Колхозонь эряф/1935/05/Ломаньць футлярса

From Wikisource
Jump to navigation Jump to search
Колхозонь эряф (1935), № 5 (23) Май ков edited by Илькинов И. Д., Бебан М. А.
Ломаньць футлярса by
авторсь: Чехов, Антон Павлович, мокшекс ётафтозе: Аф содаф (аноним)
Колхозонь эряф (Колхозная жизнь). Мокшень литературно-художественнай и общественно-политическай журнал. Мокшэрзянь АССР-нь писателень союзть правлениянц органоц. Лисеньди кавксоце кизось, эрь ковти весть. — № 5 (23) Май ков, 1935 к. — с. 49—56
 

[49]

Ломаньць  футлярса
А.  ЧЕХОВ
 

Мироносицкай велеть самай крайсонза, Прокофий старастать сараезонза лоткасть удома куду поздна сай охотникт. Синь эздост аньцек кафтоль: ветеринарнай врачсь Иван Иванович и гимназиянь учительсь Буркин. Иван Ивановичть фамилияц довольна страннаель, кафта валста — Чимша Гималайскай, кона йофси изь ладя теенза, и синь сембе губернияса лемнелезь видеста эсь лемонц и алянц лемонц коряс: сон эрясь ошть ваксса алашань кодяма заводса и сась тяни охотас, штоба таргсемс ваймец ару кожфса. Гимназиянь учительсь жа, Буркинць, эрь кизонда эрясь инжикс П. графнень пяля и тя ширеса кунара ни ульсь эсь ломанькс.

Исть уда. Иван Иванычсь, кувака уса мархта, сери, тащой атясь, ащесь озада ушеширеса сувама вастть каршеса и курендась трубка; Сонь лангозонза прашендсь ков валдсь. Буркинць ащесь потмоса тише лангса, и сон изь няефт шобдать эса.

Азонкшнесть разнай историят, тяконь шовор корхнесть сянь колга, што старастать авац, Маврась, авась шумбра и аф глупай, сембе эряфонц эрямста косонга изь уле эсь родной веледонза ичкозе, мзярдонга изь няеньдя аф ош, аф машина ки, а мекельдень кемень кизотнень ащекшнесь наголь пянакудть фтала и аньцек веть лисеньць ульцяв. — Мезе жа тяса удивительнай! — Мярьгсь Буркинць. — Ломаньдас, конат одинокайхть нутраснон коряс, конат, кода рак-отшельниксь или улиткась, старандайхть тумс эсь кедьснон потмос, тя светса аф кржа. Можбыть, тяса лисеньди атавизма[1], мрдама ся пингти, мзярда ломантть предкац нинге изь уль общественнай животнайкс и эрясь ськамонза эсь берлогасонза, а можбыть тя просто ломанень характеронь фкя разновидность, — кие содасы? Мон аф естественникан, и аф монь тевозе токсемс тяфтама кизефкст; мон аньцек йоран мярьгомс, што тяфтама ломатьтне, кода Маврась, явлениясь аф шура. Ды вага аф ичкизе вешендемс, кафтошка ков тяда инголе кулось миньцонок ошса Беликов греческай кялень учитель, монь ялгазе. Тон марьсеть сонь колганза, конешна. Сон замечательнаель сянь мархта, што прокс, нльня цебярь ущень пингста, лисеньдель калошаса и зонтик мархта и непременна лямбе польтаса вата лангса и зонтикоц сонь ащесь чехолса, и частонза чехолса серай замшань эзда и мзярда лифтезе перочиннай пееленц, штоба лаксемс карандаш, то и пеелецка сонь ащесь чехолняса; и шамац, мярьгат, тожа ащесь чехолса, сяс мес сон наголь кяшенделезе сонь кепетьф воротниконц потмос. Сон каннесь равжа сельме ваномат, фуфайка, пилензон паннезень ватаса и мзярда озсель извозчик лангс, то мярьгендель кеподькшнемс вельхтяфксть. Фкя валса азозь, тя ломантть ульсь постояннай и афмашфтови заботац ашкодомс эсь прянц оболочкаса, тиемс эсьтеенза, кода корхнихть, футляр, конац явфтолезе ба сонь ськамонза, аралалезе ба ширьдень влияниятнень эзда. Действительностьсь кяжияфнезе сонь, эйфнезе, кирьнезе прокс [50]тревогаса и, шять, сянкса, штоба оправдадондамс эсь робкай шинц, эсь отвращениянц тяниень эряфти, сон прокс фалендась йотай эряфть—пингть эса и сянь, мезе мзярдонга ашель; и древняй кяльхне, конатнень сон тонафезень ученикнень кяцта, ульсть теенза сяка жа калошатне и зонтиксь, коза сон кяшендсь видекс эряфть эзда.

— О, конашкава звучнай, конашкава цебярь греческай кяльсь! — Корхнель сон ламбаськотф шама мархта; и кода бта доказательства эсь валонзонды, сельмензон пялес конезь и суронц кеподезь мяргеньдьсь:

— Антропос![2]

И эсь арсеманзон Беликовсь станяжа старандась кяшемс футлярс. Тейнза ульсть яснайхть аньцек циркулярхне ды газетатнень статьясна, конатнень эса афольхть мярьгоньдя тиемс мезевок. Мзярда циркулярса афольхть мярьгоньдя ученикненьди лисеньдемс ульцяв илять вейхкса частта меле, или кодамовок статьяса афольхть мярьгоньдя стирень-авань кельгомда, то тя теенза ульсь яснай, определеннай: аф мярьгихть — и пец. Разрешениять жа или мярьгомать эса тейнза-арам прокс кяшфоль сомнительнай элемент, мезе мезе педа-пес апак аст и смутнай. Мзярда ошса макссельхть разрешения драматическай кружоконь, или читальнянь или чайнань панжемс, то сон чукиезе прянц и корхнель сятявняста: — ся, конешна, станя-то станя, сембе тя пара, ды каба мезевок афоль лися.

Кодама повсь калафнематне, шири шаркстоматне, кичкордаматне правилатнень эса прафнезь сонь лажнамати, хотя, мярьголеть ба, кодама теенза тевсь? Кда кивок ялгатнень эзда позна сашендсь молебенц, или пачкодькшнесть кулят гимназисттнень кодамовок коленьдемаснон колга, или няйсть класснай дама[3] позна илять офицер мархта, то сон виюста волновандаль и наголь корхнель, каба мезевок афоль лися. А педагогическай совещаниятнень эса сон проста угнетандась эсонок эсьосторожностенц, мнительностенц мархта и соньцень эхерь футлярнай арьсеманзон мархта сянь колга, што вов мол мужской и женскай гимназиятнень эса од ломатьтне вятьсазь эсь пряснон кальдявста, пяк шумондайхть класснень эса, — ох, каба афоль пачкодя начальствати, ох, каба мезевок афоль лися — и мезе кда омбоце класста панемс Петровть, а нилецеста — Егоровть, то улель бя пяк пара. И мезе жа? Эсь куфцеманзон, аварьдеманзон мархта, эсь шобда сельме ваноманзон мархта лофтана, аньцяйня шаманя, — содасак, йомланя шаманя мархта кодама хоректь, — сон люпштась сембень минь эсонок, и минь потнемя, кирьфнелеськ Петрофти и Егорофти баллть[4] поведенияснон колга, озафнеськ синь арестс и мекпяли паньцелеськ и Петрофть и Егорофть. Ульсь сонь страннай обуцяц — яксель минь квартиранькень ланга. Сай учительти, озай и ащи апак корхтак, а соньць бта кати-мезе ванонды. Ащи тяфтаня апак каштортт и туй. Тяфтаня сон кода мярьгендель, „кирьнесь цебярь отношеният ялганзон мархта“, и, ульма, якамс пялонк и ащекшнемс тейнза ульсь пяк стака, и яксель сон тейнек аньцек сяс, што лувондозе тянь ялгань обязанностекс. Минь, учительхне, пелендемя сонь эздонза. И нльня директорськя пеленць. Вот и ватт, минь учителеньке народсь ульсь мыслящай, пяк порядочнай, воспитадондаф Тургенефть и Щедринтть творчестваснон лангса, но сембе сяка тя ломаннясь, кона фалу якаль калошаса и зонтик мархта кирьнезе кядьсонза сембе гимназиять целай кеветие кизот! Ды гимназиясь мезе? Марнек ошь! Минь аваньке йоткшиста спектакльхть кудса исть тиендя, пелендсть, каба сон афолезе сода, и духовенствась афоль смедонда сонь пингстонза ярхцамс ваи кормада и налхкомс картаса. Тяфтама ломатьтнень влиянияснон сюнеда, кодама Беликов, мекельдень кемень—кеветие кизотнень пингста минь ошсонок кармасть пелема [51]сембеда. Пелема кайгиста корхтама, кучсема сьормат, знакомандама, лувондома книгат, пелема лездомс беднайхьненьди, тонафнемс сьормас...

Иван Ивановичсь, конань мялецоль кати-мезе азомс, козкстась, но васенда крьвястсь трубка, варжакстсь ковть ланг и тоса мля ни мярьгсь шуроста корхтазь:

— Да. Мыслящайхьть, порядочнайхьт, лувондозь и Щедринонь, и Тургеневонь фсякай тоса Боклятнень[5] и лиятнень, а вов подчининдасть жа, кирьдсть... То-то вот тяфта.

— Беликовсь эрясь сяка жа кудса, коса и мон. — ушедсь тага Буркинць, — сяка жа этажса, кенкш каршеса кенкш, минь сидеста няендемя, и мон содалиня сонь куд-йоткса эряфонц. И кудса сяка жа историясь: халат, колпак, ставнят, задвижкат, пяшкся фсякай запрещенияда, ограниченияда, и — ах, каба мезевок афоль лися! Поснайда ярхцамс вредна а вайда аш кода сяс мес, пожалы, мярьгихть, што Беликовсь аф ванонцыня посттнень и сон ярхцсель судакта скал вай мархта, — ярхцама пяльсь аф постнай, но и аш кода мярьгемс, штоба ваи. Женскай прислуга сон изь кирьня пелемань сюнеда, штоба сонь колганза афольхть думонда кальдявста, а кирьнесь повар, Афанасий лемецель, кодгеменьшка кизоса атя, симоль и пяле-йоньца, кона кати мзярда служась денщикокс и маштоль кой-как стряпондама. Тя Афанасийсь ащекшнель обыкновенна кенкшть ваксса, крес лаца кядень путозь, и прокс мтырдоль сяконь, кувакаста ваймень таргсезь:

— Лама пяк ни эздост эвондось

Беликовть спальняц ульсь йомланя, бта арьзяня, кроватенц вельхтерда мархтоль. Удома мадомста сон кяшендель прянек; эряль пси опана, сьолгф кенькшненьди калтыесь вармась, пянакудса унась; марявсть куфцемат кухняста, куфцематне зловещайхьть...

И теенза ульсь страшна одеялать ала. Сон пелель, каба мезевок афоль лисе, каба афолезе печкя сонь Афанасийсь каба афольхть сува ворхт, и сямельде веньперьф няендсь тревожнай отт, а шобдава, мзярда минь марса якалемя гимназияв, ульсь скучнай, лофтана, и няеньдеволь, што лама ломаньцта ащи гимназиясь, коза моли, ульсь тейнза страшнай, противнай седи вакска, и што молемс серьцек монь мархтон теенза, натуранц коряс одинокай ломаньти, ульсь стака.

— Пяк ни шумондайхт миньцонок класснень эса, — корхнесь сон, кода бта старандась мумс об‘яснения эсь стака чувстванцты. — Козонга тяфта аф кондясти.

И греческай кялень тя учительсь, тя футлярса ломаньць сай ли мялезт, цють-цють изь урьвяя.

Иван Иванычсь эрязста варжакстсь сараи и мярьгсь: „Шутендат!“

— Да, цють изь урьвяя, кода тя аф странна. Кучсть тейнек историянь и географиянь тонафни од учитель, Коваленкань, Михаил Саввичть, хохол. Сась сон аф ськамонза, а Варенька сазоронц мархта. Сон од, оцю равжаза, оцю кядьмархта, и шаманц коряс няеви, што корхтай басом, и видя, вайгялец кода боцькаста: бу-бу-бу... А сазороц уш аф одоль, колмогеменчка кизоса, но тожа сери, страннай, равжа сельме пона, якстерь щека, — фкя валса, аф стирь, а мармелад, и стамка отькоря, шумнай, морси коль малороссийскай романст и рахси. Цють мезевок так и горьняй серевайгяль рахамац: ха-ха-ха! Васенце, основательнай знакомствась Коваленкать мархта мяляфтса, тиевсь директорть именинасонза Суровай, скучнайста ащи педагокнень йоткса, конат именинаска якайхть кода обязаннайхть, вдруг няйхтяма, од Афродита[6] эвондась шовста, якай вяри прянь кепетьфста, рахси, морай, кшти... Сон морась седи вакска „Виют витры“, тоса тага романс, и тага, и сембе минь шарфтомя мяль сонь лангозонза — сембе, нльня Беликовсь. Сон озась ваксозонза и мярьгсь, ламбамоста пеедезь:

— Малороссийскай кяльсь эсь нежнай и приятнай кайги шинц мархта лятьфнесы древне-греческайть.

[52]Тя тусь сонь (Варенькать — переводчик) мяльс, и сон кармась азондома теенза седи вакска и убедительна, што Гадячскай уездса сонь ули хутороц, а хуторса эряй тядяц и тоса стама грушат, стама дынят, стама кабакт! Хохолхне тиклатненьди мярьгихьт кабак, а кабакненьди шинок, и пицихть синь лям якстерь и сенем мархта „стама таньцти, стама таньцти, што просто-ужас!!!“

Кульхцондомя минь, кульхцондомя, и вдруг сембень минь мяльсонок кфчядсь фкя мысля.

— А пароль ба урьвяяфтомс синь, — тошказь мярьгсь тейне директорть авац.

Минь сембе кати-мес лятфтаськ, што минь Беликовоньке апак урьвяяфт и тейнек тяни арась страннайкс, што минь тя пингс кати-кода изеськ прьметакшня, йофси ноляськ сельмеингельденк тяфтама важнай подробносьтть сонь эряфстонза. Кода сон вообще ваны авать лангс, кода сон арьсекшнесы эсь тейнза тя насущнай кизефсть? Инголи тя ашемазь интересованда минь йофси; шять минь ашемя ноля прязонк нльня мыслявок, што ломаньць, кона фсякай погодаста якай калошаса и удси полог ала, может кельгемс.

— Тейнза кунарани нильгеменьда вельф, а тейнза (Варенька — переводчиксь) колмогемень... — азондозе эсь мыслянц директорть авац. — Тейнь-арам, сон тейнза молельба.

Мезе аньцек аф тиеньдеви миньцонок провинцияса скучендамать сюнеда, мзяра аф эрявикс, юмаф-араф тевда! И тя сяс, што йофси аф тиеньдеви ся, мезе эряви. Ну вов, мезеньди тейнек вдруг эрявсь урьвяяфтомс тя Беликовть, конань нльня мялезтка ашель кода путомс урьвяяфтфокс. Директоршась, инспекторшась и сембе минь гимназистскай аваньке эрекласть, нльня цебярьгадсть, кода бта няезь эряфонь цельть. Директоршась сявсь театраса ложа и ваттама — сонь ложасонза ащи Варенькась стамка веер мархта, пиндолды, павазу, и вакссонза Беликовсь, йомланя, мяньцефкя, кода бта сонь таргазь кудста клящаса. Мон тиень вечеринка, и аватне вешихть, штоба мон непременна серьгяделиня и Беликовть и Варенькать. Фкя валса азозь, машинась ушедсь работама. Кулевсь, што Варенькать ули мялец лисемс урьвакс. Эрямс тейнза брадонц пяла ульсь аф сяшкава ни весяла, аньцек и содасть, што шинперьф спорьсесть ды сялондкшнесть. Вов теть сцена: моли Коваленкось ульцява, сери, таза верзила, сьорма мархта панарса, шяяренза картузостонза прашендыхть конянц лангс: фкя кядьсонза канкс книгат, омбоцеса моргу байдек. Мельганза моли сазороц, тожа книга мархта.

— Да тон жа, Михайлик, тянь ашить лувонда! — Споряй сон сери вайгяльхт. — Мон жа теть корхтан, божендан, тон ашить лувонда тинь йофси!

— А мон теть корхтан, што лувондыня! — пешкоды сядонга пяк Коваленкось.

А кудса, кодак ломань кодамовок, так и сялондыхть. Тяфтама эряфсь, ульма, арась скучнай, йорась эсьтейнза уже, да и кизонзовок сявомат мяльс, тяса уш кочксемс аш мзярда, лисят киньди повсь нльня греческай кялень учительти. И сявок мярьгома, ламоц минь барышняньконьди киньди аф лисемс, аньцек лисемс ба. Кода ба изь уль, Варенькась кармась шарфнема минь Беликовоньконьди няевикс мяль.

А Беликовсь? Сон и Каваленкати якась станя жа, кода тейнек. Сай пялонза, озай и ащи апак корхтак. Сон ащи, а Варенькась морай тейнза „Виют витры“, или ваны лангозонза думандазь эсь равжа сельмензон мархта, или вдруг рахазеви: „Ха-ха-ха!“.

Кельгема тефнень эса, а сембеда пяк урьвяямать эса, мялень шарфнемась тя шири налхки оцю роль. Сембе — и ялганьке и аватне — кармасть корхнемонза Беликовть, што сон должен урьвяямс; што тейнза сяда лама мезевок аф илядкшни эряфсонза, кода урьвяямс; сембе минь поздравляли сонь, корхнемя важнай шама мархта разнай лима-сюнот, тянь кондяма, што урьвяямс — серьезнай аськолкс; тяка жа лангс Варенькась ульсь аф кальдяв, интереснай, сон статскай советниконь стирель и ульсь хутороц, а главнайсь, тя ульсь васенце авась, кона тейнза видя мяльса ласковаель, — пряц сонь (Беликовть — [53]переводч.) шаракодсь, и сон путозе мяльс, што тейнза, и видя, эряви урьвяямс.

— Вов тяса ба и эрявольхть сявомс сонь кядьстонза калошанза и зонтикоц, — мярьгсь Иван Иванычсь.

— Арьсека, тя ульсь тиемс аш кода. Сон путозе эсь пялонза шра лангс Варенькать портретонц и коль якась тейне и корхнесь Варенькать колга семейнай эряфть колга, сянь колга, што урьвяямась серьезнай аськолкс, сидеста уленьць Коваленкатнень пяла, но эряфонц изь полафта мзярашкодовок, нинге меки лангт мяльс путомац тейнза ульсь кода бта сярядьфкс, сон тащойгодсь, лофташкодсь и, тейнек арам, нинге сяда крхкаста сувась эсь футлярозонза.

— Варвара Савишнась монь мялезон тусь, — корхнесь сон тейне лафча крьвой пеетьфкс мархта — и мон содаса, урьвяямс эряви эрь ломаньтти, но... сембе тя, содасак, лиссь кати-кода вдруг... Эряви думандамс.

— Мезе жа тяса думондамс? — корхтан тейнза. — Эрявихть васенда арьсемс ингельпяльдень обязанностьтнень, ответственностть... штоба сяда меле мезевок афоль лися. Тя монь сяшкава беспокоендасамань, мон тяни веньберьф аф утцян. И, видеста азомс, мон пелян: Сонь брадонц мархта кати кодама страннайхть мыслясна, арьсекшнихть синь кати-кода, содасак ли, странна и характероц пяк бойка. Урьвяят, а тоса сяконь ватт поват кодамовок историяс.

И сон изь тиеньдя предложения, коль кадондозе сяда ингельпяленьди, кода аф досадналь директоршати и сембе минь даманьконьди; коль ункснезень ингельпяльдень обязанностьтнень и ответственность и тяконь шовор пцтай эрь шиня гуляндась Варенькать мархта, соньць шять думандась, што тя тяфта эряви сонь положениясонза, и сашендоль тетке, штоба корхтамс семейнай эряфть колга. И ульма, мекпяли сон тиель ба предложения и лисель ба фкя сят аф эрявикс, глупай урьвяяматнень эзда, кодамот миньцонок скучендамать сюнеда и тяфтак ащемда тиеньдевихть тьожяньца, кда вдруг афоль лиси пяк оцю скандал. Эряви мярьгемс, што Варенькать брадоц, Коваленкось, изь кельгя Беликовть знакомствань васенце шиста сявомок и пчкясь сельмеска афолезе няя.

— Аф шарьхкодян, — корхнесь сон тейнек, лафтунзон вяри кепсезь, — аф шарьхкодян, кода тинь кирьттяда тя фискалть[7], тя мерзкай рожать ингеле. Эх, господа, кода тинь можете тяса эрямс! Атмосферась тяса ляпияфты, поганай. Деряй тинь педагоктада, учительхтяда? Тинь чинодралхтада, тяса аф наукань храм, а благочиниянь управа[8], и шапама шине маряви, кода полицейскай будкаса. Аф, братьят, эрян мархтонт тага аф ламня и туян эсь ширезон хутору и карман тоса ракат кунцема и хохлятат тонафнема. Туян, а тинь илядода тяса.

Иуданьтень мархта, нехай вин лопади.

Или рахсель сон, рахсель сельме ведень тумс, то басом, то шуваня писклявай вайгяльса, и кизефнемань монь кядензон кафту яфнезь.

— Мес сон монь пялон ащекшни? Мезе тейнза эряви? Ащи и ванонды.

Сон нльня макссь Беликовти лем „глитай абаж паук“![9] И, шарьхкодеви, минь старандамя аф корхнемс сонь мархтонза сянь колга, што сазороц сонь Варенькась йорай лисемс „абаж паукти“. И мзярда весть директоршась кичкордозь азозе тейнза, што пароль ба максомс сонь сестранц тяфтама солиднай сембень ширьде уважаемай ломаньти, кодама Беликовсь, то сон кяжияфтозе шаманц и мярьгсь:

— Тя аф монь тевсь. Катк сон лиси хоть гадюканьди, а мон аф кельгса шоворямать ломанень тевс.

Тяни кулхцонт, мезель сяда тов. Кати-кодама проказник рисовандась [54]карикатура: моли Беликовсь калошаса, илештьф брюкаса, зонт ала, и мархтонза кядень пецек Варенькась; ала подпись: „Кельги антропос“. Выраженияц фатяф удивительна. Художниксь, ульма, работась аф фкя ве, сяс мес мужской и женскай гимназиянь сембе учительхне, семинариянь учительхне, чиновникне, — сембе получасть тифтень экземпляр. Получась и Беликовсь. Карикатурась тись сонь лангозонза самай стака впечатления.

Листяма минь марса кудста, — тя ульсь как раз васенце майста, недляшиста, и минь сембе, учительхне и гимназисттне, путоськ пуромомс гимназиять ваксс и тоса марса молемс ялга ошть фталу рощав, — листяма минь, а сон сенем, дуцядонга мрачнай.

— Кодама аф цебярь, кяжи ломатьт улихьт! — мярьгсь сон, и курга трванза трнатозевсть.

Тейне нльня ужяль арась сонь. Мольхтяма и вдруг, сявк мялезот, арды велосипедса Коваленкось, а мельганза Варенькась, тожа велосипедса, якстерь, марендаф, но весяла, радостнай.

— А минь, — пешкодсь сон, — ингели арттама! Уш стама цебярь погодась, стама цебярь, што проста ужас!

И кяшевсть кафцьке. Монь Беликовозе сенемста арась акша и кода бта таяскодсь. Лоткась и ваны лангозон.

— Ожка, мезе жа тя тяфтамось? — кизефтемань сон. — Или, шятта монь васькафтомазь сельмене? Деряй гимназиянь преподавательхненьди и аватненьди прилична арнемс велосипедса?

— Мезе жа тяса аф приличнай? — мярьгень мон. — И катк арнихьт эсьтейст шумбра шис.

— Да кода жа можна? — ивадсь сон, а соньць дивандась монь спокойствиязьти. — Мезе тон корхтат?

И сон ульсь сяшкава шавф тянь мархта, што ашезь йора молемс сяда ичкизи и мрдась куду.

Омбоце шиня сон эрь пингоня нервнайста шовсезень фкя-фкянь ланга кядензон и чукиесь пря, и шаманц коряс няевсь, што тейнза аф цебярь.

И занятияста тусь, мезьсь лиссь сонь мархтонза эряфсонза васенцекс.
 
И афи обедась. А илядь пяли щась сяда ламбеста, хотя ушеса ащесь йофси кизонь погода, и тусь Коваленкатненьди. Варенькась кудса ашель, сатозе сон аньцек брадонц. — Озак, покорнейше эняльдян, — мяргсь Коваленксь холодна и сельме понанзон сырмафста тиезь, шамац сонь ульсь удоф, сон аньцек ваймясь абедта меле и ульсь пяк аф эсь мяльса.

Беликовсь ащесь апак корхтак кеменьчка минута и ушедсь:

— Мон тейнть сань штоба тьождялгафтомс ваймезень. Тейне пяк, пяк стака. Кати-кодама пасквилянт[10] рисовандамань смешнойста монь и тага фкя особать, кона тейнек кафцькеньди мала ломань. Лувонца долгокс верондафтомс тонь, што мон тяса ни причом...

Мон изень максся кодамовок туфтал тяфтама рахсемати, — нинге мекелангт, прокс вятиня эсь прязень кода вполне порядочнай ломань.

Коваленкось ащесь кяжиста и изь кашторда. Беликовсь учсь афламос и поладозе сятявняста, лажнай вайгяльса:

— И монь тага ули кой-мезе корхтамс теть. Мон кунара служань, тон жа аньцек ушедыть службать, и мон лувонца долгокс, кода старшай ялга, тиемс предостережения теть. Тон арнят велосипедса, а тя колендемась—налхкомась йофси аф приличнай од ломанень воспитательти.

— Мес жа? — Кизефтезе Коваленкось басом.

— Ды дряй тяса эряви тага азонкшнемс, Михаил Саввич, дряй тя аф шарьхкодеви? Кда учительсь арды велосипедса, то мезе жа илядкшни ученикненди? Теест илядкшни якамс пряснон Лангса! И рас тя апак мярьк циркулярса, то и аш кода. Монь исяконя ужас сявомань! Мзярда мон няиня тонь сазорцень, то монь мутендавсть сельмене. Ава или стирь велосипед лангса — тя ужасна!

— Мезе жа теть собственна эряви?

— Тейне эряви аньцек фкя — тиемс предостережения теть, Михаил Саввичь. Тон — ломаньць одат — ингельпяли тонь [55]ули будущайце, эряви вятемс есь пряце пяк и пяк осторожна, тон жа станя манкируешь;[11] ох, кода тон манкируешь! Тон якат сьома мархта панарса, постоянна ульцяса кати-кодама книга мархта, а тяни тага велосипед. Сянь колга, што тон и тонь сестраце арнетяда велосипедса, содасы директорсь, тоса пачкоди попечительти!..[12] Мезежа цебярь.

— Што монь и сазорозе арнетяма велосипедса, киньге аш тяса тевоц! — мярьгсь Коваленкось и якстерьгодсь. — А кие кармай шоворяма монь кудонь и семейнай тевненьди, сянь мон кучса пинень чорттненьди.

Беликовсь лофташкодсь и стясь.

Кда тон корхтат монь мархтон тяфтама вайгяльса, то мон не могу корхтамс сяда тов, — мярьгсь сон. — И прошу тонь мзярдонга тяфта аф корхнемс монь пинкстон начальникнень колга, тон должен уважандамс властьтнень.

— А дряй мон корхтань мезеньге кальдявкс властьнень колга? — кизефтезе Коваленкось, кяжиста лангозонза ванозь,

Пожалста, кадомак монь покойс. Мон честнай ломанян и тяфтама господинть мархта, кодамат тон, аш мялезя корхтамс. Мон аф кельгсайня фискалхнень.

Беликовсь нервнайста бзмолясь и кармась эряста щама, пелькс мархта шама лангсонза. Вдь тя эряфсонза васенда сон маряй тяфтама грубостьт.

— Можешь корхтамс, мезе теть эряви, — мярьгсь сон, ингольде комнатада куцеманянь площадкать лангс листемста — Мон должен аньцек инголькигя азомс теть: шять, минь марямазь кие-кие, и штоба афолезь толкава лиякс минь корхтаманькень и мезевок афоль лися, тейне сави азондомс господин директорти минь корхтаманькень содержаниянц... главнай вастонзон. Мон обязанан тянь тиемс.

— Азондомс? арт, тихьт доклад!

Коваленкось фатязе сонь фталда воротникта и эрьхтезе, и Беликовсь гурькстась алу куцемать ланга, эсь калошанзон мархта калтыезь, куцемась ульсь сери, крутой, но сон гурькстась алу благополучна, стясь и варжазе эсь шалхконц: целайхьт ли сельме ваноманза? Но как рас ся пингть, мзярда сон гурькстась куцемать ланга, сувась Варенькась и мархтонза кафта ават; синь ащесть ала и ванцть — Беликовти тя ульсь сембеда ужасна. Улель ба, тейнза арам, сяда цебярь синьдемс сялдазонц, кафцьке пильгензон, чем арамс рахсема вастоньди: вдь тяни содасы сембе ошсь, пачкоди директорти, попечительти — ах, кда мезевок афоль лися! — рисовандайхьт од корректура и шумордави сембе тя сянь мархта, што мярьгихьт максомс отставкас...

Мзярда сон стясь, Варенькась содазе сонь и сонь смешной шаманц, сермосеф польтанц, калошанзон лангс ванозь, апак шарьхкодть, мезьса тевсь, арьсемок што сон прась соньць, изь кирьдя и рахазевсь сембе кудти марявиста:

— Ха-ха-ха!

И тя раскатистай вайгелю „ха-ха-ха“-ть мархта шумордавсь сембесь: и сватовствась, и Беликовть масторлангса эряфоц. Сон ни мезевок изь маря, мезе корхтась Варенькась и мезевок изь няя, куду мрдамда меле сон васендакигя урядазе шра лангста портретть а тоса мадсь и больщи уш изь стяшенда.

Коломошка шида меле сась тейне Афанасийсь и кизефтезе, аф эряви ли кучемс докторонкса, сяс мес дескоть, баярть мархта кати-мезе тиеньдеви. Мон тунь Беликовти. Сон ашесь полог ала одеяласа кяшфста, и ашезь кашторда; Кизефцак сонь, а сон аньцек да или аш — и сяда лама фкявок вайгелькс. Сон ащи, а вакссонза якай-тапай Афанасийсь сымбора, кяжи, и куфца кувакаста; а эздонза винашинесь, кода кабакста.

Ковда меле Беликовсь кулось. Калмаськ минь сонь сембе, лиякс азомс кафцьке гимназиятне и семинариясь. Тяни, мзярда сон ащесь лазкснень потмоса, ванфксоц ульсь кроткай, приятнай, нльня весяла, кода бта сон кенярдсь, што, мекпяли, путозь сонь футлярс, коста сон мзярдонга уш аф лиси. Да, сон сатозе эсь идеалонц! И кода бта сонь инксонза, калмстонза, ульсь сымбора, пизему погода, и сембе минь улеме калошаса и зонт мархта. [56]Варенькась тожа ульсь калмамстонза и мзярда лазкснень нолдазь самай калмоти, аварьдсь. Мон прьмейтайня, што хахлушкатне аньцек аварьдихть или рахсихьт, средняй жа настроениясна синь аф эряй.

Виденц азса, калмамс тяфтама ломанень кодама Беликовсь, тя оцю удовольствия. Мзярда минь мрдамя самай калмотьнень лангста, то минь сембень шаманьке ульсть скромнайхьт, постнайхьт; кивок изь йора лифтемс лангти удовольствиянь тя чувствать — чвуствать, конаф лаца сянь мархта кодама минь фатнелемазь кунара-кунара, нинге шабакс, мзярда оцюфне тушендсть кудста, и минь ласькондемя садга час-кафта, кенярькшнезь полнай свободати Ах, свобода, свобода! Нльня намексь, нльня лафчеста надиямась сонь улеманцты максси ваймети пацят, виде вдь?

Мрдамя минь калмотнень лангста цебярь мяль мархта. Но йотась неделяшка да аф сяда лама, и эряфсь кармась шудема ингельцекс, стама жа суровай, сизеф и, бестолковай, эряфсь, кона аф запрещеннай цирькулярса, но и аф разрешеннай вполне; сяда цебярь изь ара. И виде, Беликовть калмаськ, а мзяра нинге тяфтама ломаньда футлярса илядсь, мзяра нинге синь эздост ули!

— Станя вага, — мярьгсь Иван Иванычсь и крьвястезе трубканц.

— Мзяра синь эздост нинге ули! — азозе мельганза Буркинць.

Гимназиянь учительсь лиссь, сарайста. Тя ломаньць ульсь аф оцю, эчке, йофси лысай, равжа сакал мархта пцтай каркс эземгя; и сонь мархтонза лиссть кафта пинет.

— Ковсь, ковсь! — мярьгсь сон, вяри ванозь.

Ульсь ни пяле ве. Види кядь ширеса ульсь сембе велесь, кувака ульцясь таргавсь ичкизи, ветешка вайгяльпет. Сембесь ульсь фатяф сятяв, глубокай удомаса, аш движения, аш вайгялькс, нльня афи верондат, што природаса может улемс тяшкава сятяв, мзяра ков валда веть няят велень кели ульця кудонзон, капанзон, мадф исанзон мархта, то ваймесот арай весяла; тя эсь покойсонза кяшфста вень цильфнень эсь пруттнень заботатнень и горять эзда, сон сятяв, печальнай, цебярь, и тейть арам, што и тяштьтне ваныхьт лангозонза ласковайста и кенярькшнезь, и што кальдяв уш аш модать ланга и сембесь благополучна. Кяржи кядь ширеса велеть крайста ушедсь паксясь; сон няевсь ичкизи, горизонтти молемс, и сембе келенц лангса тя паксять, кона валф ков валдса, тоже аш движения, аш вайгялькс.

— То-то вага, — омбоцеда мярьгсь Иван Иванычсь. — А дряй ся, што минь эрятама ошса духотаса, теснотаса, сьормадкшнетяма аф эрявикс каготт, налхксетяма винтса[13] — дряй тя аф футляр? А ся, што минь йотафнесаськ сембе эряфонькень бездельникнень., сутягатнень, йоньфтема, тевфтома эряй аватнень йотка, корхнетяма фсякай вздор — дряй те аф футляр? Вов, кда йорат, то мон азондан теть фкя пяк поучительнай история.

— Аф, пинге ни удомс, — мярьгсь Буркинць — Вандыс!

Кафцке тусть сараи и мадсть тише лангс. И кафцьке ни кяшсть и нувазевсть, кода вдруг марявсть тьождя аськолкст: топ, топ... Кати кие якась аф ичкизе сарайть эзда; йотай аф лама и лоткай, а минутада меле тага: топ, топ... пинетне ырназевсть.

— Тя Маврась якай, — мярьгсь Буркинць Аськолксне сятявгадсть.

— няемс и кулемс, кода васькафнихьт, — мярьгсь Иван Иванычсь, омба боконц лангс шарфтомста, — и тонь жа лемттядязь дуракокс сянкса, мес тон кирьдят тя васькафнемать каршес; кирьнемс обжаматнень, унижениятнень, аф смедондамс сембе инголе азомс, што тон честнай, свободнай ломатьтнень ширесат, и эсьтейть васькафнемс, пеедькшнемс и сембя тя кши суском инкса, лямбе уженкса, кодамовок чиння инкса, конань питнец грош, — аф, сяда тов эрямс тяфта аш кода!

— Ну, тя уш тон лия операста Иван Иваныч, — мярьгь учительсь. — Дай маттама.

И кеменчка минутада меле Буркинць удось ни: А Иван Иванычсь коль шарфнесь бока ланкста бокс и куфцекшнесь а тоса стясь, тага лиссь наружа, озась кенкшнень ваксс и ушедсь таргама трубочканц эса.

1898


  1. Атавизмась — ся стама явление, мзярда эвондакшни пяк кунардонь предкань признак.
  2. Антропос — грекокс — ломань.
  3. Класснай дамась — женскай гимназиянь преподавательница, конань лангс путьнельхть обязанность ваномс, кода вятьсазь эсь пряснон ученицатне.
  4. Баллсь — отметка (тонафнихнень содамашисна и поведениясна укнсневсь отметкаса — цифраса).
  5. Бокль, Генри Томассь (1821—1862 к. к.) — английскай историк, сьормадсь книга „История цивилизации в Англии“.
  6. Афродитась — древне-греческай йофкснень коряс кельгемань шкай, кона шачсь бта морянь шовста.
  7. Фискал — буквальна: Петр I пингста путф должность правительственнай служащайхнень действияснон мельге ванома, конатнень злоупотребленияснон и беззаконияснон колга фискалсь ульсь обязан пачфнемс кулят начальствати. „Фискал“ кармасть мярьгендема доносчикненьди, ябедникненьди.
  8. Благочиниянь управась — XVIII и XIX веконь (йотай веконь 60 кизотненьди молемс) полицейскай учреждения, кона, законтть коряс, вятьсь наблюдения „благочиниять, добронравиять и порядкать“ эряфс йотафнемаснон мельга (паспортнай порядкась и ст. тов).
  9. Глитай абаж паукть — мироед или паук.
  10. Пасквилянтсь — пасквилянь лиякс мярьгемс оскорбительнай или позоряй произведениянь или рисункань сочинитель.
  11. Манкировамс — ваномс цьолакста или аф добросовестна эсь тевцень и обязаносстнень лангс.
  12. Попечительсь (учебнай округось) — оцязоронь пингонь правительственнай чиновник.
  13. Винтсь — картаса налхкома
 
  This is a translation and has a separate copyright status from the original text. The license for the translation applies to this edition only.
Original:
This work was published before January 1, 1929, and is in the public domain worldwide because the author died at least 100 years ago.
Translation:
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
  • it was anonymously published before January 1, 1954 (more than 70 years ago).

This work is in the public domain in the United States because it was first published outside the United States (and not published in the U.S. within 30 days), and it was first published before 1989 without complying with U.S. copyright formalities (renewal and/or copyright notice) and it was in the public domain in its home country on the URAA date (January 1, 1996 for most countries).
This work was in the public domain in Russia on the URAA date January 1, 1996, according to the Law 09.07.1993 No 5351-1 which was enacted on that date:

  • it was anonymously published before January 1, 1946 (more than 50 years ago from 1/1/1996).

This anonymous or pseudonymous work is also in the public domain in other countries and areas where the copyright term of anonymous or pseudonymous works is 88 years or less since publication.