Ужась калык эриксэ
Ас ки улаз киултӥз,
Андан дурон молотсэ
Пилемъёс кеме ӝутӥз.
Нюлэм сюпсись кузёзэ
Нежыр-нежыр пачкатӥз,
Сьӧд фабриксэ, заводзэ
Дарали кадь горд кариз.
Горд фабриказ, заводаз
Дыбыр-йыг гинэ ужа,
Аслаз шулдыр эриказ
Шулдыр кырӟанзэ кырӟа.
Мон ке нош та ляльчиын
Эрикез уг валаськы,
Нунал потэм уж дурын
Шулдырез уг адӟиськы.
Монэ кузё тышкаське,
Ултӥ каре, мактаське;
Дунтэм дунын возьыса,
Вирме улэ сюпсьыса.
Юртэ-ере ке лусал,
Пыдйылам ӧй ветлысал;
Валэ ке гырдаллясал,
Гырны музъем шедьтысал.
Ужась шоры учкыса
Кӧты ик нёркак луэ,
Ӟеч улэмзэ адӟыса
Сӥльы-виры вожъяське.
Малы меда мон таӵе
Укыр шудтэм вордскиськем?
Малы меда мон сыӵе
Дунне вылэ кылдӥськем?
Ляльчиетӥ ветлыса
Калы ик быриз ини,
Кузёослы ужаса,
Кокыр луоно лась ини.
Ку-о меда мон дугдом
Ляльчиетӥ ветлэмысь,
Ку-о меда мон дугдом
Узыр муртлы ужамысь.
Эркын ужась калыке,
Вай тон мыным бур кидэ,
Зарни бугор ужасе
Кызьы каром узырен?
— Мон тыныд киме нюрто
Гуртад гинэ гудырты,
Кенеше бырйылы ёздэ,
Ачид кузё кариськы.