Кылчин-убир Колчак нимо
Потӥз дуннеез саптаны,
Сьӧд калыкез пӧяны усто,
Вуж законэн улыны.
Калыкез мозмытӥсь, Ленин нимо
Вордскиз выль закон пуктыны,
Куанер калыкез утьыны усто,
Ужась калыкен улыны.
Колчак ожмаське уксёен,
Зӧк кӧтъёсын кенешыса,
Огкылысь кариськыса буржуен,
Лыктэ, шудо улонэз быдтыса.
Ленин ожмаське ӟеч мылкыдын,
Ужась крестьянэн вераськыса,
Кенеш карыса сьӧд калыкен,
Ветлэ, вуж улонэз сӧрыса.
Колчак лыктэ эксэй луыны,
Котыраз министр пуктыны,
Сьӧд калыклы урыс вайыса,
Дораз возёз вешаса.
Ленин лыктэ кенеш сётыны,
Котыраз крестьянэз возьыны,
Буржуйёслы узвесь ӝук вайыса,
Тырмымон возёз сюдыса.
Колчак крестьянлэсь музъемзэ
Берен помещиклы берыктэ,
Музъемтэк крестьянэз кельтыса,
Курадӟытэ, ужасьын возьыса.
Ленин баярлэсь музъемзэ
Ваньзэ крестьянлы сётэ,
Крестьянэз музъемо карыса
Шудо каре, эрик сётыса.
