Колхозонь эряф/1937/01/Моцарт и Сальери/2

by авторсь: Пушкин, Александр Сергеевич, мокшекс ётафтозе: Аф содаф (аноним)

ОМБОЦЕ СЦЕНАСЬ

Трактирса башка комната; фортепиано. Моцарт и Сальери (шра вакссот).

Сальери.

Мес тячи тон нусьмангодфат? *^[1]

Моцарт

Мон? Аф!

Сальери.

Тонь, маряк, мяльце мезьса мезьса колаф?
Пара пяк обедсь, винаськя цебярь,
А тон аф каштордат и аньцек келсят
Кяжде сельме кабат.

Моцарт

Кда виденьцямс,
Requiemoze * *^[2] Монь эсон эвфни.

Сальери

А!
Тон тяштят Requiem? Кнара ли?

Моцарт.

Кнара; колмошка ни недяля.
Но страннай случайсь... Ашинь азончне?

Сальери

Аш.

Моцарт.

Эста маряк: колма недьляшкада
Инголя сань куду позна, теень
Азозь: сувсесь инксон кати-кие.
Мезенкса-аф содца, арьсекшнень веньберьф:
Кие шта ся ульсь? И мезе эряви
Теенза монь эздон. Шобдава же
Та сувась и тага ашень сатов.
Колмоце шиня тияксть мон лангса
Цёрокшязень марта налксень. Терьдемазь.
Мон лисень. Равжа платьяс щаф-каряф
Ломаньсь теень лац ряд сюконясь
И мярьгсь сёрмадомда Requiem и тусь.
Озань эстакигя — кармань тяштемя —
И эстоньберя ашезь сашенда
Теень равжа ломанезе вестеньгя.
А мон и кенярьдень: ужяль ули
Рана явомс работазень марта,
Хуть анок ни и Requiemсkя, но —
Тяконь шовор...

Сальери

Мезь мля?

Моцарт.

Пяк визькс
Виденьцямс тянь квалма...

Сальери

Мезень квалма?

Моцарт.

Шинек, венек аф максси покой
Теень равжа ломанезе. Цильфокс
Панци мельган, коза тязан моля.
Вов и тяниеньгя, теень арам,
Ащи колмоцекс сон серьцек мартонок.

Сальери.

И пандя! Мезень шабань пелема?
Шукадьк тя шава мяльцень. Бомарше
Корхнесь теень: „Кулцентт, брат Сальери,
Кда равжа мяльхне тоньдеть педихть,
Эста паньчк шампанскяень бутылкать,
Али тага лувк Фигаронь свадьбанц“.

Моцарт.

Ба! Бомарше вдь тоньдеть ялга ульсь;
Тон тяштить теенза Тарарацень,
Пяк цебярь вещацень. Мотив фкя ули
Эсонза... сонь морсеса мон, мзярда
Эрьсян павазу... Ла ла ла ла ла... Ах,
Афкукс ли, што Бомарше, Сальери,
Кать-кинь кулофтсь ядса?

Сальери.

Мон аф арьсян:
Афоль ладя сон тя ремеслати.

Моцарт.

Сон жа гений, кода тон да мон,
А генийсь и злодействась — кафта вещьне
Марс аф ладяйхть вестеньгя. Аф правда ли?

Сальери.

Тон арьсят?

(ердай яд Моцартть стаканц.)

Симть.

Моцарт.

Тонь шумбра шицень инкса,
И седи ваксстонь союзть инкса, ялгай,
Кона сотни Моцартть и Сальерить,
Гармониятъ кафга цёранзон.

Сальери.

Ожу,
Ожу, ожу! Симить тон! и моньфтемон?

Моцарт.

(ердасы шрать лангс салфеткать).

Мон топодьстан ни.

(Моли фортепианоти).

Кульк ина, Сальери,

(морай).

Тон аварьдят?

Сальери.

Ня сельмеведьтнень
Мон васеньцеда пяярьдян, и теень
И сяряди и таньцти, бта пандонь
Стака шума, и пчкафты пеельсь

Кярозе монь пяк сяряди вастозень!
Моцарт ялгай, титя сельме ведьтне...
Тят ти няикс, морак, кенордак
Ненгя пяшкодемс монь ваймозень
Ня вайгялькснень марта.

Моцарт.

Кда тяфта
Гармониять виенц сембе марялезь!
Но аф! аф, аф: эста ба и мирскя
Афоль эряв, кивек афоль карма
Мелкай эряфонь нужатнень колга
Пичедемя. Сембе кундальхть вольнай
Искусствати. Кржа минь эздонок,
Празднай павазуда, конат афольхть няй
Сельмесостка ся презреннай пользать.
Аф правда ль? Но мон тячи аф шумбран,
Теень кать-мес стана; молян, мадан.
Прощай ина!

Сальери.

Прощай, Моцарт, прощай.

(ськамонза)

Тон матодоват ламос, Моцарт! Но
Тьряй правдась сонь и мон аф гениян?
Генийсь и злодействась — кафта вещьне
Марс аф ладяйхть мзярдонга. Аф тяфта:
А Бонаротти? Али титя ёфкссь
Тупой и ёньфтемя толпать — и ашель
Ломань шавикс Ватикантть создателец?

---

1. * Нусманьготф — пасмурнай.
2. ** Реквием — кулофнень вельксса католическяй обедня.

 

1936 к.  Октябрь.

 

---