Колхозонь эряф/1933/07/Тядясь

Колхозонь эряф (1933), 7 № апрель ков edited by Шестов Н. С., Порватов Т. М. Тядясь by авторсь: Максим Горький, мокшекс ётафтозе: Черапкин, Иосиф Григорьевич

Колхозонь эряф. Мокшонь литературно-художественнай и общественно-политическай журнал. Нолдаец Сембе союзонь писателень Мокшэрзянь областень оргкомитець. Лисенди 6-це кизось эрь ковти кафксть. — 7 № апрель ков, 1933 к. — с. 13—19

 

М.  Горький.

---

„Мать“  романць  (Ушотксоц  1,  2,  3,  4,  5  и  6  номерга)

Мокшокс  йотафтозе  И.  Г.  Черапкинць

 

— Значит — сембонь мон лувондыне, Так. Улихть эсост аф шарьхкодеви вастт ули лишнай, — ну, коста ломаньць лама корхтай, сашендови теенза кемоньчка вал зря азомс...

Рыбин пеедезевсь, пеенза сонь акшетольхть, кемотольхть.

— Тоса — обысксь. А ся монь сядонга пяк ширезонт шарфтомань. Тонга, хохолськя, Николайгя — сембе пряньтень няфтесть...

Тяда меле теенза ашезь мушендов эрявикс валь, сон лоткась корхтамда, варжаксць вальмяти, эрьхнезень суронзон шрати.

— Штафтозь тинь тевоньтень, арьсеманьтень. Тон, кле, ваше благородие, тиеньтьк эсь тевцень, а минь карматама тиеньдемонза — миньценнеть. Хохолсь тожи пара алясь. Иляста кулхцондан мон, кода сон фабрикаса корхтай, ды арьсян — тянь аф люпштасак, аньцек смерьць сонь сяськсы. Сану ломаньць! Тон монь, Павол, верондасамак?

— Верондате! — прянь сюконяфтозь мярьксь Павол.

— Вага, ватт — тейне нильгемонь киза, монь кафксть сяда лама кизоне, комозьксть сяда лама няеньдень мон. Колма кизода ламос солдатокс аськолень, кафксть урьвеякшнень, фкесь кулось, омбоцеть кадыне. Кавказса уленьдень, духоборхнень (сектать) содасайне. Синь братья, эряфть аф кочкасазь, аф!

Тядясь кулхцондозе сонь тангоцта корхтаманц; пароль мялезонза, ладель няемс теенза, мес сась цьоранцты эряф ломань, и корхтай мархтонза, пта пря спавендафты. Но теенза пта няевсь, што Павел пта кяжиста корхтай инжить мархта, ды штоба кяжть синьдемс, сон кизефтезе Рыбинонь:

— Шять, ярхцамаце сась, Михал Иваноч?

— Спасиба, тядясь! Мон ужанань ни. Так ва мезе Павел, тон значит, арьсят, што эряфсь моли аф законц коря?

Павол стясь васцтонза ды кармась комнатава якама, а кядензон копорь фталонза путозень.

— Сон эсь лацонза видеста моли! — корхтась сон. — Вага, сон тонь вятензе ширезон панжадонь седи мархта. Минь, конат марнек векснон работахть, сон афламонь марс пуропнесамазь; сай пинге — сембонь марс пуропцамазь! Афпароньди, стакаста сон ладяф сембоньди тейнеск, но сонць жа панчсесыне сельмонкень эсь осал ширенц ланкс, соньць няфнесы ломаньти, кода молемац виияфтома.

— Видеце! — лоткафтозе сонь Рыбин. — Ломаньць эряви откстоптомс. Тазыяньдеряй ломаньць — вятьк сонь баняв, эшеляк, штак, шчафтт акша одежат лангозонза — пчкяй! Се стане? А кода ломаньць потма ширьде тазаста тиема? Вага мезе!

Павел кармась кяжиста ды тангоцта корхтама начальствать ланга, фабрикать кувалма, сень, кода границать тона бокса рабочахне эсь праваснон инкса тюрихть. Рыбин иляста эрьхнелезе сурса шрать, пта точкат путнесь. Аф весть сон пшкятькшнесь:

— Так!

И весть, пеетькстась, сетьмоняста мярьксь:

— Эх, одат тон! Аф пяк содасайть ломатьтнень!

Эста Павол лоткась каршезонза ды серьезнайста мярьксь:

— Аф карматама сянь ланга корхтама — кие од, кие сире! А ваттама лучи, кинь мяленза сяда видет.

— Значит, тонь корязт лисеньди, што шкайсонга минь васькафтомазь? Так. Монга стане, арьсян, щто минь религиянеке — фальшивай.

Тя йоткть шоворьсь корхтамазост тядяськя. Коста цьорац корхтась шкайть калга и сембонь нень кувалма, конань сон сотнелезень шкаеньди эсь верондаманць мархта, мезе теенза пяк питьниель и святоель, эста сон прокс вешелезе цьоранц варжакстоманц васьфтемс; сонь мялецоль эняльдемс цьоранцты, штоба сон афолезе кськоре сонь седиенц афверондамань оржа валса. Но афверондамать фтала теенза шарькотькшневсь вера, и се сонь седиенц озафнелезе.

— Коста—ни тейне шарьхкодемс сонь мялензон? — арьсекшнесь тядясь.

Теенза арам, Рыбиноньдинге, эряф ломаненьдиге тожи аф пархт марямс Паволонь валонза. Но коста Рыбин спокойна путозе Паволоньди эсь кизефксонц, изь кирьде седиец и, нюрьхкеняста, но виде мяльса сон мярьксь:

— Шкабавазть кувалма тинь сяда ванозне корхтада! Тиньцень — кода мяленьтте! — Ваймонь таргамок тага сяда кемоста сон корхтась: — а тейне сире ломаненьди, монь тоскавамасон аш мезь ланкс нажедемс ули, кда шкайтькя тинь моньцтон нельксасть!

Сельмонза валовсть сельмевеца. Соньць нарнезень посудатнень, трнацть суронза.

— Тон, тядяй, минь ашемасть шарьхкодь! — сетьмоняста мярьксь Павол.

— Тон миць простиндамасть, тядясь, — валомне и эчкста лездозе Рыбин ды пеетькстазь варжаксць Паволонь ланкс.

— Юкстайне мон, што тон сирять—ни сяньди, штоба тонь силькнень кярсемс...

— Мон корхтань, — лездозе Павол, — аф ся пара и милозю шкайть ланга, конаньди, тон верондат, а сень колга, конань мархта попне минь эвфнесамазь, кода байдекса, — се шкайть ланга конань лемонц мархта мяльсна кошардомс сембе ломатьтнень покориндафтомс осал мялезост...

— Вот так да! — пешкоць Рыбин, соньць шрать сурса эрьхтезе. — Синь шкайтькя тейнек полафтозь, синь сембонь, мезе кяцост, каршезонок латцесазь. Тон, тдясь, мяляфтк, шкайсь тиезе ломаньть эсь кодямонзокс эсь лацонза ащикс, — значит, сон ломаньть кодяма, кда ломаньць сонь кодямонза. А минь аф шкаень кодяптама, а дикай зверень. Церькавса тейнек пужала няфнихть... Полафтома шкайсь, тядясь, ароптома сон! Осалса, васькафнемаса сонь шчазь—карязь, колазь шаманц сон, штоба ваймоньконь минь шавомс!..

Сон корхтась сетьмоста, но эрь валоц праль тядять пряс, кода стака молатка, йожот машфтоль. Шамацка сонь, равжа сакалонь рамкаса, оцю, лажназь ащи эвфнезе тядять. Шобда сельмонзон вандолдомасна афкирьдемшкатольхть, сон кепсесь седиса мезень бди пелема.

— Мон, ина лучи туян! — пшкяць тядясь, соньць атказазь прянц шуказе. — Нень кулхцондомсь — аш монь виезе!

Ды эрязта тусь кухняв, а мельганза Рыбинонь валонза:

— Вот, Паволь! Аф пряса, а седиса — ушеткшнесь! Ули ломаньть ваймоса стама васта, конань эс мезевок иля аф касы.

— Аньцек йонць волякс ши максы ломаньти! — тангоцта мярьксь Павол.

— Йонць вий аф—максы, — каршезонза корхтась Рыбин кеме вайгяльса — седись вий макси, — аф прясь, вот!

Тядясь каряньфць ды маць пастелезонза апак озонттт. Теенза якшамоль и афпароль мялезонза. Рыбинга, конац инголи йонюста няевсь теенза, тени седистонза кепсесь кяж тень ланкска.

— Еретик! Смутян! — арьсесь тядясь, вайгяленц кулцондомбач, — Тожи, сась пяк эрявсь!

А сон корхтась вемоста и спокойнайнайста:

— Святой вастти шава аф ащема. Ся коса шкайсь эряй, — сярятьф васта. Праньдеряй сон ваймоста, сяряди васта иляць. Вот! Эряви, Павол од вера смекамс... эряви тиемс стама шкай, конац ломатьненьди другокс ащель!

— Вага — ульсь Христозсь! — пешкоць Павол.

— Христозсь седиге аф кемоль. Сявк мярьги, вакска эздодон сай терьпеньять. Кесарь — оцязорть признавал. Шкайсь не может признавать сянь, штоба фке ломань иля ломань ланкса азорондаль, сон — соньць марнек власьць. Сон ваймонц аф явонцы: тя — ломанень, те — шкаень... а сон — торгавамать инкса ащесь, урьвакс тумать—сявомать признавал. А смоковницать стак ащемда сюдозе, рази сод эсь воле изь касфта-шачфта? Ваймось тожи аф эсь воле пара тефть аф касфты, моньць штоли осалть видине сонь эзонза? Вот!

Комнатаса апак лотксек марявсть кафта вайгяльхть, конат шоворькшнесть и тюрьсть фке—фкень мархта, аськоляс Павол, киякссь чаторць сонь пильгалонза. Коста сон корхтась, сембе вайгельхне юмсесть сонь корхтамазонза, а коста спокойнайста и шуроста шюдесь Рыбинонь вайгялец, марявсь маятникть тостиемац, морозть чатордомац, конаць щюпазень кутть стенанзон — оржа кенжонзон мархта.

— Азса теть эсь лацон, кочегаркс: шкайсь — кода толсь. Так, эряй сон седиса. Мярькф — вал, а валсь—дух...

— Йонць! — тангоцта мярьксь Павол.

— Так! значит — шкайсь седиса ды йонца, а аф церькавса, церькавсь — калмоц шкайть...

Тядясь матодовсь, аф и марязе, кода тусь Рыбинць.

Но сон кармась сидеста сашенкшнема, а коста Паволонь ширеса ульсь кивок ялгадонза, Рыбин озаль уженяс ды афоль кашторда, аньцек иляст-иляста мярьголь

— Вот. Так!

А фке пинкть, ужеста шобда сельмоса семболанкс ванозь, сон кяжиста мярьксь:

— Эряви корхтамс сянь ланга, мезе ули тени, а мезе сай ся тейнек аф содаф, вот! коста нароць воляс мяни, эста сонць няйсы кода сяда лад. Лама ни сонь прясонза яцекшнесть стамода, мезе сон йофси ашезь вешенде саты! Катк сонць тевонзон кочакасыне. Может сон захочет сембонь йордамс, марнек эряфть и сембе наукатненьге, может сон няйсы, што сембе сонь каршезонза ладяфт, — кода, например, церковнай шкайсь. Тинь максост аньцек сонь кядезонза сембе книгатнень, а эста мльни сон соньцке отвечай. — Вот!

Но савоньдеряволь Павол ськамонза, синь эстокиге кярьмодельхть пефтеме спорямати, но спорямасна прокс ульсь спокойнай, и тядясь, тревожнайста кулхцондолезень синь валснон мяльснон, ваноль мельгаст, мялецоль шарьхкодемс мезе корхтахть синь, иляста теенза пта няевсь, што кели копорь, равжа алясь ды цьорац, стройнайсь ды кемось — кафцьке сокоргоцть. Ширьде—ширес син трхцыесазь нярьснон, лисема вешихть, сембе вастти кярьмотькшнихть кемя, но сокор кяцнон мархта, шукасазь сембонь, вастта-васц шашфнесазь кияксти прафнесазь, ды тапасазь прафнень пилькснон мархта. Сембонь варчсесазь, токсесазь и эстост йорясазь, но аф юмафнесазь надиямаснон ды верондамоснон...

Синь тонафтозь сонь, тядять смел и виде шиснон мархта страшнай валснон кулхцонодома, но не валхне афолезь кярсе седиенц сяшкава, кода васенда, — сон тонаць синь эсьтонза тутмиемост. А иляста шкайда атказай валхнень эшксста сон шарьхкотькшнесь кеме надияма и верондама сонь лангозонза. Эста сон пеедель салавань сетьме пеедемаса, сембонь простиндай пеедемаса и хоть Рыбин изь тушенда мялезонза, но кяж афоль сафта—ни.

Неделязонза весть сон каннель тюрьмав одежат ды книгат хохолти, весть макссть пинге васедемска мархтонза ды куду самок сон мяльвельде азонкшнезе:

— Сон тосонга — кода куца. Сембонь мархта ласковай, сембе мархтонза шутендахть. Афпара теенза, стака, а нефтемс сянь аш мялец...

— Стане и эряви! — приметазе Рыбин. — Минь сембе горясотама, кода кедь потмосотама, горе ваймокожфокс таргатама горяса шчафтама—каряфтама. Пря шнамс тяса аш мезьса. Аф сембонь ватьфть сельмосна, конат синць синь кончсесазь вот! А кда прявийфтемат — кирьтть...

XII

Серай, йолма куднясна Власофнень ков ши сядонга пек сельмос поволь Слоботкаса. Тя мяль повомаса пек ламоль пелезь ваномада и афшярьхкодеви кяжень кирьдемада, но няконь ваксса шаченц верондамань шири веляфты сунардомавок. Иляста сашенкшнель Паволоньди кодамовок ломань ды сей—тов ванондомбачк, корхталь Паволоньди:

— Ну—ка, тон книгат лувонкшнят, закоттне теть содафт. Вага, азонткать тейне тон...

И азондоль Паволоньди кодамовок осал, конанц сазе сон полициять или фабрикань администрациять ширьде. Коста тевсь пек сложнаель Павол макссель сермане ошу, теенза содаф адвокатоньди, а коста сафтоволь — соньць тевть орадолезе—азондолезе.

Валомне ломатьтне кармасть лац ванома од ломаньть, серьезнай алять, шири конац сембонь ланга корхтай шарьхкодевиста и смелста, сембонь ланкс ваномок, сембонь виде мяльс кулхцондомок, конат прокс тапаряфтольхть эрь тевть перьфке и прокс, сембоста муль кодама бди фкакс ащи, пефтеме сюреки, конац тьоженьца лувови сюлмоса сотнелезень ломатьтнень тангода кильгокшса.

Пяк содавикс—кельговикс ломаненьди арась Павол „болотнай копейкань“ мальдинк историяда меле.

Фабрикать фтала, почти шаролезе сонь наксада шинень канды сурксокс, таргавсь оцю шяй, лангаза кассть кузнят ды келунят. Кизонда ся шяйсь шинь фталь туста, тюжя шиньфса, а куроняти эстонза лиельхть тучань—туча сяськне, и видельхть маштыксса серядема. Болотась фабрикань лемса лувоволь, а од директорсь, йорась тяста польза сявомс, думандась косьфтамс се шяйть, а сияк сявомс эстонза торфть. Рабочахненьди сон азондозе, што тя тевсь шумбра шинь ванфтыкс тийсы вастть, лучи ули эрямась куроняса, мярьксь сембонь работама питьнеста эрь цалковайста кирьнемс тяфтень трьошнек ся шяйть косьфтамс.

Рабочахне кармасть тмашиндама. А сембода пяк кярозень синь седиснон се мес служащахнень кяцта се трьошнекть налокть изезе кирьне.

Се йоткшить, коста повфтазь директорть об‘явлениянц трьошнеконь кирьдемать кувалма, Паволонь ашель моцец; сон изезь работа и мезевок изь сода сень кувалма. Омбоце шиста, обетта меле, соньдиенза сась урядна атясь, Сизов—литейщиксь, мархтонза кяжи слесарьсь Махотин ды азондозь теенза директорть решениянц.

— Пуромоме минь, конат инда сиретне, — степенняйста корхтась Сизов, — корхтаме сень ланга и вага кучемазь минь ялганьке теть кизефнемот — кода тон мярьгат штоба директорти минь трьошнеконьконь вельде сяськнень марта воявамс?

— Арьсек! — пщкяць Махотин, сонцень пиньделцть тейненя сельмонза. — ниле кизот тяда инголе синь, жуликне, банянь строямс кочкасть. Колма тьожятть кафкса сятт цалковай кочкафоль. Косот синь? Баня аш!

Павол азондозе теест, што налоксь аф законц коря, азондозе тяса фабрикати выгодать тя тевста; кафкце синь кяжиста тусть. Прважамдоот меле, пеетькстазь, тядясь мярьксь:

— Ванат Паша, атятневок кармасть теть йоненкса сашендома.

Апак отвечак, седи ризф мархта Павол озась шрать ваксс ды кармась мезе—бди сьормадома. Афламос ащезь сон мярьксь тядяти:

— Энельдян теть, тядяй, арт ошу, макск те сьорманять...

— Те пелькс тев? — кизефтезе тядясь.

— Да; тоса тейнек печатлахть газета. Эряви штоба трьошнеконь историясь поволь газетас...

— Ну ну — пщкяць тядясь. — Мон тяниок...

Те васеньце поручениясель, конанц теенза максозе цьорац. Сон кенярьць, што сон видеста азозе теенза, мезьса тевсь — Мон тянь шарьхкоца, Паша! — корхтась сон одежань щамань йоткть. — Тяфта синь-ни грабахть! Кода ломаньть лемоц Егор Иваноч?

Сон сась куду илять позда, сизефста но пароль мялезонза.

— Сашенькать няине! — корхтась сон цьоранцты. — Поклон теть кучсь. А ся, Егор Иваночсь, стама пара ломаньць шутник! Пеетьфтезь корхтай.

— Монь пара седиезон мес синь тусть мялезт! — сетьмоняста пшкяць Павол.

— Простохть ломатьтне, Паша! Пара ся, коста ломатьтне простойть! И сембе тонь кельктядязь...

Понедельникста Павол тага изь моль работама, сонь сяряць пряц. Но обед йоткть ласьксь Мазин Федя соньць кенярьтьф, ваймоц аф тельги потмозонза, сизезь, корхтай:

— Адя! Марнек фабрикась кепоць. Инксот кучемазь. Сизов ды Махотин корхтахть, што тон сембода лац азонцак тень. Меле лисеньди!

Павол апак корхтак кармась одежанц шчама.

— Аватьне ласксть пжняхть!

— Монга молян! — мярьксь тядясь. — Мезе синь тоса ушецть? Молян мон!

— Арт! — пшкяць Павол.

Ульцява мольсть эрязта и апак корхтак. Тядять ваймоц потмозонза аф тялги и сон шарьхкотькшнезе, што сашенды оцю тев. Фабрикань ортатнень ланкса ащесь авань толпа, пешкоткшнезь сялонкшнесть. Коста синь колмонест йотасть фабрикань двору стразу повсть туста, равжа, кяжиста унай толпать йоткс. Тядясь няезе, што сембонь шамасна шарфтфт фке шири, кузнечнай цехть стенанц пяли, коса, ташта кшни мар ланкса ды якстерь кирьпицень эшксса, ащесть, синьць яфиезь кяцнон, Сизов, Махотин, Вялов ды тага ветешка эряф ломань сяда кельгови рабочайста.

— Власов сай! — пешкоць кие бди.

— Власов? Давай сонь сей...

— Сетьмода! — пешкоцть сразу лама вастова.

И коса—бди маласа марявсь Рыбинонь ровнай вайгялец:

— Аф трьошнекть инкса, а правдать инкса ащема. — Вот! Питьни тейнек аф минь трьошнеконьке, сон аф иляда покаряв, но — сон сяда стака, — сонь эсонза ломань верда пяк сяда лама, директорть цалковаенц коряс, — вот. И аф трьошнексь теинек ужяль, — вернеке, правдась — вот!

Валонза сонь пяярельть толпать ланкс и лифтельхть эстонза псиста пяшкоткшнемат:

— Видеце, Рыбин!

— Правдаце, кочегар!

— Власов сась!

Вайгяльхне глушиндакшнезь машинатнень стакаста возендамаснон, шиньфть стакаста куфкснеманц ды проводтнень кашторфснон и шоворькшнесть шумонь вихорькс. Сембе васцта Эрязта ласьксть ломатть, яфиезь кяцнон, крьвяснесть фке—фкень пси, оржа валса. Кажсь, конац прокс нувазь ащесь сизеф мяштева, сргозькшнесь анась лисема кенярьдезь лиеньць кожфса, ков пинге сяда келиста новлялезень шобда пацянзон, ков ащесь сяда пяк фатьнезень ломатьтнень сявоньдезень мельганза, тостиезень фке фкень мархта, тиеньдевсь кяжень ардомакс. Толпать вельксса якафць пулень ды качамонь туча, ливозьса валф шаматне палозь—палсьть шама кетьтне аварьцть равжа селмя веца. Шобда шамава вандолцть сельмотне, пиньделцть пейхне.

Тоза коса ащесть Сизов ды Махотин, эвондась Павол ды марявсь сонь кайги вайгялец:

— Ялгат!

Тядясь няезе, што шамац сонь лофташкац, трванзовок трнатыхть, сон апак стряндак кармась инголи шаштома, толпать явошнеме. Теенза кяженьбачк мярьгоньцть:

— Ков яцат?

Тутмиезь сонь. Но се ашезе лоткафне тядять; кенерь пакарьса ды лафтуса ломатьтнень сон явошнезень валомне шашць инголи, цьоранц малас, мялецоль арамс сонь ваксозонза.

А Павол, йордазе мяшцтонза валть, се валть конаньди сон путнель оцю мяль щарьхнодезе, што сонь горланц люпштазе боевой кенярьдемань элякодома сявозе сонь желание йордамс ломатьтненьди эсь седненц, конац палоль правданкса ащемаса.

— Ялгат! — тага мярьксь сон и савоньць ся валста вий кенярьдема, — минь — ня ломатьтне, конат строяхть фабрикат, церькафт, тиихть цюнзерхт ярмакт минь — ся живой вийсь, конац трясыне и кенярьфнесыне сембонь нюрямняста сявамок калмос молемс.

— Вот! — пешкоць Рыбин.

— Минь прокс и эрь васца — васеньцетнетяма тевса и мельдень васца эрямаса. Кия заботендай инксонок? Кинь мялец тейнек пара тиемс? Кие ломанькс лувсамазь? Кивок аф.

— Кивок аф! — марявсь кати кинь вайгялец.

Павол сединь озамок кармась корхтама сяда шарьхкодевиста спокойнайста толпась валомне нажетькшнесь малазонза сон пуромкшнесь шобда, тьожянь сельмоса ваны ронгокс. Сон ванць Паволонь шамас сядонь—сядонь лувови видеста ваны сельмоса, шокшезь—шокшезень валонзон!

— Тейнек аф муви пара мек сьнярс, мзярс минь аф аратама фке фкеньди ялгакс дугань семиякс, конань сотнесы не фке мяль, миньцень праванькень инкса тюремань мяль!

— Тон корхтак тевть кувалма! — кяжиста пшкяць кати кие тядять маласа.

— Тят шорьсе! — аф пяк кайгисте марявсть кафта вайгяльхть разнай васцта.

Качамса архтф шаматне сьормосевсть аф верондазь, кяжиста, кемонень кемонь лувови сельмотне ванцть Паволонь шамас серьезнайста, думандазь.

— Социалист, но — аф дурак! — пшкяць кати кие.

— Ух! Смелста корхтай. — тостядезе тядять лафтувонц, ды мярьксь сери, фкя сельмя рабочай.

— Сась пинге, ялгат, шарьхкодемс эряви, што кивок эсьтедонок башка аф посабляй тейнек! Фкясь сембонкса сембя фкять инкс — вага минь законнеке кда мяленьке вракть сяськомс.

— Тев азонды, цьорат! — пешкоць Махотин.

Ды келиста кяденц яфодемок, курмоштазе клоконц ды гразязь шукадезе.

— Эряви терьдемс директорсь! — корхтась Павол.

Толпать ланга пта вихрь йотась. Сон люкакаць, ды лама вайгяльса сразу пешкоць:

— Директорть сей!

— Депутатт кучемат инксонза.

Тядясь яцесь йнголи ды ванць цьоранц ланкс алуда вери, седиец кенярьтьфоль: Павол ащесь сире кельгови рабочахнень йоткса, сембе сонь кулхцондозь и согласиндакшнесть мархтонза. Сонь пароль мялезонза сявок, мес Павол аф кяжда, аф сялондозь корхтай кодане илятне.

Кода церахман кшни ланкс, пяярьсть пешкоткшнемат, сюцемат, кяжи валхт. Павол ванць ломатьтнень ланкс вярьде алу и вещеньць йоткстост, келептьф сельмоса мезе—бди,

— Депутатт кочакамт!

— Сизовонь!

— Власовонь!

— Рыбинонь! Сонь пеенза страшнахть!

Вдрук толпаса марявсть аф пяк пешкоды вайгяльхть:

— Соньць сай!

— Директорсь!..

Толпась явовсь, макссь ки сакалне мархта, кувака шама, сери ломаньти.

— Позвольте! — мярьгоньць сон, аерфнезень рабочахнень эсь кинц ланкста нюрьхкеняста кядень яфиемаса, но кяденза теест исть токсе. Сельмонза сонь коньчт ащесть, и содай азоронь сельмоса сон ванць щупазь рабочахнень шамас. Сонь инголенза валхнезь вазьснон, сюконякшнесть теенза, сон мольсь поклоттнень каршес апак отвечак и видеста толпать йоткс сетьмома, визьделгодома виноватайста пеетькснема и аф пяк вайгелюста пешкоткшнема, конань эса марявсь идень каендама, конат шарьхкодезь, што синь аф лац коленьцть.

Вага сон йатась тядять вакска, нафтольцть сельмонза сонь шаманц ланга, лоткась кшни марть инголи. Кие-бди вярьде венептезе теенза кяденц — сон ашозе кунда ронгонь вииста яфодезь куцсь вяри, арась Паволонь ды Сизовонь инголи ды кизефць:

— Тя — мезень пуромкс? мяс кадость работоманьтень?

Аф ламос, ашель кашт моли, Ломатьтнень прясна качандаст кода розьбрят. Сизов яфодезе велькссонза картузонц, пуврязень лафтувонзон, ды нолдазе прянц.

— Мон кизефнетядязь? — пешкоц директорсь

Павол арась ваксозонза ды пяшксень вайгяльхть мярькс, а соньць няфнесь Сизовонь ды Рыбинонь ланкс:

— Минь колмонек кучомазь азома штоба тон полафтолить распоряженияцень трьошнеконь сявоньдемать кувалма

— Мес стане? — кизефць директорсь Паволонь ланкс апак ватт.

— Минь лувонцаськ тяфтама налокть ланкстонок аф пароньди! — оцю вайгяльхть мярьксь Павол.

— Тинь кода стане, монь се мяльстон мес йорасан косьфтамс болотать, няхтяда аньцек мяль кода ба рабочахнень экплоатировандамс, а аф забота синь эрямаснон петемать инкса? Да?

— Да — отвечась Павол.

— Тонга станяк арьсят? — кизефтезе директорсь Рыбинонь.

— Сембе фкакс! — отвечась Рыбин.

— А тон, пара ломань? — кизефтезе директрсь Сизовонь.

— Да монга эняльдянь: тон—ни катк трьошнеконькень эсьтинек!

Ды, тага прянц сюкняфтомок, Сизов виноватайста пеетькстась.

Директорсь аф эряскодозь ванондозе толпать, шумордазень лафтувонзон, тоса пта варчсезь ванозе Паволонь ды мярьксь теенза:

— Няемас коря тон интеллигентнай ломанят — неужели тага аф шарьхкоцак паронц ся тевть?

Павол пящксень вайгяльхть отвечась:

— Косьфтаньдерясы фабрикась болотать эсь ярмаконзон ланкс — сень сембе шарьхкоцазь!

— Фабрикась сускопт аф явонкшни! — коськста отвечась директорсь. — Мон приказываю сембоньди тенийок арамс работама!

Ды кармась алу валгома, пильгонц мархта варчсезень кшнитнень и киньгя ланкска изь ван.

Толпаса кармась марявома аф довольнай шумнама.

— Мезе?—кизефць директорсь, лоткамок.

Сембе лоткасть шумнамда, аньцек коста бди фширеста марявсь вайгяль:

— Работак тоньць!,.

— Кеветие минутада меле арафтерятада работама — мярьган сьормадомда сембонь ланкс штраф! — коськста и сембоньди марявиста мярьксь директорсь.

Соньць тага тусь толпать пачк, но тяни сонь мельганза мольсь глухой роптандама, и ков сяда ичкози тушенць сонь ронгоц, сядонга пяк кепсесть вайгяльхне.

— Корхтак мархтонза сонь!

— Вот и прават теть! Эх, эряманя... — шарфнесть Паволонь шири, пешкоткшнесть теенза:

— Эй, законник, месть тяни тиеньдема?

— Корхтать, корхтать тон, а сась сон ды сембонь нардазень!

— Ну—ка Власов, месть тяни тиеньдема?

Коста кармасть сяда пяк пешкоткшнеме, Павол мярьксь:

— Мон, ялгат, мярьголень йордамс работамать снярс, мзярс аф атказахть минь трешнеконьконь сявоньдемда...

Кармасть комотьнеме эрек валхт:

— Муть дуракт!

— Стачка?

— Трьошнеконкса аньцек!

— А мезе мльни? Ну, и стачка!

— Сембонь сянкса сялдаз ланга...

— А кие работама кармай?

— Мувихть!

— Иудат.

(Кармай молема)

 

 

Чамзинкань райононь „Од ки“ колхозса тийсть од куд, коса работай колхозонь прав-
лениясь, клубсь, парт‘ячейкась и ст. тов.

 

This is a translation and has a separate copyright status from the original text. The license for the translation applies to this edition only.
Original:
Translation: