Колхозонь эряф/1939/03/Великай поэтть эряфонь киц

From Wikisource
Jump to navigation Jump to search
Колхозонь эряф (1939), № 3 Март
Великай поэтть эряфонь киц
Колхозонь эряф (Колхозная жизнь). Литературно-художественнай и общественно-политическяй журнал. Мордовскяй АССР-нь советскяй писателень союзонь правлениять органоц. Лисенди кемгафтувоце кизось, ковти весть. — № 3 Март 1939 киза. — с. (45)47—48
 

[45]

 
[47]
ВЕЛИКАЙ ПОЭТТЬ ЭРЯФОНЬ КИЦ
125 кизот Тарас Шевченкоть шачема шистонза сявомок

1814 кизоня укряинскяй помещикть Энгельгардть „крепостной душанзон“ лувксозост прибавась нинге фкя ломань: Маринцы велеса, Киевскяй губерниянь, беднай крестьянинть Григорий Шевченкоть семьяса шачсь цьорац Тарас. Йомла крепостнойнясь, конанцты суждено ульсь арамс великай народнай поэтокс, нинге иднякс испытал нуждать, вачашить, подневольнай трудть сталмонц.

1831 кизоня помещиксь Энгельгардт тусь Петербургу. Марса „баринть“ мархта, тейнза слугань эземс, моли 17 кизосонь Тарас Шевченкось. Нят кизотнень пингста ни няевсь юношать живописецонь оцю талантоц, и помещиксь решает „максомс ки“ сонь талантонцты: Тарассь ульсь максф тонафнема... малярти Ширяевти.

Малярть эзда салава Тарассь якаль Эрьмитажу, тонафнельхцень живописень великай мастерхнень картинаснон. Случайно Шевченкось познакомился известнейшай художникть Брюлловть мархта, конац эстакиге жа примась горячай участия юношать судьбасонза. И вов Тарассь — художествань Академиянь ученик. Знатокне пророчат тейнза живописецонь оцю слава.

Брюлловсь и сонь ялганза решили нолдамс воляс Шевченкоть крепостной зависимостть эзда. Брюлловсь рисовандазе поэтть Жуковскяйть портретонц. Портретсь ульсь разыгранай знакомай художникнень йоткса. Тяфта кочкасть 2500 цалковай — суммать, конань помещиксь Энгельгардт вешезе Шевченкоть инкса. Тарассь свободнай, — сон сяда пяк аф крепостной.

Художествань Академияса улемстонза Шевченкось ушеткшни сьорматкшнема стихт, коль сяда пяк и сяда пяк увлекандакшнемок поэтическяй творчестваса. 1840 кизоня Шевченкось нолдазе „Кобзарь“ стихонь эсь книганц васенце изданиянц, и поэтонь оцю апак учсек слава сашенды од художникти.

Сяда мельдень вете кизотнень пингста Шевченкось кафксть якай эсь родной Украиназонза. Сон тага няйсы сонь изнемогающайкс николаевскяй режимть гнетонц ала, няи закрепощеннай крестьянствань бесправиянь и нищетань страшнай картинат.

Сембе эсь помысланзон, сембе эсь огромнай талантонц Шевченкось водендакшнесыне тюрема оцязоронь правительствать каршес, польскяй и украинскяй помещикнень каршес. Сон выступает крестьяттнень йоткса, кода пламеннай революционнай агитатор. Сон сьормады лама замечательнай од произведеният и синь йотксост — „Сон“, разящай сатира монархиять лангс. Коль сяда пяк и сяда пяк кайгиста кулеви поэтть обличающай вайгялец; сон терди тюремати, революционнай восстанияти.

Тунда 1847 кизоня Шевченкось Киеву самдонза меле ульсь арестовандаф и кучф Петербургу. Тяда меле лиссь приговор: „... возмутительнай и вельф дерзкяй стихотворениянь сьормадоманкса йотафтомс рядовойкс Оренбургскяй башка корпусти“. Но оцязорть Николай I-ть изощреннай кяжи шинцты и тявок ульсь аф сатомшка. Сон тиезе эсь „поправканц“ приговорти: „строжайшай надзор ала и запретить сьормадомс и рисовандамс“.

Кемонь кизот йотафтсь Шевченкось каторжнай военнай ссылкаса, тюрьмаса и крепостьса. Но оцязоронь палачненди ашезь синдев поэтть-борецть духоц. Самок ссылкада меле Петербургу, Шевченкось познакомился русскяй революционнай демократтнень мархта, во главе конатненди ульсь знаменитай Чернышевскийсь. Од вийса кайги Шевченкоть гневнай вайгялец, конац терди тюремати и мщенияти.

Родиназонза молемась... Тя мекольдень молемац: жандарматне тага арестовандазь поэтть революционнай пропаганданкса. Шевченкоть ускозь меки Петербургу, и Украинать [48]пределонзонды сувамась тейнза ульсь запрещенай прокс.

Жестокай преследованиятне, конатненди подвергался Шевченкось ламода крьфтазь сонь эряфонь кинц. Сон кулось 1861 кизоня, ульсь калмаф васенда Петербургу, а сяда меле сонь телац ульсь ускф Украинав, Каневу.

Эсь завещаниясонза Шевченкось сьормадсь, обращандакшнемок обездоленнайхненди, конатнень сон няйзень эсь мечтанзон эса счастливайкс и свободнайкс:

„Моньге тямасть юксне братскяй,
Од семьяса, валдса,
Лятфнесть лемозень монь тоса
Цебярь, сятяв валса“.

Советскяй странань народонь великай вольнай семьясь ашезе юкста Тарас Шевченкоть. Шиса сонь колганза памятсь, шисот сонь прекраснай пламеннай стихонза, конат близкайхть и кельговихть аф аньцек украинскяй народти, но и минь многонациональнай советскяй государствать сембе народонзонды.