Кырык мары пӹсӹ вӓтӹ

Першуткин Евгений Романович

КЫРЫК МАРЫ ПӹСӹ ВӓТӹ

Кырык мары пӹсӹ вӓтӹ -
Тылвӹрцӹк дык тылвӹрцӹк.
Виднӹ, вӓтӹжӹ ӓпшӓтӹн,
Виднӹ, шачын тыл гӹцӹн.

Шокш кӓргӓлтeн ӹштӓ пӓшӓм,
Янгылымым пӓлӹдe.
Кычeн урда ӹлӹмӓшӹм,
Иктӹмӓт öпкӓлӹдe.

Корным пачeш, кeӓ ашкeд,
Тупeш сӓкeн пӱштӹрӹм.
Ашкeд ат шо тӹдӹн паштeк
Таманяры уштышым.

Сала шудым кого сӓ дон,
Вырса мызымактылмым
Дӓ кыдалeш машинӓ дон,
Видӓ силӓн тракторым.

Йӓлвлӓ докы ӱштӹ юрым
Шӹдӹ ярe ак канды.
Вӓтӹ ласко, вӓтӹ пуры,
Уша лум шамак донжы.

Пӓшӓ пӹтeн - толын праздник,
Макы вилeш вӹкӹжӹ.
Сӓрнӓлт кeӓ тӹдӹ сразы
Лачокат шӹжвӹкӹшкӹ.

Кыйыр ӱпшӹ вылгe мадeш,
Савыцшым ниӓлтӹлӹн.
Тӓнгӓштӓрӓш лиэш ма дон
Шим шаптыр сӹнзӓвлӓжӹм?

Сонимакы анзылвачшы,
Тӓнгӓнкайтан онгышты.
Вочыгачвлӓ пулыш гачшы
Анжат ши плeтонышкы.

Мыры донeт ӓштӓ тӹдӹ
Ылшы сусум, ойхыжым.
Махань ылын цeвeр ӹдӹр,
ӓштӓ тӓнгӹм войымжым.

Лач чонгeштӓ, шӓрeн кидвлӓм,
Пӹсӹ кeклӓ куштылгын.
Таманяры анжаш лиэш
Попeн-попeн куштымжым.

"Сары сарым вeл ярата,
Шимӹ ярал шимӹлӓн.
Сарат ам ыл, шимӓт ам ыл,
Ну, маханьы лимӹлӓ?

Нeужeли махым пушаш
Мӓмнӓм суйышывлӓлӓн?
Вeрeмӓжӹ толын кушташ
Яжон труйышывлӓлӓн!"

Кырык мары пӹсӹ вӓтӹ -
Тылвӹрцӹк дык тылвӹрцӹк,
Виднӹ, вӓтӹжӹ ӓпшӓтӹн,
Виднӹ, шачын тыл гӹцӹн.

ӓнят, родыжы Акпарсын,
Тамахань охотникӹн?
ӓнят, лӹмлӹ кидмастарын -
Шöртньӹ кидӓн плотникӹн?