Колхозонь эряф/1937/01/Кевень инжи/4

←3-це сценась

Колхозонь эряф (1937), № 1 (36) Январь-Февраль ков edited by Купряшкин Т., Бебан М. А. Кевень инжи. 4-це сценась by авторсь: Пушкин, Александр Сергеевич, мокшекс ётафтозе: Аф содаф (аноним)

Кевень инжи (оглавлениясь)→

Колхозонь эряф (Колхозная жизнь). Мокшень литературно-художественнай и общественно-политическяй журнал. Мокшэрзянь АССР-нь писателень союзть правлениянц органоц. Лисенди кемоньце кизось, кафта ковти весть. — № 1 (36), Январь-Февраль ков 1937 киза. — с. 39—43

4-це сценась

ДОННА АННАНЬ КОМНАТАЦ

Донна Анна

Мон тинь прьняндань, Дон Диего, аньцек
Ризфу кортамазе, пелян, мольфтсы
Мялентень; ёт арань выдавойкс мон,
Ямбарнясь, мон эстоньберя мяляфтса,
Мезь имафтонь. Сельме веднень шорьсян

Мызылфкязень марта, проке апрельсь.
Мес аф каштордтада тинь?

Дон Гуан.

Мон валфтома
Кенярдьчнян ни, ся мелезень арьсемок,
Што ащан ськамон Донна Аннань марта,
Вельф цебярь Донна Аннань марта, — тязк,
Аф калмонц лангса кулоф павазуть —
И няян тинь ни аф плманжа лангса
Ингольденза мраморста тиф мирдентень.

Донна Анна.

Дон Диего, б‘льшем кунендатада,
Мирдезе и калмосонга муцяй
Эсононт?

Дон Гуан.

Аф сави теень кунендамс.
Вдь сонь тинь кочксесть тинць?

Донна Анна

Аф, тидязе
Кошардомань Дон Альварти максомда
Кядезень — минь ашсолемя, козяль сон.

Дон Гуан.

Павазусь! Сон кандсь шава сокровищат
Богинять пильгя ингели и тянкса
Варжазе сон раень таньфть! О, к‘да
Содаледязь тинь мон сяда ингели —
Кода кенярдезь ба козя шизень
И сембень, сембень теенть максолень,
Сембень — вестькя монь лангозон ваномда,
Мон ульлень ба тинь волянтенди рабкс,
Мон сембе прихотентень кармалень
Содцекшнемост ингелькигя, штоба
Ванондомс тинь мялентень эрь мезьня,
Штоб эряфонте улель най волшебствакс. —
Но аш! — Судьбазе казьсь теень иля.

Донна Анна.

Диего, лоткада, мон пован грефс
Тинь кулцендозь, аш кода кельгемс теень
Тинь эсононт, мон калмонцтыгя сонь
Улеме ёран вернайкс. К‘да б содалесть,
Конашкада кельгемань монь Дон Альвар!
О, Дон Альвар ни, улема, дяль терьде
Эсь пялонза кельги ава, мзярда б
Кадоволь урьвафтома — сон улель
Мирдень-урьвянь кельгеманькень аралайкс.

Дон Гуан.

Седизень тясть муця, Донна Анна,
Мирдень лемень кундсемантень марта.
Саты казьнендадя эсон, хоть и мон,
Пади, саван казьнендамска.

Донна Анна.

Мезенкса?
Аф сотнефтяда тинь святой законца,
Арьсян мон, кинь мартонга, аф тяфта ли?
К‘да арань кельгевикс, тянь инкса
Аф ульхтяда муворкс менельть ингеля,
И монь ингелен сембеденга пяк.

Дон Гуан.

Тинь!
О шкайняй!

Донна Анна.

Трьяй эста муворхтада?
Азость ина, мезенкса?

Дон Гуан.

М‘зярдонга
Аф азса, аф.

Донна Анна.

Диего, мезь тяфтамсь?
Муворхтада ингелен и мезенкса?

Дон Гуан.

Тянь аф азса мезьденга!

Донна Анна.

Диего,
Тя страннай тееня, мон эняльдян,
Мон азомдонза мярьгеньдян.

Дон Гуан.

Аф, аф.

Донна Анна.

А! тяфта, няйса, кулцендсамасть монь!
А мезе аф к‘нара корхнедя?
Тинь рабокс теень улеме ёрадя,
Мон кяжиян, Диего: кортада,
Ингелен монь мезенкса тинь мувортад?

Дон Гуан.

Аф смедондан, тинь эста мля монь
Сюдосамасть, панцамасть сельмь ингольдент.

Донна Анна.

Аф, аф. Прощандан инкелькигя тинь,
Но содамс ёраса...

Дон Гуан.

Тясть ёра содамс
Пря кедь стяфты, ризфса шави тайнать.

Донна Анна.

Пря кедь стяфтыть? Тинь монь мучендатада.
Мон сембень кельган содцемс — азость мезь?
И коданя тинь аердамасть монь?
Мон ашень содце тинь — монь аш и ашельхть
Врагоневек. Аньцек мирдень шавизе
Врагозевек.

Дон Гуан (эсь пачканза).

Орадчневи тевськя.
Азость теень; павазфтома Дон Гуанть
Содасасть?

Донна Анна.

Ет шачень ашинь няендя.

Дон Гуан.

Тинь кирдьтяда лангозонза кяж сонь?

Донна Анна.

Честь закононц коряс. Няйса тинь ни
Ератада шарфтомс монь, Диего,
Кизефксонень эзда — эрь, отвечада...

Дон Гуан.

Мезе, к‘да васьфтелесть тинь Дон Гуанть?

Донна Анна.

Эста ба мон озафтолень пеель
Седиезонза злодейть.

Дон Гуан.

Ах, Донна Анна!
Коса пеельце тонь, вага мяштезе.

Донна Анна.

Диего, мезь тинь?

Дон Гуан.

Аф Диеган мон,
Мон Дон Гуанць.

Донна Анна,

О шкайняй! Аф Гуан,
Аф верондан.

Дон Гуан.

Мон Дон Гуан.

Донна Анна.

Аф правда.

Дон Гуан.

Мон шавонь мирдьцень, и аф пичедян
Тянь инкса — каендама ваймесон
Монь аш.

Донна Анна.

Мезь марян мон? Аф тон Гуанць,
Аф, аф — аф тон.

Дон Гуан.

Мон Дон Гуан и мон
Кельгтя тонь.

Донна Анна (празь).

Вай, косан? косан? ёньне
Шаракадсть, кудсь шары... праян...

Дон Гуан.

Менель!
Мезь мартонза сонь? мартот мезе, Анна?
Стяк, стяка, с‘ргозть, тонь Диегаце,
Тонь рабце праф пульзяда ингелет.

Донна Анна.

Кадомак, арт тяста (цють кулевиста),
Тон монь врагозят,
Тон нельгить кядьстон сембень, эрьяфсон
Мезьсь сембедонга...

Дон Гуан.

Ангел, шкайть созданияц!
Кода кельгат — ста и пандфтк монь кядьстон
Мувор шизень, мон учан тонь ингелет
Пульзяда прафста аньцек приказаньяцень:

Мярьк — кулан, мярьк — карман ваймень тарксемя
Тонь инксот аньцек...

Донна Анна.

Самай тя Гуанць.

Дон Гуан.

Аф правда ли — сон теенть азондфоль
Злодейкс и извергокс — о, Донна Анна —
Кулясь и пади афи прокс аф видя,
Сизеф совесть лангса лама кяжда,
Пади, афкукс пуромсь. Ламос улень мон
Развратть инь цебярь ученикоц, но
Ся пингть эзда, кода тинь мон няедязь,
Теень арам, ёфси шачень оду.
Мон тинь кельгезь кельган добродетельть
И васенцеда ингеленза сонь
Мянцян эсь т‘рнаты мон п‘лманжанень.

Донна Анна.

О, содца, куленьдиня, Дон Гуан
Мазы валса кортама пяк машты;
Сон авань сединь ёжу васькафтысь.
Тинь, кортайть, шкайдонга аф пельхтяда,
Аватнень развратонь тевти тарксемок.
Тинь ёфси демонтада. Мзяра ямбар
Авада тинь губондадя?

Дон Гуан.

Эздост тячимс киньгя ашень кельгендь.

Донна Анна.

И карман верондама, што Гуан
Васенцеда кармась афкукс кельгемя,
Што жертва од сон эздон монь аф веши!

Дон Гуан.

Мзярда б мон тинь васькафнемонт ёралень,
Виденцялень ли и азолень ся лемть,
Конань пилесонтка пчкялькс дялесть маря?
Тяда меле коса ни коварствась?

Донна Анна.

Кие содатядязь тинь? — но кода се
Ашесть пель тинь самантень, вдь тяса
Содаледязь тинь и улель пенте.

Дон Гуан.

Мезяма стамсь куломась? Свиданиянь
Таньцти фкя и аньцяй пингонянкса
Максса эряфозень апак каштордт мон!

Донна Анна.

Но кода меки теенть лисемс тяста?!

Дон Гуан (Сонь кядензон палсезь).

И пичедьтяда тинь та ямбар
Дон Гуанонь эряфканц кувалма!
Эста маряк аш тинь шкаень ваймесонт
Кяжень пандома ни, Донна Анна?

Донна Анна.

Ах к‘да маштолень мон сельмесон
Тинь афняемда! Но пингя явомска.

Дон Гуан.

Тага м‘зярда няйтяма?

Донна Анна.

Аф содаса.
Мзярда-мзярда.

Дон Гуан.

Ванды?

Донна Анна.

Коса?

Дон Гуан.

Тязк.

Донна Анна.

О, Дон Гуан, мон кода лафчан седис.

Дон Гуан.

Простиндаманксон мирнай палама...

Донна Анна.

Арт ни, пингя.

Дон Гуан.

Фкяня, кельме, мирнай.

Донна Анна.

Кодама тон педият! ця, вага сон,
Мезень калтыема тоса? Кяшть, Гуан.

Дон Гуан.

Прощай ина, та няемознок, ялганяй.
А!..           (Лиси и сувай ласькозь меки)

Донна Анна.

Мезь мартот? А!..

(Сувай командорть статуяц. Донна Анна
прай).

Статуясь.

Мон тердемати сань.

Дон Гуан.

О, шкайняй! Донна Анна!..

Статуясь.

Кадык сонь,
Аделаф сембе, Тон т‘рнат, Гуан?

Дон Гуан.

Мон? Аф. Мон тернихтень и радан,
Мес няйхтя тяса. Инжикс ульхть.

Статуясь.

Дай кядьцень.

Дон Гуан.

Вага... вага сон... О, калгода
Люпштамац кевень сонь десницанц! Нолдак,
Вай, нолдак, нолдак кядезень... Иман —
Имань, аделамань. О, Донна Анна!

(Ваяйхть тияксть пачка).

1936 к.

 

---