Колхозонь эряф/1939/10/М. Ю. Лермонтов/Эряфоц

From Wikisource
Jump to navigation Jump to search
←М. Ю. Лермонтов (оглавлениясь) Колхозонь эряф (1939), № 10 Октябрь edited by Чумаков И. Ф.
М. Ю. Лермонтов. Эряфоц 		Лермонтовть творчествац. Лирикац→
Колхозонь эряф. Эрь ковонь литературно-художественнай и общественно-политическяй журнал. Мордовскяй писателень союзть органоц. — № 10 Октябрь 1939. — с. (25)27—31
 

[ 25 ]

 
[ 27 ]
М.  Ю.  Лермонтов
(125  кизот  шачемдонза   меле)

Сяда комсь ветие киза топодсь кода Москуса 1814 кизонь октябрть 15-це шистонза шачсь великай русскяй поэтсь Михаил Юрьевич Лермонтов. Сонь родителенза ульсть стариннай дворянскяй родонь, конац поэтть шачема пингонцты беднайгодсь и розарявсь ни. „Желание“ стихотворениясонза (1831 к.) поэтсь мрци эсь предканц Георг Лермонтовонь древняй замконцты; Георг Лермонтов шачсь Шотландияса, но XVII векста повсь русскяй пленц и сяда меле Россияса занцесь государственнай оцю должность. Михаил Юрьевич тя предканцты кати кодама родства няендсь испанскяй герцогть Лермань мархта, конац XVII векста ульсь крупнай государственнай деятель Испанияса. Поэтть кагодонзон эзда мушенттама воображаемай предканц портретонц, конань тяштезе Лермонтов. Лияста васьфневихть подписть „W. Zerma“. А сяс „Исповедть“ эса, „Демонть“ васень вариантсонза, „Испанцы“ драмасонза маряви Михаил Юрьевичень касф интересоц Испанияти. Поэтть аляц служась офицеркс, лиссь отставкас капитанонь чинца и кармась эряма родовой аф оцю именьянясонза Кроптовкаса Тульскяй губернияса.

Кроптовкань маластонь Васильевскяй велеса эрясть козя помещикт Арсеньефне, конат пря шнафтольхть эсь аристократизмаснон мархта. Арсеньефнень ульсь фкяня стирьсна, Мария Михайловна, конац родителензон ширде согласияфтома лиссь рьвакс беднай дворянинти Юрий Петрович Лермонтовонди.

Социальнай неравенствась ульсь туфталкс Лермонтофнень оцю семейнай драмаснонды, конац кадсь крхка слетт поэтть психологиянцты и творчестванцты. Рьвямда меле поэтть родителенза тусть Пензенскяй губернияса Тархан вели.

Лермонтовонь тядяц ульсь сятяв, аф шумбра, сентиментальнай мяльса ава. Сон сьорматкшнель чувствительнай стихт. Алянц характероц вспыльчивайль, гордайль и курок кяжиякшнель. Сон аердавсь Арьсеньефнень эзда сяс, мес нят сингорялезь сонь беднайшинц инкса и седисост афолезь кельге беднай дворянинть, конац васькафтозе сяконя стирьснон.

[ 28 ]1817 кизонь февральста кулось Лермонтовонь тядяц. Юрий Петровичень лангс нападкатне сядонга вишкомсть. Тейнза савсь тумс Тарханцта и эрямс эсь веленясонза. Юрий Петровичень и Елизавета Алексеевна Арсеньевать йоткса ушедсь лама пингонь тюрема сай пингонь поэтть воспитаниянцты правать инкса. Козя Арсеньевась, оцязоронь чиновникнень и лия влиятельнай ломаттнень мархта оцю связьснон использовандаманц вельде, нельгозе уноконц. Михаил Юрьевич идькс ульсь аф шумбра цьоранякс. Алянц и щаванц йоткса сялонкшнематне люпштазь люпштасть сонь впечатлительнай натуранцты.

Штоба пчкафтомс уноконц, щавась аф весть усксезе Лермонтовонь Кавказу, конань чудеснай природац кадсь крхка слетт шабать седис.

Стихонь сьормадома Михаил Юрьевич ушедсь рана. „Арфа Севера“ музыкальнай журналть эса 1824 кизоня ни васьфневи „Горленка“ стихотворенияц, конань окраскац похожайль поэтть тядянц поэтическяй упражнениянзонды.

Лермонтовонь васень воспитанияц и образованияц йотнесь кудвидень гувернанткатнень и гувернерхнень руководстваснон вельде. Капэ французсь кеподезе цьоранять интересонц 1812 кизонь событиятненди и Наполеононь личностенцты. Омбоце французсь Жандро шарфтозе поэтть мяленц XVIII веконь французскяй буржуазнай революцияти. Меколи Виндсон англичанинць, конац Лермонтовонди тонафнезе английскяй кяльть, содафтозе великай английскяй писательть Байрононь творчестванц, конац тись содаф влияния минь поэтоньконь творчестванцты. 1828 кизоня Михаил Юрьевич кармась тонафнема пансионца, коса вииста кармась литературать, живописть, музыкать тонафнема. Лирическяй стихонь сьормадомда башка сон работась „Черкесы“, „Кавказский пленник“, „Корсар“ поэманзон лангса. Ня поэматнень центральнай геройсна — демоническяй ломатть. Сонь геройнц эса постоянна няфневсь гордость, аердафши перьфпялень эряфти, жажда славати и величияти, духонь мятежность, замкнутость, одиночества, сембе пингонь неудовлетворенность, тревога, мезень-бди одонь вешендема, роковой пень анокс учендома.

Лермонтовонь васень пингонь поэманзон лангса ули влияниясна Пушкинонь, Байрононь, Жуковскяйнь и лия поэттнень.

1830 кизоня аделазе пансионть. 1830 кизонь произведениянза — „Люди и страсти“ [1] драмац, „Предсказание“ стихотворенияц и лиятне корхтайхть поэтть революционнай, мятежно-протестующай настроениянц колга. Сон оржаста шави крепостной правать ланга, ненавистьса корхтай тираттнень колга, инголявак азонды революциять маладоманц:

[ 29 ]

Россияв курок стама киза сай.
Оцязорть пряста сонь коронац прай...“
(„Предсказание“).

1830 кизоня Лермонтов ушедсь тонафнема Московскяй университетса, коса эста тонафнесть сай пингонь виднай общественнай и литературнай деятельхне Белинский, Герцен, Огарев. Лермонтов ялганзон йоткса ульсь сембода начитаннайсь сембе кизефкснень коряс, резкайль. Сон дивандафнезень ламоц преподавательхнень эсь знаниянзон одшиснон и крхкалмоснон мархта. Реакционнай профессорхнень эвфнезь Лермонтовонь од, революционнай взглядонза. Синь кармасть сонь преследовандамонза и меколи поэтть пульзяфтозь экзаменттнень эса.

Крепостной правати и существующай стройти Лермонтовонь аердамац сяда и сяда кассь. Сонь мяленц шарфнесы крестьянскяй восстаниятнень эпохасна.

„Странный человек“ драмасонза (1831) гневнайста пикссесы зверень кодяма кяжи помещицать, работай „Вадим“ повестенц лангса, коса няфневихть Пугачевонь руководстванц ала крестьянскяй восстаниятне.

Щаванц кошяреманзон сюнеда 1832 кизоня Лермонтов кармась тонафнема гвардйскяй подпрапорщиконь школаса. Закрытай учебнай заведениять эса тонафнесть козя дворянинонь цьорат. Од ломаттне ашесть заботя синцень умственнай способностьснон развитиянц колга. Сембе свободнай пингснон йотафнезь кутежса, пьянстваса и кельгомань похождениятнень эса. Лермонтов явсь празднайста эряй юнкерхнень эзда и вииста кармась работама сонцень поэтическяй созданиянзон лангса. Но тя средась тиезе кой-кодама сонцень влияниянц поэтт лангс. Юнкерхнень вкусснон коряс сон сьормадсь колма поэмат: „Гошпиталь“, „Петергофский праздник“ и „Уланша“.

1834 кизоня сон утфоль лейб-гвардиянь офицеркс гусарскяй полку, конац ащесь Царскяй Селоса.

Щаванц знакомстванц вельде Лермонтов получась возможность улемс высшай дворянскяй обществать эса; сон цебярьста няезе, кода пошлайста, пустойста, паразитическяйста йотафнесазь пингть и мятежно-протестующай сембе потмонц мархта аердавсь нулготькс бездельниконь эряфть эзда. Поэтть апак лотксек кассь мялец „смутямс веселостьснон синь и йордамс шамазост кшнинь стих, конац улель валонтф горечса и кяжса“.

А. С. Пушкинонь трагическяй куломац пяк токазе Лермонтовонь седиенц. Седиень керы кяжсь Пушкинонь палачензонды няфтьф „Поэтть куломац“ знаменитай стихотворениясонза. Авторсь вачкодезень позорнай столбати аеркс убийцатнень. Тя стихотворениясь нюрьхкяня пингста лама тьожянь спискаса срадсь Россиять келес. Самодержавиять кати-кодама кулхцонды пинец кучезе тя стихотворениять Николай I и сьормадсь лангозонза: „Революцияти серьгядема“.

[ 30 ]Поэтть вельксс срхкась гроза: сонь панезь ссылкас Кавказу действующай армияти. Оцязорсь надиясь, што сражениятнень пингста Лермонтов шавови. Кавказса Михаил Юрьевич васедсь тоза ссылкас паньф лама декабрист мархта, сембода пяк сон маладсь А. И. Одоевскяйть мархта, декабристтненди А. С. Пушкинонь „Послание в Сибирь“ стихотворениянцты знаменитай ответть авторонц мархта.

Поэтть щавац нолдазень тевс сембе связензон и знакомстванзон. Жандарматнень шефснон вельде нолдафтозе уноконц. Новгородса аф ламос эрямдонза меле Михаил Юрьевич меки сась Петербургу. Тя кизоня сьомадозень тяфтама произведениянзон: „Песня про купца Калашникова“, „Мцыри“, „Демон“, „Герой нашего времени“.

Щербатова княжнать мельгя якамстонза Лермонтов васедсь французскяй посланникть цьоранц Баронть мархта. Тянь мархта синь лиссть дуэльсь, конань инкса поэтть озафтозь гауптвахтав и максозь судс. Пякстама васту Лермонтовонди якась знаменитай критиксь В. Г. Белинский, конац Боткинонди эсь сьормасонза азонкшнезе васедемать:

„Аф кунара улень Лермонтовонь ширеса пякстама вастсонза и тяка весть корхтань мархтонза седи вакска. Крхка и вии духоц! Конашкава вернайста ваны сон искусствать лангс, конашкава крхка и чиста непосредственнай вкусоц изящнайти. О, тя поэтсь ули Иван Великайшка! Чуднай натурац“.

Дуэльс лисеманкса 1840 кизоня тунда Лермонтовонь омбоцеда панезь Кавказу. Оцязоронь правительствась максси секретнай сьорма: кучсемс поэтть сембода опаснай сражениятненди. Лермонтов няфни пяк оцю храбрость. Начальствась путни кизефкс тейнза наградань максомать колга, но Николай I атказакшни тя ходатайствати. Оцязорть мялецоль куроконе машфтомс омбоце Пушкинть.

Тяка кизоть Лермонтов малаткшни Одессаса французскяй консулть Гомер-де-Гелльть рьванц мархта, йону и проницательнай авать мархта. Гомер-де-Гелльть рьвац тевса тись оценка русскяй литературать эса Лермонтовонь роленцты. Эсь подруганцты сьормасонза Гомер-де-Гелль сьормадсь: „Пушкинонь куломда меле Лермонтов Россиять величайшай поэтоц... Тейне ужяль сон: сонь учсесы кальдявсь“. (Русскяй архивсь, 1887, 9 №).

Щаванц вельде Михаил Юрьевич хлопочась колма ковонь пингс отпуск. Петербургса улемстонза сон пяк энялькшнесь, штоба нолдалезь отставкас, но оцязорсь, конац няйсь Лермонтовонь эзда эстейнза опаснай враг, передовой прогрессивнай од ломаттнень думснонды властитель, атказазень сембе энялькшнеманзон и Лермонтовонь тага прважазе Кавказу пулятнень алу.

Дворянскяй обществась, конац афолезе няй поэтть, оцязорть и сонь маластонзотнень указовамаснон коряс арьсезе шавомс [ 31 ]Лермонтовонь. Дворянскяй обществась апак лотксек кармась поэтть травондамонза и арьсезе кяжень пандома кошардомс Мартыновонь. 1841 кизоня июльть 27 шистонза 7 частса илять Машукть ала Лермонтовонь и Мартыновонь йоткса ульсь роковой дуэль, конань пингста великай русскяй поэтсь ульсь шавф царизмать вернай пиненц кяденц мархта.

Поэтть ловажац несколька част валяндась валозь валы пиземть ала. Тостонь духовенствась атказась сонь калмамдонза. Лермонтовонь куломанц кулемста Николай I визьксфтома самодовольстваса мярьгсь: „Пинети пинень кулома“. Тяфта веры царизмась тись расправа омбоце величайшай русскяй поэтть лангса.

  1. ↑ Тя произведениять лемоц сьорматф немециснь кяльса.
 
 

(примечание редактора вики-библиотеки) Ссылки на произведения, перечисленные в этой статье:

Retrieved from "https://wikisource.org/w/index.php?title=Колхозонь_эряф/1939/10/М._Ю._Лермонтов/Эряфоц&oldid=855304"