Кымӧръяс
| Кымӧръяс (1931) by |
| Гижан кад: 1931, Йӧзӧдан во: 1931. Ӧшмӧс: Владимир Латкин. Менам босьтчӧм. Сыктывкар, 1931. Лб. 20-22. |
Муртса на сявкнитіс асывъя югӧр,
Муртса на картаысь петіс мӧс чукӧр,
Анна нин видз вылӧ петны гӧтов.
Заптӧма кузолӧ картупель, сов...
Шондіа асывнас сьӧлӧмыс ловзьӧ;
Быттьӧкӧ кокньыдджык асывнас овсьӧ;
Тэрыба ордымті восьлалӧ кок;
Тӧдӧ ӧд, отсасьны некод оз лок:
Мужиктӧм олӧмлы — дас ӧти во!
Мунігчӧж Аннушка песлӧдліс юрсӧ:
— Кытысянь дӧвалы виччысьны бурсӧ?
Мужиктӧм олӧмыд — абу ӧд гаж,
Косаяс-куранъяс ставыс нин важ.
Тавосӧ тырмас на, мӧд во — шабаш!
Тулыснас соседыс пырис колхозӧ.
Сэні пӧ олӧмсӧ кокньӧдны позьӧ!
Ёна сэк пыртіс Василий Ильич:
— Ӧтлаын босьтам пӧ пашня и видз.
Шуис сэк Аннушка:
— Олышта сідз.
Аннушка тӧдӧ, мый пырнысӧ колӧ,
Кув кӧть, а небыдик сьӧлӧмыс полӧ.
Сваття тшӧтш повзьӧдіс: оз ло пӧ шань,
Пыран кӧ, аддзывтӧм лоӧ пӧсь нянь!
Час мысти Аннушка видз вылӧ воис,
Чышъян да кузовсӧ бадь улӧ колис,
Вылӧджык лэптыштіс ковталысь сос,
Кватитіс курансӧ тэрмасигмоз...
- * *
Ылісянь лун тӧвлӧн пӧдтӧм шы кылӧ,
Нэмчӧжся мойдъястӧ гажтӧма сьылӧ,
Кымӧрыс кывтӧ, кыдз ва кузя пур.
Тшапа зэв кымӧрлӧн кыптыштӧ юр.
Вылісянь тшӧкыда кылӧ нин гур-р...
Аннушка турунсӧ зорӧдӧ чӧвтӧ.
Ӧтнаслӧн удж сӧмын омӧля содӧ!
Тэрмасьӧ, чужӧмті визувтӧ пӧсь,
Матайтчис — кокъяссӧ курччалӧ лӧдз.
Ӧтнаслы сьӧкыд,... да нинӧм он вӧч.
Удж кості тӧв кыськӧ ылысь — вӧр сайысь,
Анналы пель дінӧ сьылӧм шы вайис;
Сынӧдті нюжалӧ збой сьыланкыв.
Сулалӧ Аннушка — курччӧма кыв;
Уджыд кӧ эштӧдтӧм — майбыр он сьыв!
Сьылӧм шы матысмӧ, паськалӧ, ёнмӧ,
Вӧр сайсянь петісны бабаяс, зонъяс.
Гажаа удж вылысь лэччӧ колхоз,
Зэрмытӧдз эштӧдіс удж сьылігмоз,
Сиктын выль олӧмлӧн — медводдза роз.
Ывлаыс пемдіс век, кымӧрыс кайӧ.
Шонді нин дзебсьӧма кымӧръяс сайӧ.
Енэжсӧ синъяснас лыйис Иван,
Пельпомсьыс шыбитіс коса-куран.
— Аннушка!
— Мый нӧ?
— Олан да вылан!
Войтырлы тэрыбакодь мыйкӧ шуис,
Ставӧн пыр видз вылӧ кежисны туйысь.
Посньыдик видз вылын йӧз быттьӧ ном!,.
Недыр мысьт туруныс чӧвтсис... и пом.
Аннушка видзӧдӧ — паськӧдіс вом.
Чардыштіс-резыштіс! Енэжӧс ӧзтіс!
Быттьӧ даспельӧ орӧдіс, восьтіс;
Потшӧсӧ чорыда шарыштіс шер;
Ызнитіс, сунисӧдз кӧтӧдіс зэр.
Эз кӧ вӧв чӧвтӧма — мый кӧть вот кер?
Час мысти кымӧрлӧн вынъясыс быри.
Важкодя сынӧдыс югыдӧн тыри,
Важкодя ыркӧдӧ кокньыдик тӧв,
Быттьӧ сьӧд кымӧрыс некор эз вӧв.
* * *
Аскинас Аннушка пырис колхозӧ,
Ме ногӧн — тайӧн и помавны позьӧ.
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- its creator fought or worked for Soviet Union victory during the Great Patriotic War — so the 74-year protection term is applied;
- and the creator died before January 1, 1950 (more than 74 years ago), and has been not posthumously rehabilitated since that date;
- and this work was first published before January 1, 1950 (more than 74 years ago).
The author died in 1942, so this work is also in the public domain in other countries and areas where the copyright term is the author's life plus 81 years or less (if applicable), or the copyright term is 92 years or less since publication (if applicable).
Public domainPublic domainfalsefalse