Кыйсьӧм

by Шахов Егор Александрович

Коми муын вӧрыс помтӧм.
Ӧльӧк кыйсьӧ — оз тай вош.
Парма раскын абу шуштӧм,
Кӧть зэв матын ветлӧ ош.
Ветлӧ Ӧльӧк парма шӧрті
Тӧдӧ кодар лун да вой.
Ур кӧ олас, туй оз вошты.
Кыйӧм бӧрын пон оз сёй.
Ветлӧ нюрӧд, ветлӧ ягӧд,
Видлӧ ю пӧлӧнысь сьӧрт, —
Зіля мырсьӧ еджыд понкӧд,
Мырсьытӧгыд ур оз шед.
Мукӧд лунӧ вӧрӧ пемдӧ,
Ноддя дорын узяс вой.
Понйыс кӧзяинӧс видзӧ,
Медым вӧрса звер оз сёй.
Вӧрса керка-н овны долыд,
Парма шӧрын, быттьӧ рай,
Эм кӧ сёйны дозмӧр яйыд,
Ещӧ содтӧд рудзӧг край.
Кыйсьӧм бӧрын пӧлать шӧрын
Регыд личкӧ сьӧкыд ун...
Майбыр... Коркӧ кыйсьӧм бӧрын
Тыра нопйӧн гортӧ мун...
Лэчыд вой тӧв шучкӧ яра,
Лымйӧн тыртӧ — син ни пель.
Мыйла скӧралӧ нин бара
Из гӧраса дзор Войпель.
Коз пу йылысь тукта киссьӧ,
Гора дзуртӧ нёрӧм пу.
Ӧльӧк пыр на вӧрын кыйсьӧ —
Мед жӧ пик эськӧ оз су.
Кӧнкӧ, кылӧ, никсӧ понйыс,
Кодар увтчӧ, вевттьӧ тӧв.
«Мый нин увтӧ, кодкӧ морысь,» —
Кайтӧ мудзӧм Ӧльӧк друг.
Ӧльӧк вылӧ пуяс пӧвстысь
Уськӧдчис зэв ыджыд ош.
Эз ӧд повзьы сыысь кыйсьысь:
Лыйис кылӧ ошлы котш!
Дрӧбйыд ошлы эз тай мӧрччы,
Сылӧн юр вежӧр эз вош.
Кыйсьысь мортлӧн вӧрса зверкӧд
Лыби олӧм вӧсна кось.
Ӧльӧк ёртыд ошлы сюри,
Быттьӧ зонлы повзьӧм ныв:
Эбӧс-вынысь дзикӧдз быри —
Вывті чорыд ошлӧн сыв.
Кыйсьысь мортлысь ныр-вом пурис
Ворсігмозыс дзормӧм ош.
Кытчӧдз эз кув, ёна летіс,
Ки-кок чегъяліс рутш-ротш.
Лэчыд вой тӧв тӧдліс кулӧм,
Сьыліс нора сьыланкыв.
Парма бӧрддзис — жугыль олӧм —
Синва кисьтӧ коз и ньыв...
Уна прӧмыс кыйсьысь кыйӧ,
Кӧть и пуктӧ сьӧкыд удж.
Чӧскыда жӧ вӧрын сёйӧ,
Пуӧ дозмӧр быдса душ.
Сиктӧ локтӧ ёна сёрӧн,
Ветлӧ вежон вит-ӧ-квайт.
Гортӧ воӧ тыра нопйӧн,
Нопйын сылӧн уна шайт...
Ӧльӧк гӧтыр ӧшинь дорысь
Син эз чӧвтлы уна лун.
Войнас шуштӧм-гажтӧм думысь
Яндзим тӧдтӧг пышйӧ ун.
Прӧмыс виччысьӧ верӧслысь,
Важӧн сылы воан кад...
Эн нин виччысь, тэнад пӧрысь
Кильчӧ-д некор нин оз кай.