Кӱслемлан

Шабдар Осып

Кӱслемлан
Эй, кӱслемже, моторем,
Могай йымыжге йӱкет!
Шӱмеш перныше мурем
Шокталтен, куандарет.
Эй, шеремет, тый декет
Пашаш ноен толмеке,
Ший кылетым перымекы,
Йöршеш чонем кандарет!
Мотор таҥын тӱсшымат
Умыр касын тый кондет,
Тудын оҥгыр йӱкшымат
Ший кылет ден шоктыктет.
Илышемын рӱдаҥшыже
Шӱмеш кочын шинчеш гын,
Еҥын неле, тор шомакше
Эрта тыйын воктечын.
Коклан поро таҥ дечат
Тыланет утла ӱшанем,
Йöсын шонымаш дечат
Сай мурет ден мый утлем.
1921 и