Семьялы быдэ крестьян калыклэн юртъерез, пудо-животэз, дӥськутэз, ужан тӥрлыкез, музъемез вань. Быдэс улэмез солэн та ваньбур котырын. Куддыръя улон котырзэ юнматэ, машинаос, пудо-животъёс йыло мытэ. Куддыръя нош, ёрмыса, мае ке сое вузано луэ. Учкиськод ке, крестьян калыклэн улэмез трос пӧртэм ужлы тупа, троссэ тодыны валаны кулэ. Тодыны валаны понна мукет ужасьёс пуӵкын (вуз карон, фабрикын заводын но пӧртэм учрежденняосын) ужзэс лыдъяса возё. Со вылысь адӟе — кудӥз ма уж пайда сётэ, кудӥз изъянэ усе. Со понна соос быдэс «бухгалтерия» возё, пичиез но бадӟымез но ужзы со улысь уг мозмы.
Асьме дышетскымтэемыны таӵе уж котыре кутскыны кышкаськом, кудӥз огез кулэ но ӧвӧл каро. Соин ик крестьян калыклэн ас понназ аслаз «бухгалтериез» вань: «кулэмлэсь мозмим, номре вузатэк пыр проч потӥм.» Пумыз пумаз вуттэмын луэ, мултэсэз но кулэсэз ӧвӧл, азьпала нош маин ке соин, кызьы ке озьы уломы.
Соин ик Посадов эшлэсь «Гудырие» аслэсьтыз лыдъяса гожтэм ужъёссэ шумпотса лыдӟи но гожтэтэз сярысь одӥг-ог кыл вераме потэ.
Посадов эшмы аслэсьтыз «сумен» ужъёссэ гинэ гожтэ, троссэ лыдъятэк кельтэ. Куро, макина, картовка, бакча мертосъёс, етӥн пышлэн кужез мертчанэз — лыдэ пырымтэ. Турынлэн но ӟеглэн дуныз кулэстэмын. Соосты лыдъяса музъемлэн сётэм лыдэз уногес луоз ужам нуналлэн дуныз манетлэсь но ортчоз. Та сяна гожтоно вал кӧня пудо-животэз, бадӟым-а семьяез, кӧня ужаны быгатӥсез. Вычаксэ ке верано, тросэз гожтытэк кылемын но, со понна Посадов эшез улӥе ум каре, ас ёросысь со вылӥе потэ, быгатэмезъя ужъёссэ гожъям, ужезлэсь падизэ тодны мылыз кыдыз вань.
Ужам нуналлэн дуныз ичие усемезлэсь но туж ӝоже пырны уг яра: валатэкгес ужаськомы но, музъеммы пайдазэ ичигес сётэ, ужмес капчиятон понна, нуналъёсмес шыръян понна, машинаос басьтыны ум быгатӥське, соин ик ужмы но дунтэме усе.
Ужмы юнмаса правительствомы мукет кунъёсын нянен вузкарыны ӧдъяз ке, няньлэн дуныз но будоз. Фабрикын заводын ужасьёс ужзэс ӟеч пуктӥзы ке, соослэн гурт калыклы кулэ вуззы но дунтэмгес луоз. Соку крестьян калыклэн но улэмез капчиёмоз.