Тулкым кадик вӧлмылэ ук
Чебер куара бусыын,
Азвесь кадик жингыртэ ук
Та куараед ёросын.
Кин бон таӵе кырӟа медам,
Сюлмысьтыз ик потыса?
Мар вераса гурла медам,
Вань лулзэ ик поныса?
Уӵы чирдэ шуиськод ке,
Со чирдылэ сурдъёсын,
Турагай нош шуиськод ке,
Со кылӥське йыр йылын.
Та куара нош юос вылтӥ
Лыктылыса кылӥське,
Собере та кырӟам куйын
Бадӟым кайгу шӧдӥське.
Кыдёкын ке, кылзэ солэсь
Валан тыпак уг лу шол;
Озьы ке но вань сюлэмлэсь
Ӟеч кальёссэ быдтэ шол.
Кин бон таӵе кырӟа медам
Сюлмысьтыз ик потыса?
Мар вераса гурла медам
Вань лулзэ ик поныса?
Чебер ныл-а, пинал пи-а
Ас кайгузэ таратэ?
Мусо пинал вылькенэд-а
Ӝож сюлэмзэ буйгатэ?
Яке шудтэм кышномуртэд
Шудтэмысьтыз ӝожъяське,
Иське куанер воргоронэд,
Куанерысьтыз шугъяське.
Кыдёкын ке, кылзэ солэсь
Валан тыпак уг лу шол,
Озьы ке но вань сюлэмлэсь
Ӟеч кальёссэ быдтэ шол.