Кодлы колӧны ен праздникъяс
| Кодлы колӧны ен праздникъяс (1925) |
| Гижан кад: 1925, Йӧзӧдан во: 1925. Ӧшмӧс: Коми сикт (1925-04-17) |
Мый тшӧктӧ уджалысь йӧзӧс енлы эскӧм?
Мый вӧсна лӧсьӧдӧма ен праздникъяс?
Колӧны-ӧ уджалысь йӧзлы ен праздникъяс?
Колӧ-ӧ «ЫДЖЫД ЛУН»?
Ноко, крестьянин, лыддьы тайӧ гижӧдсӧ да бурджыка мӧвпышт.
Енлы эскӧм (веруйтӧм) сӧмын пемдӧдӧ вежӧрсӧ уджалысь йӧзлысь. Религия (енлы эскӧм) тшӧктӧ уджалысь йӧзӧс кывзыны да сетчыны капиталистъяслы да помещикъяслы. Кӧть кутшӧм сикас религия — ставныс найӧ тшӧктӧны йӧзӧс лоны рабъясӧн.
Быдсикас енлы веруйтысь йӧзлӧн эмӧсь асланыс попъяс: православнӧй поп, еврейяслӧн поп, мусульманаяслӧн поп, сідз водзӧ. Став попыс чуксалӧны йӧзӧс, медым найӧ сетчасны увтыртӧмлы, дзескӧдӧмлы, медым кивыль оз керны, медым оз шуасьны господаяс вылӧ (господаясыс — капиталистъяс да помещикъяс). Став сьӧкыда олӧмсьыс, дзескӧдӧмсьыс му вылын попъяс кӧсйысьӧны сетны бур олӧм райын, небесаын.
Попъясӧн отсалӧмӧн капиталистъяслы да помещикъяслы кокни вӧлі кутны ас кианыс уджалысь йӧзӧс, нартитчыны на вылын, найӧ сьылі вылын иславны. Сы пыдди ӧд попъясыдлы капиталистъяслӧн да помещикъяслӧн государствоясыс эз этша мынтывлыны сьӧмтӧ (дай ӧні на мынтӧны).
Медым енлы эскӧмыс пыр ӧтарӧ вӧлі, эз кус эськӧ, медым пыр казьтывны енмӧс, бурлунсӧ да лёклунсӧ енлысь, быд религиялӧн эмӧсь асланыс праздникъяс. Уна зэв сэтшӧм праздникыс. Эмӧсь гырысь праздникъяс, эмӧсь шӧркоддьӧмъяс, эмӧсь посньыдъяс, эмӧсь зэв посньыдикъяс. Быд сэтшӧм праздник лунъясӧ енлы эскысьяс торъя нин ёна кевмӧны енлы, корӧны сылысь му вылын олігӧн дай небесаӧ «локтігкежлӧ» милӧсьт.
Православнӧй религияын праздникъяс пиысь медыджыдыс — паска (коми йӧз «Ыджыд лунӧн» и шуӧны). Став сямыс паскаыслӧн да молитваясыс сэки («Кристослӧн мучитчӧмыс да ловзьӧмыс») тшӧктӧны эскысь йӧзлы Кристос моз жӧ мучитчыны, сы моз жӧ прӧститавны врагъяслы. Сы пыдди «небесаын кокньӧд сетсяс пӧ».
Сардырся правительство зэв лэптысьліс, ёна празднуйтліс дай тшӧктыліс празднуйтны паскатӧ. Попъяс вичкоясын чуксавлісны йӧзӧс «мучитчӧм да ловзьӧм Кристос» нимӧн кывзыны власьтлысь, терпитны сылысь топӧдӧмсӧ-увтыртӧмсӧ.
Колӧ-ӧ ӧні став сикас ен праздниксӧ празднуйтны? Колӧ-ӧ празднуйтны паска, коді тшӧктӧ уджалысь йӧзлы му вылын «небесаын рай сетӧм» пыдди терпитны?
Дерт, оз. Ми кыссям югыдлань, ас киӧн лӧсьӧдам олӧмнымӧс, ми зілям мездысьны енлы эскӧмысь дзикӧдз.
Енлы эскӧм пемдӧдліс, пемдӧдӧ уджалысь йӧзӧс, ен праздникъяс — отсалӧны пемдӧдны, содтӧны пемыдлунсӧ.
В. Бр-н.
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- it was anonymously published before January 1, 1954 (more than 70 years ago).
This work is in the public domain in the United States because it was published before January 1, 1929 (more than 95 years ago).
This anonymous or pseudonymous work is also in the public domain in other countries and areas where the copyright term of anonymous or pseudonymous works is 98 years or less since publication.
Public domainPublic domainfalsefalse