Кунам каем, шке ныжылгылыкем ден

Иванова Альбертина Петровна

Кунам каем, шке ныжылгылыкем ден
Чӱктен сорта гай ныжылге куэм,
Тӱрлен пытарыдыме солыкемым
Мый йодын коштшылан пуэм;
Шинчавӱд гай яндар кӱан шергашым —
Йöратымашым палыше еҥлан;
Пытартыш шомакемым, лупс шер гайжым, —
Йомартым чоныш кондышо семлан.
Поран дечын аралыше ужгамым —
Пинегыжым йомдарыше пийлан;
Тӱрвемым кылмыктыше полан тамым —
Кандалге шошым шулышаш ийлан.
Кунам каем шке ныжылгылыкем ден
Сорта гай волгыдо куэм чӱктен,
Ах, ӱмбакетше чон лукем гыч
Адак ончал гына шуктем.