Кызьы улэмед потэ, озьы эн улы (Островский)/1
| ← Йыръянэз | Кызьы улэмед потэ, озьы эн улы Нырысетӥ действие Автор: Александр Николаевич Островский Удмурт кылэ берыктэмез: А. Садаковлэн |
Кыкетӥ действие → |
| Поттэмын: 1855. Источник: Островский А. Н. Кизьы улэмед потэ, озьы эн улы. — Казань: Казанский Вотский Издательский Подотдел, 1920. — С. 3—14. |
Нырысетӥ действие
I · II · III · IV · V · VI · VII · VIII · IX · X потон
Первой потон
Афимья. Шӧдэ мынам сюлмы… маке но уродэз со шӧдэ!.. Бен кызьы ӟеч луоз на, семья пушкын одӥг но умой тэрыса улонэд ӧвӧл дыръя. Милесьтым таӵе урод улэммес адӟыса Инмар но милемыз куштӥз, лэся, ини. Кыӵе ке сьӧлык понна луэ, дыр, таӵе курадӟонъёс. Пётр Ильичлы я асьмелэн вӧсяськымтэмы понна. Урод муртэ учкыса но сюлме йӧтэ, бен капчи-а луоз аслад нылыд-пиед шоры учконэз!.. бен али со нош кышноё угось!.. Яра али коть Инмар анайзэ октӥз, кыӵе солы шуг луысал учкыны!.. Атаеныз спор улэ, кышнозэ курадӟытыса ӝумматӥз!.. Кин выжые мыныса таӵе вордӥськиз? Ини сьӧлыкъёслы ӧкынон нуналъёс вуизы, та нуналъёсын ят муртъёс но куспазы ӟеч луыса тупатско, соослэн нош изьыны выдыкузы но, султыкузы но, урод кылын тышкаськон но споръяськон. Кытын ветлэ ини со та дырозь? Сиськыны витимы-витимы, со нош олокытын ветлэ, тодмоез ик ӧвӧл!.. Быдэс вӧй арняез ветлэ, йыромиз ини йырыз, висем мурт кадь. Атаез лыктӥз шумпотыса учкыны тӥляд улэмдылы: вань на татын марке шумпотонэз! Маин ке утьысалыд-вордысалыд, со нош дӥняз бертыны дасяськиз.
Даша. Эн вера, кенак, озик но сюлмы туж писра.
Афимья. Малы бен уд вера! Зэм ӧвӧл-а ма.
Даша. Мар бен, кенак, каром на мон табере? Вайиз со монэ ят пала лушкаса.
Афимья. Кинлэн картэз пырытэк гуртаса ветлэ ке — со луонтэм кышно.
Даша. Тыныли ини мон! Вань сюлэмме ик со мынэсьтым поттӥз. Атаезлэсь уг кылзы, мон бен мар солы?
Афимья. Тон солэн кышноез, ят ӧвӧл.
Даша. Мон солы табере ятлэсь но хуже.
Афимья. Тон ини, Даша, таӵе шудтэм вордӥськемед, милемлы но сюлмаськон-нужна вайид!
Даша. Мон ӧй вайы тӥ доры та сюлмаськонэз. Пётр Ильич монэ яратыса улыку, мон но ӟеч улӥ, яратонтэм луиз — Инмар гинэ тодэ, дыр, солы мар луэмзэ, — весь гуртаны кутскиз.
Афимья. Карто кышнолы кызьы улыны кулэ, озьы улысалыд ке — ужды музон пӧртэм луысал; тон ма урод нылкышноос кадь картэдлэн чыртыяз ошиськыса ветлӥськод ук, кытысь адӟемед вань таӵеез, Инмаре, утьы. Кышнолы озьы кулэ-а ма улыны?
Даша. Туж паймон ужъёс луиз та мыным! Малпаськисько мон, малпаса но уг валаськы. (Бӧрдэ.)
Кыкетӥ потон
Илья. Дарья, эн бӧрды, Инмарлэсь вожзэ эн потты! Пельпумысьтыд йырдэ басьтэм бере, йырси понна уг бӧрдо ни.
Даша. Атаймы, кытчы мыныны дасяськид?
Илья. Кошко тӥ дорысь. Мынам тӥ шоры учкеме но уг поты: тӥ солы уд сылӥське. Тӥ доры арнялы гинэ бертӥд ке но, гуын улэм кадь потӥсько.
Даша. Тон коть пидэ витьыса солы вераса кельты вал.
Илья. Витё, нош ик огпол туж юн вераса кельто солы. Ведь быдме ини! Сыӵе улӥз ке, ӟеч витёнэз ӧвӧл ни. Сыӵе муртъёс нужна дортӥ матын ветло. Мылыз потыку кылзэ, мылыз потымтэ дыръя уг кылзы, мон пересь мурт ини, мыным шутэтскыны кулэ, лулы шорын малпаськыны но яра ини. Тырмоз, улӥ дуннеын, ваньзэ но адӟи, только уродзэ уногес адӟи, ӟечсэ ӧжыт адӟи. Иськавынлэн корказ улыкум гинэ мон дуннеез адӟи. Ӧжыт гинэ мон Муско ураме потэм вал, монастырысен тӥ доры вуытозь гинэ мармында уродэз адӟи! Калык адын пӧзе кадь: шуы-шау куара, шайтан кылъёсыз кырӟам куара! Тани толон, урамысь кык вием муртэ шедьтӥллям шуо, нош одӥгез ву басьтонэ люкмесэ йырыныз усем. Христослы ярано-а та кулон? Кытчы соос сюриллям? Кыӵе улон дуннеын та дыръя? Только сьӧлыке пырон гинэ. Тани аслам родной пие гинэ — со но мар курадӟе. Мон сыӵе улыны дышетыса быдэстӥ-а ма сое?
Куиньметӥ потон
Илья. Кытын ветлӥд, йӧно пие?
Пётр. Мускоын инты уно — вань ветлон инты, мылыд гинэ мед потоз.
Илья. Кӧт тырымонад ветлӥд-а?
Пётр. Тырмыт ветлӥ. Тон, атай, кытчы мыныны дасяськид?
Илья. Кошкыны турттӥсько, синме чимаса ик.
Пётр. Малы бен куно луыса уд улӥськы милемын валче?
Илья. Кӧты тыриз ини мынам тон шоры учкыса: туж урод улӥськод.
Пётр. Марлы, атай, вожед потэ? Маин бен ми винамат луимы тон азьын?
Афимья. Маин? Лутше тон эн вера вал, ми ӧм кылзысалмы, возьытэд но ӧвӧл!
Пётр. Тынад визьмыд уг тырмы шол та ужлы.
Даша. Атаедлэн туж вожез потэ, тынад весь гуртаса ветлэмедлы но монэным урод улэмедлы.
Пётр. Тон чагилляськид-а ма?
Илья. Мар чагилляськонэз на! Мон ачим уг адӟиськы-а ма, тынэсьтыд адями кадь улымтэдэ!
Пётр. Мыным адями кадь улон уз йӧт ни, дыр, монэ сӧризы, дыр.
Даша. Мар кылъёс бен луоз со?
Пётр. Арам кари мон асме тонэныд! Думылӥд тон монэ китӥм но, пыдтӥм но.
Даша. Тон курадӟытӥсь, тон вир юись!
Илья. Мар тӥ? Мон азьын ик? (Вожзэ поттыса.) Эн вазьы! Тынад визьмыд потэм, лэся! Тонэ кин мыртлаз сое басьтыны? Ачид басьтӥд, нокинлэсь но юатэк, лушкем басьтӥд, табере ни со винамат! Вашкалаослэн верамзы зэм луэ: «Инмарлэн, пе, юн луэ, а уродлэн, пе, лякиськись луэ».
Пётр. Со мынэсьтым йырме берыктӥз, дыр, маин ке… кыӵе ке эмъюмен.
Илья. Ӧвӧлтэмез эн вераськы, сьӧлыке пырыса! Мар бен тынэсьтыд йырдэ берыктонэз, тон озик но чума висёнэн висем мурт кадь. Ас сяменыз улӥсь муртлы озьы луэ угось. Ӟеч муртлэсь кенеш юалляськытэк, асьсэ визьмынызы гинэ ужало но собере бӧрдо, асьсэ улэмзылы зарлано, сьӧлык вылэ сьӧлык люкало, со сямен сьӧлыкен герӟасько, нюлэскын кадь.
Пётр. Бен мар, атай, карыны кулэ на? Кызьы бен нош улом на?
Илья. Закон сямен улы, муртъёс кадь.
Пётр. Тани мон ветлӥ… Мар бен луоз? Вӧйдыр угой. Ветлыны но уг яра-а ма? Вӧйдыр огпол гинэ луэ арлы. Мынам мар уже, муртлэн улэмез; мон улӥсько, аслам кызьы улэме потӥз озьы.
Илья. Аслад тодэменыд улон, закон сямен улонлэсь капчи, сое котькин но тодэ. Только ас тодэмен улон бытмонэ нуэ. Ӟечлы одӥг гинэ сюрес, а уродлы — дас. Ансыр но ӟоскыт сюрес улэп улонэ нуэ, паськыт но вӧлак сюрес бытмон интые нуэ.
Пётр. Весь ум ветлэ али, время вуоз, тупатскомы, асьмеос но муртэ дышетом; дышетонэз шуг ӧвӧл. Ветло али, ветлонлэн даурыз огпол гинэ. Тон, атай, ачид но пинал вал, дыр.
Илья. Бен вал ке? Мон тон кадь улӥ-а ма? Пинал дыръя урод улыны кулэ-а ма? Люгыт дуннеын шулдыръяськон понна ум улӥське. Ӟеч ужъёсыз лэсьтыса пинал дыръя дасяськиськод, пересьмем бере уг лу ни. Учкы али ас шорад: дӥньын тон уд улӥськы, урод муртъёсыз юлтош кутӥськод, кышнодэ куркариськод. Азьлапалан улонады мар луоз тӥляд, вера тон мыным?
Пётр. Мар луоз — луоз. Уломы кызьы луиз озьы, асьме визьмынымы, муртлэн визьмыныз ум улэ.
Илья. Улӥд ке улод ини! Мынам сое адӟеме уг поты! Мыным вераны ик со секыт. Мар веранэз? Кинлы веранэз? Визьмыд вань-а ма, визьмыд ӧвӧл ке, дышетскыса но уг луы.
Пётр. Ӧвӧл ке сое дунэн басьтыны уг луы. Ӧвӧллы суд но ӧвӧл.
Илья. Ӧвӧл ке ӟеч муртъёсыз учкыса дышетскы, собере Инмарлэсь куриськы, визь мед сётоз шуыса, ӧд ке куриськы, нумыр кадь бытмод! (Султэ.) Ӟеч луэ! Ӟеч улыны кутскоды ке, праздник дыръя лыкто, со дырозь мон доры эн ветлэ: мынам кӧты тыриз тӥляд улэменыды. Пётр, эн вунэты, бытмонэд тынад пыд выжыяд улэ. Кин весь ветлыны но уродлы дышем, со бордын Инмарлэн дэлетэз уг луы, урод маркеос шумпото, соослэсь косэмзэ каремысь, соосыз ношна но уродлы, куатаськыны, адӟыны быдмытэк улыны но всякой уродлы дышето. Сыӵе муртлы улон — шайтанэн огазьын. Ӵошаты, кудӥз ӟечгес: умой улонэз-а, атаед тонэ яратыса, ас лулдэ шумпоттыса, юртад дэлетэн-а? Яке шулдыръяськыса, муртлы мыскылляса вераны, выжы кумедлы сюлмаськыны, шайтанлы шумпотыны? Ӟеч луэлэ! Пётр, ини вуэ быдӟым нуналъёс, кышкыт нуналъёс, шӧдӥськы! Тани мон тыныд верасько, атаедлэн верамез туж кышкыт: шӧдӥськы, учкы али ас шорад. Ӟеч луэ!
Афимья. Дымак со сямен буш кошкод-а ма? Ини ӧкынон нуналъёс, муртъёс ӧкыныса огзылэсь огзы сьӧлыксэ кушто.
Даша. Атаймы, кушты милесьтым сьӧлыкмес, урод улэммес. (Пыд выжыяз йыбырттэ.)
Илья. Мынэсьтым но тӥ сьӧлыко луэмме куштэ.
Даша. Ӟеч кылдэ вера милемлы.
Илья. Тӥледлы ӟеч кылме вералом-а? Тӥ сылӥськоды-а бен солы? Тӥ ӟеч улыны кутскытэк гинэ, мон тӥледлы ӟеч кылме уг вера. Шумпотты монэ, Пётр! Тон улэм кадь улытозь, вовсе улонэз ик ӧвӧл. Атайлэн ӟечлыкез туж кулэ: ӟечлык лэсяна пуны кадь бытмод. (Кошке. Няраксы но сое келяло. Афимья но потэ со сьӧры.)
Ньылетӥ потон
Даша. Кылӥд-а, атаймы мар вераз?
Пётр. Дугды ни!
Даша. Атаедлэсь кылзод-а, монэ азьла кадь яратод-а?
Пётр. Дарья, кошкы мон дорысь!
Даша. Гажам кузпалы, вера мыным тон, эн ваты мынэсьтым, маин мон тынэсьтыд вождэ поттӥ? Пётр Ильич, оло, мон тон азьын серем бамо ӧвӧл-а? Оло, марке куарадэ ӧй кылзы-а? (Пётр шыпак улэ.) Маин вождэ поттӥ? Вера, Пётр Ильич!
Пётр. Кошкод-а тон мон дорысь, уд-а?
Даша. Улӥськом асьмеос кыкнамы ар гинэ али…
Пётр. Дарья!.. (Киыныз шаналъя.) Сьӧлыке эн пырты.
Даша. Лучше тон монэ виы! Мынам улэме уг луы, тынад ӟеч кылыд лэсяна! Ачид ведь тон монэ дышетӥд эрке улыны. Малы бен тон монэ азьла яратӥд но, вешад но? Мон эрке улыны но ӧй дышысал. Тодад усёно-а, яратон мусое, дӥньын улыкуд, мон шоры учкыса уд тыриськы вал, праздник дыръя ураме ке потӥм кыкнамы, лумбыт ӟыгырскыса пукиськом вал; тодӥськод-а мынэсьтым тӧдьы киме кутыса, мынам син шорам учкыса пукемдэ. Калык асьме дортӥ кошкыку, шумпотыса учкыса кошкоз вал. Туж чаль ортчиз асьмелэн сыӵе улэммы! (Бӧрдэ.)
Пётр. Мар ортчиз, сое уд берыкты ни.
Даша. Ачим но тодӥсько уд берыктызэ! Кызьы бен уд сюлмаськы, со зарни кадь улэме тодам усьыку. Петя, оло, тыныд мӧзмыт-а? Кулэ-а, мон тыныд одӥг кыл кырӟало, пинал дыръяд кырӟам сямдэ? (Шып луо.)
Пётр. Эн могаты али! Кошкы мон дорысь, тон лэсяна но сюлмы шуг улэ!
Даша. Вера мыным, марлы сюлмыд шуг улэ? Вера сюлэм шугдэ? Ведь мон тыныд ят ӧвӧл.
Пётр. Мынам сюлмы соин шуг, тон мынэсьтым лулме ас синмыныд кыскыса поттӥд, нош атайлы но чагилляськемед. Со мыным кыӵе кышкамон кылъёс вераз, эриктэм йырдэ ошод. Тон малпаськод вылэм али, атаез тышкаськем бере, со серем бамо луоз али шуыса. Мон сыӵе кылъёс кылыса чебер бамо луо-а ма? Витьы — али луо!
Даша. Озьы луэм бере, лэзьы монэ атае доры.
Пётр. Коть дуннелэн ньыльлапал дураз кошкы мон дорысь.
Даша. Ӟеч луы озьы ке.
Пётр. Ӟеч луы. Ӟечен буре ваёнэд ӧвӧл, уродэн но буре ӧз вайы.
Даша. Дымак сюлмаськон — нужналы кыли ук!
Пётр. Сюлмаськон? Тани кытын сюлмаськон! вуэн миськыса но уд быдты!.. Вае мыным арак! Чалякгес арак! Вырӟелэ!..
Витетӥ потон
Афимья. Мар луиз тыныд?
Пётр. Арак сётэлэ.
Афимья. Тон, эке, вунэтэмед, лэся, атаедлэсь верамзэ?
Пётр. Кин бен татын кузё? Мон дӥням-а куное лыктэмын-а? (Пуксе.) Арак вае! (Ӝӧкез мыжге.) Ӟечсэгем сёты: туннэ Вӧйюон.
Афимья. Тани мыныса ваё, мар ожмаськиськод! (Огпала кошкыса вера.) Тон кышноед шоры учкы али! Адӟиськод ведь кулоно кадь бӧрдэ. Сиид тон муртлэсь ымырзэ, сиид!
Пётр. Эй, Иван!
Тӧри ужакез кыткы, буям букоен… Чальгес луы!
Даша. Ӧжыт ке но дӥньын пукы вал.
Пётр. Мар каром мон дӥньын, татын йыре йӧтэ.
Афимья. Мар вераськиськод, кыӵе йыре йӧтон!
Пётр. Мон верасько угось, йыре йӧтэ шуыса, мынам сямен медло.
Афимья. Вера али тон, вера, дышмон, мынам тодэме потэ тынэсьтыд: мар понна тон кышнодэ курадӟытӥд?
Даша. Кенак, эн куареты!
Афимья. Куто но кошко, тӥляд улэмды шоры учкеме уг поты, учкыса сюлмы чигиське.
Пётр. Кошкы, кенак, кин тонэ кутэ; оло, тон лэсяна улонмы каньылгес луоз.
Афимья. Тэрон?! тэрон? шуиськод тон? Ӧрекчаськод тон, урод марке! Тонэныд юртын тэрон уз луы.
Пётр. Кенак, мынод-а тон уд-а араклы? Ӧд ке — мон ачим мыно; только со понна уродгем медаз луы.
Афимья. Мыным муртлэн жаль ӧвӧл. Ю, кӧтыд уз на тыры на ке.
Даша. Мон мыныса берто али.
Афимья. Ветлы али со котырын, со ношна адӟоз, тон шоры учкемез но уг поты. (Кошко.)
Куатетӥ потон
Пётр. Эй, туж йыры висе! Йыромем мурт кадь луи ук мон! (Малпаськыса пуке.) Оло, нош гулять кароно-а? Дӥньын мӧзмыт. Китӥм но, пыдтӥм но гердъяськем кадь луи мон. Мынам кышное ӧй ке лусал, ветлысал мон, асме ачим возьматысал. Мынам кыӵе етӥзлыке, дасо муртлы тырмымон! Умой-а ма кышноосын пукон, ӧвӧлтэмез вераськыса. Мар луиз — луиз, Вӧйюонэз быдтытозь юыса гулять каро али!
Аслад визьмо йырыныд,
Сад доретӥ эн ветлы,
Тяпа карыса эн кельты,
Сюрес лёгаса эн ветлы,
Вылады урод ним-дан эн кары.
Ай, йыры бен кыӵе висе! путкошконо кадь луэ. Кошко али мон аслам гажаме доры, сюлмаськонме-мӧзмонме тарканы.
Сизьыметӥ потон
Даша. Тани, Пётр Ильич, ю таза-сӧл луы.
Пётр. Эн адскы тон мынам син азям! Тӥни кыӵе кырыж учкиськод!.. Быдтоно марке сётэм кадь сётӥськод! Тынэсьтыд сётэмдэ мынам юэме уг поты!
Даша. Коть нош кулы макмыреныд, тон монэ раньӟытыса быдтӥд ини! (Аракез ӝӧк вылэ пуктэ.)
Иван. Валэд дась ини.
Пётр (араксэ стаканэ лэзе но юэ). Ойдо! (Кошке.)
Тямысэтӥ потон
Даша. Мар та мыным таӵе курадӟон луиз! Анаен-атай малпало, дыр, нылмы узыр интыын, ӟеч шумпотыса улэ, дыр, шуыса, а мынэсьтым ӵукна кутскыса ӝытозь бӧрдыса улэмме уг тодо, дыр. Мар карод на? Мыным кылдэм, дыр, чиданы — чидало; оло, ветлоз, ветлоз но визьмаськоз али, мынам гажанэ нош дорам лыктоз. (Ог вадес малпаськыса улэ.) Монэ куштыса, музон муртэ басьтӥз ке, солы гинэ уг чидаськы мон, весь малпаськыса улӥсько. Солэсь луоз, луытэк уз кыльы. Мынэсьтым со сюлэмме поттыса, олокӧня люкетлы люкыса, бусые таркаса мед куштоз вал, таӵе урод ужъёс лэсьтытозь мынам син азям.
Укмысэтӥ потон
Вася. Вӧйюон шулдыр мед луоз!
Даша. Умой-а, Вася? Мар тон?
Вася. Ӧжыт юоно кари.
Даша. Мар тон, Вася! Мар луиз тыныд, валлян та йылолыд ӧй вал?
Вася. Сюлмаськемен, Дарья Агафоновна, сюлмаськемен, туж бадӟым сюлмаськонэ.
Даша. Эн вераськы, тынад мар сюлмаськонэд вань?
Вася (пуксе). Вань, Дарья Агафоновна, вань. Сюлмаськон-нужнае чидантэм!.. Дугды али ке, сюлмаськонме ӝожаса кырӟало. Луоз-а кырӟаны?
Даша. Кырӟа!
Вася (кырӟа).
Котырез бадьпу кызьпу уз лу,
Кызьпу сурсы ву му уз лу,
Ум сюлмаськелэ ум бӧрдэлэ,
Сюлмаськем сюлэм кӧй уз лу.
Даша. Вася, мар бен тынад сюлмаськонэд?..
Вася. Уг вера, ноку но уг вера! Коть маркем курадӟытэлэ, уг вера.
Даша. Уд ке вера нош, кулэ ӧвӧл.
Вася. Ноку но, ноку но та дуннеын уг вера. (Кырӟа.)
Нюлэскы мынӥ, пу корай,
Корам пуосы туж тодмо.
Пичиысен кырӟаны усто луи,
Шудтэм луэме туж тодмо.
Даша. Уд ке бен вера, уд вера, мон уг юаськы ни.
Вася. Уг луы вераны, веран ӧз косэ… верантэм кыл верай… со монэ виёз.
Даша. Кин бен ӧз косы вераны?
Вася. Одӥг мурт. (Кырӟа.)
Турын но ӵоги кускам понӥ.
Пиям поныны мар луиз:
Мыным анай уно вераз,
Пелям поныны мар луиз.
Даша. Вася, мон тынэсьтыд ог марке но юало, вера мыным.
Вася. Юа-ске.
Даша. Пётр Ильич кытчы ветлэ? Тон соин валче ветлӥд.
Вася. Веран уг лу. (Кырӟа.)
Ӟичы ку изьы изьы уз лу,
Уйин ветлыса уж уз лу.
Уйин ветлыса сюроды ке,
Солэсь но урод уж уз лу.
Даша. Вася, оло, тон арак юод-а? Ю тани вишня арак.
Вася. Уг, кышкасько!.. Ох, атай тодӥз ке!.. Эн улы ни дуннеын!.. Мынам озик но ӧжыт кудӟеме вань… мон тӥ доры озик гинэ пырем вал, оло, кудӟеме ортчоз-а шуыса… мон атайлэсь кулоно кадь кышкасько… туж кышкасько!
Даша. Ми дорын ӧжыт изид ке, кудӟемед бытмоз… Ӧжыт гинэ ю, номре уз лу.
Вася. Одӥг чарка сёт-ске?
Даша (чаркае лэзе). Ю, Вася, номре но уз лу.
Уд вера-а тон мыным, кытчы ветлэмдэс?
Вася. Нокызьы но вераны уг луы: вераны ӧз косы.
Даша (кышкаса вера). Кызьы бен со, марлы уг косы?
Вася. Ӧз косы бере, ӧз косы. Интыяд ик виё шуиз! Эн юалляськы, Дарья Агафоновна, номре но уг вера.
Даша. Яралоз, яралоз, номре но уг юалляськы. Вася, нош огзэ юы.
Вася. Уг ни, тау тыныд, тырмоз… йыры берга… мон атайлэсь туж кышкасько.
Даша. Мар бен атаедлэсь кышканэз? Туннэ Вӧйюон угось. (Нош стаканэ лэзе.)
Вася. Бен кудӟод ук! (Юэ.)
Даша. Номре уз лу. Вася, тон туж чебер угось… тонэ нылъёс ярато, дыр… Тынад йырсиед бидыргиё! (Йырзэ маялля.) Нылъёс ярато шуиськод-а? (Арак лэзьыса юэ.)
Вася. Монэ нылъёс туж ярато. Только одӥг туж чебер ныл монэ серекъяз… со мынэсьтым быдӟымгес… вузкарись ныл, марлы монэ куркаре, уг тодӥськы.
Даша. Марлы бен тонэ куркаре?
Вася. Со монэ куркариз, со юри, шудыса гинэ серекъяз… туж йыркур луымон! а ачиз туж ӟеч, ӟеч тодэм мурт шуыса, нимаське.
Даша. Вера-ске мыным! вера, вера…
Вася. Мон со доры весь лушкем ветлэм вал, соин кышкасько мон, атай тодоз шуыса… Кытчы тон ветлӥськод шуэ?.. Уг вера, вераны ӧз косы… со вераз мыным: эн но малпаськы! Тон янгыш кышнолы но вералод шуиз…
Даша. Васёк, мон тонэ туж яратӥсько, мон тыныд туж чебер нылэз дэмлало! Вася, нош ю али.
Вася. Эн секта монэ, буркарик, эн секта… Мон кудӟемен, янгыш вераса лэзё, мон солэн юлтошкыз… со вераны ӧз косы… Верай ке, дуннеын ик, коть эн улы ни!
Даша. Нылыз бен кыӵе, Вася! Кыӵе чебер бен, суредэ понэм кадь!
Вася (юэ). Яралоз ске, яралоз, мон няраксэ но верало… монэ со туж куркариз… кӧтме шуг кариз… монэ со мыскылляз!.. Только тон солы эн вера, мон верай шуыса.
Даша. Уг вера, уг вера.
Вася. Огпол со мынэсьтым юа: кытчы тон ветлӥськод шуыса? Мон шуи солы: одӥг туж чебер ныл вань, анаеныз гинэ улэ, мон отчы ветлӥсько… Солэн нимыз Грушенька. Монэ но нуыса мын асэныд валче, шуэ. Мон нуи сое. Со тырысь ми ветлӥмы со доры туж уно пол… уно пол… пукиськом вал отын турлы кылъёс вераськыса, пряник но нуиськом вал… уез умой ортчытӥськом вал. Огпол сыӵе пукыку, со утыр тодмаськыса, синмаськыны кутскиз, ассэ кышнотэм пи шуыса оскытӥз…
Даша (кышкаса палэн луиз). Эй, Инмаре, Инмаре!
Вася. Тон эн вера со ныллы мынэсьтым кышно ваньме, шуиз… Пересь анаез шумпотыса кизэ сётэ, эмеспи луонэзлэн узырезлы шумпотыса. Ог вадес улэм бере мыным вера: тон табере отчы эн ветлы, адӟи ке виё, шуэ! Атаедлы но верало, шуэ. Мон атайлэсь туж курдасько вал! Монэ тон ӧрекчаны турттӥськод, лэся, шуи… Ӧрекча-ске! Мынам синкылие огпол тыныд вуттоз али… Ог арня ӵоже, Дарья Агафоновна, мон куараен бӧрдӥ, тани соин туннэ сюлмаськеменым ӧжыт гинэ юи… сюлмаськеменым асме вормеме ӧйло!
Даша. Ой, туж бадӟым сюлмаськон-нужна адӟиськод ук!
Вася (бӧрдэ). Мон но таӵе ик адями, мынам сюлмы но, лулы но вань… лулы-сюлмы шӧдэ, дыр… мон но из ӧвӧл, дыр!.. Солэн кышноез вань, а мон сирота… мынам нокинэ но ӧвӧл ук…
Даша (султэ). Кенаке-анае!
Дасэтӥ потон
Даша. Кенак, дасялэ мынэсьтым арбериме… мон дӥням кошкисько… пудэн ке но кошко, бызьыса кошко!
Афимья. Мар бен луиз тыныд!
Даша. Мынам картэ, кенак, монэ быдэсак люкем ас бордысьтыз!.. Кенак, солэн вань яратон нылыз!.. Тани марлы со дӥньын уг улы.
Афимья. Ой, мар тон? Ай, гажаме!
Даша. Со мон азьын мар карганонэз, вань лул-сюлмыныз карганӥз, одӥг тонэ лэсяна музонэз уг яраты шуыса, табере со олокыӵе маркеез шедьтэм… (Вася доры мыныса, донга сое.) Кин бен со ныл, вера али?
Изе! Чалякгес, кенак, чалякгес… Рогожкае мыно, вал медъяны. Мыным сое адӟытэк улонэз капчигес, ымырме соин сюлмаськыса ортчытытозь. Тырмоз, улӥмы ини. Ӟеч луы, Пётр Ильич!