Колхозонь эряф/1939/08/Плюшкинонь ширеса

From Wikisource
Jump to navigation Jump to search
Колхозонь эряф (1939), № 8 Август edited by Руськин Ф. С., Чумаков И. Ф.
Плюшкинонь ширеса by
авторсь: Гоголь, Николай Васильевич, мокшекс ётафтозе: Аф содаф (аноним)
Колхозонь эряф (Колхозная жизнь). Литературно-художественнай и общественно-политическяй журнал. Мордовскяй АССР-нь советскяй писателень союзонь правлениять органоц. Лисенди кемгафтувоце кизось, ковти весть. — № 8 Август 1939 киза. — с. (17)19—29
 

[17]

Колхозонь эряф 1939-08 19стр изобр1.jpg
 
[19]
Плюшкинонь  ширеса*)[1]
(Пялькс  Н.  В.  Гоголень  „Мертвые  души“  поэмаста)
 

... Сон аф довольнайль Собакевичень поведениянц мархта. Все-таки, кода ба афоль уль, ломанць знакомай, и губернаторть, и полицейместерть ширеса няендсть фкя-фкянь, а тись кода йофси чужой ломань, аш мезенксонга сявсь ярмакт! Мзярда бричкась лиссь пирьфста, сон варжакстсь фталу и няезе, што Собакевичсь нинге сембе ащесь крылец лангса и, кода няевсь, ванондсь, арьсемок содамс, кона шири туй инжись.

„Подлец, мянь тянимс нинге сембе ащи!“ — мярьгсь сон пейнь пачк и мярьгсь Селифанонди, штоба алашатнень шарфтомс крестьянскяй куднятнень шири, тумс стане, штоба афоль няев экипажсь господскяй пирьфть ширде. Сонь мялецоль сувамс Плюшкинонь шири, конанц ломаненза кулсесть, кода корхтай Собакевичсь, каруфнень лаца, но ашель мялец, штоба Собакевичсь содаль тянь колга. Мзярда бричкась ульсь ни веле песа, сон эсь малазонза серьгядезе васенце мужикть, конац коста бди ки лангста кеподсь пяк эчке шочка и кандозе сонь эсь лафту лангсонза, кода аф сизси панжав, эсь кудозонза.

„Эй, сакалу аля! а кода тяста йотамс Плюшкинонь шири, стане, штоба аф йотамс господскяй кудть вакска?“

Алясь, кода няевсь, ашезе сода мезе азомс.

„Мес мля, аф содасак?“

„Аф, аф содаса, барин“.

„Эх, тон! А нинге шяярьхне шаржиясть ни! Аф содасак скрягать Плюшкинонь, сянь, конац ломанензон кальдявста аннесыне?“

„А! панксуть, панксуть“, ивадсь алясь...

Мзярс Чичиковсь арьсесь и эсь пачканза пеетькшнесь прозвищать лангс, конанц Плюшкинонди максозь алятне, сон ашезе путарда кода пачкодсь лама куд и лама ульця мархта оцю велеть кучкас. Но тянь сон курок шарьхкодезе, мзярда сонь бричкац эрьхтевсь шуфтса ацаф кити, конань ваксс йофси аш кода путомс кевса ацаф ошень кить. Ся шочкне, кода фортепьяннай клавишатне, кепсесть то вяри, то алу и ки ланга молись, конац кальдявста ваны эсь мельганза, или тапсезе шовоненц и эзонза лисендсь поколь, или конязонза тиендевсь сенем пятна, или жа эсь пейнзон мархта пяк сярядиста сускондозе сонцень жа кяль прянц. Кодама бди пяк таштомфши сон няйсь велень сембе стройкатнень эзда: кудонь шочкне равчтольхть и ташттольхть: лама куд прятне варяфтольхть, кода сюфтепт, кой-конатнень пряс лядондсь аньцек вярде конексь, да бокова улсть ирьхксокс ащи слегат. Можна арьсемс, бта синць азорхне лункфнезь синь эздост дранть и тёсть, думандамок, и конешна лац, што пиземть пингста кутт аф вельхнихть, а мани пингста тяфтаконга аф кольгихть, гуляндакшнемс сонь эсонза аш месть, мзярда ули простор и кабаксонга, и оцю ки лангса, лиякс мярьгомс — коса мяльце. Куднятнень вальмасна гляньцекфтоптольхть, кой-конат паннефтольхть лоскодса или суманьца; крышатнень ала перила мархта балконнятне, конатнень афоле содасаськ мезенди тиендьсазь кой-кона русскяй куттнень эса, ширемсть и нльня аф азондомшка равчкодсть. Куттнень фталга лама вастова рядова-рядова ульсть сьоронь оцю капат, конат марафт, кода няеви, кунара; [20]синь тюссна похожаель сире, кальдявста плхтаф кирпицень тюсть лангс, синь пряваст кассь всякай дрянь, и фкя бокса нльня кассь кустарник. Сьорось, кода няеви, ульсь господскяй. Сьоронь капатнень и калада куд прятнень фталда чистай воздухть эса няевсть и кяшендевсть то види, то кержи ширде, сянь коряс кода шарондсь бричкась, ряцок ащи велень кафта церькафне: шуфтонь калада церькавсь и кевоннесь, конань стенанза тюжат, пяшксет пятнада и лазонфт. Пяльксонь-пяльксонь кармась няевома господскяй кудса и тоса сон кармась няевома марнек ся вастса, коса сязевсь куттнень рядсна, и синь вастозост пустырькс лядсь пересь или капста вастсь, конац пирьф алня, кой-кона вастова синнеф пирьксса. Кодама бди пялес кулоф инвалиткс ванць тя кувака, пяк кувака страннай замоксь. Кона вастса сон ульсь фкя этажень, кона вастса кафта этажень; равжаза крышать лангса, конац аф сембе вастова надежнайста кяшендезе сонь сирешинц, карань каршек ащесть кафта бельведерхт, кафцьке ширемсть ни, лангсост аш краска, конац мзярда бди вельхнезень синь. Васток-васток илежкшнесть кудть стенанзон штукатуркаснон решеткасна, и, кода няеви, стенатненди пяк сатсь всякай ненастьятнень, пизепнень, варматнень и сьоксень полафневи погодать эзда. Вяльмятнень эзда панжадотольхть аньцек кафттне, лядыксне кяшфтольхть ставняса или нльня шавфтольхть доскаса. Но и ня кафта вальмятневок пялес сокорхтольхть; фкять эзда няевсь сахарнай сенем кагодста петфтаф треугольник.

Сире, оцю, кудть фтала ащи садсь, конац лисенди велеть тона пес и тоса юмсесь паксяти, тишеда пяшксесь и дикайготфсь, кода бта ськамонза свежайгофнезе тя оцю велеть и сон ськамонза ульсь живописнай эсь картиннай опустениянц мархта. Свободаса виюста касф шуфттне менельти ванцть фкя-фкас токаф сянгяре туцякс ащи и либорди лопав пряснон мархта. Келуть пряфтома акша оцю стволоц, конанц синдезе бурясь или атямсь, кепсесь тя туста сянгярять эзда и круглайготкшнесь воздухть эса, кода правильнай мраморнай, пиндолды колонна; сонь косой, оржа пе синьфоц, конац ащесь прянц вастс, ловкс ащи акшенц эса равчкоткшнесь кода вазь или равжа нармонь. Комлясь, конац алга ашкодозень бузинань, пизелксонь и вирь пяштексонь кусттнень и конац сяда меле таргавсь сембе частоколть прява, кеподсь вяри и пяле видева ашкодозе синтьф келуть. Мзярда сон пачкодсь пяле видезонза, сон тоста нюрьгсь алу и ушеткшнесь ни лия шуфттнень пряс кунцема или жа нюрьгсь воздухть эса, пуроптомок марняс эсь шуваня и фатни крючоконянзон, конатнень тьождяста тарфнезень вармась. Кой-кона вастова разнай шири тушендсть шиса валдоптф сянгяре ситьксне и няфнезь синь йотксост апак валдоптт крхка вастть, конац няевсь кода шовда курга, сон марнек вельхтяфоль цильфса, цють-цють няевсть сонь шовда потмакссонза: таргави тяйня кинясь, срафтф перилатне, ширемф беседкась, исать унду, дряхлай стволоц, шаржу чапыжниксь, конац исать шочконц фталда туста щетинакс лифтезень лопанзон и тарадонзон, конат коськсть страшнай глушть сюнеда, шорявсть и ашкорявсть и, меколи, ушторть од тараткац бокста кувалгофтозень эсь сянгяре лопанзон — кядь лапшензон, конатнень эзда фкять алу кати кодане яцесь шись и тиендезе сонь вдрук пачк няевикс и толкс палыкс, конац пиндолдсь тя туста шовдать эса. Ширеса, мянь садть крайса, несколька сери поюфне, конат эсь серьснон мархта сяда оцюфт лиятнень коряс, эсь ичкоздень серьснонды кепсесть варсиень оцю пизот. Синь эздост кой-конатнень утяф и аф йофси явштф тарадсна нюрьгсть алу марса эсь коськф лопаснон мархта. Лиякс мярьгомс, тяса сембе ульсь цебярь, тяда цебярьста аф арьсеви аф природати, аф искусствати, но кода эряй аньцек эста, мзярда синь шоворихть марс, мзярда ломанть пяк оцюста карьхцяф, лияста зря карьхцяф, трудонц ланга йотай эсь окончательнай резецонц мархта природась, йордасыне стака массатнень, машфтсы грубайста маряви правильностть и нищенскяй варятнень, конатнень пачка няеви, апак кяшть, штада ащи планць, и максы чуднай лямбе семботи, мезсь тиевсь [21]размереннай чистотать и опрятностть кельмонц эса.

Мзярда шарсь весть или кафксть, минь геройньке тифтедсь ни мянь кудть инголи, конац тяни няевсь нинге сяда печальнайкс. Сянгяре куштафсь вельхтязень ни кунардонь шуфттнень перяфть и ортатнень эзда. Лия строениятне: людскойхне, утопне, похаряпне, конат каладома лангсот, пяшкотькшнезь пирьфть; синь вакссост види и кержи шири няевсть ортат лия пирьфненди. Сембось корхтась, што тяса мзярда бди хозяйствась мольсь пяк оцюста, и сембось ванць тяни пасмурнайста. Мезевок ашезь няев, конац живолгофтольхце ба картинать: аф панчсеви кенкшт, аф костовок лисенди ломатть, аф кудонь кодамовок живой хлопочамат и заботат! Аньцек панжадотольхть ськамост главнай ортатне, и то сяс, мес сувась аля рогожаса вельхтяф пяшксе крандазса, конац няфтсь пря кода бта нарошна тя кулоф вастть живолгофтоманц инкса: лия пингоня синге улельхть сьолкфт ба йофсикс, сяс мес кшнинь петлять эса нюрьгсь оцюдонга оцю замок. Фкя строениять тейста Чичиковсь курок няйсь кодама-бди фигура, конац кармась сялондома крандазса саф алять мархта. Кувать тейнза ашезь содав, кодама полонь ульсь фигурась: ава или аля. Сонь лангсонза лангань щамсь ульсь йофси афопределеннай, пяк похожай авань копотть лангс, прясонза колпак, кодапт каннихть велень дворовай аватне, аньцек ськамонза вайгялец тейнза марявсь цютькяня эчкокс, кодапт аф эряйхть авань вайгяльхне. „Ой ава!“ арьсесь эсь пачканза сон и эстакиге прибавазе: „Ой аф!“ „Конешна ава!“ меколи азозе сон, мзярда цебярняста ванозе. Фигурась стане жа Чичиковонь лангс ванць цебярьста. Няевсь, бта инжись авати ульсь дивакс, сяс мес сон ванондозе аф аньцек сонь, но и Селифаноньге, алашатненьге, ушедомок пулоста и мянь нярезост молемс. Авать каркс эземсонза нюрьги панжематнень коряс и сянь коряс, што сон алять сюцесь сатомшка аф цебярь валса, Чичиковсь арьсезе, што тя ключница.

„Кулхцонтт, авакай“, азозе сон, бричкаста лисемок, „коса баринць?“

„Аш кудса“, Чичиковонь корхтаманц сязезе ключницась, кизефксть пенц апак учсек, и сяда меле, минутань йотамда меле, прибавазе: „а мезе тейть эряви?“

„Тевозе ули“.

„Архт комнататненди!“ азозе ключницась, сонць шарсь и няфтезе тейнза почфса ваденьф копоренц, конань эса сяда алува ульсь оцю варя.

Сон сувась шовда, кели кудинголи, конань эзда яфодсь кельмось кода матфста. Кудынгольде сон повсь комнатав, конац станежа шобдаль, но цютькяня сонь валдопнезе кенкшть алда кели лазфста лисенди валдсь. Мзярда панжезе ся кенкшть, сон меколи тифтедсь валдти и дивандась беспорядкать лангс, конань сон няезе. Няевсь, бта кудса штайхть киякснень эса, и сей аф лама пингс маразь сембе мебельть. Фкя шрать лангса ульсь нльня синнеф стул и, сонь вакссонза, лоткаф маятник мархта частт, маятникти котфонь кодай унжась таргась ни унжань котф. Тоса жа ащесь сире сия и графинчиконя и китайскяй фарфор мархта шкап, конанц бокоц нежетьфоль стенати. Бюроть лангса, конац вельхтяф перламутнай мозаикаса, но конац вастонь-вастонь пяярсь ни и вастозост лядсть аньцек клейда пяшкотьф тюжя жолапкат, ащесть лама всякай аф эрявикс паршихть: мелкайста сьорматф кагодонь марня, конац вельхтяф алня мархта мраморнай сянгярьготф пресса, кодама бди сире книга якстерь обрез мархта кедень переплетса, вирень пяштешка марнек коськф лимон, креслань синтьф ручка, кодама бди жидкость и колма кару мархта рюмка, конац вельхтяф сьормаса, сургуч пакшкя, коста бди кепотьф лоскод пакшкя, мациень кафта долгат, конат ваденьфт черниласа, коськт бта чахотка урмаста, йофси тюжалготф пейнь чистендама, конань мархта азорсь, может быть, сярхксесь пейнзон эса нинге Москуть лангс француснень нашествиядост инголе.

Стенатнень эзга пяк теснаста и кода повсь повфнефтольхть несколька картинат: кодама бди сражениянь огромнай барабан мархта, колмужеса шляпаса ивади солдат мархта и вайси [22]алаша мархта глянцекфтома тюжалготф кувака гравюр, конац путф шуваня бронзовай китькскя мархта и ужева бронзовай жа кружоконя мархта якстерь шуфтонь рамати. Сонь вакссонза ряцок пяле стена занцесь огромнай равчкотф картинась, конац сьорматф маслянай краскаса и няфнесь цветокт, фруктат, керьсеф арбуз, тувонь пря и яксярга, конац нюрьгсь алу прят. Потолокть кучка видестонза нюрьгсь котфонь кяскавс ашкотф люстрась, конац пульть эзда тиевсь похожайкс парьхциень кокононь лангс, конань эса ащи сукссь. Комнатать ужеса кияксти марафоль мар сятнень эзда, конат сяда грубайхть и конат аф достойнайхть ащемс шрать лангса. Мезе именна ульсь ся марть эса, содамс трудналь, сяс мес сонь лангсонза сяшкава ламоль пульда, што кажнайть кяденза, конац синь токафнезень ся марти, арсесть похожайкс перчатка лангс; сембода няевиста тоста лисендсь шуфтонь каймоть синтьф пяльксоц и кямонь ташта подошвась. Ашель кода ба азомс тя комнатаса живой существать тяса эряманц колга, кда ба сонь тяса эряманц афольхце няфне шра лангса сире, таштомф колпаксь. Мзярс сон ванондозе сембе тя страннай убранствать, панжевсь боковой кенкшсь и сувась самай ся ключницась, конанц сон васьфтезе пирьфса. Но тяса сон няезе, што тя сяда пяк ульсь ключник, чем ключница; ключницась, васендакиге, аф нарсесы сакалонц, а тя, мекеланкт, нарсесы и, кода няевсь, пяк шуроста, сяс мес щеканц алуда пяльксонц мархта марнек улоц похожаель кшнинь проволокаста тиф скребницать лангс, кодамса чистендакшнесазь кардса алашатнень. Чичиковсь, конац шаманц тиезе кизефтикс, аф кирдезь учсезе, мезе йорай азомс тейнза ключниксь. Ключниксь сонць учсь, мезе йорай азомс тейнза Чичиковсь. Меколи Чичиковсь, конанц дивандафтозе тя страннай аф корхтамась, арьсезе кизефтемс:

„Коса мля баринць? Кудса, што ли?“

„Азорсь тяса“, азозе ключниксь.

„Коса ина?“ тага кизефтезе Чичиковсь.

„Месть, алякай, сокорат, што ли?“ азозе ключниксь. „Эхва! А вдь азорсь монан!“

Эста минь геройньке аф эсь воля потась фталу и варжакстсь сонь лангозонза цебярняста. Тейнза сашендовсь няемс аф кржа всякай лаца ломатть, нльне стапт, кодапт, пади, вестевок аф сави няемс тейнек морафтыть мархта; но тяфтама нинге изь няйнде. Шамасонза ашель мезеньге особеннай; сон ульсь пцтай стама жа, кода лама худощавай атятнень, аньцек улоц лисьфоль пяк инголи, сяс сон эрь разня должналь кяшемс сонь руцяняса, штоба аф вадемс сельгса; йомла сельмонянза нинге ашесть мад и оцюста касф сельмекунонзон ала шарондсть кода шеерхт, мзярда, шовда варяснон эзда лифтемок оржа нярьняснон, оржаста кулхцондозь и усаснон шерьфнезь, синь ванондыхть, ашезь кяш ли козовок катось или озорник цьоранясь, и подозрительнайста никссесазь сонцень воздухть. Сяда замечательнай ульсь сонь нарядоц: кодамовок средстваса и старанияса ашель кода содамс, мезьста кочкафоль сонь халатоц: ожанза и лангань поланза сяшкава пяньгихтельхть и пиндолдсть, што похожайхтельхть юфть[2] лангс, конанц эзда стакшнихть кямот; фталонза кафттнень вастс нутолдсть ниле полат, конатнень эзда пакшень-пакшень нюрьгсть вататне. Кргазонза стане жа сотфоль мезе бди стама, конанц ашель кода содамска: цюлка ли, каркс ли, или набрюшник, аньцек коданга аф галстук. Лиякс мярьгомс, кда ба Чичиковсь васьфтельхце сонь тяфта наряжафста костовок церькав кенкшнень каршеста, то, улема, максоль ба тейнза серень грош. Сяс эряви азомс минь геройньконь честьс, што сонь седиец ульсь нужань маряй, и сон коданга афоль кирде, штоба ашу ломанти аф максомс серень грош. Но минь ингольнок ащесь аф нищай, минь ингольнок ащесь помещик. Тя помещикть ульсть тьожяньда лама ваймонза, и кивок тяряфтоль ба мумс киньге ширеста тняра кшида сьороса, почфса и проста капава, кинь ба кладовойнза, утомонза и сушиланза тяшкава улельхть ба пяшксет тняра котфса, сукнаса, тиф и апак тик уча [23]кедьса, косьфтаф калса и всякай перень сьороса, или лия ярхцампяльса. Варжакстоль ба кивок сонь рабочай пирьфозонза, коса аноконди аноклафтольхть всякай вирь и посудат, конат вестевок апак путтольхть тевс — сон арьсель ба, ашезь пов ли кодавок Москуву щепной пирьфи, коза эрь шиня яксихть эряскоды маткатне и авосьне мельгаст моли эсь кухаркаснон мархта эсь хозяйственнай запасснон тиема, и коса пандокс акшелготкшнихть шуфтонь всякай шитай, иньзетьф и кодаф паршихть: боцькат, пачк керьф боцькат, арнянят, лагутт, кургоня мархта и куркфтома жбатт, оцю кружкат, кептернят, путнемс шуфтонь коробкат, коза аватне путнесазь моцькаснон и лия всякай мелкай паршиняснонь, шуваня мянтьф поюста коробкат, кодаф куйгорста буракт и лама лият, конат эрявихть козя и беднай Русть эряфонцты. Мезенди, видеть азомс, эрявсть Плюшкинонди тняра изделиятне? Синь марнек эряфонц пингста афольхть сав путомс тевс нльне кафта тяфтама имениятнень эса, кодаптольхть сонь имениянза, — но тейнза и тявок ульсь кржа. Улемок афдовольнай тянь мархта, сон нинге эрь шиня яксекшнесь эсь веленц ульцянзон эзга, варжакснесь седнятнень алу, перекладинатнень алу и сембонь, мезе повондсь кядь алонза: ташта подошватнень, авань лоскоттнень, кшнинь эскнень, сьовонень церяпкять, — сембонь каннезень эсь ширезонза и марсезень ся марти, конанц няезе Чичиковсь комнатать ужеста. „Ванода, калонь кундайсь тусь ни охотас!“ корхтасть алятне, мзярда няендезь сонь, добувама молить. И афкукс, сонь мельганза ашель мезенди тяемс ульцять: кда йотай офицерсь юмафтозе шпоранц, ся шпорась эстакиге тифтеди няйф марти; кда авась кодавок келепнесы кургонц эши лангса, юкстасы ведарканц, сон сявондезе и ведарканцка. Сияк азсаськ, што кда алясь, конац содазе эсь паршинц, эстакиге тянь лифнезе лангти, сон ашезь спорьсе и эстакиге салаф паршить мрдафнезе меки; но кда паршись повондсь марти, эста мезевок аф тият: сон озондсь, што паршись сонне, сонь рамазе эста-эста, сянь-сянь кядьста, или лядсь атянц эзда. Эсь комнатасонза сон киякста кепсезень сембонь, мезе няендсь: сургучкять, кагод листкять, долганять и сембонь тянь путнезе бюроть или валмять лангс.

...Несколька минутат ни ащесь Плюшкинць, фкявок валнянь апак аст, а Чичиковсь нинге сембе не мог ушедомс корхтамать, сяс мес ванондсь кода сонцень азорт лангс, стане жа и сятнень лангс, мезе ульсь сонь комнатасонза. Кувать тейнза ашезь думандав, кодама ба валса азомс сей самань туфталонц колга. Сон йорась ни корхтазевомс стане, што мзярда кулезень сонь цебярь ширензон и цебярь ваймонц, лувозе долгонди уважениянц няфтеманц инкса самс ширезонза, но стрянондась и марязе, што тя пяк ни зря. Сон ширем сельмот нинге весть варжакстсь сембонь лангс, мезе ульсь комнатаса, сон марязе, што „цебярь ширензон и цебярь ваймонц“ валхне пяк лац можнат полафтомс тяфтама валса: экономия и порядок; и сяс, мзярда тяфтане одукс тиезе эсь корхтаманц, сон азозе, што мзярда сон кулезе, кодама лац сон вятьсы экономиянц пяк цебярь имениянь управленияц, сон лувозе долгонди знакомондамс мархтонза и самс ширезонза. Конешна, можналь ба мумс сяда цебярь туфтал, но эста мезевок лия изь са прязонза.

Тянь каршес Плюшкинць мезе бди мотерьгодсь пейнзон пачк, сяс мес сонь пейнза ашельхть, мезе именна азсь, аф содасаськ, но, улема, смыслац тяфтамоль: „А шяйтанць ваткалензе ба тонь сей самацень инкса!“ Но сяс мес миньцонок инжикс улемась и инжиень примсемась станя ладяф, што и скрягатинге аш кода йотамс сонь закононзон вельф, то сон эстакиге прибавазе сяда шарьхкодевиста: „Пяк эняльдян озамс!“

„Мон кунара аф няендян инжихть“, азозе сон: „да видезень азса, синь эздост кржа няян цебярьда. Нолдасть вельф аф цебярь обуця яксемс фкя-фкянь шири, а хозяйствасост упущения... да и синь алашаснон нинге аннить тишеда! Мон кунара ни обедань, а монь кухнязе алняня, пяк кальдяв, и трубацка пцтай йофси каладсь, ушедсак уштомонза, нинге пожар тият“.

[24]„Вов коданя!“ Эсь пачканза думандась Чичиковсь, „пара, што Собакевичень ширеса мон сивонь ватрушка, да боран бока пакш“.

„И тяфтама сквернай анекдотсь, што фкявок тише пакшкя марнек хозяйствастон аф муят“ сяда тов корхтась Плюшкинць. „Да и афкукс, коданя сонь ванфцак? модадон кржа, алятне нолат, работамаснон аф кельгсазь, думандайхть, коданя ба кабаку молемс... сяконь и ватт, сиреденьбяльхть анцема туят!“

„А тейнь азондозь“, скромнайста тись замечания Чичиковсь, „што тонь тьожяньда лама ваймодот“.

„А кие тянь азондозе? А тон ба, матаняй, сельголеть ба сянь сельмос, кие азондозе тянь! Сон рахсеманц кельгсы, содаф, йорась шутендамс лангсот. Вов, корхтайхть, тьожянь ваймот, а ушеттака лувомост, вов и мезевок аф лувови! Мекольдень колма кизотнень проклятай пси урмась кулофтсь лама аляда монь ломаннень эзда“.

„Мезе корхтат! и лама кулофтсь?“ ивадсь Чичиковсь, няфтемок прянц, што синь тейнза ужяльхть.

„Да, сявсь лама“.

„Мон йораса кизефтемс, а мзяра числаса?“

„Кафксоньгемоньшка“.

„Неужели?“

„Аф карман васькафнема, матаняй“.

„Мон йораса нинге кизефтемс: вдь ня ваймотнень, мон арьсян, тон лувондсайть мекольдень ревизиять эзда сявомок?“

„Тя улель ба нинге цебярь“, азозе Плюшкинць: „да кальдяв ся, што сяда меле кочкави сяда комозьшка“.

„Афкукс? мянь сяда комозьшка?“ ивадсь Чичиковсь и дивандамать эзда нльня цютькяня панжезе кургонц.

„Мон сирян ни, матаняй, штоба васькафнемс: сизьгемонце кизось эрян!“ азозе Плюшкинць. Сон, кода няевсь, обижавсь Чичиковонь тяфтама пцтай кеняртьф, ивадеманц лангс. Чичиковсь шарьхкодсь, што афкукс аф пара тяфтане ширеста ваномс чужой горять лангс, и сяс эстакиге куфкстсь и азозе, што тейнза синь пяк ужяльхть.

„Да вдь синь ужяльдемаснон зепозон аф путсайне“, азозе Плюшкин. „Вов монь вакссон эряй капитан, шайтаттне содасазь коста сон эвондась, корхтай, бта тейнь родняшире: оцяй, оцяй! и кядезеньге палсесы, а кодак ушеды валса ужяльдемон, кеподи тяфтама вой, што хоть пилетнень пандыть. Марнек шамац якстерь: содаф, винада симомда аф лоткси, куломс тянь кельгсы. Улема, карьхцязень ярмаконзон, офицеркс служендазь, или театральнай актрисась васькафтозень, вов тяни сон и валса ужяльни эсон!“

Чичиковсь старандась азомс, што сонь ужяльдемац аф капитанть ужяльдеманц лаца и што сон аф шава валса, а тевса анок няфтемс тянь и, аф кадондомок тя тевть сяда тов, эстакиге сон лифтезе эсь желаниянц сявомс эсь лангозонза обязанностть пандомс дацять сембе крестьяттнень инкса, конат кулость тяфтама несчастнай случайхнень эзда. Предложениясь, эряви мярьгомс, йофси дивандафтозе Плюшкинонь. Сон, келептемок сельмонзон, куватьс ванць сонь лангонза и меколи кизефтезе: „Да тон, матаняй, ашеть служенда ли военнай службаса?“

„Аш“, сатомшка лукавайста отвечась Чичиковсь: „служендань статскяй службаса“.

„Статскяйса?“ оду кизефтезе Плюшкинць и кармась трванзон тарфтома бта мезевок ярхцась. „Да кода станя? Вдь тя эстейть арай убыткакс?“.

„Тейть паронь тиемать инкса анокан кирдемс убыткавок“.

„Ах, матаняй, ах, монь ужяльдиезе!“ ивадсь Плюшкинць, сонць кенярдемать эзда ашезе путарда, кода сонь шалхкстонза пяк аф лац лиссь табаксь, конац ульсь туста кофеякс, и халатонц поланза, сяс мес панжевсть, няфтезь платьянц, конац аф пяк приличнай ванондомс. „Вов кенярьфтить атять!“ Ах, шкабавас! Ах, монь святительне!“ Сяда меле Плюшкинонь нльня корхтамкшкацка ашель. Но изь йота и минутавок, кода тя кенярдемась, конац вдрук эвондась сонь шуфтоннекс ащи шамазонза, стане жа вдрук йотась, бта сон йофси ашель, и сонь шамац тага кармась ванома заботливайста. Сон нльня шаманц нардазе руцяняса, ашкодозе сонь комоконяс и кармась йотафнемонза сонь вярде трванц ланга.

„Коданя мля, йоратя кизефтемс тонь, [25]штоба аф кяжияфтомсат, тон эрь кизоня синь инксост кармат пандома даця? и ярмакнень кармат паннемост тейнь или казнав?“

„Да, минь вов коданя тисаськ: минь синь лангозост тихтяма купчай крепость, кода бта синь ульсть шисот и бта тон мийть синь тейнь“.

„Да, купчай крепость...“ азозе Плюшкинць, арсезевсь и тага кармась трванзон мотерьфтема. „Вдь вов тиемс купчай крепость — сембе эрявихть тиендемс карьхцть. Приказнойхне сяшкава бессовестнайхть! Инголи сиянь полтинникта да кяскав почфта тевцень тиелезь, а тяни кучт целай усф ямкс, да якстерь каготкя прибавак, тяшкава ярмаконь кельгихть! Мон аф содаса, кодане кивок аф шарфты тянь лангс мяль. Ну аволь ба тейнза ваймонь аралай вал! Вдь валть мархта можна кинь повсь корхтамс. Кие мезе тяда корхта, а ваймонь аралай валть каршес аф судардат“.

„Ну, тон, монь койсон, судардат!“ эсь пачканза думандась Чичиковсь и эстакиге азозе, што сонь кельгоманц сюнеда сон анок эсь лангозонза сявомс нльня карьхцненьге купчайть инкса.

Мзярда кулезе, што нльне купчайнкса карьхцненьге сявсыне эсь лангозонза, Плюшкинць арьсезе, што инжись должен быть йофси шава пря и аньцек няфни пря, што сон служендась статскяйса, а сяда виде сон ульсь офицер и яксесь актеркань мельге. Но тяконь пингста тейнза кодавок ашель кода кяшемс эсь кенярдеманц и арьсесь всякай пархт аф аньцек тейнза, но нльне и сонь идензондыге, хоть ашезеле кизефте, ульсть ли сонь иденза или — аш. Сон молсь вальмять тейс, суронзон мархта покоргофтозе глянцекть и ивадсь: „Эй, Прошка!“ Минутада меле кулевсь, кие бди кудынголи сувась эряскодозь, кувать возсесь, тоса и стукась кямонзон мархта, тоса панжевсь кенкшсь и сувась Прошкась, кемголмувошка кизоса цьоранясь, сяшкава оцю кямоса, што молемста цють ашезень тарга синь эздост пильгонзон. Мес тяшкатольхть Прошкань кямонза, тянь можна куляксамс тяникигя: Плюшкинонь сембе дворнянцты, кудста сембонди, ульсть аньцек финц кямот, конат фалу должетт улемс кудынголе. Кажнайсь, кие терневсь барскяй покойхненди, пирьфть туркс обыкновенна яксесь кяпе, но, кудынголи сувамда меле, щафнезень кямотнень и тяфтане эвондакшнесь комнатав. Комнатаста лисемда меле кямотнень сон меки кадондозень кудынголи и тоса тушендсь тага эсь подошванзон лангса. Кда ба кивок вальмава варжакстоль сьоксень пингова и сембода пяк мзярда шовдава-шовдава ушеткшнихть лафча мороскятне, то няельхце ба, што сембе дворнясь тиендсь стама комотнемат, кодапт вряд ли тиевихть театрава сембода бойкай танцовщикти.

„Вов ватт, матаняй, кодама аф пара ломанць!“ Чичиковонди азозе Плюшкинць, сонць сурсонза няфнесь Прошкань лангс. „Глупай вдь кода шуфтсь, а тяряфтт мезевок путомс, эсткиге саласы. Ну, местема тон сать, дурак, азк, местема?“ Тяда меле сон мзярс изь корхта, конанди Прошкась отвечась станя жа аф корхтамаса. „Путк самоварть, кульсак, да вов сявк панжемать, да макск Мавранди, штоба молель кладоваи: тоса лапаня лангса ули коськши куличста, конань ускозе Александра Степановнась, штоба кандолесть сонь чай мархта симомс!.. Норавак, ков ина тон? Шава пря! Эхва, шава пря!.. Бессь тонь пилькнень эса китни, што ли?.. тон васенда кулхцондомак: коськшись ащи вяре, содаф, кольсь цютькяня, так катк сон кргасы сонь пеельса, да катк паморькснень аф йордасыне, а кандсыне саразонь кардоняв. Да тон кулхцонтт, ватт тон, тят сувсе, брат, кладовои, а то мон тонь, содасак! пикссетя келувонь тяльмоса, штоба лацкас ярхцамаце саль! Вов тяни тонь цебярь аппетитце, но штоба сон улель сядонга цебярь! Вов тяряфтт молемс кладовои, а мон ся пингста карман вальмава ванома. Тейст йофси аш кода верондамс“, сяда тов корхтась сон, сияк шарсь Чичиковонь шири, сяда меле мзярда лиссь Прошкась эсь кямонзон мархта. Сяда меле сон Чичиковоньгя лангс кармась ванондома подозрительнайста. Тяфтама необыкновеннай великодушиянь чертатне тейнза кармасть няевома афулемшкакс, и сон думандась эсь пачканза: „Вдь шяйтанць сонь содасы, можи, сон проста хвастун, кода сембе [26]ня ярмаконь зря карьхцяйхне: васькафни, штоба корхтамс, да симомс чайда, а тоса и туй ширестот!“ А сяс, штоба аф васькафтомс эсь прянц и кирдемок мяль цютькяня испытандамс сянь, сон азозе, аф кальдяв ба купчайть тиемс сяда куроконя, сяс мес кле ломанти аф верондай: тячи шиса, а ванды — кие содасы.

Чичиковсь азозе анокшинц купчайть тиемс хоть тяка жа минутаня и вешсь аньцек списка сембе кулоф крестьяттненди.

Тя озафтозе Плюшкинонь седиенц. Няйфоль, што сон арьсекшнесь мезе бди тиемс, и афкукс, сявозень панжематнень, маладсь шкафть тейс, панжезе кенкшканц и кувать сюволясь стакаттнень и чашкатнень йоткса и меколи азозе: „Вдь вов афоле муви, а монь ульсь цебярь ликернязе, кда аньцек ашезь симе! народсь кодама, эхярь ворхт! А вов аф тя ли сон?“ Чичиковсь кядьстонза няйсь графиння, конац марнек вельхтяфоль пульса, кода мярьгат кяшфоль фуфайка потмос. „Нинге покойницась урьвязе тиендезе“, сяда тов корхтась Плюшкинць: „мошенницасьключницась сонь мельганза йофси аф ваны и нльня ашезе панда, канальясь! Унжат и всякай нулготькст тоза яцесть, но мон сембе сорть ароптыне и тяни вов аруня, мон тейть каян рюмканя“.

Но Чичиковсь старандась атказамс тяфтама ликернять эзда, азозе, што сон и ярхцась ни, и симсь ни.

„Симоть и ярхцать ни!“ азозе Плюшкинць. „Да, конешна, цебярь обществань ломанть коста повсь содасак: сон аф ярхцай, а топоцта; а кда сявомс кодамовок ворть, да сонь коданя тяк анда... Вдь вов сай капитанць: „Оцяй“, корхтай „дай мезевок ярхцамс“. А мон тейнза стама жа оцян, кода сон тейне атя. Эсь кудсонза, улема, ярхцамс аш мезьде, вов сон и усксеви! Да, вдь тейть эряви сембе ня тунеядецнень реестрасна? Кода ина, мон бта содайне, сембонь синь сьормадыне башка каготкас, штоба, мзярда сай васень ревизиясь, сембонь синь нардамс“. Плюшкинць путозень сельмеваноманзон и кармась сюволяма каготтнень йоткса. Всякай соткснень юкссемста сон эсь инжиенц каванязе стама пульса, што тонац нльня кшнясь. Тоса лифтсь кругом сьорматф каготкя. Крестьянскяй лепне сонь кругом пяшкодезь кода карунятне. Тоса ульсть всякайхть: и Парамонов, и Пимонов, и Пантелеймонов и нльня мувсь кодама бди Григорий Пачкоди аф пачкодеви; сембоц ульсь сяда комсьта лама. Тяшкава ламоть няемста Чичиковсь нльня пеетькстсь. Яцезе каготкять зепозонза и азозе Плюшкинонди, што крепостть оформлениянц инкса тейнза сави ардомс ошу.

„Ошу? Да кода станя?... а кудть кинди кадомс? Вдь монь народозе или ворхт или мошенникт: фкя шиста станя салатядязь, што и суманьцевок аф ули коза повфтамс“.

„Аш ли тонь кивок содаф ломанце?“

„Да кинь мумс содафнень эзда? Сембе содаф ломанне кулсесть, или арасть аф содафокс. Ах, матаняй! коданя аш, ули содафозе!“ пешкодсь сон. „Вдь содаф сонць председательсь, мзярда бди нльня сувсекшнесь ширезон, кода аф содамс! Фкя кизоннет улеме, марса пирькснень лангс куценькшнеме! Коданя аф содаф? Вов пяк содаф! Вов аф сьормадомс ли тейнза?“

„И, конешна, тейнза“.

„Кода ина, сон сяшкава содаф ломань! Школаса ялгат улеме“.

И тя шуфтонь шамать эзда вдрук няевсь кодама бди лямбе луч, няевсь аф чувства, а чувствань кодама бди бледнай отражения, явления, конац похожай ветть лангс ваяфть апак учсек эвондаманц лангс конац кеподсь радостнай ивадема берягу пуромф толпать йоткса. Но брадонза и сестранза напрасна берягста яфияйхть пикс и учихть, аф няеви-ли меки копорец, или ваямать мархта тюремать эзда сизеф кяденза — эвондамац ульсь мекольцесь. Сембось аф кашторды, и сяда меле нинге сяда страшнайкс и шавокс арай ветть сетьме лангоц. Тяфтаня и Плюшкинонь шамацка сонь эсонза чувствань вдрук няйф лучта меле арась сядонга чувствафтома и нинге сяда пошлайкс.

„Шра лангса ульсь четвертка чистай кагод“, азозе сон: „да аф содаса, ков юмась: ломанне монь ковонга аф кондястихть!“ Сяда меле сон кармась ванондома и шрать алу, и шрать лангс, [27]сюволясь везде и меколи ивадсь: „Мавра, а Мавра!“ Ивадеманцты эвондась ава кядьсонза тарелка мархта, конань лангса морафтыти знакомай ни коськшись. И синь йотксост ульсь тяфтама корхтама:

„Ков тиить тон каготть, разбойница?“

„Ей богу, барин, ашине няй, афоцю пакшкада башка, конань мархта тонць тавадыть рюмкать“.

„А мон сельмотнень коряс няйса, тон салайть“.

„Да мезенди мон саласа? Вдь тейнь сонь эздонза аш кодамовок цебярь; сьормас мон аф содан“.

„Васькафнят, тон кандыть сонь понамарьть цьоранянцты; сон сьормадома машты, вов тон и кандыть тейнза“.

„Да понамарьть цьораняц, кда тейнза эряви, кагод муй. Пяк эряви тейнза тонь кагод пакшкяце!“

„Вов няйсак! Страшнай судса тянкса тонь шяйтаттне пицетядязь кшнинь цянгса! Вов ванцак, кода пицетядязь!“

„Да мезенкса пицесамазь, кли мон четверткать кядезонга ашине сявонде? Катк ни кодамовок авань лия лафчашинкса, а саламанкса монь кивок нинге ашемань пице“.

„А вов шяйтаттне тонь и пицетядязь! мярьгихть: „вов тянкса тонь, мошенница, сянкса, што баринть васькафнекшнийть!“ Да толу цянкса тонь и пицетядязь!“

„А мон мярьган: „аш мезенкса! Ей богу, аш мезенкса, мон ашине сяв...“ Да вов сон ащи шра лангса. Фалу аш мезенксонга сюцекшнесамак!“...

Плюшкин няезе, афкукс, четверткать и афламняс лоткась, мотерьфтезень трванзон и азозе: „Ну, мес ни тон тяшкава вишкомоть: кяльце аф кирдеви! Тейнза аньцек аст фкя вал, а сон тейть ответонди кемонь азы! Архт кантт толня сьормать печатламс. Да ожу, тон кандсак куяста тиф свецять, куясь курок шяняды: палы — и мезевок аф ляды эздонза, аньцек убытка тии, а тон кантака тейнь шявня!“

Маврась тусь, а Плюшкинць озась креслатненди, сявсь кядезонза долга, кувать нинге сембе шири шарфнезе четверткать, думандакшнесь: аш ли сонь эздонза кадомс нинге осьмушканя, но меколи няезе, што тянь коданга тиемс аш кода; долгать яцезе кодама бди куштаф и потмакссонза пяк лама кару мархта жидкостти и кармась сьормадома, музыкальнай нота лангс буквань тиендема, сияк кирнезе кяденц тароманц, конац комотнесь сембе каготть ланга, скупойста сьорматкшнезе строчкать лангс строчкать и ужяльдезь думандась сянь колга, што нинге лядонды лама вастта строчкатнень йоткс.

И тяфтама ничтожествас, мелочностьс, гадостьс мог пачкодемс ломанць! Мог тяшкава полафтовомс! И похожай тя правда лангс? Сембось похожай правда лангс, сембось может лисемс ломанть мархта. Тянипингонь толкс палы од ломанць эводезь комотель ба шири, кда няфтелезь тейнза сонцень жа сирепингонь портретонц. Откс пингонь ляпе кизотнень эзда суровай и ожесточающай мужествати лисемда меле сявость жа эсь мархтонт сайпингонь эряфонкса ломанень сембе движениятнень, тясть кадонда синь ки лангс, сяда меле синь аф мувихть! Грознай, страшнай эсонок учи сирешись, и мезевок аф мрдафты и аф максы меки! Калмось сяда милосерднай сонь корязонза, калмоти ули сьорматф: сей калмаф ломань! Но мезевок аф морафтови бесчеловечнай сирешить кельме, чувствафтома чертанзон эзда.

„И аф содат ли стама ломань тонь приятельхнень эзда“, азозе Плюшкинць сьормать мянцемста, „конанцты эрявкстольхть ба ворьготьф ломатть—ваймот“.

„А тонь и ворготьфтка улихть?“ кеподезе прянц и вишкста кизефтезе Чичиковсь.

„Сянь эса тевське, што улихть. Овоньке йоразень вешемс и мярьгсь: што бта синь аф мувихть, но вдь сон ломанць военнай: мастяр топстыемс шпоранц, а кда ба хлопочамс суттнень вельде...“

„А мзяра синь эздост числаса?“

„Да сизьгемоньшка тожа пуроми“.

„Видецень азондсак?“

„А ей богу станя! Вдь моньцтонь эрь кизоня ворьготькшнихть. Народсь пяк ни ярхцамати жаднай, мезеньгя аф [28]тиендемать сюнеда нолдась обуця пефтома пяльдемс, а монь и эстейньгя аш мезьда ярхцамс... А мон ба мзяра афольхть макса синь инксост, сяволине ба. Вов тон указовак приятельценди; кда муви хоть кемоньшка, вов сонь и ярмактонзовок кармайхть улема лама. Вдь ревизскяй ваймось тии ветесядошка цалковай“.

„Аф, тянь приятельти и никсамска аф макссаськ“, эсь пачканза азозе Чичиковсь и тоса толкавазе, што тяфтама приятель костовок аф муви, што аньцек тя тевть карьхценза кармайхть улема сяда оцюфт; сяс мес судендакшнемста эрявихть керомс эсь суманьцень полонзон, да тумс сяда ичкозине; но што кли сонь афкукс оцю нужац, то, сяс мес сон тейнза пяк ужяль, сон анок максомс... но што тя сяшкава кржа ули тя максомась, конань колга нльня афоле эряви корхтамска“.

„А мзяра ба тон максолеть?“ кизефтезе Плюшкинць, а сонць арась житкс, кяденза сонь тарозевсть кода эрек сия.

„Мон ба максолень комсь ветиень трьошник ваймоть инкса“.

„А кода тон рамсят, чистай ярмак лангс?“

„Да, ярмакнень тяникиге“.

„Аньцек, матаняй, монь нищайшизень инкса максолеть ба нильгемонь трьошник“.

„Кельгома ломань!“ азозе Чичиковсь: „аф аньцек нильгемонь трьошник, вете сятт цалковайхть кажнайнкса максолень ба! Оцю удовольствия мархта максолень ба, сяс мес няйса, цебярь ломань, седивакскань атясь кирди нужат эсь добродушиянц сюнеда“.

„А ей богу тя тяфта! Ей богу видеть азоть!“ азозе Плюшкинць, прянц нолдазе алу и кольф потмот шуказе сонь, „сембе тя добродушиять эзда“.

„Ну, няйсак ли, мон вдрук содайне тонь характерцень. Вов, станя, мес ба аф максомс ветень сяда цалковай ваймонкса, но... аш коста максомс, ветень трьошник, кда мяльце, мон прибаван, штоба тяфтаня эрь ваймоть питнец улель колмоньгемонь трьошник“.

„Ну, матаняй, воляце, хоть кафтонь трьошниконя путт“.

„Кафтонь трьошниконя прибаван, тянь тиса. Мзяра сембоц синь эздост? Тон, тейнь арам, корхтать сизьгемонь?“

„Аф, сембоц кочкави сизьгемонь кафкса“.

„Сизьгемонь кафкса, сизьгемонь кафкса, колмоньгемонень трьошник ваймонкса, сембонкса эряви пандомс...“ и минь героеньке аф секундада ламос арьсесь и вдрук азозе: „Сембонкса эряви пандомс комсь нилие цалковай вехксогемонь кота трьошникт!“ Сон арифметикаса ульсь вию. Эстакиге Плюшкинонди сон мярьгсь распискань сьормадомда и макссь тейнза ярмакт, конатнень тонац примазень кафта кядьса и кандозень синь бюроти станя жа салаваня, кода бта кандсь кодама бди жидкость и эрь минутаня пельсь сонь пяердеманц эзда. Мзярда мольсь бюроть тейс, сон нинге весть ванозень синь и станя жа путозень пяк салаваня фкя ящикс, коса, содаф, тейст сави улемс калмафокс мянь снярс, мзярс отец Карпсь и отец Поликарпсь, сонь велесонза кафта священникне, аф калмасазь сонцень, мезсь ули афазомшка кенярдемакс овонцты и стиренцты, а можи и капитантиге, конац арась тейнза родняширекс. Мзярда прдазень ярмакнень, Плюшкин озась креслати и сяда лама, кода няевсь, не мог мумс материя, мезень колга корхтамс.

„Мезе тяфта, тон срхкат тума?“ азозе сон, мзярда няезе цютькяня таромать, конань тиезе Чичиковсь зепстонза руцянянц сатоманц инкса.

Тя кизефкссь лятфтазе тейнза, што афкукс тейнза сяда ламос аш месендемс. „Да, тейнь пинге ни тумс!“ азозе сон, сявомок шляпанц.

„А чайда?“

„Аф, чайда катк кодавок лия пингоня?“

„Кода ина, мон мярьгонь путомс самовар. Мон, видеть азомс, аф охотникан чайда симондема: напитоксь питни, да и сахарть питнецка кассь афазомшка. Прошка! Аф эряви самоварсь! Коськшить кантк Мавранди, кульсак: катк сонь путсы сяка вастти, али аф станя, дай сонь сей, сядожу монць сонь кандса. Прощай, матаняй, максоза тейть шкабавазсь паваскя, а сьормать тон макск председательти. Да! катк морафтсы, сон монь сире содаф ломанезе. Кода [29]ина! Минь улеме сонь мархтонза фкя кизонь!“

Сяда меле, тя страннй явлениясь, тя копорьготф атянясь прважазе сонь пирьфста, тоса эстакиге мярьгсь пякстамс ортатнень, тоса йотазень кладовойхнень, сянкса штоба ваномс, эсь вастоваст ли ваныхне, конат ащесть сембе ужетнень эзга, шуфтонь каймоса эрьхнесть шуфтонь боцькянять эса чугуннай доскать вастс; сямельде варжакстсь кухняв, коса няфтемок пря, бта варжасы, цебярьста ли ярхцайхть ломаттне, топодемс ярхцась лямда и ямда, педе пес сембонь сюцезень саламанкса и афцебярь поведениянкса и мрдась эсь комнатазонза. Мзярда лядсь ськамонза, сон нльня думандась сянь колга, коданя ба каземс инжить тяфтама, афкукс, беспримернай великодушиять инкса. „Мон тейнза казьсайне, думандась сон эсь пачканза, карманнай частонень: синь вдь цебярьхть, сияннет, а аф кодамовок томпаковайхть или бронзовайхть, хоть цютькяня колафт, но сон петьсыне синь; сон ломанць нинге од, вов и тейнза эрявихть карманнай часттне, штоба тумс эсь невестанц мяльс! Или аф макссайне, мзярошкас думандамда меле арьсезе сон, лучи мон тейнза кадсайне монь куломдон меле, духовнаезень эса, штоба лятфнелемань монь“.

Но минь геройньконь и частфтомонга мялец ульсь пяк цебярь. Тяфтама апак учсек приобретениясь ульсь йофси казьнекс. Афкукс, месть тят корхта, аф аньцек кулоф ваймот, но нинге и ворьготьф ваймот, и марнек кафта сятта лама! Конешна, нинге Плюшкинонь велес пачкодемста сон марязе ни, што ули кой-кодама пожива, но тяфтама прибыль мархта кодавок изь учсе.


  1. *) Печатлави нюрьхкяняста.
  2. Юфть — стама сорт кедь.
 

 
This is a translation and has a separate copyright status from the original text. The license for the translation applies to this edition only.
Original:
PD-icon.svg This work was published before January 1, 1926, and is in the public domain worldwide because the author died at least 100 years ago.
Translation:
PD-icon.svg This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
  • it was anonymously published before January 1, 1951 (more than 70 years ago).

This work is in the public domain in the United States because it was first published outside the United States (and not published in the U.S. within 30 days), and it was first published before 1989 without complying with U.S. copyright formalities (renewal and/or copyright notice) and it was in the public domain in its home country on the URAA date (January 1, 1996 for most countries).
This work was in the public domain in Russia on the URAA date January 1, 1996, according to the Law 09.07.1993 No 5351-1 which was enacted on that date:

  • it was anonymously published before January 1, 1946 (more than 50 years ago from 1/1/1996).

This anonymous or pseudonymous work is also in the public domain in other countries and areas where the copyright term of anonymous or pseudonymous works is 81 years or less since publication.

Flag of Russia.svg