Кутш да рака
Ыджыд вӧлі рӧдвуж ракалӧн. Уна вӧлі сылӧн пиян. Воисны тулысын дзодзӧгъяс, юсьяс. Поздысисны, лӧсьӧдчисны быдтысьны. Аддзис поздысьӧмтӧ налысь рака. Кутіс колькнысӧ гусявлыны. Коркӧ лэбӧ сэті тупъюр варыш. Буретш суис ракатӧ гусясянінас. Сьӧлӧм сылӧн пузис. Лэбис сера кутш дінӧ норасьны. Сера кутш ыстіс ракала пышкайӧс. Тайкӧ сійӧ оз вермы ракаӧс: оз лок, пыксьӧ. Лои тодмышкалігтырйи вайны. Сера кутш пуксис судитны ракаӧс.
— Паськыд вома ракаӧй! Тэ йылысь зэв тай нӧ лёк юӧр воис. Тэ пӧ тай йӧз эмбур вылӧ китӧ нюжйӧдлан… Гырысь пӧткаяслысь колькъяс гусявлан!
— Чӧв, югыд шондіӧй сера кутшӧй! Дзик прӧста тайӧ суклялӧма пӧрысь выжывыд, тупъюрыд.
— Тайӧ ӧмӧй на сӧмын, — шуӧ кутш. — Висьталӧны сэсся, тэ пӧ кӧдзысьяс бӧрся став рӧдвужнас вӧтлысян да му вывсьыс кӧйдыссӧ ӧкталан.
— Ок-ок-ок, югыд лунӧй кутшӧй! Дзик прӧстӧй сёрни тайӧ.
— Висьталӧны — кольтаяс пӧ да чумалияс бабаяслысь пасьян став рака котырнад.
— Югыд шондіӧй кутшӧй! Ёна жӧ менӧ гудралӧмаӧсь, суклялӧмаӧсь.
Сэсся сера кутш тшӧктіс ракаӧс пуксьӧдны чижовкаӧ.
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
This work is in the public domain in the United States because it was published before January 1, 1929 (more than 95 years ago). This anonymous or pseudonymous work is also in the public domain in other countries and areas where the copyright term of anonymous or pseudonymous works is 102 years or less since publication. |
|