобыртэ.

Улон нюжтӥське, сӥныр кадь кыстӥське. Уг ворекъя, уг тэтча, мылкыд поръяны уг вала. Ваньмыз одӥг эгесэ тулъямын.

Куакаос мылкыдэз сӧрись куараенызы ӵукна вуэмез иворто. Ортчисьёсыз пуныос жоб утыса келяло. Ӝыт уйсыос, шуралиос шимес куараен кесясько. Мӧзмыт, кӧшкемыт.

Гурт шорын ик куйгу сылэ. Дыльды кадь кыстӥськись вузэ шутэтскытэк омыръятэ. Татын книга, газет кулэ ӧвӧл: куйгу дорын ваньзэ тодод. Кенакъёс котьмар сярысь супыльто, иворъёсын огзэс огзы сюдо.

— Пуклё Лёвалэсь ӟезьызэ тэкитэн нашталлям. Таканэз ураме потымтэысь, дыр? Со кулэ, ӟеч тупам…

— Сюлыс Пель кышнозэ жугем. Куинь урдлызэ тӥям… Кема уз улы, дыр. Кыӵе ческыт вина пуке вал, — ӝожтӥсько, лулӟо.

— Баля Бӧзок кӧто луэм! Кӧтсэ ӵушконэн ӝик-ӝик думылыса ветлэ. Медаз тодэ шуэ, дыр… Мырдэм шокамез тодмо ук! — паймо.

— Заркей Ӵаналэсь нунызэ парсь сием… Ойдо ӵок!— синтэм сӧсыр-лебыр улӥз, сотэк но кулысал,— чапкисько.

— Ожмег Лади оброссэ корам… Измертан! Возьыттэм! Кудӟеменыз, луоз,— тышкасько.

— Тути Баян пелляськись Бызара дорын нунызэ куштэм. Али ветлэмез но уг лу: весь кылле. Ӝуштэ… жоб чер кутскем-а, мар-а, — сялӟисько.

— Песьтэр Исьтоклы Чонглё Огашез кышнолы лушкаллям. Чи-ик мынэмез уг поты, пе, вал. Туннэ юозы, дыр? Ӧтьытэк уз лу,— серекъяло.

Кин гинэ татчы уг лыкты, котькудӥз выль ивор вае, выль ивор кылэ. «Коркан вераськон сюриз»,— шуыса, дораз бертэ. Со понна ик куйгуэз — со нылкышнолэн книга-газетэз шуо ук!

Нылъёс но пӧртэм ӧвӧл. Супыльтыны дыр шедьто. Колӟо Матӥлэн куала вӧзаз ветло. Табанакесь, пуклё кадь зӧкъёсыз но вань. Курмем, пӧсьтэм дэрем улысьтызы сьӧд-ӵуж вӧен кыстӥськем мугорзы адӟиське.

Отчы учкы — вина, татчы учкы — вина. Тыш но мыжык, — ымтыр визьтэм кыл.

Коркаос пушкысь чылкытсэ ичи шедьтод. Тросэтӥ пиналъёс курмем выж вылтӥ кӧт вылазы уяло. Погмаськем, тузонын лошъям нянь сиё.

Таӵе гуртын Лёва Матранлы улон кылдӥз. Гуртлэсь емышъёссэ трос чидано луиз, адӟиз.

Дыр нюжтӥськыса ортчиз. Берпум нуналъёсыз но вуиз: совет кылдӥз. Тулыс омырен шокчиз гурт.

* * *

Лёва Матран — шаян, етӥз кышномурт. Куамын ареслэсь ортчемын. Пиосмуртлы уз сётскы. «Та вадескын пиосмурт но, нылкышно но одӥг кадь», — шуэ. Ӧтчамъёсыз одӥгзэ но уз кельты. Паймымон визьмо кылъёс вера. Со вераку, пиосъёс серекъяло но, асьсэос бӧрысь Матранлэн верамезъя ик ужало. Нылкышноосыз троссэ ӧтчаме ветлыны дышетӥз. Одӥг кылын вераса — тыл!

Огпол Матранэз Сюлыс Пель возьытэ вуттӥз.

— Матран гожтэт тодэ, нырзэ вылэ ӝутэм. Куриськон гожъятэ сое!..

Кытчы пырыны ик ёрмиз — тупатэм кадь, гожтэт уг тоды вал. Горд кышет кадь бамаз вир кисьтӥськиз. Ляб интызэ шедьтӥзы. Дышетӥсь доры мынытэк, амалыз ӧз луы. (Школазы революция бере усьтӥськиз.)

Куинь толэзь ӵоже ӝытлы быдэ дышетӥсь дорын Матран дышетскиз. Ӧтчаме но ӧз ветлы. Ветлымтэысьтыз калык ик паймиз.

— Матранмы ву куртчиз,— асьсэ понна серекъяло.

Гожтэтлы дышем бераз, Матранэз нылкышноос пӧлын ужаны бырйизы. Вань мылкыдзэ поныса ужаз.

Чонглё Огаш доры кенеш люказ. Трос люкаськемын. Верасько.

— Ма, зэмзэ ик, улонмы каньыл луоз-а?— Сюлыс Пель кышно уг оскы. — Инмар возь. Кызьы но монэ кузпалэ ӧз жугылы. Трос пол виыса куяз. Юон — мыжык, юон — мыжык. Сӧсыртыса быдтӥз ук!

— Каньыл, каньыл, выль сямен луоз,— Матран лӥятэ, буйгатэ.

— Воштӥськиз ик вань!— Чонглё Огаш шумпотэ.— Тӥни Сергей Огашез басьты али? Кузпалэз жугыса воземысь кутӥз но люкиськиз. Али сое кузпалэз берлань вайыны турттэ но, уг лыкты ини.

— Визьтэмесь вал уго асьмеос. Татӥяз картъёсмы ӧжыт лаптӥськизы. Азьланяз дэмен нош на лапкытом.

— Эриктэм шып луод! Ма кышномурт, ӝык, адями ӧвӧл-а, мар-а? Ужанзэ пиосмуртлэсь но уно ужа. Керттӥськы, кышъяськы, сиён дася, пудо-животэз утялты, мисьтаськы, пиослэсь ужзэс ужа. Нылкышнолэсь ужзэ лыдъяса но уд быдты. Тонэ ик пудо интыын лыдъяло…

— Пӧзем ыжйыр вал асьмеос,— серекъяса Матран курла. — Эшъёс! Тани марлы мон тӥледыз люкай. Мон Утеме ветлӥ. Асьмелы акушерка кури.

— Мар бен со кушарка? — Баля Бӧзок юа.

— Со Бызара кадь пелляськисьёсмес воштӥсь луоз. Мар мында адямиез сӧриз ини Бызара? Лыдъяса уд быдты. Нылпи вордскытӥсь кышноослы юрттӥсь луоз со акушерка… Уг сёто… Асьме пӧлысь бырйыса дышетскыны ыстыны косо. Ыстом кинэ ке.

— Ыстом! Ыстом! Туж кулэ со!..— шумпотӥзы.

— Мон сямен, Чонглё Огашез лэзём. Со гожтэт тодэ. Пинал на али.

— Со тупа! Огаш, мын ойдо!..

— Мынысал но, кузпалэ уз лэзь, — ӝожтӥськиз Огаш.

— Кузпалэд тонэ думыса уг возь ук?! Ойдо мын…

— Иське, мыно…

Озьы Огашез дышетскыны ыстӥзы. Собере арысь аре курадӟонлэсь, жоб висёнъёслэсь мозмизы.

* * *

Лымы трос люкаськиз. Кезьытлы чидатэк, борддоръёс пильылӥсько. Школаын луд кечъёс ворттылымон кезьыт. Укноосыз одӥг вершок зӧкта лымыяськемын. Шокчид ке, самоварысь кадь, бус вӧлдӥське. Эстыны пузы ӧвӧл…

Пиналъёс пӧзьёсын, изьыосын, шубаосын лызэктыса пуко. Дышетӥсьлэн но киосыз ӟазег тяпа (пыд) кадь гордэктэмын. Гожъяськемзы уг луы.

— Ольга Ивановна, кезьыт.

— Мон ӵуказе уг лыкты.

— Мынам шуныт дӥськутэ ӧвӧл,— пиналъёс огез сьӧры огез чагисько.

— Чидалэ ини ӧжыт, оло пу кызьы ке сётозы. Курыса-курыса ӟигары быриз ини,— сюлэмзэс ик лек кари, дыр.

Сельсовет тӧро доры дышетӥсь олокӧня пол ветлӥз. Соизлэн вожез ик потӥз. Ольга Ивановнаез тышкаське.

— Чёртлы школа усьтӥзы-а? Казна мед сётоз. Ваньмызлы ми виноват ӧвӧл ук, а?

Ольга Ивановна берло-азьло со доры ӧз ветлы ини. Номырин но юрттымтэезлы оскиз.

— Лучше Матран доры мыноно. Оло нылкышно визеныз юрттоз,— шуыса, малпаз.

Матранлэн корка пушказ шуныт. Обросъёссэ ватэм. Ленинлэн суредэз, пал синзэ кырметъяса, тон шоры учке. Калининэз, Луначарскиез бам ӵушетэн котыртыса понэм. — Улаз, огез борды огез думиськыса, кырыж-шонер букваос сыло: «Азьветлӥсьёс».

— Матрёна Егоровна, юртты. Школаямы тӧл шудэ, — дышетӥсь чагиськиз.

— Тон эн чагиськы, юрттом, — дышетӥсьлэсь сюлэмзэ Матран буйгатӥз.

Ӵукна. Пиналъёс купырскыса школае люкасько. Чапкисько. Гидкуазьын сажемесь-сажемесь пуклёос кыллё. Мылкыдзы капчиямысь кеч така кадь тэтчало.

Матран вало солдаткаосыз ас дораз люказ но, школалы юрттыны пуктӥзы. Куать валэн мыныса нюлэскысь пу ваизы.

— Дырез трос уд ышты, пайдаез лыдъянтэм луоз, — шуыса, нылкышноослэсь мылкыдзэс ӝутӥз.

Пиосъёслэн но сюлэмзы чигиз.

— Та, шай, Матран, возьытэ вуттэ ук! Эриктэм мынытэк уд лу. Вормемед но уз лу, дыр? Пиосмуртлэсь ужзэ ужаны кутскиз ук. Паймод.

Ӵукнаяз кышномуртъёсын валче ог кӧня ке егит пиос, собере пересь Пуклё Лёва но мынӥзы. Кырӟаса ужало. Мылкыдзы ӝутскемын: нылкышноосын шулдыр ук ужаны! Шӧдскытэк ик кылизы — пу толбытлы люказы, нуллӥзы.

— Ольга Ивановна, эсты, толбытлы тырмоз, — Матран пу шоры возьматэ.

— Тау, Матрёна Егоровна. Тӥледлы но, пересьёс, тау карисько. Тон ке ӧй кутскысалыд, школамес ворсатык ӧй луысал. Пересьёслэн кӧберзы но ӧй вал юрттыны. Весь — я валзы висе, я уг ваньмо, я дӧдьызы ӧвӧл, я валзылэн дагаез усемын. Мылзы потымтэысь мар но уг шедьто.

— Секыт, секыт пиосмуртъёсын кылъя луыны, ужаны. Милемыз «гур суран» шуо, асьсэос «гур суран» вань, музон ӧвӧл. Дышозы али! — Матран юн кылъёссэ вераз.

Школаын шуныт. Пиналъёс сюлмысь дышетско. Дэрем полэс пуко, — тэез каръяськыны уг лэзё.

Кутскымтэлэсь кутскем умой!

* * *

Нылъёс, кӧня ке кенакъёс Матран дорын пуко: черсо, чильпасько, керттӥсько. Мылкыдзы ӝутскемын. Кылем аръёсын но тазьы люкасько вал но, пиос люкетэмен номыре но ужатэк кыльылӥзы. Асьсэлэн но мылкыдзы визьтэмъяськыны кыскемысь тросэз мунчоын пукыны ярато вал. Мунчоын пуконлэн тусыз нош тодмо: кӧтурдэсад мыжык вуоз, визьтэм кыл пельдэ урмытоз, ӵын, погмаськон, тыш. Со понна ик мунчо угось!

Матранлэн корказ чылкыт. Ньылпу зын нырез бичатэ. Пӧсь но ӧвӧл, кезьыт но ӧвӧл, — таман гинэ. Шокчонэз тамак ӵын уг басьты, гадь тыр шокаське.

Удмурт кырӟанъёс корка пушез верттало. Ӝутскыса, лаптӥськыса небыт куараос пеле пыро, мылкыдэз лӧпкыто. Ужало, кырӟало, серекъяло, верасько. Мугоразы вирзы пальккаськыса шудэ.

Кытчы пырид, нюжтӥськись уй?

— Апокъёс, вае ӧжыт шутэтскоме? Уж вӧзын умой, мылкыдъя луоз, — кемалась малпанзэ Матран сэрттыны-пертчыны кутскиз.

— Кырӟалом на!

— Выжыкылъёс вералом! — нылъёс огзылэсь огзы етӥз вераны туртто.

— Кырӟан но уз пегӟы, выжыкылъёс но уз пегӟе. Кулэ марке ныр улысь вольтчоз.

— Мар бен, мар?

— Тани «Гудыриын» туж серем верос вань, — Матран «Гудыриез» сэзъяса возьматэ. — Вае лыдӟом?..

— Вае! Вае!

— Баян, лыдӟы… Тон мон сярысь умойгес лыдӟиськод.

Гидкуазьын тӧл корка пырыны турттыса шудэ. Коркан шып-шып. Баянлэн ымысьтыз гинэ, тӥрен корам кадь, кылъёс огез сьӧры огез ӝужъё. Ленинлэн суредэз шоразы учке. Ӝӧк котырын пукисьёсыз ушъяны турттэ кадь адске. «Нылкышнолэн ужез вормиз» нимо веросэз лыдӟыса быдтӥзы.

— Паймоно кадь. Огшоры бумага вылын кыӵе-кыӵе шонер верамын. Мыным нош кунгыр-мангыръёс гинэ адско, — Заркей Ӵана ӝожтӥськиз.

Матран сое гинэ возьмаса улэ вал. Шумпотэменыз ымыз паль кошкиз.

— Зэм вераськод. Мыным но сыӵе ик йӧтэ вал. Куинь толэзь гинэ дышетски — лыдӟыны но тодӥсько ини. Тон но дышетскы вал.

Ӵана йырзэ сэзъя, кулэ уг кар.

— Ойдо нылъёс мед дышетскозы ини. Соослэн визьзы сэзь. Мыным мар, гур вӧзысь мозмыны уг лу, нылпиос но вань.

— Чик кулэтэмзэ супыльтӥськод. Сыӵе гуре мынам но вань ук! Озьы но дыр шедьтӥ. Нылъёслы но дышетскыны кулэ. Гожтэт тодытэк шуг улонэд. Газетъёсын, книгаосын мар но уг гожто? Тӥни сӥзьыл валэ кулӥське вал. Тупатэм кадь, газетысь кызьы эмъянозэ шедьтӥ: тупаз… Ужлэсь ваньмон дыръя лыдӟыны луэ. Кулэ дыръяз — карттылы, дусымдылы но гожъялоды. Ӧжыт-а ма солдатын?..

Урод кылъёс шер дыръя мылкыдэ пыӵало. Уно дыръя, огпал пельтӥ пырыса, музонтӥз потыса кошко. Яке борддоре лэзем кӧжы кадь пезьдо. Небыт кыл пумен мылкыдэз шунатэ, сюлэме каръяське.

Матранлэн но кылыз небыт; ачиз, тодмо, уг вылтӥяськы. Гожтэт тодымтэ нылъёслэн мылкыдзы корка пыртэм лымы кадь шуназ. Пал кыл но пумитатэк, дышетскыны тупазы.

— Вае ужалом, — Матранлэн капчиёмемез шӧдске.

Черсон машинаос дыбырлато. Черсъёс пырс-пырс! бергало. Чиндысъёс чильк-чильк вень борды шуккисько. Мылкыдзы вылысь душес кадь поръя. Уж шулдырен вожмаськыса ужаське. Сюлэм пилиськымон кузь уй шӧдӥськытэк ортче. Кезьыт тӧл мугоразы уг пыӵа.

* * *

Матран байтак ужаз: урод висёнъёс вӧлмемлэсь гуртсэ мозмытӥз, школаез пыдйылаз султытӥз, тямыс нылэз гожтэтлы дышетӥз. Туж умой ик, пыр-поч ӧз дышеты ке но — кутскемез данлы.

Уж мугорез тазамытэ, юнматэ, улонэз шулдыр каре. Шулдыр интыын мугор кисьма. Матранлэн но кӧсэктӥсь бамыз гордо кисьтаськыны кутскиз. Пересьмон пала вамыштӥсь мугорыз пиналъяськись мылкыдэн воштӥськиз.

Матранлэн таин гинэ ужез ӧз быры на. Тулыс вуоз — выль уж куриськоз. Гужем вуоз — выль уж сюроз.

Гуртын лёгиськемлы быдэ — вуж сямен пумиськод. Вамыштэмлы быдэ — уж сюроз.

Матран ачиз но сое тодэ, шӧдэ. Дэрие зымем гуртэз выль сямъёсын котыртыны понна, трос кужым, трос мылкыд кулэ.

— Улэп дыръям ужаса кылё! — Матранлэн куараез пеймыт гуртысь кылӥське.

— Выль гурт улонэз каньыл кароз! — нош на кужмо шуккиське.