Корны

Савельева Евгения Константиновна

КОРНЫ

Неркӓвлӓштӹ изимӧр якшарген,
йӹр пеледӹш ӓршӓш кловой валган,
ўвшӹнзӓл, дӓ трўкок йӓнгет шыла.
Ах, сӓндӓлӹк, тӹньӹ мӹньӹн ылат.


Корны, корны, ылат мӹньӹн веле,
ам керд йӓл дон пайыленжӹ пеле.
Пуйырымаш лин техень мӹлӓнем,
ойхыжат дӓ сусужат вӹлӓнем.

Ныржы мычкы ладнан ашкед кеем,
тӹнь, сӓндӓлӹк, ылат иктӹ веле,
иктӹ веле улы тӓнгжӹ йўксӹн,
ам керд тӹньӹм йӓллӓн пуэн кўсӹн,

Вырсаш дӓ ӧпкӓлӓш уке йӓлӹм,
корны пандым кидӹшкемжӹ нӓльӹм,
соты корны ӹшкеок нӓнгеӓ,
тӹдӹ мычкы шукы халык кеӓ.

Ӹшке велӹн корны – анзык ашкыл,
ак ли тӹдӹм весӹ дон(о) вашталташ.
Кок покашты шурны коэштӓлтеш,
пӓшӓ мӓмнӓн шытыр дон(о) ӹштӓлтеш.