Колхозонь эряф/1939/05-6/Тядясь/2
| ←I-це главась | Колхозонь эряф (1939), № 5-6 Май-Июнь edited by Руськин Ф. С., Пинясов Я. М. Тядясь, Омбоце пялькссь, II-це главась by авторсь: Максим Горький, мокшекс ётафтозе: Аф содаф (аноним) |
Тядясь (оглавлениясь)→ |
| Колхозонь эряф (Колхозная жизнь). Литературно-художественнай и общественно-политическяй журнал. Мордовскяй АССР-нь советскяй писателень союзонь правлениять органоц. Лисенди кемгафтувоце кизось, ковти весть. — № 5-6 Май-Июнь 1939 киза. — с. 20—23 |
II
Тядясь Николайнь шири срхкась нилеце шиня сонь сашендомдонза меле. Мзярда сонь кафта арзянзон мархта крандазсь слободкаста лиссь паксяв, сон, шарфтомок фталу, вдрук марязе, што йофсикс кадондсы вастть, коса йотась сонь эряфонц шовда и стака полосац, коса ушедсь од эряфсь, — конац пяшксе од горяда и кенярдемада, конац вишкста нилендезень шитнень.
Модать лангса, конанц равчкофтозе содсь, пяк оцю шобда якстерь котф кодай унжакс келемсь фабрикась, кеподемок менельти эсь сери трубанзон. Сонь малазонза пштитькшнесть рабочайхнень фкя этажса куднясна. Серайхть и люпштафт синь ащесть теснай кучаняса шяйть крайса и жалобнайста ванцть фкя-фкянь лангс йомла, бта олаф вальмянясот. Синь велькссост кепотькшнесь церькавсь, станяжа шобда якстерель фабрикать тюсса, сонь колокольняц фабричнай трубатнень коряс алняль.
Тядясь, куфкстомок, петезе кофтанц сивонц, конац теснандазе кргапаренц.
— Аськоляк! — мотердсь извозчиксь, соньць алашать лангс яфиесь вожьятнень мархта. Тя ульсь кичкор пильге, аф определеннай возрастонь ломань, шамасонза и прясонза шяяренза олафт и шурот, тюсфтомот сельмонза. Фкя ширде омба шири люказь, сон мольсь крандазть мархта ряцок, и ульсь шарьхкотьф, што тейнза сембе сяка молемс — види шири, кержи шири.
— Аськоляк! — корхтась сон аф мази вайгяльса, и рахафтыста сон аськолязень коськф урдаз мархта кямось кичкор пильгонзон. Тядясь варжакстсь перьфпяли. Паксясь шаволь, кода седисонза.
Аф весяласта прянц шерьфнезь, алашась стакаста нежетькшнезень пильгонзон крхка песокти, конанц эждезе шись, сон сетьмоняста кажелдсь. Читордсь кальдявста ватьф, калада крандазсь, и сембе цяторфонза, пульть мархта марса, лядондсть фталу...
Николай Ивановичсь эрясь ошть крайса, шава ульцяса, пиже тюсса йомла флигельса, конац тиф кафта этажса сиредемать эзда келемф, равха кудть ваксс. Флигельть инголе ульсь туста палисадник, и квартирать колма комнатанзон вальмас ласковайста ванондсть сиреттнень, акациятнень тарадсна, од топольхнень сиянь лопасна. Комнататнень эса ульсь сетьме, чистай, кияксть эса апак каштортт тарсть узорчатай цильфне, стенатнень эса ульсть кувака полкат, конат теснаста пяшькотьфт тольхть книгада, и ащесть кодама бди строгай ломанень портретт.
— Тейть пара кармай улема тяса? — кизефтезе Николайсь, сувафтомок тядять комнатати, конанц фкя вальмась ваны полисаднику, омбоцесь пирьфи, коса тустста кассь тишесь. И тя комнататьке сембе стенанзон станежа заньцезь шкафне и книга мархта полкатне.
— Мон ба лучи кухняв! — мярьгсь тядясь. — Кухнянясь валда, чистайня...
Тядяти бта няевсь, што Николайсь мезьда бди эводсь. А мзярда сон аф ловкайста и смутяфста кармась [ 21 ]корхнемонза тядять, и тядясь согласиндась, — сразу весялгодсь.
Сембе колмоцьке комнататне пяшксельхть кодама бди особеннай воздухта, — ваймоцень таргсемац ульсь тьождя и пара, но вайгялец аф эсь воля сетьмосесь, ашель йора корхтамс кайгиста, стенатнень эзда видеста ваны ломаттнень мирнай задумчивостьснон колсезь.
— Панчфне эрявмхть валомс! — мярьгсь тядясь, варжамок вальмя лангса панчфнень сяканяснон эзда модать.
— Да, да! — муворуста мярьгсь азорсь. — Мон, няйсак, кельгсайне синь, а мельгаст ваномс аш мзярда...
Сонь мельганза ванондозь, тядясь няезе, што и эсь уютнай квартирасонзовок Николайсь станяжа якай салаваня, чужойкс и ичкозденнекс семботи, мезсь ащи сонь перьфканза. Эсь шаманц пачфнезе мянь сянь малас, мезе ванондсь, и, види кяденц шуваня суронзон мархта очканзон латцезь, пялес конендезень сельмонзон, валфтома кизефнезь предметть лангс ваномок, конац интересовандазе сонь.
Лияста вещь сявондсь кядезонза, малатьфнезе шаманцты и цебярьняста щупсезе сельмонзон мархта, — бта няевсь, сон комнатав сувась тядять мархта марса, и, кода и тядяти, тейнза сембось тяса аф содафоль, аф тонатфоль. Мзярда няезе сонь тяфтамкс, тядясь сразу эсь прянц ня комнататнень эса марязе эсь вастсонза. Сон якась Николайнь мельгя, ванондсь, коса мезе ащи, кизефнесь эряфть порядоконц колга, сон тейнза отвечась ломанень стама мувору вайгяльса, конац содасы, што сон семботь тиендьсы аф станя, кода эряви, а лиякс аф машты.
Валомок панчфнень и кочкамак правильнай стопас пианинать ланга йоряф нотатнень, тядясь варжакстсь самоварть лангс и мярьгсь:
— Эряви чистендамс...
Николайсь йотафтозе суронц ловтана металлать ланга, малатфтозе суронц шалхконц малас и серьезнайста варжакстсь лангозонза. Тядясь ласковайста пейдезевсь.
Мзярда тядясь мадсь удома и лятфтазе эсь шинц, сон дивандазь кеподезе прянц тодуть лангста, перьф пяли ванондозь. Эряфсонза васенцеда сон ульсь лия ломанень кудса, и тя ашезе визделгофне, колсе сонь мяленц. Николайнь колга сон думандась заботливайста, марясь желания тиемс тейнза семботь кода можна сяда цебярьста, путомс сонь эряфонцты мезе бди ласковай, эжди. Тядять седиенц токсезе Николайнь аф ловкостец, смешной аф маштомашиц, сонь аерфтфшиц обычнайть эзда и мезень бди мудрай-иденнесь пиндолды сельмонзон эса. Тоса сонь арьсеманза кемоста лоткасть цьоранц лангс, и сонь инголенза тага арась Майнь Васенце шись, конанц марнек щаф од вайгяльса, виияф од смысласа. И тя шить горяц ульсь, кода марнек сонць особеннай, — тя горясь ашезе комафне прять модати, кода клокть тупой, таяскафты вачкодемац, сон сялгондсь седить эса лама сялгондомаса и сонь эсонза кепсесь сетьме кяж, видепнемок мяньтьф копорть.
— Мирть эса молихть иттне, — думандась тядясь, сонць кулхцондонзень ошть вень эряфонц аф содаф звуконзон. Синь шашнесть панжада вальмяти палисадникса лопатнень кажелфтозь, лиендсть ичкозде сизефста, лофтанаста и саворня кулсесть комнатав.
Рана шовдава тядясь чистендазе самоварть, лакафтозе сонь, аф стуказь аноклазень посудатнень и, кухняса ащезь, кармась учема, мзярда сргози Николайсь. Марявсь сонь козкстамац, и Николайсь сувась кенкшти, фкя кяденц мархта кирдезень очканзон, омбоцеть мархта кяшендезе кргапаренц. Отвечамок сонь приветствиянцты, тядясь самоварть сявозе комнатав, а сон кармась шаманц штама, кияксу ведть пяярезь, сапоненц, пеень щетканц прафнезь и эсь лангозонза пркснезь.
Чайда симомста Николайсь тядяти азондозе:
— Земскяй управаса мон вятян пяк печальнай работа — ванондса, кода розарякшневихть минь крестьяноньке...
И, мзелдозь, муворуста тага азозе:
— Ломаттне, конатнень керозень вача шись, пингта инголе мадондыхть калмотненди, иттне шачендыхть лафчт, кулсихть, кода сьоксенда каруфне, — минь сембонь тянь содасаськ, содасаськ несчастять туфталонзон и, [ 22 ]ванондомок синь, получакшнетяма жалованья. А сяда меле аш мезевок, азомс видеть...
— А тон кият — студентат? — кизефтезе сонь тядясь.
— Аф, мон учителян. Монь алязе — Вяткаса заводонь управляющай, а мон тунь учителькс. Но велеса мон мужикненди кармань книжкань макссема, монь тянкса озафтомазь тюрьмав. Тюрьмада меле служендань приказчикокс книжнай магазинца, но эсь прязень вятине аф осторожнайста и тага повонь тюрьмав, тоса — панемазь Архангельскяи. Тоса станяжа лиссть монь неприятностене губернаторть мархта, монь панемазь Белай морять берягс, веленяс, коса мон эрянь вете кизот.
Сонь вайгялец валда, ши валдть мархта пяшькотьф комнатаса кайгсь спокойнайста и ровнайста. Тядясь ламоксть ни кулендсь тяфтама историят и вестевок изь шарьхкотькшне, — мес синь азондсазь тяфтаня спокойнаста, ваныхть синь лангозост, кода стамонь лангс, конань эзда аш кода мянемс?
— Тячи монь сестразе сай! — азозе Николайсь.
— Урьвакс максф?
— Вдова. Сонь мирдец паньфоль Сибири, но ворьгодсь тоста и кулось чахоткаса кафта кизода тяда инголе границать тона бокса...
— Сон корязт од?
— Корязон сире кота кизода. Мон тейнза пяк ламоса обязаннаян. Вов тон кулхцонтк, кода сон морай! Тя сонь пианинась... тяса вообще сонь лама паршидонза, монь — книгатне...
— А сон коса эряй?
— Коса повсь! — отвечась сон пейдезь. — Коса эряви смелай ломань, тоса и сон.
— Станяжа — тя тевса? — кизефтезе тядясь.
— Конешна! — мярьгсь Николайсь.
Сон курок тусь службав, а тядясь кармась арьсема „тя тевть“ колга, конанц шиста шис упрямайста и спокойнайста тиендьсазь ня ломаттне. И сон эсь прянц марязе синь инголест, кода пандть инголе вень пингста.
Обедшкада эвондась равжа платьяса, сери и стройнай ава.
Мзярда тядясь панжезе тейнза кенкшть, сон йордазе кияксть лангс тюжя чемоданнянц и, вишкста фатямок Власовать кяденц кизефтезе:
— Тон Павел Михайловичень тядяцат, тяфта?
— Да, — отвечась тядясь, сонь питни костюмонц лангс ванозь бта визделготфста.
— Мон тяфта и думандань тонь колгат! Брадозе сьормадсь, што тон кармат эряма сонь ширесонза! — корхтась авась, ваномать инголе шляпанц валхтомста. — Павел Михайловичень мархта минь кунара ялгатома. Сон тейнь азонкшнесь тонь колгат.
Сонь вайгялец аф пяк кайгиель, корхтась сон валомня, но шашнесь виюста и эрязста. Серай оцю сельмонза мзелдсть одста и яснайста, а сельме кунонзон эса няевсть ни шуваня, китькскакс ащи срмафкат и аф оцю пилензон вельксса сияк пиндолдсть шаржу шяярьхть.
— Пекозе вачсь! — мярьгсь сон. — Тяни ба чашка кофе симомс...
— Сейчас мон лакафтан! — тейнза мярьгсь тядясь и, шкафста кофейнай приборть сявомста, сетьмоняста кизефтезе: — А дряй Пашась корхни монь колган?
— Лама...
Авась таргазе кедень йомла портсигаронц, кармась курендама папиросада и, комнатать эзга якамста, кизефнесь:
— Тон пяк пелят сонь инксонза?
Сянь лангс ванондозь, кода кофейникть ала комотнихть спиртовай лампать толонц сенем кяленза, тядясь мзелдсь. Авать инголе сонь смутяфшиц юмась кенярдемать потмос.
— Так сон монь колган корхни, — монь цебярьнязе! — думандась сон, а сонць саворня корхтась: — Конешна, аф тьождя, но тяда инголи улель ба сяда кальдяв, — тяни мон содаса — аф ськамонза сон...
И, авать шамас ванозь, кизефтезе сонь:
— А кода тонь лемце?
— Софья! — отвечась тонац.
Тядясь оржа сельмот ванць лангозонза. Тя авать эса ульсь мезе бди размашистай, пяк бойкай и эрек.
Вишкста кофень коршазь, сон увереннайста корхтась:
[ 23 ]— Главнайсь, штоба сембе синь аф кувать ащельхть тюрьмаса, куроконя судендалезь ба синь! А кодак аньцек паньцазь, минь эстакигя Павел Михайловичень ворьготьфцаськ, — сон тяса эряви.
Тядясь аф верондазь варжакстсь Софьянь лангс, а тонац, вешендемок сельмонзон мархта, коза ба йордамс папироса петь, яцезе сонь панчфонь банкать модас.
— Тянь эзда гастявихть панчфне! — машинальна пшкядсь тядясь.
— Простиндамак! — мяргьсь Софьясь. — Николайсь тяфтажа фалу корхтай тянь колга тейнь! — и, таргамок банкать эзда папироса петь, сон йордазе вальмава.
Тядясь смутяфста варжакстсь сонь шамазонза и муворуста корхтазевсь:
— Тон простиндамак монь! Мон тянь тяфтак азыне, апак думандак. Дряй мон могу тонафтомс тонь?
— А мес ина аф тонафтомсан, кда мон неряхан? — отвечась Софьясь, лафтувонзон кеподемок. — Кенерсь кофесь? Спасиба! А мес фкя чашка? Тон аф кармат симома?
И вдрук, сявомок тядять лафтуда, ускомок эсьтейнза и сельмозонза ванозь, сон дивандазь кизефтезе:
— Кали тон виздят?
Тядясь мзелдозь отвечась:
— Аньцек што мон тейть папироска петь колга мярьгонь, а тон монь кизефнесамак — аф виздян ли!
И, эсь дивандаманц апак кяшенть, тядясь корхтазевсь, кода бта кизефнезь:
— Исяк ширезонт сань, а вятса эсь прязень, кода кудса, мездонга аф пелян, корхтан, мезе йоран...
— Тяфта и эряви! — пшкядсь Софьясь.
— Монь прязе шары, и кода бта мон — монць эсьтейнь чужоян, — сяда тов корхтась тядясь. — Бывала якат, якат ломанть перьф, васенда азат тейнза мезевок седивакска, а тяни — фалу ваймозе панжада, и сразу корхтан сянь, мезе инголи афоленеля думанда ба...
Софьясь тага крьвястсь папироса, ласковайста и аф каштордозь ванондсь тядять шамас эсь серай сельмонзон мархта.
— Тон корхтат — ворьготьфтемс? ну, а кода ина сон кармай эряма — беглайста? — путсь тядясь тейнза эсь пичефти кизефксонц.
— Тя аш мезевок! — отвечась Софьясь, эстейнза нинге кофень каязь. — Кармай эряма, кода эряйхть лама кемотть ворьготьфне... Мон вов аньцек васьфтине и прважайне фкять станяжа пяк эряви ломань, — паньфоль вете кизос, а ссылкаса эрясь колма пяле мархта кофт...
Тядясь видеста ванць лангозонза, пейдезь и прянц шерьфнезь сетьмоняста мярьгсь:
— Аш, кода няеви, тапамань монь тя шись, Майть Васенце шиц! Аф ловка кода бди тейнь, и кода кафта кигя сразу молян: то тейнь няеви, што семботь шарьхкодьса, а вдрук кода туманц повонь. Вов тяни тон, — ванан лангозт, — барынят, — ня тефнень эса тиендят... Пашань содасак и лувондсак цебярь ломанькс сонь, спасиба тейть...
— Ну, тя тейть ни спасиба! — рахазевсь Софьясь.
— Мес мон? Аф мон тонафтыне сонь тянди! — куфкстозь мярьгсь тядясь.
Софьясь папироса петь путозе эсь чашканц шаванясонза, сон шукадезе прянц, золотакс ащи шяяренза срадсть туста пакшкянь копоренц эзга, и сон тума шовор мярьгсь:
— Ну, тейнь пинге каямс эсь лангстон тя великолепиять.