Колхозонь эряф/1941/03/Йомла Мирон
| ←Авань международнай коммунистическяй шись | Колхозонь эряф (1941), № 3 Март edited by Игнатьев Г. А. Йомла Мирон by авторсь: Франко, Иван Яковлевич, мокшекс ётафтозе: Аф содаф (аноним) |
Золотой узерь→ |
| Колхозонь эряф. Эрь ковонь литературно-художественнай и общественно-политическяй журнал. Мордовскяй Советскяй писателень союзть органоц. — № 3 Март 1941. — с. 63—68 |
| Иван Франко
|
| Йомла Мирон |
| I |
Йомла Миронць удивительнай шаба. Лангозонза ванозь, аляц радовакшни и корхни, што сон удивительна ёню идь, но аляц, содаф, односторонняй судья. Да нинге Мирононь аляц — сире ни ломанць, цють учевсь тейнза шабась, и, конешна, кодама ба афоль уле шабась, сон сякокс ули тейнза золотойкс, и ёнюкс, и мазыкс. Шабратне саворне тошксесть эстейст, што Мирон кода-бди аф стама, кодапт ломаттне: моли и яфчай кядензон, корхтай кати-мезе эстейнза, сяви илиня, вяшкфтьсы сон кожфса или мархтонза прафни кумбарав и пизьгатань тише прятнень. Лия иттнень ёткса сон аф смелай и аф отькорь, а кой-коста кда и пшкяди коданга, то азы стама, што оцюфне, кодак кульсазь, то аньцек лафтуснон шерьфтихть.
— Василий, — корхтай ёмла Миронць ёмла Василийти, — мзярос тон маштат лувома?
— Мон? А мзярос эряви маштомс? Вете, сисем, парканадцать [1]?
— Парканадцать! Ха-ха-ха! А мзяра парканадцатть эса?
— Ну, мзяра эсонза? Мон аф содаса!
— Тоса аш мзяровок. Вов озак и карматама лувома.
Василий озай, а Мирон ушеды лувома, калтадемок эрь валть мельге байдекса модати: фкя, кафта, колма, ниле...
Василий кулхцондсь, кулхцондсь, а сяльде стясь и тусь ласькозь, Мирон афи приметазе, и калтыи и луви сяда тов и тов. Сась ваксозонза сире Рябинась, козксни, сельгонди и куфци, — Мирон афи кульсы, сякокс эсь тевонц содай... Мирон лувсь ни ниле сядос.
— А, тон, аф алякс туф цёраня, э! — мярьгсь атясь аф эсь вайгяльсонза, цють шалхконьбачк, — мезе тяфта тон тият?
Йомла Миронць нльне киренди и шарфтсыне эвотьф сельмонзон сире Рябинать лангс.
— Да тон святой моданять пикссят, а? Тон аф содасак, што моданясь минь тядяньке? Дай тейне тя байдекть?
Мирон максозе, пцтай аф шарьхкодемок, мезе эздонза веши атясь. Рябинась ёрдазе байдекть ичкози, палакснень ёткс. Мирон цють ашезь аварьгода, аф стане байдекть инкса, кода сянкса, мес атясь лоткафтозе сонь лувоманц.
— Архт куду и лувк «отче нашить», э-э-э, сянкса, штоба [ 64 ]тяфтама пакостть аф тиендемс! — мярьгсь кяжиста атясь и тусь сяда тов. Мирон куватьс ванць сонь мельганза, сякокс ашезе шарьхкочне, мезенкса тя атясь кяжиякшнесь и мезе веши сонь зздонза.
| II |
Йомла Миронць сембода пяк кельгсы ськамонза ласькондеманц панчфса вельхтяф пиже лугатнень ланга, кели лопа кумбарафнень и танцти шиня ромашкатнень ёткова, — кельгсы никссемс расав клеверть ламбама таньфонц и наряжакшнемс кумбаравонь педенди пуняса, конатнень мархта вельхнесы эсь прянц пильгонек-прянек. А нинге ляйня, конань туркс эряви ётамс переста жуватань ванома васту, ёмла сетьме горнай ляйня, конанц серихть, крутат и обрывистайхть беряконза, сёвоню потмаксоц, горняй кялема мархта, конатнень потмакссна вельхтяфт ёмла плитаняса, куване касыхть кувака, моцькакс ляпе пиже ведьтишет, — тя ся ляйнясь, ся настоящай мазышись, тя пяк вии васькафниец Мирононь. Тоса сон кельгсы озада ащеманц частонь-частонь, кяшемок сери касатыкть потмос или белокопытыкть туста кели лопанзон ёткс. Ащи и ванонды пиндолды ведти, кона шерьфнесыне волнать люпштаманц вельде тишетнень, ванонды мянтукнень лангс, конат пингонь ётазь лисендихть эсь варястост или уихть крхка вастста, шашнихть потмаксть эзга, панцемок инжанятнень мельге, или тага нльне лихнесазь ведьста эсь ношка, усав нярьснон, нилихть весть кожфта и тага ворьгодихть сяда курок эсь варязост, бта варжасть кати-кодама пяк танцти, танцти суском. А тя ёткова шись пиди туцяфтома равжаза-сенем менельста, эжди Мирононь лафтубрянзон и сембе теланц и пидесы сонь кели лопатнень ёткста. Тейнза цебярь. Сон аф сяряди, серай сельмонянза эрекста ванондыхть, шабань коняц срмави — мяль кармай прясонза шарома.
— Вов шинясь мес сон тяфтама ёмланя, а алязе корхнесь, што сон оцю? Виде, менельти тяфтама ёмла варяня пяльф, и сон аньцек тяшкаста няеви!
Но эстокиге ни сонь прясонза эвондась лия мяль.
— Ванка, — кода ина тя тяфта? Стяй, тяфтама жа ёмланя варянясь, валги, — тяшка тосонга варянясь. Дряй варянясь шить мархта менельть эзга якай?
Тя аф тяльги сонь прязонза и сон надияфтсы эсь прянц, што кодак аньцек моли куду, эстокиге же кизефтьсы алянц, кода именна менельть эса шити пяльф варясь?
— Мирон! Мирон! — кулеви ичкозде ювадема. Ся тердьсы тядяц. Мирон кулезе, тусь берякста ласькозь кялемав, штоба ётамс ляйнять туркс, — и эстокиге лоткась. Ламоксть ни сон ётнесь ляйнять туркс, и мезьге ашель, а тяни вдруг од явления шарфтозе сонь мяленц. Сон ащесь как раз шить каршеса, и ваномок ведти, вдруг няйсь мацянять, кевнятнень и ляпе, сянгяря ведьтишень моцькятнень вастс — пефтома крхка сенем васта. Сон нинге афи сотцезе, што тя мзолды тейнза ведть эзда менельсь, и лоткась. Кода ина [ 65 ]тейнза молемс тяфтама крхкати? И коста сон вдруг сявовсь? Сон стясь и ушедсь лапкас ванондомонза крхкать. Сембе стамкаль. Сон озась. Сякокс аньцек берякть крайста няевихть содаф кевнятне и сякокс кулеви кялемаса ведть кельгома горьфоц. Сон шарфтозе шаманц лия шири, копоренц шити: крхкась юмась, кялемась — мацяня, кодама ульсь. Тя открытиясь и касфнезе мяленц и дивандафнезе сонь. Сон ушедсь шарфнема сембе шири, проверякшнемок и касфнемок мяленц удивительнай явлениять мархта. А тядянц тердеманц ёфси юкстазе!
И куватьс станяк ащесь ёмла Миронць, то комсемок, то шарфнемок кялемать трваса, а сувамс эзонза сембе сяка ашезь сатне вийц. Тейнза няевсь сякокс, што вов-вов маця, кевонь кялемать кучкаса модась яви кафтова, и сери берякнень ёткса, ляйнять ала пиндолгоды сенем, нефтома крхкта васта, и сон лийкстай ся крхкалмоти ичкози—ичкози, юмай тоса, кода крхка, шобда эшис ёрдаф чепканясь. И кие содасы, мзярс ащель ба сон кялемать трваса, кда ба афоль са малазонза Мартын шабрасна, конац цянга и грабля мархта кенордась тишес.
— А тон мес тяса нюрьксят? — Вов тоса тядяце тернетянза. Мес аф молят куду?
— Да мон молелень, но пелян.
— Мезьда?
— Вов ванка! — и сон няфтезе ведьста пефтома крхка, сенем вастть. Мартын ашезь шарьхкоде.
— Ну, мезьда тяса пелемс? Маця вдь.
— Маця? — аф верондазь кизефтезе Мирон. — А вов кодама крхка?
— Крхка? Ватт, тя аф крхка, — мярьгсь Маргын, и кодак ульсь постолса, станяк и ётась кялемава, цютьке начфтомок синь. Мартынонь ётамац макссь Мирононди смелость, и ётась ведть туркс, и тусь перетнень ланга куду.
— Кодама тя глупай цёрокшсь! Вете кизонза, а нинге кялемать эзда пели, — мятордсь шабрасна и тусь тише урядама.
| III |
А мзярда кизонда сембе оцюфне туйхть кудста паксяв, — Мирон ляды ськамонза, но аф куду. Кудса сон пели. Пели «ужеса ащи атятнень» эзда, лиякс мярьгомс, цильфнень; пели оцю пеке пянакудть эзда, пели шуфтонь эчке туркскять эзда, конац шавф поталкста вальмяняти, куване тялонда лисенди кудть валдоптомс крьвястьф шявнять эзда качамсь. Мирон ляды пирьфи. Тоса сон может гуляндамс, сязендемс лопат и нефнемс синь пакшкянь-пакш, налхксемс шить каршеса, и кулхцондомс марлюнятнень пряста кирьхкснень чильнямаснон, и ванондомс сенем менельти, строямс куднят чепкаста и илиняста, конат ащихть пенгянь керома вастса или тяфтак ащихть завалинкать лангса. Пара тейнза, и шабань конязонза тага туцяня лийкстай — тя сась мяль.
[ 66 ]— А мезьса тяфта ломанць сембонь няйсыне? И менельть, и модать, и алянзон-тядянзон?
Тяфтама кизефкссь сашенды сонь прязонза апак учсек.
— Или мезьса кули? Вов яксярга кяркнай, сарасне ктнайхть... Мес тя тяфта, мес мон тянь кульса?
Тейнза арам, што тянь сембонь ломанць тиендьсы кургса, и няи, и кули. Панчсы кургонц: тяфта и лисенди, сембонь няйсыне, кулевихть сембе...
— А пади аф? Пади сельмонзон мархта?
Коньцыне сельмонзон. Вов, мезевок аф няеви. Панчсыне сельмонзон: няи и кули. Коньцыне тага — аф няи, но кули.
— Да вдь, вов сон кодане! Сельмоса няевихть, а мезьса жа кулевихть? Тага панчсы и сёлгсы кургонц — кули! Сяльде — сельмонзон — сембе кулевихть. Вов меколи сась мяль — пандомс сурса пилензон. Шум-шум-шум. Мезе тя тяфтамсь! Маряви шум, но аф кулеви аф саразонь ктнама, аф яксяргонь кяркнама. Сявсыне суронзон — кулеви ктнамась, а шум аш. Нинге весть — сякокс станяк.
— Мезе тя тяфтамсь? — арьсекшни Мирон эсь потмованза. Вов ни содаса кода! Пилесон кулян ктнама, а сурсон кулян шум. Конешна, конешна.
Тяряфтсаськ весть и нинге весть — тяфта, ёфси тяфта!
А мзярда састь лядихне обедама, сон, комотнемок, ласьки алянцты.
— Аляй, аляй! Мон мезе-бди содан?
— Мезе ни стамсь, идняй?
— Мон содаса, што сельмонзон мархта ломанць няи.
Аляц пеедезевсь.
— Пилесон жа кулян ктнама, а сурнень мархта шум.
— Кода стане?
— Да стане, мзярс аф пандсайть пилетнень сурса, то кулеви, кода сарасне ктнайхть, а кодяк пандсайть, то маряви аньцек шум.
Аляц рахазевсь, а тядяц варжакстсь Мирононь лангс оржаста и мярьгсь, куцюса гразязь:
— Архт, бродяга, архт! Тяфтама оцю цёра, што курок и рьвяяфтомска пинге, а стама глупостть корхтай! Мес тон мяльцень азомда инголе аф арьсят, а фалу мезевок стама лаподят, кода каймоса ускить? Вдь ломанць сембонь кульсыне пилензон мархта: и шумтьке и ктнаматьке.
— Мес ина аф кульсайне марса? Аньцек, кодак аф пандсайне пиленень, кульса ктнамать, а кодак пандсайне, то кулян шум? — кизефтсь цёранясь. Вов тяряфтость тинць! — И сон, штоба верондальхть, тага пандозень сурса кафцьке пилензон.
Тядяц мятордсь мезе-бди, но ответ тя кизефксть каршес ашезь му.
| IV |
А сембода ни оцю бедась Мирононди тя арьсекшнемать мархта! Аф машты арьсема, и сембе. Мезе аф мярьги, бывала, фалу аф стане, кода эряви, фалу тядяц, или кивок лия, мярьги тейнза:
[ 67 ]— Мес ина тон, тумак восемнадцатый [2], инголькиге аф арьсят, а тяфтак лабордат, кода калонь кунцысь ботса.
И кода ни беднай Миронць ашезь мученда, штоба арьсемс инголи, а сяльде азомс мезевок ёнюста, аф, аш кода, да и сембе. Беднай Миронць пачкодсь стама убежденияс, што сон аф машты арьсема.
Кати-кода весть озаф сембе семьясна кудть кучкаса ащи оцю шрать перьф обедама.
Слугатне няезь тянь, варжакстсть фкя-фкянь лангс, тостядязе фкясь омбоцеть конерьбакарьса, а работница стирнясь нльне тошкась сире Иванти:
— Ватт вов, сон тяньёк кодамовок глупость азы.
— Вов аф содаф, — ушедсь савор Мирон, — мес тя святой тядясь ваны и ваны, а капстада аф ярцай?
Беднай Миронць кода изь старанда, ашезь арьсе сяда цебярня, пади, сяс, мес сонь вихца кошярязь арьсема, стане, кода ломатть.
Пеечнемат, рахсемат, конешна, тядянц упреконза тумак восемнадцатайть мархта, — беднай Миронць аварьгодсь.
— Мезе ина, кда мон аф маштан арьсема, кода ломатть, — мярьгсь сон, нарнемок сельмоведензон.
| V |
Мезе сонь эздонза лиси? Кодама панчф тиеви тя бутонть эзда? Тя содамс аф стака инголькиге. Эряйхть минь велеванк пяк сидеста тяфтама уднвительнай явленият. Ванат, шабась ёмланястокиге марнек аф стама, кодапт ломаттне: и якай лиякс, и шамац, и шяяренза, и валонза, и тевонзовок лият. А кда сави тяфтама шабати эрямс веконц велень тесна лапаз ала, сяда кели опытфтома, сяда оцю знанияфтома, мзярда ёмластокиге аф шарьхкоди тядянза-алянза ушедыхть прянц пяшкочнема сембоса стане, кода и ломаттнень, то тейст и матови эздонза оригинальностти врожденнай способностец; шабать сембе тевс аф путови и люпштаф способностенза [ 68 ]пужихть и коськихть нинге зародышса, а ёмла Миронть эзда лиси кальдяв азор, — или, нинге сяда кальдяв, — аф ёнюста характеронц эрекшинц и оржашинц матрамасна вятьсазь аф парс — арай сон драчункс, воражиякс, конац кармай верондама эсь привидениянзонды и кармай васькафнемост ломаттнень виде ваймот.
Но кда тяфтама шабась пови цебярь, и сембода главнайсь, аф пяк беднай алянди, конац ёрай и макссы мекольдень трёшниконц, штоба эсь иденц панжемс сельмонзон и няфтемс мирть — мезе ина сяльде? Аф арьсетяда ли тинь, што шабать судьбац арай пяк цебярькс, стамкс, кодамть ломаттне обыкновенна лувондсазь инь цебярькс! Кода ба аф тяфта! Школаса шабась кармай вишкста прязонза сявондема наукать, кармай сонь эсонза тарксема ваймонц, кода сярядись ару кожфса, и аделави стане, што содамок наукать правданц истинанзон, кармай синь ётафтомост эряфс. И ули ёмла Миронць горячай проповедникокс ся истинатненди, кандсыне синь шобда и люпштаф велень родной лапаснень алу. Ну, и учсесы сонь афи завиднай судьба! Варжасыне сон и тюрьмань стенатнень и различнай муцямань норатнень, и ломаттнень лангса ломаттнень насилияснон, а аделави стане, што или юмай коса-коса ашушиса, одиночестваса, юмафста-арафста кодазга-кодама кудботмарса или лихти тюремнай стенатнень эшксста смертельнай урмань ушеткс, конац пингта инголькиге вятьсы сонь калму, или, юмафтомок веранц святой оцю правдати, ушеды винаса марендафнема потма суксканц ёжензон маштомс. Беднай ёмла Мирон!
 This is a translation and has a separate copyright status from the original text. The license for the translation applies to this edition only.
| |
| Original: |
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse |
| Translation: |
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
This work is in the public domain in the United States because it was first published outside the United States (and not published in the U.S. within 30 days), and it was first published before 1989 without complying with U.S. copyright formalities (renewal and/or copyright notice) and it was in the public domain in its home country on the URAA date (January 1, 1996 for most countries).
This anonymous or pseudonymous work is also in the public domain in other countries and areas where the copyright term of anonymous or pseudonymous works is 82 years or less since publication.
Public domainPublic domainfalsefalse |
