Газетъёсын книгаосын али туж трос гожъяло: фабрикъёсын, заводъёсын но мукет ужъёс котырын ужъёсты бадӟым пайдаё (поднятие производительности труда) кароно шуо. Та кылъёс котыре крестьян калыклы но кутскыны кулэ. Тросэз крестьян калык ужа но ужезлэн пайдаез туж ичиен лыктэ. Малы ке озьы шуоно, солы пумит трос гожъяно луэ. Нырысь ик вералом: крестьян калык аслэсьтыз ужзэ заводын сямен пуктыны уг быгаты. Солэн ужез бадӟымез карын ортче, зорен, кезьытэн, пельскемен ужамез уг луы. Музъем бордын улэмез но куазь вылэгес оскыса улэ. Ар ке тупа со нянен, пудо-животэн луэ, ар ке уг тупа ваньзэ вузаса сиса быдтэ. Озьы ке но луэ, крестьянэз уг ужа уд шуы. Со ужа но, ужамезлэн падиез уг луы. Талы пумит вань дышетскон но агрономия нимо тодонлыкъёс. Соос троссэ куазьлэсь урод сямъёссэ тодӥллям но соин погыръяськыны быгато. Тае тодыса
Кыктэтӥзэ тае вералом: крестьян семья пуӵкын ӵемен кинлы ма ужез ужаны усемез пуктымтэ. Соин сэрен одӥгез ужа, одӥгез оть-тать ветлыса нуналзэ ортчытэ. Куд-дыръя куазь жобамен, кудӥз огез лымбыт гурвылын, полатьын нуналзэс ортчыто. Та сярысь семья ужез валаса пуктоно, адямилы быдэ уж сётоно, жоб куазен кырысь ужез юртъер ужен воштоно.
Паймыса уж котырын берганы уг яра. Ма ужез ку ужаны кулэ азьпала адӟоно, сое гожъяса кадь тодоно. Арнялы толэзьлы быдэ ужаны ужъёсты син азьын возёно. Соку паймытэк уж бере уж ортчоз.
Куиньметӥез: талалтэ кузь ӝытъёсын кышноос черсыса пуко, пиос кудӥз маке со ужа, кудӥз тамак кыскыса гинэ коркась корка ветлэ. Токма ужтэк калгыса ветлэмлэн нош ик падиез ичи. Кыткон сиес котыръёсты тупатылыса, гозы пунса, маке со ремесло шедьтыса — ялам со улон котырез юнматысал. Сыӵе ужъёс ке уг шедё, книга-газетэз лыдӟыса ӧжытак дышетскыны валаны кулэ — кызьы мукет кунъёсын, интыосын калык гидкуа лэсьтэ пудоживот вордэ, музъемез ужа, маин улэмзы вольытамын но мар но. Со сярысь
Таӵе ужъёс котырын арнялы быдэ одӥг ӝытазе быдэс гуртэн люкаськыса, агрономъёсты, дышетӥсьёсты но мукет валась калыкез ӧтьыса кенешыны луэ. Кенешемлэн, книга-газет лыдӟемлэн ужез уг ке но адӟиськы, азьпала улса ужакуд сыӵе ужъёс шарае потозы. Америкаын «время — деньги» шуо, ужаны ке кутско, олань-талань уг учко, нуналзэс уг могато. Ужзы ке быдэсме, кизэс книга-газет воштэ.
Котькыӵе котьма уж котыре валаса мылысь-кыдысь кутсконо ке, со уж эркак гинэ шудса ки улын мынэ. Валатэк но мылпоттэк ужаськод ке, туж ужед секытэ усе, падиез но ичи луэ.
Та верам кылъёс сярысь тазьы чакласько: асьмелэн Россиямы ньыльлэн куинь кусыпез крестьян калык луэ. Вычакыз соос тодыса, валаса, ужез яратыса, бадӟым кужымен ужаны ӧдъязы ке, Кенешо Республикаосмылэн узыр интыез Америкае утчаны ум ветлэ.