Колхозонь эряф/1940/08/Международнай антивоеннай шись

←Валпрякс

Колхозонь эряф (1940), № 8 Август edited by Игнатьев Г. А., Дурнов Ф. С. Международнай антивоеннай шись

Волянкса→

Колхозонь эряф. Эрь ковонь литературно-художественнай и общественно-политическяй журнал. Мордовскяй Советскяй писателень союзть органоц. — № 8 Август 1940. — с. 3—5

 

МЕЖДУНАРОДНАЙ  АНТИВОЕННАЙ  ШИСЬ

Августть 1-це шинц — 1914—1918 кизонь мировой империалистическяй войнать ушетксонц шинц — сембе масторонь трудящайхне ётафнесазь империалистическяй войнатнень каршес, капитализмать каршес, мирть инкса, социализмать инкса тюремань шикс.

Войнатне — капитализмать неизбежнай спутниконза. Капиталистическяй странатне сембе эсь историяснон пингста вятсть захватническяй войнат, порабощандамок сяда лафча нароттнень, шарфнемок синь колониальнай рабокс.

Чужой масторхнень грабамасна, колониятнень инкса, од рынкатнень инкса тюремась — капиталистическяй странатнень ёткса аф мирендафтови противоречиятнень основасна и синь ётксост ламоц войнатнень туфталсна.

Противоречиятне капиталистическяй странатнень ёткса сембода пяк оржакстомкшнихть империализмань эпохаста, мзярда сембе мирсь явф ни инь оцю империалистическяй хищникнень ёткова и келемсь синь ётксост упорнай тюрема мирть одукс явоманц инкса.

Империалистическяй войнатне сембе эсь сталмоснон мархта прашендыхть рабочайхнень и крестьяттнень лангс. Сембонди содаф, кодама пяк оцю бедствият кандсь трудящайхненди 1914—1918 кизонь империалистическяй войнась. Сонь эсонза участвондасть 33 государства, конатнень населениясна ульсь 1,5 миллиард ломань. 74 миллион трудящай империалисттне путнесть ружья алу. Войнась мольсь 4 кизот 3 кофт и 26 ши, и фалу тя пингста кели ляйкс шудесь рабочайхнень и крестьяттнень версна. 10 миллионда лама ульсь шавф, 20 миллион калечендаф. Войнась тись нищета, вачаши, эпидемият, конат усксть калму лама кемотть миллион ломанень эряф. Войнась тись оцю разруха, конац, эсь пингстонза, кандсь трудящайхненди од испытаният.

1914 кизонь войнаса Англиясь стреминдась тапамс мировой рынкастонь эсь опаснай конкурентонц — Германиять. Французскяй капиталисттне стреминдасть фатямс Германиять кядьста Саарскяй областть и Эльзас—Лотарингиять, конат ульсть козят уголень и кшнинь мархта. Оцязоронь Россиясь стреминдась явомс Турциять, фатямс Константинопольть. Германиясь ёрась нельгомс колоният и мода Англиять, Франциять, Россиять и лиятнень кядьста. Эрь воявай странась кирдсь захватническяй цельхть, конатнень эса ульсть заинтересованайхть империалистическяй хищникне.

Империалисттне 1914 кизонь войнать лама кизот аноклазь пяк салава трудящайхнень эзда. Мзярда жа ушедсть военнай действиятне, синь кармасть ляпиякшнезь явсема „отечествать араламанц“ колга. „Отечествань аралама“ лозунгса буржуазиясь и II Интернационалста сонь приспешниконза визьксфтома васькафнекшнезь рабочайхнень и крестьяттнень сембе воявай странатнень эса.

Мирса единственнай рабочай партиякс, конац лихтезе лангу империалистическяй войнать истиннай смысланц, разоблачил сонь крвястиензон и няфтсь трудящайхненди империалистическяй войнатнень каршес тюремань ки, ульсь большевикнень партиясна. Штоба педа-пес машфтомс войнатнень, тонафтсь Ленин, эряви машфтомс капитализмась. „Шарфтомс империалистическяй войнать гражданскяй войнакс“, лиякс мярьгомс шарфтомс оружиятнень, конат ащихть рабочайхнень и крестьяттнень кядьса, буржуазиять каршес и ёрдамс сонь властенц — вов лозунгсь, конань кандозе Ленинонь—Сталинонь партиясна массатненди. Большевиконь партиять руководстванц вельде минь странань рабочай классь 1917 кизоня ётафтозе эряфс империалистическяй войнаста революционнай лисемать.

Сембе масторлангонь империалисттне и синь приспешниксна юватькшнесть эрь ки лангса, што 1914 кизонь войнась ули мекольдень войнакс. Но ашезь ёта и кафта кемотть кизовок, кода империалисттне тага ушедсть война, ёрямок нароттнень од бедствияс.

Колма кизода инголе Япониясь ушедсь война Китайть каршес. 1939 кизоня Англиясь и Франциясь ушедсть война Германиять каршес. 1940 кизоть ушетксонцты тя аф справедливай грабительскяй войнати империалисттне кенерсть таргамс земной шарть населениянц пяледа ламонц. Империалисттне сембе вийса ёрайхть крвястемс од мировой империалистическяй бойнянь пожар. Нагла васькафнемок народть „свободать“, „демократиять“ инкса „тюремань“ лицемернай лозункнень мархта, тевса жа империалисттне ушедозь войнать колониятнень инкса, мировой господствать инкса, сырьянь источникнень и сбытонь рынкатнень инкса. Кодама тянь значенияц империалисттненди, няеви сяда товолдонь кепотькснень эзда. Англиясь, конань населенияц пачкотькшни 47 миллионц, кирди тяни эсь кядь алонза 480 миллион населения мархта колоният. Францияса сембоц эряй 42 миллион ломань, а французскяй колониятнень эса — 70 миллион. Тя максси английскяй и французскяй капиталисттненди возможность эксплоатировандамс, Англиянь и Франциянь рабочайда башка, нинге сядот миллиотт порабощеннай ломань.

Единственнай странакс, кона вяти империалистическяй войнатнень каршес последовательнай тюрема, ащи минь могучай социалистическяй родинаньке — СССР-сь.

Минь великай родинаньке — рабочайнь и крестьянонь социалистическяй государствась — ащи миронь могучай оплотокс сембе мирса.

Сембе масторонь трудящайхне, сембе передовой человечествась няи СССР-ть эса миронь честнай поборник, конац разоблачандакшнесыне войнань истиннай крьвястихнень и провокаторхнень, кодама ба „идеологическяй“ щамса синь афольхть наряжакшне.

Сембе масторонь рабочайхне и крестьяттне най сяда пяк организовандакшневихть и пуромкшнихть сембе мирса мирть инкса, войнань крьвястихнень и провокаторхнень каршес тюремань знамять алу.

Советскяй ломаттне должетт шиста шис касфнемс эсь бдительностьснон, эсь мобилизационнай готовностьснон кемокснемс Советскяй государствать обороноспособностенц, кемокснемс Якстерь Ярмиять и Якстерь Флотть, конат ащихть Советскяй Союзть мирнай политиканцты могучай опоракс.

Минь должны мяляфтомс, што Советскяй Союзть внутренняй вийнзон всемернай касомасна и сонь международнай авторитетонц кемокстамац ащихть аф аньцек священнай долгокс советскяй ломаттненди, но и отвечайхть оцю интересснонды сембе нароттнень, конат жаждуют мир и омбоце империалистическяй войнать инь курокста шумордаманц. Минь должны всемерна кемокснемс эсь могучай Советскяй государстваньконь, конац ащи сембе миронь трудящайхненди опоракс миронкса, нароттнень павазснон инкса, капитализмать эзда полнай освобождениянкса синь тюремасост.