Коми Автономияа Обласьтувса государственнӧй да общественнӧй учрежденньӧясын...

by Аноним

Коми Автономияа Обласьтувса государственнӧй да общественнӧй учрежденньӧясын, предприятиеясын да организацияясын коми кыв удж нуӧдӧм кузя индӧд.

ИНДӦД

1. Коми Автономияа Обласьтын коми кыв лыддьысьӧ роч кыв моз жӧ государственнӧй кывйӧн.

2. Быд съездъяс, конференцияяс, собранньӧяс да заседанньӧяс вылын роч да коми кыв лыддьысьӧны ӧткодьӧн. Роч кывйӧн нуӧдан съездъяс, конференцияяс, собранньӧяс да заседанньӧяс вылын эмӧсь кӧ йӧз, кодъяслы сетӧма гӧлӧс, да роч кывсӧ гӧгӧрвотӧмысла кутасны корны сёрнияссӧ да резолюцияяссӧ вуджӧдны коми кыв вылӧ либӧ тадзи жӧ кутасны корны вуджӧдны роч кыв вылӧ рочьяс, коми кывйӧн съездъяс, конференцияяс, собранньӧяс да заседанньӧяс нуӧдігӧн — колӧ корӧм серти вӧчны.

3. Сӧветскӧй учрежденньӧясӧ кор локтас коми морт, служитысьяслы колӧ сёрнитны сыкӧд комиӧн. Служитысь кӧ коми кывсӧ оз тӧд, а локтӧм морт роч кывсӧ омӧля гӧгӧрвоӧ, сёрнитны сыкӧд колӧ кыв вуджӧдысь пыр.

4. Быдсяма эскӧданпасъяс, эсканпасъяс, кырымпасъяс, лӧсьӧдчӧмъяс, протоколъяс, денежнӧй документъяс да мукӧд пӧлӧс официальнӧй гижӧдъяс, кӧть государственнӧй, кӧть общественнӧй учрежденньӧяссянь, кӧть частнӧй мортсянь сетӧм, комиӧн кӧ гижӧма, пыдди пуктыны ӧтмоза рочӧн гижӧм документъяскӧд.

5. Печатъяс, штампъяс да вывескаяс став государственнӧй учрежденньӧяслӧн да общественнӧй организацияяслӧн: туйяс, станцияяс да улича нимӧдан пӧвъяс, Коми Автономияа Обласьт пытшкын мед вӧлі гижӧма обязательнӧ комиӧн и рочӧн.

6. Став обласьтувса, уездувса, карса, вӧлӧсьтувса да сиктса сӧветскӧй учрежденньӧяслы обязательнӧ колӧ босьтны, гижӧмӧн кӧть висьтавлӧмӧн, гражданасянь быдсяма шыасьӧмъяс коми кыв вылын.

Содтас: Коми гижӧдъяс вылӧ колӧ обязательнӧ воча юӧръяс гижны комиӧн жӧ.

7. 6-ӧд пунктын лыддьӧдлӧм государственнӧй да общественнӧй учрежденньӧяссянь должносьта йӧзлы сетӧм эскӧданпасъяс мед вӧліны гижӧма ӧтпырйӧн комиӧн и рочӧн.

8. Став йӧзлы чуйдӧдан шуӧмъяс, тшӧктӧмъяс, индӧдъяс, чуйдӧдъяс, плакатъяс да с. в., 6-ӧд пунктын лыддьӧдлӧм учрежденньӧяссянь да общественнӧй организацияяссянь колӧ чуйдӧдлыны комиӧн.

Содтас: Роч сиктъясын чуйдӧдчӧм мунӧ рочӧн.

9. Коми вӧлӧсьтъясын волісполкомъяслы став делопроизводство (книгаяс, сёрнигижӧдъяс да мукӧдтор) денежнӧй отчётъяс, касса книгаяс да военнӧй делӧяс кындзи, колӧ нуӧдны комиӧн; роч кыв позьӧ кольӧдлыны недыр кежлӧ сӧмын кӧні дзик некод волісполкомса уджалысьяс пиысь оз тӧд коми кыв.

Содтас: Роч вӧлӧсьтъясын делопроизводство вӧлӧсьтувса да сиктувса учрежденньӧясын мунӧ рочӧн.

10. Коми йӧзкӧд да найӧс ӧтувтан сельсӧветъяскӧд волісполкомъяс нуӧдӧны удж, сёрнитӧмӧн кӧть гижӧмӧн, обязательнӧ коми кыв вылын. Вӧлӧсьт улын кӧ йӧзыс кык пӧлӧс (коми да роч), сэки нуӧдны сёрни да гижасян удж кыкнан кывнас, а йӧзыс кӧ дзик рочӧсь — роч кывйӧн.

11. Коми волісполкомъяслы да сельсӧветъяслы колӧ нуӧдны быдлунся гижасян удж, кыдзи ас костаныс да вӧлӧсьт пытшкӧсса учрежденньӧяскӧд, сідзи-й уездувса да обласьтувса учрежденньӧяскӧд да организацияяскӧд непременнӧ коми кыв вылын. Уездувса да обласьтувса учрежденньӧяс быдлунся гижасян уджсӧ коми волісполкомъяскӧд нуӧдӧны коми кыв вылын жӧ, ас костаныс гижасьны колӧ сідзжӧ комиӧн, рочӧн позяс гижасьны сӧмын кор оз тырмы комиӧн кужысь служитысьяс.

1 содтас: Обласьтвывса учрежденньӧяскӧд да организацияяскӧд колӧ гижасьны рочӧн.

2 содтас: Роч вӧлӧсьтъяскӧд гижасигӧн быд комиӧн гижӧм петан гижӧд дінӧ, полномочйӧ дінӧ, эскӧданпасъяс да справкаяс дінӧ колӧ пуктыны тшӧтш сэтшӧм жӧ документ (гижӧд) роч кыв вылын.

12. Бӧрйысигъясӧн, вотъяс лӧсьӧдалігӧн, овмӧс йылысь да мукӧдтор йылысь кампания нуӧдігъясын, обласьтувса, уездувса да карса учрежденньӧяссянь да организацияяссянь колӧ ыставны сёрнитысьясӧс коми либӧ коми сора районъясӧ, вӧлӧсьтъясӧ да сиктъясӧ комиӧн кужысь йӧзӧс.

13. Та воддза пунктъясын шуӧм серти удж нуӧдӧм могысь госорганъяслы колӧ босьтавны служитысьясӧс медъёна коми йӧз пӧвстысь, сы понда:

а) служитысьясӧс босьтігӧн быд госорганлы колӧ комиясӧс да комиӧн кужысьясӧс (уджсӧ ӧткодя тӧдігӧн) босьтны водзджык коми кыв тӧдтӧмъяс дорысь; коми кыв тӧдӧм вылӧ колӧ видзӧдны аслыспӧлӧс удж тӧдӧм вылӧ моз;

б) быд госорганлы колӧ видлавны ассьыныс штатъяссӧ да лӧсьӧдлыны сідз: код служитысьлы торъя ёна лоӧ уджавны коми йӧз костын, сэтшӧм должносьтъясӧ мед вӧлі обязательнӧ пукталӧма комиӧн бура кужысьясӧс;

в) коми кыв да гижӧд велӧдны кокньӧдӧм понда обласьтувса да уездувса центръясын да вӧлӧсьтъясын воссялӧны курсъяс: коми служитысьяслы ковмас велӧдчыны сэні обязательнӧ, а комиӧн кужтӧмъяслы — ас вӧлясьыс. Тайӧ пункт серти вӧчӧмысь кывкутӧны госорганъясын юралысьяс.

Содтас: Пункт "б" серти медвойдӧр колӧ вӧчны милициялы, юстициялы, войтырӧс велӧдан да дзоньвидзалун кутан органъяслы да вот перъян аппаратъяслы.

14. Водзӧ кежлӧ тӧждысьӧм могысь, медым государственнӧй учрежденньӧяслы да организацияяслы тырмымӧн лоас коми уджалысьяс (либӧ комиӧн кужысьяс), Войтырӧс велӧдан юкӧдлы колӧ:

а) Быд велӧдчан да политика тӧдмалан учрежденньӧӧ сюйны коми кыв; тайӧ уджсӧ колӧ лыддьыны медколанторйӧн.

б) Быд гырысьджык школаясӧ велӧдчыны пырысьяслысь требуйтны, мед коми кыв (мыйта пуктӧма тӧдны) тӧдісны.

в) Коми Обласьт пытшкӧсса профтехническӧй велӧдчанінъясӧ, техникумъясӧ, партшколаясӧ велӧдчысьясӧс босьтавны коми да роч йӧз лыд серти, прӧчентӧн лыддьӧмӧн. Татшӧм велӧданінъясӧ торъя ёна босьтавны яранъясӧс; лӧсьӧдӧм прӧчент лыд налы оз инмы.

г) Медыджыд велӧданінъясӧ ыставны велӧдчысьясӧс сэтшӧм жӧ принципӧн, кыдзи висьталӧма лои водзын.

15. Быд обласьтувса учрежденньӧлы, а медвойдӧр Войтырӧс велӧдан юкӧдлы, Видз-му управленньӧлы, Дзоньвидзалун кутан юкӧдлы, колӧ выльысь видлавны ассьыныс учрежденньӧяссӧ (школаяс, библиотекаяс, нардомъяс, клубъяс, йӧзӧс да скӧтӧс лечитан пунктъяс да мукӧд) да лӧсьӧдлыны сідз, мед коми да мукӧд кывъя районъясын вӧлі индалӧма найӧс ӧткодя, йӧз лыд серти; сідзжӧ лӧсьӧдлыны, мед коми да коми сора районъясын тырмымӧн вӧліны коми кыв тӧдысь уджалысьяс.

16. Обисполкомлӧн юкӧдъяс быд циркуляр да мукӧд пӧлӧс индӧмъяс, кодӧс лӧсьӧдаласны ыставны асланыс улыс учрежденньӧясӧ, коми кыв пыртӧм йылысь тайӧ индӧд серти обязанӧсь разӧдтӧдз войдӧр ладмӧдны Обласьтувса коми комиссиякӧд.

17. Обласьтувса учрежденньӧяслы колӧ, коми кывйӧ вуджигӧн мыйкӧ оз кӧ кут артмыны либӧ оз позь вӧчны, пырысь-пыр сы йылысь юӧртны Обласьтувса коми комиссияӧ; уездувса да вӧлӧсьтувса учрежденньӧяс ысталӧны татшӧм юӧръяс уездувса комиссияӧ, а уездувса коми комиссия — обласьтувсалы.

18. Уездувса коми комиссияяслы пуктыссьӧ мог:

а) паськӧдны тайӧ индӧдсӧ став уездувса да вӧлӧсьтувса учрежденньӧясӧ да став йӧз костын;

б) туйдӧдавны уездувса да вӧлӧсьтувса учрежденньӧясӧс тайӧ индӧд серти удж нуӧдны;

в) служитысьясӧс да велӧдысьясӧс юклан органъяскӧд ӧтвылысь лыдӧ босьтны да юклыны коми да комиӧн кужысь служитысьясӧс да велӧдысьясӧс.

г) Рабкрин да Юстиция Комиссариат органъяскӧд ӧтвылысь кутны контроль, мед быд госорганын удж нуӧдӧны тайӧ индӧд серти: кодъяс оз кутны сідз вӧчны — найӧс кыв кутӧдны.

19. Регыдджык да бурджыка учрежденньӧясӧ пыртӧм могысь, обласьтувса да уездувса учрежденньӧясын да предприяттьӧясын бӧрйыссьӧны уполномоченнӧйяс. Налӧн могыс: видзӧдны, мед нуӧдӧны вӧлі тайӧ индӧдсӧ да-й коми кыв вылӧ вуджӧм йылысь мукӧд пӧлӧс шуӧмъяссӧ да тшӧктӧмъяссӧ.

Уполномоченнӧйяс вермӧны асьныс веськыда гижасьны-сёрнитны обласьтувса либӧ уездувса комиссиякӧд да быд тӧлысьын найӧлы (комиссияяслы) сетны отчёт.

20. Тайӧ индӧдыс пырӧ вын улӧ печатьын чуйдӧдан лунсянь.

Обисполкомса председатель Еф. Мишарин.

Обисполком бердса коми комиссияын председатель С. Трофимов.

Обисполкомса шлен-секретар Ф. Попов.