Валда ян/1928/02/Лездома комитетнень маластонь задачасна

From Wikisource
Jump to navigation Jump to search
Валда ян (1928), № 2, Апрель ков edited by Шотин И. В.
Лездома комитетнень маластонь задачасна
Валда ян. Эрь ковонь общественно-политический и велень-хозяйствань журнал. Нолдаец "Од веле" газетать редакцияц. — № 2, 1928 кизоня, Апрель ков. — с. 9
[9]

Лездома комитетнень маластонь задачасна.

Лездома комитетнень тиймоснон колга декретть нолдамста Совецки правительствась арьсезя тевть станя, што лездома комитетня велева арахть ашу ломатненди марс пуромома вастокс.

Лац ладяф лездома комитец — велеса оцю вий. Соньфтемонза аф вирь максыхть, аф сьора видьмот явихть, да и налогонь путомстонга и лия велень тевонь тиймостонга лездома комитетть вакска аф йотават. Сембя велень эрявикс тевса, коса орхиевихть ашу ломатнень интерезсна, лездома комитетти макссеви печетнай васта, и сембя васца лездома комитетти ули кода арелямс ашуфнень, удавойхнень и уроснонь интерезсна.

Нят шитнень эзда шумордавсь Пензань губкомть пленумоц, коса кочкаф кооперациянь кемокстама кизефкссь. Тя пленумсь лифць контрольнай цыфрат, конатнень корява тя кизоть йотамс эряви сувафтомс кооперацияв: потребительскайти — 34.000 ломань, и велень хозяйстваннети — 19.000 ломань ашуфнень эзда.

Нят контрольнай цыфратнень эзда лездома комитетнень инголи лисенди оцюдонга оцю од задача. Тя задачась — сувафтомс сяда ламоня ашуфнень езда кооперативу пайщектя и васень ряца сят ашуфнень эзда, конатнень семьясост аш работайкс алят.

„Од Велесь“ аф кржа содай стама тевдя, мзярда аля мархта семьятня лувондовихть ашунь семьякс, мес алясь сяда сидеста уленьди марстонь пуромксса, сяда лац содасынь эсь бедняконь праванзон, сявонди кредитнай товариществаста пандомода ярмакт и лия васцонга сон эсь прянц абидас аф макссы.

Ламода сяда осал тевоц ся ашу семьять, коса прякс ащи удавой ава, конанцты кудонь-шинь тевдя башка, эравихть штамос-нардомс, андомс-симдемс йомбла шабанза, марстонь пуромксу сон аф молеви, эсь ашунь праванзонь аф содасынь, да хоть и мезя содай, сявок аф тиеви, — моли алятнень йоткс, тоса гуроцазь рахсемс... и аф шуроста тяфтама нужань няи аватненди потмонь панжема вастокс арсихть аньцек сельмятветьня...

Пяк шурот мокшонь велева стама тефня, мзярда ашу аватненди удалаль сявомс кредиткаста пандомода ярмакт. Авань ашу семьятня лувондовихть, кодама б‘ди йордафксокс: ярмакт пандомода кредиткась аф максси, б‘та меки аф пандовихть; марстонь тевса — кодамовок ответственнай васц аф кочксевихть...

Тяфтама тефня эрявихть машфтомс юрнек. Эряви совецки законць йотафтомс эряфс аватненгя йоткса. — Тя тевсь лездома комитетнень. Тейст эряви тяникигя ушептомс авань правань ареляма тевсь.

Сембя корператифнень эзга, кода потребительскяйть, станя велень хозяйстваннеть, эрявихть лифнемс ава кандидатт ответственнай работас. Кредитнай товариществатнень инголи эряви лифтемс стама задача, штоба синь таргальхть эсь пайщекснон йоткс сяда лама авада, штоба ашу авань семьятненьди макссельхть пандомода ярмакт, эрявикс машинат, видьмот.

Кооперативонь фондонь вельдя пайщекокс сувамста аватня эрявихть сувафтомс васень ряца.

Лездома комитетненди эряви сембя вастова ровналгаптомс аватнень праваснон алятнень мархта. — Тя работась лездома комитетненди путневи малостонь задачакс, и сон эряви тиемс песта пес.

Валда ян 1928-02 11стр изобр2.jpg